Ugmara ang Tinuod nga Pagkamapainubsanon
“Ang mapainubsanon nga katawhan imong pagaluwason.”—2 SAMUEL 22:28.
1, 2. Unsang kinaiya ang samang nabatonan sa daghang magmamando sa kalibotan?
ANG mga piramid sa Ehipto maoy pamatuod bahin sa mga tawo nga nagmando kanhi nianang nasora. Ang ubang inilang mga tawo sa kasaysayan mao si Senakerib sa Asirya, si Alejandrong Bantogan sa Gresya, ug si Julio Cesar sa Roma. Adunay usa ka kinaiya nga samang nabatonan sa maong mga magmamando. Sila walay gibilin nga rekord nga sila tinuod nga mapainubsanon.—Mateo 20:25, 26.
2 Mahanduraw mo ba nga si bisan kinsa sa mga magmamando nga gihisgotan sa itaas nagbatasan sa pagsuroy sa iyang gingharian aron pangitaon ang timawang mga sakop nga nagkinahanglag kahupayan? Dili gayod! Ni mahanduraw mo nga sila mangadto sa kabos nga mga balay sa masulub-ong mga lungsoranon aron palig-onon sila. Pagkalahi sa ilang tinamdan sa timawa nga mga tawo kon itandi sa tinamdan sa Supremong Magmamando sa uniberso, si Jehova nga Diyos!
Ang Labing Talagsaong Panig-ingnan sa Pagkamapainubsanon
3. Unsay pagtagad sa Supremong Magmamando sa iyang tawhanong mga sakop?
3 Dili matukib ang pagkadako ug pagkataas ni Jehova, bisan pa niana “ang iyang mga mata nagalibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.” (2 Cronicas 16:9) Ug unsay buhaton ni Jehova inigkakaplag niyag timawang mga magsisimba nga nahugno ang espiritu tungod sa nagkalainlaing mga pagsulay? Sa usa ka diwa, siya “nagapuyo” uban sa maong mga tawo pinaagi sa iyang balaang espiritu “aron buhion pag-usab ang espiritu sa mga mapainubsanon ug aron buhion pag-usab ang kasingkasing sa mga nangahugno.” (Isaias 57:15) Busa, ang iyang mga magsisimba nga napalig-on mas nasangkapan sa pagpadayon sa pag-alagad kaniya nga malipayon. Ang Diyos nagpasundayag gayod ug tinuod nga pagkamapainubsanon!
4, 5. (a) Unsay pagbati sa salmista bahin sa paagi sa Diyos sa pagmando? (b) Unsay kahulogan sa pagpaubos sa Diyos aron sa pagtabang sa “timawa”?
4 Walay lain sa uniberso ang nagpaubos sa iyang kaugalingon nga sama sa Soberanong Ginoo aron tabangan ang makasasalang mga tawo. Ang salmista nakasulat: “Si Jehova nahimong hataas ibabaw sa tanang kanasoran; ang iyang himaya maoy ibabaw sa kalangitan. Kinsa ang sama kang Jehova nga atong Diyos, siya nga nagapuyo sa kahitas-an? Siya nagapaubos aron sa pagtan-aw sa langit ug sa yuta, nga nagabangon sa timawa gikan sa abog; ginabayaw niya ang kabos gikan sa gahong sa abo.”—Salmo 113:4-7.
5 Matikdi ang pulong “nagapaubos” nga gigamit dinhi. Kon kini gamiton langkit sa mga tawo, kanang pulonga makabaton ug dili maayong kahulogan, nga mao ang ‘pagbatog hunahuna nga labaw sa usa ka ubos o alaot nga tawo.’ Kanang mapahitas-ong tinamdan dili gayod magamit sa pagbatbat kang Jehova nga Diyos, kinsa maoy putli ug balaan ug mao nga walay “pagkamapahitas-on.” (Marcos 7:22, 23) Apan ang pulong ‘pagpaubos’ mahimong magpasabot usab sa pagpaubos ngadto sa kahimtang sa usa ka ubos nga tawo sa katilingban o mopaubos gikan sa ranggo o kahalangdon aron makiglabot sa usa ka ubos nga tawo. Busa, ang pipila ka Bibliya naghubad sa Salmo 113:6 nga ang Diyos nagapaubos sa iyang kaugalingon. Haom kaayo kana nga paghulagway sa atong mapainubsanong Diyos nga mahigugmaong nagatagad sa mga panginahanglan sa iyang dili-hingpit nga tawhanong mga magsisimba!—2 Samuel 22:36.
Kon Nganong si Jesus Mapainubsanon
6. Unsa ang labing dakong buhat sa pagkamapainubsanon ni Jehova?
6 Ang labing dakong buhat sa pagkamapainubsanon ug sa gugma sa Diyos mao ang pagpadala sa iyang minahal nga panganayng Anak aron ipakatawo sa yuta ug matutoon ingon nga usa ka tawo alang sa kaluwasan sa katawhan. (Juan 3:16) Si Jesus nagtudlo kanato sa kamatuoran bahin sa iyang langitnong Amahan ug unya nagtugyan sa iyang hingpit nga tawhanong kinabuhi aron sa pagpala sa “sala sa kalibotan.” (Juan 1:29; 18:37) Kay hingpit nga nagpabanaag sa iyang Amahan, apil ang pagkamapainubsanon ni Jehova, si Jesus andam sa pagbuhat kon unsay isugo sa Diyos kaniya. Kana ang labing dakong panig-ingnan sa pagkamapainubsanon ug gugma nga gihatag sukad sa usa sa mga linalang sa Diyos. Dili ang tanan nag-ila sa pagkamapainubsanon ni Jesus, kay giisip gani siya sa iyang mga kaaway ingong “ang usa nga labing ubos sa katawhan.” (Daniel 4:17) Bisan pa niana, si apostol Pablo nahibalo nga ang iyang isigkamagtutuo angayng magsundog kang Jesus ug busa magmapainubsanon sa ilang mga pagpakiglabot sa usag usa.—1 Corinto 11:1; Filipos 2:3, 4.
7, 8. (a) Sa unsang paagi nakakat-on si Jesus nga mahimong mapainubsanon? (b) Unsang pangaliyupo ang gihimo ni Jesus sa umaabot niyang mga tinun-an?
7 Gipasiugda ni Pablo ang talagsaong panig-ingnan ni Jesus, nga misulat: “Hupti kini nga tinamdan sa pangisip diha kaninyo nga diha usab kang Kristo Jesus, kinsa, bisan tuod siya naglungtad diha sa dagway sa Diyos, wala maghunahuna sa pagpangilog, nga mao, nga siya mahimong katumbas sa Diyos. Wala, apan iyang gihaw-asan ang iyang kaugalingon ug gihuptan ang dagway sa usa ka ulipon ug nahisama sa mga tawo. Labaw pa niana, sa dihang iyang nakaplagan ang iyang kaugalingon nga diha sa dagway sa usa ka tawo, siya nagpaubos ug nagmasinugtanon hangtod sa kamatayon, oo, kamatayon sa estaka sa pagsakit.”—Filipos 2:5-8.
8 Mahibulong tingali ang pipila, ‘Sa unsang paagi nakakat-on si Jesus nga mahimong mapainubsanon?’ Kadto maoy resulta sa iyang suod nga pagpakig-uban sa iyang langitnong Amahan sulod sa hataas kaayong panahon, nga sa maong panahon siya nag-alagad ingong “batid nga magbubuhat” sa Diyos diha sa paglalang sa tanang butang. (Proverbio 8:30) Human sa pagrebelde sa Eden, ang Panganayng Anak sa Diyos nakakita sa mapainubsanong mga pagpakiglabot sa iyang Amahan sa makasasalang mga tawo. Busa sa dinhi siya sa yuta, gipabanaag ni Jesus ang pagkamapainubsanon sa iyang Amahan ug siya nangaliyupo: “Isangon diha kaninyo ang akong yugo ug magtuon gikan kanako, kay ako malumog-buot ug mapainubsanon sa kasingkasing, ug kamo makakaplag ug kahayahay alang sa inyong mga kalag.”—Mateo 11:29; Juan 14:9.
9. (a) Nganong si Jesus nahinangop kaayo sa mga bata? (b) Unsang pagtulon-an ang gitudlo ni Jesus pinaagi sa usa ka gamayng bata?
9 Tungod kay si Jesus tinuod nga mapainubsanon, ang gagmay nga mga bata wala mahadlok kaniya. Sila nadani hinuon kaniya. Sa iyang bahin, siya nagpakitag kahinangop sa mga bata ug nagtagad kanila. (Marcos 10:13-16) Nganong si Jesus nahinangop man kaayo sa mga bata? Seguradong sila may tilinguhaong mga hiyas nga wala ipasundayag kanunay sa hamtong niyang mga tinun-an. Halos ang tanan nahibalo nga giisip sa gagmayng mga bata nga ang mga hamtong labaw kanila. Masabtan nimo kini tungod sa daghan nilang pangutana. Oo, kon itandi sa daghang hamtong, ang mga bata mas daling tudloan ug lagmit dili kaayo mapasigarbohon sama sa mga hamtong. Sa usa ka higayon, si Jesus mipilig usa ka gamayng bata ug miingon sa Iyang mga sumusunod: “Gawas kon kamo motalikod ug mahimong sama sa mga bata, dili gayod kamo makasulod sa gingharian sa mga langit.” Siya nagpadayon: “Bisan kinsa nga magapaubos sa iyang kaugalingon sama niining bataa mao ang labing dako sa gingharian sa mga langit.” (Mateo 18:3, 4) Gipahayag ni Jesus ang lagda: “Ang matag usa nga magabayaw sa iyang kaugalingon igapaubos ug siya nga nagapaubos sa iyang kaugalingon igabayaw.”—Lucas 14:11; 18:14; Mateo 23:12.
10. Unsang mga pangutana ang atong hisgotan?
10 Ang maong kamatuoran mopatunghag hinungdanong mga pangutana. Ang atong paglaom nga makabatog kinabuhing walay kataposan sa bahin nagdepende sa atong pag-ugmad ug tinuod nga pagkamapainubsanon, apan nganong malisdan usahay ang mga Kristohanon nga magmapainubsanon? Nganong lisod kaayo ang pagtulon sa atong garbo, ingnon ta, ug mapainubsanong sagubangon ang mga pagsulay? Ug unsay motabang kanato aron molampos sa pag-ugmad ug tinuod nga pagkamapainubsanon?—Santiago 4:6, 10.
Kon Nganong Lisod nga Magmapainubsanon
11. Nganong dili katingalahan nga kita maningkamot aron mahimong mapainubsanon?
11 Kon nalisdan ka nga magmapainubsanon, ikaw wala mag-inusara. Niadtong 1920, kining magasina naghisgot sa tambag sa Bibliya nga kinahanglanon ang pagkamapainubsanon, nga mikomento: “Tungod kay gipabilhan pag-ayo sa Ginoo ang pagkamapainubsanon, kini angayng magdasig sa tanang matuod nga mga tinun-an sa pag-ugmad niining hiyasa kada adlaw.” Unya kining magasina prangkang mipahayag: “Bisan pa niining tanang tambag sa Kasulatan, ang pagkadili-hingpit sa tawhanong kinaiya daw dako kaayo nga kadtong nahimong katawhan sa Ginoo ug nanaad sa pagsubay sa dalan sa Ginoo daw mas naglisod, mas gihagoan sa pagbatok sa maong kinaiya kay sa uban.” Gipasiugda niana ang usa ka hinungdan nga ang matuod nga mga Kristohanon kinahanglang maningkamot nga mahimong mapainubsanon—ang atong makasasalang tawhanong kinaiya nagtinguhag sobrang himaya. Tungod kini kay kita maoy mga kaliwat sa makasasalang magtiayon, si Adan ug Eva, kinsa nagpadaog sa hakog nga mga tinguha.—Roma 5:12.
12, 13. (a) Sa unsang paagi ang kalibotan maoy usa ka babag sa Kristohanong pagkamapainubsanon? (b) Tungod kang kinsa nga kita mas nalisdan sa atong pagpaningkamot sa pag-ugmad sa pagkamapainubsanon?
12 Ang laing hinungdan nga kita malisdan tingali sa pagpasundayag ug pagkamapainubsanon maoy tungod kay kita gilibotan sa kalibotan nga nagdasig sa mga tawo sa pagpaningkamot nga molabaw sa uban. Nahilakip sa kasagarang mga tumong niining kalibotana mao ang pangandoy nga tagbawon “ang tinguha sa [makasasalang] unod ug ang tinguha sa mga mata ug ang mapagawalong pagpasundayag sa mga kahinguhaan sa kinabuhi sa usa.” (1 Juan 2:16) Inay gamhan sa maong kalibotanong mga tinguha, angayng payanohon sa mga tinun-an ni Jesus ang ilang mata ug isentro ang ilang pagtagad sa pagbuhat sa kabubut-on sa Diyos.—Mateo 6:22-24, 31-33; 1 Juan 2:17.
13 Ang ikatulong hinungdan nga lisod ugmaron ang pagpasundayag ug pagkamapainubsanon maoy tungod kay ang sinugdanan sa pagkamapahitas-on, si Satanas nga Yawa, maoy nagmando niining kalibotana. (2 Corinto 4:4; 1 Timoteo 3:6) Si Satanas nagpausbaw sa iyang daotang mga kinaiya. Pananglitan, iyang gitinguha nga siya simbahon ni Jesus baylo sa “tanang gingharian sa kalibotan ug sa ilang himaya” nga iyang ihatag kaniya. Tungod kay kanunayng mapainubsanon, gisalikway dihadiha ni Jesus ang tanyag sa Yawa. (Mateo 4:8, 10) Sa susama, tentalon ni Satanas ang mga Kristohanon sa pagtinguhag himaya alang sa ilang kaugalingon. Ang mapainubsanong mga Kristohanon maningkamot hinuon sa pagsunod sa panig-ingnan ni Jesus, nga ihatag ang pagdayeg ug kadungganan ngadto sa Diyos.—Marcos 10:17, 18.
Pag-ugmad ug Pagpasundayag sa Tinuod nga Pagkamapainubsanon
14. Unsay “pakaaron-ingnon nga pagpaubos”?
14 Sa iyang sulat ngadto sa mga taga-Colosas, si apostol Pablo nagpasidaan batok sa pagpulopaubos aron magpadayeg sa mga tawo. Gibatbat kini ni Pablo nga “pakaaron-ingnon nga pagpaubos.” Kadtong nagpakaaron-ingnon nga mapainubsanon maoy dili espirituhanong mga tawo. Ilang gipadayag hinuon nga sila “miburot” gayod sa pagpagarbo. (Colosas 2:18, 23) Naghisgot si Jesus ug mga pananglitan bahin nianang pakaaron-ingnon nga pagpaubos. Siya nagbadlong sa mga Pariseo tungod sa mapagawalon nilang mga pag-ampo ug sa ilang paagi sa pagpuasa uban ang masulub-on ug gihiwi nga mga nawong aron makita sa mga tawo. Sa pagkalahi, ang atong pribadong mga pag-ampo kinahanglang ipahayag sa mapainubsanong paagi aron mahimong bililhon atubangan sa Diyos.—Mateo 6:5, 6, 16.
15. (a) Unsay atong mahimo aron padayong mahuptan ang pagkamapainubsanon sa hunahuna? (b) Unsay pipila ka maayong mga panig-ingnan sa pagkamapainubsanon?
15 Matabangan ang mga Kristohanon sa paghupot ug tinuod nga pagkamapainubsanon sa hunahuna pinaagi sa pagsentro sa hunahuna sa labing maayong mga panig-ingnan sa pagkamapainubsanon, si Jehova nga Diyos ug si Jesu-Kristo. Aron mahimo kini, kinahanglan natong regular nga tun-an ang Bibliya ug ang mga tabang sa pagtuon sa Bibliya nga gitagana sa “matinumanon ug maalamong ulipon.” (Mateo 24:45) Ang maong pagtuon hinungdanon kaayo alang sa Kristohanong mga magtatan-aw, “aron ang [ilang] kasingkasing dili magmapahitas-on ibabaw sa [ilang] mga igsoon.” (Deuteronomio 17:19, 20; 1 Pedro 5:1-3) Hinuktoki ang daghang panig-ingnan sa mga tawo nga napanalanginan tungod sa ilang mapainubsanong tinamdan, sama kang Ruth, Ana, Elisabet, ug daghan pang uban. (Ruth 1:16, 17; 1 Samuel 1:11, 20; Lucas 1:41-43) Hunahunaa usab ang daghang maayong mga panig-ingnan sa inilang mga tawo nga nagpabiling mapainubsanon diha sa pag-alagad kang Jehova, sama kang David, Josias, Juan Bawtista, ug si apostol Pablo. (2 Cronicas 34:1, 2, 19, 26-28; Salmo 131:1; Juan 1:26, 27; 3:26-30; Buhat 21:20-26; 1 Corinto 15:9) Ug unsa na man ang daghang panig-ingnan sa pagkamapainubsanon nga atong makita diha sa Kristohanong kongregasyon sa atong modernong panahon? Pinaagi sa pagpalandong sa maong mga panig-ingnan, ang matuod nga mga Kristohanon matabangan sa pagbaton ug “pagkamapainubsanon sa hunahuna ngadto sa usag usa.”—1 Pedro 5:5.
16. Sa unsang paagi ang Kristohanong ministeryo makatabang kanato nga magmapainubsanon?
16 Ang pagpakigbahin nga regular sa Kristohanong ministeryo makatabang usab kanato nga magmapainubsanon. Mahimo kitang epektibo sa pagsangyaw sa mga estranghero nga atong makaplagan diha sa balay-balay ug sa ubang mga dapit kon kita mapainubsanon ug hunahuna. Kini tinuod gayod sa dihang ang mga tagbalay dili matinagdanon o kaha dili maabiabihon sa sinugdan sa dihang sangyawan sa mensahe sa Gingharian. Kasagarang supakon ang atong mga tinuohan, ug ang pagkamapainubsanon makatabang sa Kristohanon sa pagtubag kanunay sa mga pangutana “uban ang kalumo sa buot ug halawom nga pagtahod.” (1 Pedro 3:15) Ang mapainubsanong mga alagad sa Diyos namalhin sa bag-ong mga teritoryo ug sila nakatabang sa mga tawo nga lain ug kultura ug sukdanan sa pagkinabuhi. Ang maong mga ministro mahimong nalisdan sa pagtuon ug bag-ong pinulongan aron mas makatabang sa mga tawong gusto nilang sangyawan sa maayong balita. Pagkadalayegon gayod!—Mateo 28:19, 20.
17. Unsang Kristohanong mga responsabilidad ang nagkinahanglan ug pagkamapainubsanon?
17 Tungod sa pagkamapainubsanon, daghan ang nagtuman sa ilang Kristohanong mga katungdanan, nga nag-una sa intereses sa uban kay sa ilang kaugalingon. Pananglitan, ang Kristohanong amahan kinahanglang magmapainubsanon aron makagahin ug panahon gikan sa iyang kaugalingong mga kalihokan alang sa pagpangandam ug sa pagdumalag epektibong pagtuon sa Bibliya uban sa iyang mga anak. Ang pagkamapainubsanon makatabang usab sa mga anak aron ilang pasidunggan ug sugton ang ilang mga ginikanan bisan pag sila dili hingpit. (Efeso 6:1-4) Ang mga asawa nga adunay dili-magtutuong bana kasagarang nagsagubang sa mga kahimtang nga nagkinahanglan nga sila magmapainubsanon samtang gipaningkamotan nilang makabig sa kamatuoran ang ilang mga kapikas pinaagi sa “maputling panggawi uban ang halawom nga pagtahod.” (1 Pedro 3:1, 2) Hinungdanon usab ang pagkamapainubsanon ug nagsakripisyo-sa-kaugalingon nga gugma samtang mahigugmaon natong ginaatiman ang mga panginahanglan sa masakiton ug tigulang nga mga ginikanan.—1 Timoteo 5:4.
Ang Pagkamapainubsanon Makasulbad ug mga Suliran
18. Sa unsang paagi ang pagkamapainubsanon makatabang kanato sa paghusay sa mga kabingkilan?
18 Dili hingpit ang tanang tawhanong mga alagad sa Diyos. (Santiago 3:2) Mahimong motungha usahay ang mga kabingkilan o di-pagsinabtanay tali sa duha ka Kristohanon. Ang usa ka tawo mahimong adunay balidong hinungdan sa pagreklamo batok sa lain. Kasagarang mahusay ra ang maong mga kabingkilan pinaagi sa pagpadapat niining tambaga: “Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain. Ingon nga si Jehova kinabubut-on nga nagpasaylo kaninyo, buhata usab ninyo ang ingon.” (Colosas 3:13) Tinuod, dili sayon nga sundon kining tambaga, apan ang pagkamapainubsanon makatabang sa usa sa pagpadapat niini.
19. Unsay kinahanglan natong hinumdoman sa dihang kita makigsulti sa usa nga nakapasilo kanato?
19 Usahay, mahimong hunahunaon sa usa ka Kristohanon nga ang usa ka balidong hinungdan sa pagreklamo maoy seryoso kaayo nga dili mahimong dili na lang kana tagdon. Sa maong panahon, ang pagkamapainubsanon makatabang kaniya nga duolon ang tawo nga iyang gituohang nakasala kaniya sa tuyo nga mapasig-uli ang ilang maayong kabubut-on. (Mateo 18:15) Ang usa ka hinungdan nga magpadayon ang mga di-pagsinabtanay tali sa mga Kristohanon mao nga ang usa o tingali ang duha ka partido maoy hambogiro kaayo nga dili moangkon sa ilang sayop. O ang usa nga mouna sa pagduol mahimong miduol nga nagpakamatarong sa kaugalingon ug nanaway pa. Sa pagkalahi, ang tinuod nga mapainubsanong tinamdan maoy epektibo kaayo aron mahusay ang daghang kabingkilan.
20, 21. Unsa ang usa sa labing talagsaong mga tabang aron magmapainubsanon?
20 Ang usa ka hinungdanong lakang aron maugmad ang pagkamapainubsanon mao ang pag-ampo alang sa tabang sa Diyos ug sa iyang espiritu. Apan hinumdomi, “Ang Diyos . . . magahatag ug dili-takos nga kalulot [lakip ang iyang balaang espiritu] sa mga mapainubsanon.” (Santiago 4:6) Busa kon ikaw adunay pakigbangi batok sa isigkamagtutuo, ampo kang Jehova aron matabangan ka nga mapainubsanong dawaton ang imong kasaypanan nga maoy hinungdan sa kabingkilan, magamay man kana o madako. Kon ikaw nahiubos ug ang nakasala sinserong moingon, “Gikasubo ko,” nan mapainubsanong pasayloa siya. Kon malisdan ka sa pagpasaylo, pangayog tabang kang Jehova diha sa pag-ampo nga mawagtang unta ang nagpabiling pagkamapahitas-on gikan sa imong kasingkasing.
21 Ang pagkasabot sa daghang kaayohan nga ipatungha sa pagkamapainubsanon angayng magdasig kanato sa pag-ugmad ug paghupot niining bililhong hiyas. Pagkatalagsaon ang mga panig-ingnan ni Jehova nga Diyos ug ni Jesu-Kristo aron atong mahimo kana! Ayaw gayod kalimti ang pasalig sa Diyos: “Ang sangpotanan sa pagpaubos ug pagkahadlok kang Jehova maoy bahandi ug himaya ug kinabuhi.”—Proverbio 22:4.
Mga Punto nga Palandongon
• Kinsa ang labing maayong mga panig-ingnan sa pagkamapainubsanon?
• Nganong lisod ugmaron ang pagkamapainubsanon?
• Unsay makatabang kanato aron magmapainubsanon?
• Nganong hinungdanon kaayo nga magpabiling mapainubsanon?
[Hulagway sa panid 26]
Si Jesus tinuod nga mapainubsanon
[Hulagway sa panid 28]
Ang kalibotan nagdasig sa mga tawo nga maningkamot nga molabaw sa uban
[Credit Line]
WHO photo by L. Almasi/K. Hemzǒ
[Hulagway sa panid 29]
Ang pagkamapainubsanon makatabang kanato sa pagsangyaw sa mga estranghero
[Mga hulagway sa panid 30]
Ang mga kabingkilan kasagarang mahusay pinaagi sa atong mapainubsanong pagtabon niana ug gugma
[Mga hulagway sa panid 31]
Adunay daghang paagi nga ang mga Kristohanon makapakitag pagkamapainubsanon