Magpatalinghog sa Ginaingon sa Espiritu!

“Ang adunay igdulungog magpatalinghog sa ginaingon sa espiritu ngadto sa mga kongregasyon.”—PINADAYAG 3:22.

1, 2. Unsang tambag ang gisubli maylabot sa mga mensahe ni Jesus ngadto sa pito ka kongregasyon nga gihisgotan sa Pinadayag?

ANG mga alagad ni Jehova kinahanglang mamati sa inspirado-sa-espiritu nga mga pulong ni Jesu-Kristo ngadto sa pito ka kongregasyon nga gihisgotan diha sa basahon sa Bibliya sa Pinadayag. Sa pagkatinuod, ang matag usa niining mga mensahea naundan niining tambaga: “Ang adunay igdulungog magpatalinghog sa ginaingon sa espiritu ngadto sa mga kongregasyon.”—Pinadayag 2:7, 11, 17, 29; 3:6, 13, 22.

² Nahisgotan na nato ang mga mensahe ni Jesus ngadto sa mga manulonda, o mga magtatan-aw, sa Efeso, Smirna, ug Pergamo. Sa unsang paagi kita makabenepisyo sa giingon sa balaang espiritu ngadto sa upat pa ka kongregasyon?

Ngadto sa Manulonda sa Tiatira

 3. Asa nahimutang ang Tiatira, ug sa unsang produkto nga kini ilabinang nailado?

³ Ang “Anak sa Diyos” nagdayeg ug nagbadlong sa kongregasyon sa Tiatira. (Basaha ang Pinadayag 2:18-29.) Ang Tiatira (karon Akhisar) gitukod ubay sa sapa nga nag-agos ngadto sa Gediz (karaang Hermus) River sa kasadpang Asia Minor. Ang siyudad gibantog tungod sa daghang kinamot nga mga buhat sa arte. Ang mga tiggamag tina niini naggamit sa gamot sa tanom nga madder ingong tinubdan sa ilang gibantog nga eskarlata, o purpura. Si Lydia, kinsa nahimong Kristohanon panahon sa pagduaw ni Pablo sa Filipos sa Gresya, maoy “tigbaligyag purpura, sa siyudad sa Tiatira.”—Buhat 16:12-15.

 4. Tungod sa unsa nga gidayeg ang kongregasyon sa Tiatira?

⁴ Gidayeg ni Jesus ang kongregasyon sa Tiatira tungod sa iyang maayong mga buhat, gugma, pagtuo, pagkamainantoson, ug buluhaton diha sa ministeryo. Gani, ‘ang ilang ulahing mga buhat mas labaw pa kay sa mga nahauna.’ Apan, bisan pag maayo ang atong rekord, kinahanglang hatagan natog dakong pagtagad ang atong moralidad.

5-7. (a) Kinsa “kanang babaye nga si Jezebel,” ug unsay buhaton labot sa iyang impluwensiya? (b) Ang mensahe ni Kristo ngadto sa kongregasyon sa Tiatira motabang sa diyosnong mga babaye sa pagbuhat sa unsa?

⁵ Ang kongregasyon sa Tiatira nagtugot sa idolatriya, bakak nga pagtulon-an, ug seksuwal nga imoralidad. Diha sa ilang taliwala ang “babaye nga si Jezebel”—tingali usa ka pundok sa mga babaye nga may mga taras nga sama niadtong sa daotang Rayna Jezebel sa napulo-ka-tribo nga Gingharian sa Israel. Ang ubang mga eskolar nagsugyot nga ang ‘mga manalagnang babaye’ sa Tiatira misulay sa paghaylo sa mga Kristohanon sa pagsimba sa mga diyos ug diyosa sa pundok sa mga magpapatigayon ug sa pag-apil sa mga pista nga naglangkit ug paghalad ngadto sa mga idolo. Hinaot nga walay tinudlo-sa-kaugalingon nga manalagnang babaye ang maningkamot sa pagmaniobra sa uban diha sa modernong-adlaw nga Kristohanong kongregasyon!

⁶ ‘Iitsa ni Kristo ang babayeng si Jezebel ngadto sa higdaanag masakiton, ug kadtong nagapanapaw uban kaniya ngadto sa dakong kasakitan, gawas kon sila maghinulsol sa iyang mga buhat.’ Ang mga magtatan-aw dili gayod magpadala sa maong daotang pagtulon-an ug impluwensiya, ug walay Kristohanon ang angayng mohimog espirituwal ug pisikal nga pagpakighilawas o makigbahin sa idolatriya aron lang mahibaloan nga ang “lawom nga mga butang ni Satanas” daotan gayod. Kon magpatalinghog kita sa pasidaan ni Jesus, ‘makuptan nato pag-ayo ang atong nabatonan,’ ug ang sala dili modominar kanato. Tungod kay ilang gisalikway ang dili-diyosnong mga buhat, kaulag, ug mga tumong, ang nabanhawng mga dinihogan makadawat ug “awtoridad ibabaw sa mga nasod” ug moduyog kang Kristo sa pagdugmok kanila. Ang modernong-adlaw nga mga kongregasyon adunay simbolikong mga bituon, ug ang mga dinihogan hatagan sa “mahayag nga bituon sa kabuntagon,” ang Pamanhonon, si Jesu-Kristo, sa dihang sila banhawon ngadto sa langit.—Pinadayag 22:16.

⁷ Ang kongregasyon sa Tiatira gipasidan-an nga dili tugotan ang daotang impluwensiya sa mga babayeng apostata. Ang inspirado-sa-espiritu nga mga mensahe ni Kristo ngadto sa kongregasyon motabang sa diyosnong mga babaye sa paghupot sa ilang tinudlo-sa-Diyos nga dapit karon. Dili sila mosulay sa pagpasundayag ug awtoridad ibabaw sa mga lalaki ug dili maghaylo ni bisan kinsang igsoong lalaki nga mohimog espirituwal o pisikal nga pagpakighilawas. (1 Timoteo 2:12) Hinunoa, ang maong mga babaye maghatag ug panig-ingnan diha sa maayong mga buhat ug sa pag-alagad alang sa kadayeganan sa Diyos. (Salmo 68:11; 1 Pedro 3:1-6) Kon bantayan sa kongregasyon ang nabatonan niini—putli nga doktrina ug panggawi ug gipabilhang pag-alagad sa Gingharian—si Kristo moabot dala ang maanindot kaayong mga ganti, dili kalaglagan.

Ngadto sa Manulonda sa Sardis

 8. (a) Diin nahimutang ang Sardis, ug unsa ang pipila ka detalye bahin niini? (b) Nganong ang kongregasyon sa Sardis nagkinahanglan ug tabang?

⁸ Ang kongregasyon sa Sardis nagkinahanglan ug dinaliang tabang tungod kay kini patay sa espirituwal. (Basaha ang Pinadayag 3:1-6.) Nahimutang mga 50 kilometros sa habagatan sa Tiatira, ang Sardis maoy mauswagong siyudad. Ang komersiyo, pagkatabunok sa maong dapit, ug ang paggama ug delana nga panapton ug mga alpombra nakatabang sa paghimo niana nga usa ka adunahan nga siyudad nga kanhi dihay 50,000 ka molupyo. Sumala sa historyano nga si Josephus, ang Sardis dihay dakong Hudiyohanong komunidad sa unang siglo W.K.P. Lakip sa mga gun-ob sa siyudad mao ang usa ka sinagoga ug templo sa diyosa sa Efeso nga si Artemis.

 9. Unsay angayng buhaton kon ang atong mga kalihokan sa pag-alagad wala ra sa buot?

⁹ Giingnan ni Kristo ang manulonda sa kongregasyon sa Sardis: “Nahibalo ako sa imong mga buhat, nga ikaw nagbaton sa ngalan nga ikaw buhi, apan ikaw patay.” Komosta kon kita dunay reputasyon nga nagmata sa espirituwal apan kasagaran wala kita magtagad sa Kristohanong mga pribilehiyo ug ang atong mga kalihokan sa pag-alagad wala ra sa buot ug sa espirituwal nga paagi “hapit nang mamatay”? Nan kinahanglang ‘magpadayon kita sa paghinumdom kon sa unsang paagi atong nadawat ug nadungog’ ang mensahe sa Gingharian, ug kinahanglang buhion nato pag-usab ang atong mga paningkamot diha sa sagradong pag-alagad. Kinahanglang magsugod na kita sa pagpakigbahin nga kinasingkasing diha sa Kristohanong mga tigom. (Hebreohanon 10:24, 25) Gipasidan-an ni Kristo ang kongregasyon sa Sardis: “Gawas lamang kon ikaw momata, ako moanha ingon sa usa ka kawatan, ug dili mo gayod mahibaloan kon unsang taknaa ako moanha kanimo.” Komosta sa atong adlaw? Sa dili madugay kinahanglan kitang manubag.

10. Bisan sa situwasyon nga sama nianang sa Sardis, unsay kahimtang sa pipila ka Kristohanon?

¹⁰ Bisan sa situwasyon nga sama nianang sa Sardis, duna tingaliy pipila nga ‘wala maghugaw sa ilang panggawas nga mga besti ug kinsa makalakaw uban kang Kristo nga magbesti ug puti, tungod kay sila takos niini.’ Sa tanang panahon, mailhan sila ingong mga Kristohanon, nga nagpabiling wala mahugawi, walay moral ug relihiyosong lama gikan niining kalibotana. (Santiago 1:27) Busa, si Jesus ‘dili gayod magapapas sa ilang ngalan gikan sa basahon sa kinabuhi, hinuon pagailhon niya sila atubangan sa iyang Amahan ug sa mga manulonda.’ Kay gipahayag nga takos nga magalakaw uban kang Kristo, ang iyang pangasaw-onong matang sa mga dinihogan mabestihan sa magilakon, hinlo, pino nga lino nga nagsimbolo sa matarong nga mga buhat sa mga balaan sa Diyos. (Pinadayag 19:8) Ang maanindot nga mga pribilehiyo sa pag-alagad nga nagpaabot kanila sa langit nagdasig kanila sa pagdaog niining kalibotana. Ang mga panalangin giandam usab alang niadtong makadawat ug walay kataposang yutan-on nga kinabuhi. Ang ilang mga ngalan nasulat usab sa basahon sa kinabuhi.

11. Unsay angay natong buhaton kon kita giduka na sa espirituwal?

¹¹ Walay mausa kanato nga gustong mahiagom sa makapasubong espirituwal nga kahimtang sa kongregasyon sa Sardis. Apan komosta kon maila nato nga kita giduka na sa espirituwal? Kinahanglan kitang molihok dayon alang sa atong kaugalingong kaayohan. Ibutang ta nga kita nahaylo sa dili-diyosnong mga dalan o dili na regular sa pagtambong sa tigom o sa pagsangyaw. Mangayo kita sa tabang ni Jehova diha sa kinasingkasing nga pag-ampo. (Filipos 4:6, 7, 13) Ang adlaw-adlaw nga pagbasa sa Bibliya ug pagtuon sa Kasulatan ug sa mga publikasyon sa “matinumanong piniyalan” makatabang sa pagpabiling nagtukaw sa espirituwal. (Lucas 12:42-44) Nan mahisama kita niadtong anaa sa Sardis nga giuyonan ni Kristo, ug mahimo kitang panalangin sa mga isigkamagtutuo.

Ngadto sa Manulonda sa Filadelfia

12. Unsaon nimo paghubit ang relihiyosong situwasyon sa karaang Filadelfia?

¹² Gidayeg ni Jesus ang kongregasyon sa Filadelfia. (Basaha ang Pinadayag 3:7-13.) Ang Filadelfia (karon Alasehir) mao ang mauswagong sentro sa tiggamag-bino nga rehiyon sa kasadpang Asia Minor. Gani, ang pangunang diyosdiyos niini mao si Dionysus, ang diyos sa bino. Dayag nga ang mga Hudiyo sa Filadelfia wala molampos sa pagdani sa Hudiyong mga Kristohanon didto sa pagpadayon pagbuhat sa pipila ka mga tulumanon sa Moisesnong Balaod o sa pagbuhat pag-usab niana.

13. Sa unsang paagi gigamit ni Kristo ang “yawi ni David”?

¹³ Si Kristo “adunay yawi ni David,” ug gipiyalan siya sa tanang intereses sa Gingharian ug sa pagdumala sa panimalay sa pagtuo. (Isaias 22:22; Lucas 1:32) Gigamit ni Jesus ang maong yawi sa pagbukas sa mga kahigayonan ug mga pribilehiyo sa Gingharian alang sa mga Kristohanon sa karaang Filadelfia ug sa ubang dapit. Sukad sa 1919 gibutang niya atubangan sa “matinumanong piniyalan” ang “usa ka dakong pultahan” nga nagatultol ngadto sa pagsangyaw sa Gingharian nga walay bisan kinsang magsusupak nga makasira. (1 Corinto 16:9; Colosas 4:2-4) Siyempre, ang pultahan ngadto sa mga pribilehiyo sa Gingharian gisira niadtong sakop sa “sinagoga ni Satanas,” kay sila dili espirituwal nga mga Israelinhon.

14. (a) Unsang saad ang gihatag ni Jesus sa kongregasyon sa Filadelfia? (b) Sa unsang paagi kita dili mahulog panahon sa “takna sa pagsulay”?

¹⁴ Gisaaran ni Jesus ang mga Kristohanon sa karaang Filadelfia ug sama niini: “Tungod kay gibantayan mo ang pulong bahin sa akong paglahutay, ako usab magaamping kanimo gikan sa takna sa pagsulay, nga moabot sa tibuok gipuy-ang yuta.” Ang pagsangyaw nagkinahanglan sa matang sa paglahutay nga gipakita ni Jesus. Wala gayod siya magpadala sa kaaway kondili nagpadayon sa pagtuman sa kabubut-on sa iyang Amahan. Busa, si Kristo nabanhaw ngadto sa walay-kamatayon nga langitnong kinabuhi. Kon mobarog kitang malig-on sa atong desisyon nga mosimba kang Jehova ug atong paluyohan ang Gingharian pinaagi sa pagsangyaw sa maayong balita, dili kita mahulog panahon sa presenteng yugto sa pagsulay, ang “takna sa pagsulay.” ‘Panguptan nato pag-ayo ang atong nabatonan’ gikan kang Kristo pinaagi sa pagpanglimbasog nga mapauswag kanang maong mga intereses sa Gingharian. Ang pagbuhat niini moresulta sa bililhon kaayong langitnon nga purongpurong alang sa mga dinihogan ug walay kataposang yutan-on nga kinabuhi alang sa ilang maunongong mga kauban.

15. Unsay gikinahanglan niadtong mahimong ‘mga haligi sa templo sa Diyos’?

¹⁵ Si Kristo midugang: “Siya nga magmadaogon—himoon ko siya nga haligi diha sa templo sa akong Diyos, . . . ug isulat ko diha kaniya ang ngalan sa akong Diyos ug ang ngalan sa siyudad sa akong Diyos, ang bag-ong Jerusalem nga manaog gikan sa langit gikan sa akong Diyos, ug ang akong bag-ong ngalan.” Ang dinihogang mga magtatan-aw kinahanglang magbayaw sa matuod nga pagsimba. Kinahanglang magpabilin sila ingong kuwalipikadong mga membro sa “bag-ong Jerusalem” pinaagi sa pagsangyaw sa Gingharian sa Diyos ug pagpabiling hinlo sa espirituwal. Gikinahanglan kini kon buot nilang mahimong mga haligi sa hinimayang langitnong templo ug kon sila magdala sa ngalan sa siyudad sa Diyos ingong langitnong mga lungsoranon niini ug makigbahin usab sa ngalan ni Kristo ingong iyang pangasaw-onon. Ug, siyempre, kinahanglan nga ang ilang mga igdulungog “magpatalinghog sa ginaingon sa espiritu ngadto sa mga kongregasyon.”

Ngadto sa Manulonda sa Laodicea

16. Unsa ang pipila ka impormasyon bahin sa Laodicea?

¹⁶ Gibadlong ni Kristo ang tagbaw-na-sa-kaugalingon nga kongregasyon sa Laodicea. (Basaha ang Pinadayag 3:14-22.) Mga 150 kilometros sa sidlakan sa Efeso ug nahimutang sa gitagboan sa pangunang mga ruta sa pamatigayon sa tabunok nga walog sa Lycus River, ang Laodicea maoy usa ka mauswagon kaayong siyudad sa mga pabrika ug maoy sentro sa panalapi. Ang mga besti nga gigama gikan sa itom nga delana sa maong rehiyon nabantog kaayo. Kay didto nahimutang ang inilang eskuylahan sa medisina, lagmit ang Laodicea maoy naggama sa tambal sa mata nga nailhan ingong Prigianhong polbos. Si Asclepius, usa ka diyos sa medisina, maoy usa sa pangunang mga diyosdiyos sa siyudad. Morag daghang Hudiyo ang namuyo sa Laodicea, ang uban kanila maoy mga adunahan kaayo.

17. Nganong gibadlong ang mga taga-Laodicea?

¹⁷ Nakigsulti sa kongregasyon sa Laodicea pinaagi sa “manulonda” niini, si Jesus nagsulti nga may awtoridad ingong “ang matinumanon ug matuod nga saksi, ang sinugdan sa kalalangan sa Diyos.” (Colosas 1:13-16) Ang mga taga-Laodicea gibadlong tungod kay sila “dili bugnaw ni init” sa espirituwal. Tungod kay sila dagaang, igasuka sila ni Kristo. Dili sila malisdan sa pagsabot sa maong punto. Ang kasikbit nga Hierapolis may mga tubod, ug ang Colosas may bugnaw nga tubig. Apan, tungod kay ang tubig kinahanglang ipaagi sa tubo paingon sa Laodicea nga layolayo pa ang distansiya, lagmit dagaang na kini inig-abot sa siyudad. Sa dili pa kini makaabot sa siyudad, kini moagi sa usa ka kanalkanal. Sa duol na kini sa Laodicea, kini moagi sa linungagan nga mga bloke sa bato nga gisemento aron magtapot.

18, 19. Sa unsang paagi ang modernong-adlaw nga mga Kristohanon nga sama niadtong anaa sa Laodicea matabangan?

¹⁸ Ang mga tawo karon nga sama sa mga taga-Laodicea dili makapadasig ang kainit ni makaparepresko ang kabugnaw. Sama sa dagaang nga tubig, igasuka sila! Dili gusto ni Jesus nga sila himoong iyang mga tigpamaba, ingong dinihogang “mga embahador kapuli ni Kristo.” (2 Corinto 5:20) Gawas kon sila maghinulsol, mawad-an sila sa ilang pribilehiyo ingong mga magmamantala sa Gingharian. Ang mga taga-Laodicea nagtinguha sa yutan-ong mga bahandi ug ‘wala mahibalo nga sila alaot, makaluluoy, kabos, buta, ug hubo.’ Aron mawala ang ilang espirituwal nga pagkakabos, pagkabuta, ug pagkahubo, si bisan kinsa nga sama kanila karon kinahanglang mopalit gikan kang Kristo sa ‘dinalisay nga bulawan’ sa sinulayang pagtuo, “maputing panggawas nga mga besti” sa pagkamatarong, ug “banyos-sa-mata” nga nagpaarang-arang sa espirituwal nga panan-aw. Ang Kristohanong mga magtatan-aw malipay nga motabang kanila nga mahimong mahunahunaon sa ilang espirituwal nga panginahanglan aron sila mahimong “dato sa pagtuo.” (Santiago 2:5; Mateo 5:3) Dugang pa, kinahanglang tabangan sila sa mga magtatan-aw sa paghidhid sa espirituwal nga “banyos-sa-mata”—sa pagdawat ug pagpahiuyon sa mga pagtulon-an, tambag, panig-ingnan, ug tinamdan ni Jesus. Kini maoy tambal batok sa ‘tinguha sa unod ug sa tinguha sa mga mata ug sa mapagawalong pagpasundayag sa mga kahinguhaan sa kinabuhi sa usa.’—1 Juan 2:15-17.

¹⁹ Si Jesus nagabadlong ug nagadisiplina niadtong tanan nga iyang gimahal. Ang mga magtatan-aw nga ilalom kaniya kinahanglang mobuhat sa susamang butang uban ang kalumo. (Buhat 20:28, 29) Ang mga taga-Laodicea kinahanglang “magmasiboton ug maghinulsol,” nga magbag-o sa ilang hunahuna ug paagi sa pagkinabuhi. Aw, ang uban ba kanato naanad na sa estilo sa kinabuhi nga naghimo sa atong sagradong pag-alagad sa Diyos nga dili na kaayo hinungdanon sa atong kinabuhi? Nan ‘mopalit kita ug banyos-sa-mata gikan kang Jesus’ aron makita nato ang kahinungdanon sa masibotong pagpangita pag-una sa Gingharian.—Mateo 6:33.

20, 21. Kinsay hustong misanong sa dihang si Jesus ‘nanuktok’ karon, ug unsay ilang mga palaaboton?

²⁰ “Tan-awa!” nag-ingon si Kristo, “Ako nagabarog sa pultahan ug nagapanuktok. Kon may magpatalinghog sa akong tingog ug magbukas sa pultahan, ako mosulod sa iyang balay ug manihapon uban kaniya ug siya uban kanako.” Si Jesus subsob nga naghatag ug espirituwal nga instruksiyon samtang siya nagkaon. (Lucas 5:29-39; 7:36-50; 14:1-24) Karon nanuktok siya sa pultahan sa kongregasyon nga sama sa Laodicea. Ang mga membro ba niini mosanong sa iyang pagtuktok, magbuhi pag-usab sa ilang pagmahal kaniya, mag-abiabi kaniya sa ilang taliwala, ug magpatudlo kaniya? Kon mao, si Kristo mokaon uban kanila alang sa ilang dakong espirituwal nga kaayohan.

²¹ Ang “ubang mga karnero” karon mahulagwayong nagpasulod kang Jesus, ug ang maong buhat motultol ngadto sa walay kataposang kinabuhi. (Juan 10:16; Mateo 25:34-40, 46) Sa matag usa ka dinihogan nga nagmadaogon, ihatag ni Kristo ang pribilehiyo nga ‘molingkod uban kaniya sa iyang trono, maingon nga siya usab nagmadaogon ug milingkod uban sa iyang Amahan diha sa Iyang trono.’ Oo, ngadto sa dinihogang mga mananaog, si Jesus nagsaad ug dakong ganti nga molingkod sa trono uban kaniya diha sa tuong kamot sa iyang Amahan didto sa langit. Ug ang nagmadaogon nga ubang mga karnero magpaabot sa maanindot nga dapit dinhi sa yuta ilalom sa pagmando sa Gingharian.

Mga Leksiyon Alang Kanatong Tanan

22, 23. (a) Sa unsang paagi ang tanang Kristohanon makabenepisyo sa giingon ni Jesus ngadto sa pito ka kongregasyon? (b) Unsay determinado natong buhaton?

²² Walay duhaduha nga ang tanang Kristohanon makabenepisyo ug dako sa giingon ni Jesus ngadto sa pito ka kongregasyon sa Asia Minor. Pananglitan, kay nakamatikod nga si Kristo naghatag ug angayang pagdayeg, ang mahigugmaon nga Kristohanong mga ansiyano matukmod sa pagdayeg sa mga indibiduwal ug mga kongregasyon nga maayo ang espirituwalidad. Diin naglungtad ang mga kahuyangan, ang mga ansiyano motabang sa mga isigkamagtutuo sa paggamit sa Kasulatanhong mga tambal. Kitang tanan makapadayon sa pagbatog kaayohan gikan sa lainlaing mga bahin sa tambag nga gihatag ni Kristo ngadto sa pito ka kongregasyon, basta ipadapat nato kini uban ang kinasingkasing nga pag-ampo ug sa walay langan.a

²³ Kining kataposang mga adlaw dili maoy panahon sa pagkatagbaw na sa kaugalingon, sa materyalismo, o sa bisan unsa nga magtukmod kanato sa pag-alagad sa Diyos nga wala sa buot. Busa hinaot nga ang tanang kongregasyon magpadayon sa pagsidlak pag-ayo ingong mga tangkawan nga dili kuhaon ni Jesus sa nahimutangan niini. Ingong matinumanong mga Kristohanon, hinaot nga magmadeterminado gayod kita sa pagpamati sa dihang nagasulti si Kristo ug magpatalinghog sa ginaingon sa espiritu. Unya maangkon nato ang dumalayong kalipay ingong mga tigdala sa kahayag alang sa kahimayaan ni Jehova.

[Footnote]

Unsaon Nimo Pagtubag?

• Kinsa “kanang babaye nga si Jezebel,” ug nganong ang diyosnong mga babaye dili mosundog kaniya?

• Unsang kahimtang ang naglungtad sa kongregasyon sa Sardis, ug unsay atong mahimo sa paglikay nga mahimong sama sa daghang Kristohanon nga nagpuyo didto?

• Unsang mga saad ang gihatag ni Jesus sa kongregasyon sa Filadelfia, ug sa unsang paagi mapadapat kini karon?

• Nganong gibadlong ang mga taga-Laodicea, apan unsay mga palaaboton alang sa masibotong mga Kristohanon?

[Hulagway sa panid 16]

Kinahanglang likayan ang daotang mga dalan ‘nianang babaye nga si Jezebel’

[Mga hulagway sa panid 18]

Si Jesus nagbutang diha sa atubangan sa iyang mga sumusunod sa “usa ka dakong pultahan” nga motultol ngadto sa mga pribilehiyo sa Gingharian

[Hulagway sa panid 20]

Ikaw ba mag-abiabi kang Jesus ug magpatalinghog kaniya?