Masagubang Nato ang Bisan Unsang Pagsulay!
IKAW ba nag-atubang ug usa ka pagsulay karon? Nagminghoy ka ba tungod kay morag dili na nimo kini maagwanta? May mga panahon ba nga nagtuo ka pa gani nga ang imong problema talagsaon ug wala nay solusyon? Kon mao, ayawg kaluya! Bisan unsa pang pagsulay ang moabot kanato, ang Bibliya nagpasalig nga ang Diyos motabang kanato sa pagsagubang niana.
Ang Bibliya nag-ingon nga ang mga alagad sa Diyos makaatubang ug “nagkadaiyang mga pagsulay.” (Santiago 1:2) Matikdi ang pulong ‘nagkadaiya’ (Grego poi·kiʹlos). Sumala sa karaang gamit niini, ang orihinal nga pulong nagkahulogan ug “lainlaing matang” o “lainlain ug kolor” ug nagpasiugda sa “kadaiyahan sa mga pagsulay.” Busa, ang “nagkadaiyang mga pagsulay” mao ang lainlaing matang sa pagsulay nga moabot kanato. Bisan pa niana, si Jehova motabang kanato sa pagsagubang sa matag usa niana. Nganong makaseguro man kita niini?
‘Ang Dili-Takos nga Kalulot sa Diyos Gipahayag sa Nagkadaiyang Paagi’
Si apostol Pedro nag-ingon nga ang mga Kristohanon “naguol sa nagkadaiyang mga pagsulay.” (1 Pedro 1:6) Sa ulahing bahin sa iyang dinasig nga sulat, siya miingon nga ang “dili-takos nga kalulot sa Diyos” “gipahayag sa nagkadaiyang paagi.” (1 Pedro 4:10) Ang pamulong “sa nagkadaiyang paagi” adunay diwa nga sama niadtong orihinal nga Gregong pulong. Sa pagkomento bahin niining maong pamulong, usa ka eskolar sa Bibliya miingon: “Makapatandog kaayo kini nga impormasyon. . . . Ang paghisgot sa grasya [o, dili-takos nga kalulot] sa Diyos ingong poikilos nagkahulogan nga walay kahimtang nga maagoman sa tawo nga dili mabuntog sa grasya sa Diyos.” Siya dugang miingon: “Walay motunghang situwasyon, krisis, kalit nga panghitabo o panginahanglan nga dili masulbad, masagubang, ug mabuntog sa grasya sa Diyos. Wala gayoy kahimtang sa kinabuhi nga dili masagubang sa grasya sa Diyos. Kining mahubitong pulong nga poikilos tin-awng nagpahinumdom kanato nga ang lainlaing paagi sa pagpahayag sa Diyos sa iyang grasya motabang gayod kanato sa pagsagubang sa bisan unsang pagsulay.”
Ang Kalulot sa Diyos Motabang Kanato sa Pagsagubang sa mga Pagsulay
Sumala kang Pedro, ang usa ka paagi nga gipahayag sa Diyos ang iyang dili-takos nga kalulot maoy pinaagi sa lainlaing mga membro sa Kristohanong kongregasyon. (1 Pedro 4:11) Ang matag alagad sa Diyos adunay espirituwal nga mga gasa, o mga abilidad, nga magsilbing tinubdan sa pagdasig niadtong nag-atubang ug mga pagsulay. (Roma 12:6-8) Pananglitan, ang ubang membro sa kongregasyon maayo kaayo nga mga magtutudlo sa Bibliya. Ang ilang maalamong mga pulong makadasig ug makapalig-on sa uban sa paglahutay. (Nehemias 8:1-4, 8, 12) Ang uban regular nga nagaduaw sa mga balay niadtong nanginahanglag paghupay. Ang maong mga pagduaw makapadasig, nga ‘makahupay sa mga kasingkasing.’ (Colosas 2:2) Sa dihang himoon sa mga magtatan-aw ang maong makapalig-on-sa-pagtuo nga mga pagduaw, sila nagapaambit ug espirituwal nga gasa. (Juan 21:16) Ang uban usab diha sa kongregasyon nailhan tungod sa ilang mahigugmaon, mahangawaon, ug malumo nga pagpakiglabot sa ilang mga isigkamagtutuo nga naguol tungod sa mga pagsulay. (Buhat 4:36; Roma 12:10; Colosas 3:10) Ang empatiya ug abtik nga pagtabang niining mahigugmaong mga igsoong lalaki ug babaye maoy usa gayod ka paagi sa pagpahayag sa Diyos sa iyang dili-takos nga kalulot.—Proverbio 12:25; 17:17.
“Ang Diyos sa Tanang Paghupay”
Labaw sa tanan, si Jehova motaganag kahupayan. Siya ‘ang Diyos sa tanang paghupay, kinsa nagahupay kanato sa tanan natong kasakitan.’ (2 Corinto 1:3, 4) Ang atong mga pag-ampo alang sa tabang kasagarang tubagon ni Jehova pinaagi sa paghatag kanato ug kaalam nga makaplagan diha sa dinasig nga Pulong sa Diyos ug sa pagtagana kanato ug kusog pinaagi sa iyang balaang espiritu. (Isaias 30:18, 21; Lucas 11:13; Juan 14:16) Kita madasig sa inspiradong saad nga gipadayag ni apostol Pablo. Siya miingon: “Ang Diyos kasaligan, ug dili niya itugot nga tentalon kamo nga labaw sa inyong maantos, apan uban sa tentasyon siya usab magtaganag kalingkawasan aron kamo makahimo sa pag-antos niini.”—1 Corinto 10:13.
Oo, bisan unsa pa ang matang sa pagsulay nga atong maagoman, aduna gayoy paagi ang Diyos sa pagpahayag sa iyang dili-takos nga kalulot aron tabangan kita sa pagsagubang niana. (Santiago 1:17) Ang tukma-sa-panahon ug nahiangay nga tabang nga gitagana ni Jehova alang sa iyang mga alagad—bisan unsa pa ang ilang giatubang nga mga tentasyon o kalisdanan—maoy usa lang ka pamatuod sa “nagkadaiya uyamot nga kaalam sa Diyos.” (Efeso 3:10) Dili ka ba mouyon niana?
[Mga hulagway sa panid 31]
Si Jehova motabang kanato sa pagsagubang sa atong mga pagsulay