Pag-atiman sa mga Tigulang—Usa ka Kristohanong Responsibilidad

“Bisan hangtod sa pagkatigulang sa usa ako mao gihapon Siya; ug hangtod sa pagkaubanon sa usa ako magpadayon sa pagpas-an.”—ISAIAS 46:4.

1, 2. Sa unsang paagi ang pag-atiman sa atong langitnong Amahan lahi nianang gihatag sa tawhanong mga ginikanan?

ANG debotadong mga ginikanan mag-atiman sa ilang mga anak sa panahon sa pagkamasuso, pagkabata, ug sa pagkatin-edyer. Bisan sa dihang ang mga batan-on mohamtong na ug aduna nay ilang kaugalingong mga pamilya, ang ilang mga amahan ug inahan magpadayon sa paghatag kanilag mahigugmaong pagtagad ug pagpaluyo.

² Bisan tuod adunay limitasyon sa kon unsay mahimo sa mga tawo alang sa ilang mga anak, ang atong langitnong Amahan kanunayng makahatag sa iyang matinumanong mga alagad ug mahigugmaong pagtagad ug pagpaluyo. Nga nagsulti sa iyang piniling katawhan sa karaang mga panahon, si Jehova miingon: “Bisan hangtod sa pagkatigulang sa usa ako mao gihapon Siya; ug hangtod sa pagkaubanon sa usa ako magpadayon sa pagpas-an.” (Isaias 46:4) Pagkamakapadasig nga mga pulong kini alang sa tigulang nga mga Kristohanon! Dili pasagdan ni Jehova kadtong magmaunongon kaniya. Hinunoa, siya nagsaad nga mopalig-on, motabang, ug mogiya kanila sa tibuok nilang kinabuhi, bisan hangtod sa pagkatigulang.—Salmo 48:14.

 3. Unsay hisgotan niining artikuloha?

³ Sa unsang paagi masundog nato ang mahigugmaong kahingawa ni Jehova para sa mga tigulang? (Efeso 5:1, 2) Hisgotan nato ang mga paagi diin ang mga anak, magtatan-aw sa kongregasyon, ug tagsatagsa ka mga Kristohanon makaatiman sa mga panginahanglan sa tigulang nga mga membro sa atong tibuok-kalibotang kapunongan sa mga igsoon.

Atong Responsibilidad Ingong mga Anak

 4. Unsay responsibilidad sa Kristohanong mga anak ngadto sa ilang mga ginikanan?

⁴ “Pasidunggi ang imong amahan ug inahan.” (Efeso 6:2; Exodo 20:12) Pinaagi niining yano apan hinungdanon nga kinutlo gikan sa Hebreohanong Kasulatan, gipahinumdoman ni apostol Pablo ang mga anak sa ilang responsibilidad ngadto sa ilang mga ginikanan. Apan sa unsang paagi mapadapat kining mga pulonga sa pag-atiman sa mga tigulang? Ang usa ka makapadasig nga panig-ingnan gikan sa una-Kristohanong mga panahon motabang kanato sa pagtubag niining pangutanaha.

 5. (a) Unsay nagpaila nga si Jose wala makalimot sa iyang katungdanan sa iyang amahan? (b) Unsay kahulogan sa pagpasidungog sa atong mga ginikanan, ug unsang maayong panig-ingnan ang gihatag ni Jose niining bahina?

⁵ Sulod sa kapig 20 ka tuig, wala magkita si Jose ug ang iyang tigulang nga amahan, ang patriarkang si Jacob. Apan, dayag nga wala mawala ang gugma ni Jose alang kang Jacob. Gani, sa dihang gipadayag ni Jose ang iyang tinuod nga pagkatawo ngadto sa iyang mga igsoon, nangutana siya: “Buhi pa ba ang akong amahan?” (Genesis 43:7, 27; 45:3) Nianang panahona, ang yuta sa Canaan naapektohan sa gutom. Busa, nagpasugo si Jose ngadto sa iyang amahan, nga nag-ingon: “Lugsong ngari kanako. Ayaw paglangan. Ug ikaw mopuyo gayod sa yuta sa Gosen, ug ikaw magpadayon duol kanako . . . Ug ako magtagana ug pagkaon kanimo didto.” (Genesis 45:9-11; 47:12) Oo, ang pagpasidungog sa tigulang nga mga ginikanan naglakip sa pagpanalipod kanila ug pagtagana kanila sa materyal sa dihang dili sila makaatiman sa ilang kaugalingon. (1 Samuel 22:1-4; Juan 19:25-27) Malipayong gidawat ni Jose kining maong responsibilidad.

 6. Sa unsang paagi gipasundayag ni Jose ang tinuod nga gugma alang sa iyang amahan, ug sa unsang paagi masundog nato ang iyang panig-ingnan?

⁶ Tungod sa panalangin ni Jehova, si Jose nahimong usa sa kinadatoan ug labing gamhanan nga mga tawo sa Ehipto. (Genesis 41:40) Apan wala niya isipa ang iyang kaugalingon nga hinungdanon kaayo o puliki kaayo nga dili na niya mapasidunggan ang iyang 130-anyos nga amahan. Sa pagkahibalo nga si Jacob (o Israel) nagkaduol na, “gipaandam ni Jose ang iyang karo ug miadto sa pagsugat kang Israel nga iyang amahan didto sa Gosen. Sa dihang siya nagpakita kaniya siya dihadiha mihalog sa iyang liog ug mihilak nganha sa iyang liog nga sublisubli.” (Genesis 46:28, 29) Kining maong pag-abiabi dili lang usa ka pormal nga pagpakitag pagtahod. Gimahal pag-ayo ni Jose ang iyang tigulang nga amahan ug wala siya maulaw sa pagpasundayag sa iyang gugma. Kon kita adunay tigulang nga mga ginikanan, sama ba kita ka madagayaon sa atong pagpahayag ug pagmahal kanila?

 7. Nganong gusto ni Jacob nga ilubong sa Canaan?

⁷ Ang debosyon ni Jacob kang Jehova nagpabiling lig-on hangtod sa kataposang gutlo sa iyang kinabuhi. (Hebreohanon 11:21) Tungod sa iyang pagtuo sa mga saad sa Diyos, si Jacob mihangyo nga ang iyang patayng lawas ilubong sa Canaan. Gipasidunggan ni Jose ang iyang amahan pinaagi sa pagtuman niining maong hangyo, bisan pa sa dakong gasto ug paningkamot nga nalangkit.—Genesis 47:29-31; 50:7-14.

 8. (a) Unsa ang pangunang magpalihok kanato sa pag-atiman sa tigulang nga mga ginikanan? (b) Unsay gihimo sa usa ka bug-os-panahong alagad aron sa pag-atiman sa iyang tigulang nga mga ginikanan? (Tan-awa ang kahon sa panid 17.)

⁸ Unsay nagpalihok kang Jose sa pag-atiman sa iyang amahan? Bisan tuod ang gugma ug ang pagbatig utang kabubut-on sa usa nga naghatag kaniyag kinabuhi ug nag-atiman kaniya naapil sa mga hinungdan, sa walay duhaduha gibati usab ni Jose ang dulot nga tinguha sa pagpahimuot kang Jehova. Mao man usab kita. Si Pablo misulat: “Kon ang babayeng balo adunay mga anak o mga apo, patun-a una kini sila sa pagpakita sa diyosnong pagkamahinalaron diha sa ilang kaugalingong panimalay ug magpadayon sa paghatag sa angayng balos ngadto sa ilang mga ginikanan ug mga apohan, kay kini maoy dalawaton sa panan-aw sa Diyos.” (1 Timoteo 5:4) Sa pagkatinuod, ang gugma alang kang Jehova ug ang masimbahong kahadlok kaniya magpalihok kanato sa pag-atiman sa tigulang nga mga ginikanan, bisan unsa pang mga kalisdanan ang malangkit sa pagbuhat niana.a

Kon sa Unsang Paagi ang mga Ansiyano Makapakita nga Sila May Kahingawa

 9. Kinsay gitudlo ni Jehova sa pagbantay sa panon, lakip na sa tigulang nga mga Kristohanon?

⁹ Sa hapit nang matapos ang iyang taas nga kinabuhi, gitawag ni Jacob si Jehova ingong “ang matuod nga Diyos nga nagbantay kanako sa tibuok panahon sa akong paglungtad hangtod niining adlawa.” (Genesis 48:15) Sa pagkakaron, si Jehova nagabantay sa iyang yutan-ong mga alagad pinaagi sa Kristohanong mga magtatan-aw, o mga ansiyano, ilalom sa pagtultol sa iyang Anak, si Jesu-Kristo, “ang pangulong magbalantay.” (1 Pedro 5:2-4) Sa unsang paagi masundog sa mga magtatan-aw si Jehova samtang sila nag-atiman sa tigulang nga mga membro sa panon?

10. Unsay nahimo na sa pagtagana ug materyal nga tabang alang sa tigulang nga mga Kristohanon? (Tan-awa ang kahon sa panid 19.)

¹⁰ Wala madugay human matukod ang Kristohanong kongregasyon, ang mga apostoles nagtudlo ug “pito ka lalaki . . . [nga] puno sa espiritu ug kaalam” sa pagdumala “sa adlaw-adlaw nga pagpang-apod-apod” ug pagkaon taliwala sa kabos nga Kristohanong mga balo. (Buhat 6:1-6) Sa ulahi, gisugo ni Pablo ang magtatan-aw nga si Timoteo sa pag-apil diha sa listahan sa sulondan nga tigulang nga mga babayeng balo nga takos nga hatagan ug materyal nga tabang. (1 Timoteo 5:3, 9, 10) Sa susama, ang mga magtatan-aw sa kongregasyon karon andam nga mohikay ug praktikal nga tabang alang sa tigulang nga mga Kristohanon kon kini gikinahanglan. Apan, labaw pa niana ang nalangkit sa pag-atiman sa matinumanong mga tigulang.

11. Unsay giingon ni Jesus bahin sa kabos nga babayeng balo nga naghatag ug gamayng amot?

¹¹ Sa talitapos na ang iyang yutan-ong ministeryo, si Jesus milingkod diha sa templo ug “naniid sa panon sa katawhan nga nanghulog ug salapi sa mga panudlanag bahandi.” Dayon dihay nakadani sa iyang pagtagad. Nag-ingon ang asoy: “Usa ka kabos nga babayeng balo miabot ug naghulog ug duha ka gagmayng sensilyo, nga kubos kaayog bili.” Gipaduol ni Jesus ang iyang mga tinun-an kaniya ug giingnan sila: “Sa pagkatinuod ako magaingon kaninyo nga kining kabos nga babayeng balo naghulog ug labaw pa kay kanilang tanan nga naghulog ug salapi sa mga panudlanag bahandi; kay silang tanan naghulog gikan sa ilang mga sobra, apan siya, gikan sa iyang kawalad-on, naghulog sa tanan niyang nabatonan, ang iyang tibuok nga panginabuhian.” (Marcos 12:41-44) Kon kantidad sa salapi ang hisgotan, ang amot sa babayeng balo gamay ra, apan nahibalo si Jesus kon unsa ka dako ang pagpabili sa iyang langitnong Amahan nianang tibuok-kalag nga pagpahayag ug debosyon. Bisan pa sa pangedaron sa babayeng balo, gipabilhan ni Jesus ang iyang gihimo.

12. Sa unsang paagi ang mga ansiyano makapakita sa ilang pagpabili sa natampo sa tigulang nga mga Kristohanon?

¹² Sama kang Jesus, pabilhan sa Kristohanong mga magtatan-aw ang gihimo sa mga tigulang sa pagpalambo sa matuod nga pagsimba. Ang mga ansiyano adunay katarongan sa pagdayeg sa mga tigulang tungod sa ilang pagpakig-ambit diha sa ministeryo, sa ilang pagkomento diha sa mga tigom, sa ilang positibong impluwensiya diha sa kongregasyon, ug sa ilang paglahutay. Ang sinserong pulong sa pagdasig makatabang sa mga tigulang nga makakaplag ug “hinungdan sa pagsadya” diha sa ilang sagradong pag-alagad, sa ingon malikayan ang makapahigawad nga mga pagtanditandi sa kon unsay mahimo sa ubang mga Kristohanon o sa ilang nangaging mga kalamposan.—Galacia 6:4.

13. Sa unsang mga paagi ang mga ansiyano makapahimulos sa mga katakos ug eksperyensiya sa mga tigulang?

¹³ Mahimong ilhon sa mga ansiyano ang bililhong tabang nga gihimo sa tigulang nga mga Kristohanon pinaagi sa paggamit sa ilang eksperyensiya ug mga katakos. Ang sulondan nga mga tigulang mahimong gamiton matag karon ug unya sa mga demonstrasyon o mga interbiyo. “Ang mga mamiminaw mamati gayod pag-ayo sa dihang akong interbiyohon ang usa ka tigulang nga igsoong lalaki o babaye kinsa nakamatuto ug mga anak diha sa kamatuoran,” matod sa usa ka ansiyano. Ang mga ansiyano sa laing kongregasyon nagtaho nga usa ka 71-anyos nga payunir nga igsoong babaye nagmalamposon sa pagtabang sa mga magmamantala sa Gingharian nga mahimong regular diha sa pag-alagad sa kanataran. Gidasig usab niya sila sa paghimo sa “sukaranang mga butang,” sama sa pagbasa sa Bibliya ug sa adlaw-adlaw nga teksto ug dayon sa pagpamalandong sa ilang nabasa.

14. Sa unsang paagi ang usa ka lawas sa mga ansiyano nagpakitag pagpabili sa usa ka tigulang nga isigkamagtatan-aw?

¹⁴ Pabilhan usab sa mga ansiyano ang natampo sa tigulang nga mga isigkamagtatan-aw. Si José, kinsa nag-edad ug kapin sa 70 anyos ug nag-alagad ingong ansiyano sulod na sa daghang dekada, di pa dugayng nailalom sa makuting operasyon. Kay dugay pang maulian, naghunahuna siya nga mohunong siya sa pag-alagad ingong nagadumalang magtatan-aw. “Natingala ko sa reaksiyon sa ubang mga ansiyano,” matod ni José. “Imbes dawaton ang akong sugyot, nangutana sila kon unsang praktikal nga tabang ang akong gikinahanglan aron makapadayon ako sa pag-atiman sa akong mga responsibilidad.” Pinaagi sa tabang sa usa ka batabata nga ansiyano, si José nakahimo sa pagpadayon sa pag-alagad nga malipayon ingong nagadumalang magtatan-aw, ug kini maoy usa ka panalangin sa kongregasyon. Usa ka kaubang ansiyano miingon: “Ang mga igsoon nagpabili gayod sa buluhaton ni José ingong ansiyano. Sila nahigugma ug nagtahod kaniya tungod sa iyang eksperyensiya ug panig-ingnan sa pagtuo. Gipalig-on niya ang among kongregasyon.”

Pag-atiman sa Usag Usa

15. Nganong ang tanang Kristohanon magtagad sa kaayohan sa mga tigulang diha sa ilang taliwala?

¹⁵ Dili lamang ang mga anak sa tigulang nga mga ginikanan ug tinudlong mga alagad ang angayng mahingawa sa mga tigulang. Nagtandi sa Kristohanong kongregasyon sa lawas sa tawo, si Pablo misulat: “Ang Diyos naghiusa sa lawas, nga naghatag ug mas dakong pasidungog sa sangkap nga may kakulangan, aron walay pagkabahinbahin diha sa lawas, kondili nga ang mga sangkap niini makabaton ug samang pagtagad alang sa usag usa.” (1 Corinto 12:24, 25) Ang laing hubad mabasa: “Ang tanang parte [sa lawas angayng] magtagad sa kaayohan sa usag usa.” (Knox) Aron ang Kristohanong kongregasyon magkahiusa sa paglihok, ang matag membro kinahanglang magtagad sa kaayohan sa iyang mga isigkamagtutuo, lakip na sa mga tigulang.—Galacia 6:2.

16. Sa unsang paagi kita makapakita ug kaikag sa mga tigulang sa dihang kita motambong sa Kristohanong mga tigom?

¹⁶ Ang Kristohanong mga tigom maoy maayong kahigayonan sa pagpakita sa atong kaikag sa mga tigulang. (Filipos 2:4; Hebreohanon 10:24, 25) Mogahin ba kitag panahon sa pagpakig-estorya sa mga tigulang sa maong mga okasyon? Bisan tuod angayan nga mangutana bahin sa ilang panglawas, kita ba ‘makahatag ug espirituwal nga gasa,’ tingali pinaagi sa pagpaambit ug makapalig-on nga eksperyensiya o usa ka Kasulatanhong hunahuna? Tungod kay ang pipila ka mga tigulang dili kaayo makalihoklihok, pagpakitag kalulot ang pagduol kanila imbes magdahom nga sila maoy moduol kanato. Kon ang tigulang dili kaayo makadungog, tingali kinahanglang hinayhinayon ug klarohon nato ang atong pagsulti. Ug aron adunay tinuod nga “pagdinasigay,” kinahanglang mamati kita pag-ayo sa ginasulti sa maong tigulang.—Roma 1:11, 12.

17. Sa unsang paagi ikapakita nato ang atong kahingawa sa tigulang nga mga Kristohanon nga anaa na lang sa balay?

¹⁷ Komosta kon ang mga tigulang dili makatambong sa Kristohanong mga tigom? Ang Santiago 1:27 nagpakita nga atong katungdanan ang “pag-atiman sa mga ilo ug sa mga babayeng balo sa ilang kasakitan.” Ang usa ka kahulogan sa Gregong berbo nga gihubad ug “pag-atiman” mao ang “pagduaw.” (Buhat 15:36) Ug mapasalamaton gayod ang mga tigulang sa atong mga pagduaw! Samtang nabilanggo sa Roma sa mga 65 K.P., ang “tawong tigulang” nga si Pablo nag-inusara na lang. Siya nangandoy nga makita ang iyang isigkamagbubuhat nga si Timoteo ug misulat: “Paningkamoti nga makaari ka sa dili-madugay.” (Filemon 9; 2 Timoteo 1:3, 4; 4:9) Bisan tuod sila dili literal nga mga binilanggo, ang ubang mga tigulang anaa na lang sa balay tungod sa mga balatian. Sa pagkatinuod, mahimong sila nagaingon, ‘Palihog, paningkamoti ang pagduaw kanako sa dili madugay.’ Mosanong ba kita sa maong mga hangyo?

18. Unsang mga benepisyo ang moresulta sa atong pagduaw sa mga tigulang?

¹⁸ Ayaw gayod pakamenosa ang mga benepisyo sa pagduaw sa tigulang nga espirituwal nga igsoong lalaki o babaye. Sa dihang ang usa ka Kristohanon nga ginganlag Onesiforo didto sa Roma, siya nangita pag-ayo kang Pablo, nakakaplag kaniya, ug human niana ‘makadaghan nga nagdasig kaniya.’ (2 Timoteo 1:16, 17) “Ganahan kong makig-uban sa mga batan-on,” matod sa usa ka tigulang nga igsoong babaye. “Ang nagustohan nako pag-ayo mao nga sila nagtratar kanako nga samag membro sa ilang pamilya. Nakapadasig gayod kini kanako.” Laing tigulang nga Kristohanon nag-ingon: “Giapresyar ko gayod sa dihang dunay magpadala nako ug kard, motawag nako sa telepono sulod sa pipila ka minutos, o moduaw kanako sa makadiyot. Sama rag nakahanggap ako ug lab-as nga hangin.”

Si Jehova Nagaganti Niadtong Nagpakitag Kahingawa

19. Unsang mga panalangin ang madawat gumikan sa pag-atiman sa mga tigulang?

¹⁹ Ang pag-atiman sa mga tigulang mosangpot sa daghang panalangin. Ang pagpakig-uban sa mga tigulang ug ang paggamit sa ilang kahibalo ug eksperyensiya maoy usa ka pribilehiyo mismo. Ang mga tig-atiman mobatig dakong kalipay nga naggikan sa paghatag, ug mobati usab ug kalamposan ug kalinaw sa kahiladman tungod kay ilang natuman ang ilang Kasulatanhong responsibilidad. (Buhat 20:35) Dugang pa, kadtong nag-atiman sa mga tigulang dili angayng mahadlok nga sila pasagdan na lang inigkatigulang na nila. Ang Pulong sa Diyos nagpasalig kanato: “Ang kalag nga mahinatagon motambok, ug ang dagayang nagabisibis sa uban dagaya usab nga pagabisibisan.”—Proverbio 11:25.

20, 21. Unsay paglantaw ni Jehova niadtong nag-atiman sa mga tigulang, ug unsay angay natong determinasyon?

²⁰ Si Jehova nagaganti sa mahinadlokon-sa-Diyos nga mga anak, mga magtatan-aw, ug ubang mahingawaong mga Kristohanon tungod sa dili-mahakogong pag-atiman sa mga panginahanglan sa tigulang nga mga isigkamagtutuo. Ang maong espiritu kaharmonya niining maong proverbio: “Siya nga nagapakitag kaluoy sa timawa nagapahulam kang Jehova, ug Siya magabayad kaniya sa iyang gibuhat.” (Proverbio 19:17) Kon ang gugma magtukmod kanato sa pagpakitag pabor sa mga timawa ug kabos, ang Diyos mag-isip sa atong paghatag ingong usa ka pagpahulam nga iyang bayran ug mga panalangin. Bayran usab niya kita tungod sa atong mahigugmaong pag-atiman sa atong tigulang nga mga isigkamagsisimba, nga daghan kanila maoy ‘kabos maylabot sa kalibotan apan dato sa pagtuo.’—Santiago 2:5.

²¹ Pagkadako sa ibayad sa Diyos! Naglakip kini ug walay-kataposang kinabuhi. Alang sa kinabag-an sa mga alagad ni Jehova, kana maoy kinabuhing dayon sa paraisong yuta, diin ang mga epekto sa napanunod nga sala pagawagtangon ug mahibalik sa matinumanong mga tigulang ang kalagsik sa ilang pagkabatan-on. (Pinadayag 21:3-5) Samtang paaboton nato kanang bulahan nga panahon, hinaot magpadayon kita sa pagtuman sa atong Kristohanong responsibilidad sa pag-atiman sa mga tigulang.

[Footnote]

Unsay Imong mga Tubag?

• Sa unsang paagi ang mga anak makapasidungog sa tigulang nga mga ginikanan?

• Sa unsang paagi ang mga ansiyano magpakita ug pagpabili sa tigulang nga mga membro sa panon?

• Unsay mahimo sa tagsatagsa ka Kristohanon sa pagpakita sa ilang tinuod nga kaikag sa mga tigulang?

• Unsang mga panalangin ang mosangpot gumikan sa pag-atiman sa tigulang nga mga Kristohanon?

[Kahon sa panid 17]

Sa Dihang ang Iyang mga Ginikanan Nagkinahanglag Tabang

Si Philip nag-alagad ingong boluntaryong trabahante sa konstruksiyon sa Liberia sa 1999 sa dihang nabalitaan niya nga ang iyang amahan grabeng nasakit. Kay nagtuo nga ang iyang inahan dili makasagubang nga siyasiya ra, mihukom siya sa pagpauli aron sa paghikay sa pagpatambal sa iyang amahan.

“Dili sayon ang pagpauli,” nahinumdom si Philip, “apan gibati nako nga ang akong unang obligasyon maoy ngadto sa akong mga ginikanan.” Sulod sa misunod nga tulo ka tuig, iyang gibalhin ang iyang mga ginikanan ngadto sa mas angayan nga puy-anan ug uban sa tabang sa mga isigka-Kristohanon sa ilang dapit napasibo ang puy-anan aron maatiman ang linaing mga panginahanglan sa iyang amahan.

Ang inahan ni Philip mas andam na karong mosagubang sa grabeng sakit sa iyang bana. Di pa dugay, nadawat ni Philip ang pagdapit nga magtrabaho ingong boluntaryo sa sangang buhatan sa mga Saksi ni Jehova sa Macedonia.

[Kahon sa panid 19]

Wala Nila Pasagdi ang Iyang mga Panginahanglan

Sa dihang si Ada, usa ka 85-anyos nga Kristohanon sa Australia, anaa na lang sa balay tungod sa dili maayong panglawas, ang mga ansiyano sa kongregasyon naghikay sa pagtabang kaniya. Ilang giorganisar ang usa ka grupo sa mga isigkamagtutuo nga makatabang kaniya. Kining maong mga igsoong lalaki ug babaye nalipay sa pag-atiman sa mga buluhaton sama sa pagpanghinlo, pagpanglaba, pagluto, ug pagpamalit.

Ang tabang gisugdan duolan na sa usa ka dekada kanhi. Hangtod karon, kapin sa 30 ka isigka-Saksi ni Jehova ang nakatabang sa pag-atiman kang Ada. Sila nagpadayon sa pagduaw kaniya, pagbasa kaniya sa mga publikasyon sa Bibliya, pagpahibalo kaniya bahin sa espirituwal nga kauswagan sa mga membro sa kongregasyon, ug pag-ampo nga regular uban kaniya.

Usa ka Kristohanong ansiyano sa maong dapit mikomento: “Kadtong nag-atiman kang Ada nag-isip nga usa ka pribilehiyo ang pagtabang kaniya. Daghan ang nadasig sa iyang matinumanong pag-alagad latas sa daghang katuigan, ug dili gayod sila makaako nga pasagdan ang iyang mga panginahanglan.”

[Hulagway sa panid 16]

Kita ba madagayaon sa atong pagpahayag ug pagmahal sa tigulang nga mga ginikanan?

[Mga hulagway sa panid 18]

Ang tanan diha sa kongregasyon makapasundayag sa ilang gugma alang sa tigulang nga mga isigkamagtutuo