Usa ka Pagdumala Aron sa Pagtuman sa Katuyoan sa Diyos

“[Ang Diyos] nagapalihok sa tanang butang sumala sa gilaraw sa iyang kabubut-on.”—EFESO 1:11.

 1. Nganong ang tanang kongregasyon sa mga Saksi ni Jehova magtigom sa Abril 12, 2006?

SA Miyerkoles sa gabii, Abril 12, 2006, duolan sa 16 ka milyong tawo ang magtigom aron sa pagsaulog sa Panihapon sa Ginoo. Sa matag tigomanan, aduna unyay lamesa diin ipahimutang ang tinapay nga walay lebadura, nga naghawas sa lawas ni Kristo, ug ang pulang bino, nga nagsimbolo sa iyang giula nga dugo. Sa hinapos nga bahin sa pakigpulong nga magpatin-aw sa kahulogan sa Memoryal sa kamatayon ni Jesus, kining maong mga emblema—una ang tinapay, dayon ang bino—ipasa ngadto sa tanan nga nanambong. Diha sa pipila ka kongregasyon sa mga Saksi ni Jehova, usa o kapin pa sa nanambong ang makig-ambit sa mga emblema. Apan, sa kadaghanang kahimtang walay usa sa nanambong ang makig-ambit. Nganong pipila lamang ka Kristohanon, kadtong naglaom nga mopuyo sa langit, ang makig-ambit, samtang ang kadaghanan, kadtong kinsa naglaom nga mopuyo sa yuta sa walay kataposan, dili man makig-ambit?

2, 3. (a) Sa unsang paagi si Jehova naglalang sumala sa iyang katuyoan? (b) Tungod sa unsang katuyoan nga gilalang ni Jehova ang yuta ug ang tawo?

² Si Jehova maoy usa ka Diyos sa katuyoan. Sa pagtuman sa iyang katuyoan, siya “nagapalihok sa tanang butang sumala sa gilaraw sa iyang kabubut-on.” (Efeso 1:11) Una niyang gilalang ang iyang bugtong-Anak. (Juan 1:1, 14; Pinadayag 3:14) Unya, pinaagi sa iyang Anak, si Jehova naglalang ug usa ka pamilya sa espiritung mga anak ug sa ngadtongadto sa pisikal nga uniberso, lakip na ang yuta ug ang tawo nga mopuyo niana.—Job 38:4, 7; Salmo 103:19-21; Juan 1:2, 3; Colosas 1:15, 16.

³ Wala lalanga ni Jehova ang yuta ingong sulayanan sa mga tawo aron sa pagtino kon kuwalipikado ba silang idugang ngadto sa espiritung mga anak sa langit, ingon sa gitudlo sa daghang relihiyon sa Kakristiyanohan. Iya kining gilalang nga may tinong katuyoan diha sa iyang hunahuna, aron kini “pagapuy-an.” (Isaias 45:18) Gilalang sa Diyos ang yuta alang sa tawo ug ang tawo alang sa yuta. (Salmo 115:16) Ang enterong globo pagahimoong paraiso, nga mapuno sa matarong nga mga tawo, kinsa magtikad ug mag-atiman niana. Ang paglaom nga sa ngadtongadto moadto ra sa langit wala gayod itanyag ngadto sa unang tawhanong magtiayon.—Genesis 1:26-28; 2:7, 8, 15.

Ang Katuyoan ni Jehova Gikuwestiyon

 4. Sa unsang paagi gikuwestiyon ang paagi ni Jehova sa pagpasundayag sa pagkasoberano diha sa sinugdanan sa kasaysayan sa tawo?

⁴ Usa ka espiritung anak sa Diyos ang mirebelde ug determinado nga santaon ang katuyoan ni Jehova, nga nag-abuso sa gasa sa Diyos nga kagawasan sa pagpili. Iyang gitugaw ang kalinaw nga nasinati niadtong tanan nga nagpasundayag ug mahigugmaong pagpasakop sa pagkasoberano ni Jehova. Si Satanas maoy nanguna sa unang tawhanong magtiayon sa pagsubay sa dalan nga mag-independente sa Diyos. (Genesis 3:1-6) Wala niya kuwestiyona ang gahom ni Jehova, kondili iyang gikuwestiyon ang Iyang paagi sa pagpasundayag sa pagkasoberano ug sa ingon ang Iyang katungod sa pagmando. Busa, ang sukaranang isyu labot sa pagkasoberano ni Jehova mitungha dinhi sa yuta, sa sinugdanan pa lang sa kasaysayan sa tawo.

 5. Unsang segundaryong isyu ang gipatungha, nga naglangkit kang kinsa?

⁵ Dakog kalabotan nianang pangunang isyu sa unibersohanong pagkasoberano mao ang ikaduhang isyu nga gipatungha ni Satanas sa mga adlaw ni Job. Gikuwestiyon ni Satanas ang motibo sa mga linalang ni Jehova sa pagpasakop ug pag-alagad Kaniya. Gipasumbingay ni Satanas nga sila nagbuhat niana tungod sa hakog nga mga katarongan ug kon ipailalom sa pagsulay, ilang talikdan ang Diyos. (Job 1:7-11; 2:4, 5) Bisan tuod gipatungha kana may kalabotan sa usa ka tawhanong alagad ni Jehova, kining maong hagit naglangkit usab sa espirituhanong mga anak sa Diyos, bisan sa bugtong-Anak ni Jehova.

 6. Sa unsang paagi si Jehova nagtuman sa iyang katuyoan ug sa kahulogan sa iyang ngalan?

⁶ Nagtuman sa iyang katuyoan ug sa kahulogan sa iyang ngalan, gipahinabo ni Jehova ang iyang kaugalingon nga mahimong Manalagna ug Manluluwas.a Iyang giingnan si Satanas: “Ibutang ko ang panag-away tali kanimo ug sa babaye ug tali sa imong binhi ug sa iyang binhi. Siya magsamad kanimo sa ulo ug ikaw magsamad kaniya sa tikod.” (Genesis 3:15) Pinaagi sa Binhi sa “babaye,” o sa langitnong bahin sa iyang organisasyon, tubagon ni Jehova ang hagit ni Satanas ug tagan-an ang mga kaliwat ni Adan ug paglaom nga maluwas ug mabuhi.—Roma 5:21; Galacia 4:26, 31.

“Ang Sagradong Tinago sa Iyang Kabubut-on”

 7. Unsang katuyoan ang gipadayag ni Jehova pinaagi kang apostol Pablo?

⁷ Sa iyang sulat ngadto sa mga Kristohanon sa Efeso, maayo kaayong pagkapatin-aw ni apostol Pablo kon giunsa pagdumala ni Jehova ang mga butang aron sa pagtuman sa iyang katuyoan. Si Pablo misulat: “Gipahibalo niya kanato ang sagradong tinago sa iyang kabubut-on. Sumala sa iyang gikahimut-an nga gilaraw niya sa iyang kaugalingon ang usa ka pagdumala inig-abot sa kinutoban sa tinudlong kapanahonan, nga mao, aron tigomon pag-usab ang tanang butang diha kang Kristo, ang mga butang sa mga langit ug ang mga butang sa yuta.” (Efeso 1:9, 10) Ang mahimayaong katuyoan ni Jehova mao ang pagpatungha ug nahiusang uniberso nga puy-an sa mga linalang nga mahigugmaong nagpasakop sa iyang pagkasoberano. (Pinadayag 4:11) Sa ingon ang iyang ngalan mabalaan, si Satanas mapamatud-ang bakakon, ug ang iyang kabubut-on matuman “sa langit, mao man usab sa yuta.”—Mateo 6:10.

 8. Unsa ang kahulogan sa pulong nga gihubad ug “pagdumala”?

⁸ Ang “gikahimut-an,” o katuyoan ni Jehova, matuman pinaagi sa “usa ka pagdumala.” Gigamit ni Pablo ang usa ka pulong nga sa literal nagkahulogan ug “pagdumala sa panimalay.” Kini nagtumong, dili sa usa ka kagamhanan, sama sa Mesiyanikong Gingharian, kondili sa paagi sa pagdumala sa mga butang.b Ang kahibulongang paagi nga si Jehova magadumala sa mga butang aron sa pagpalampos sa iyang katuyoan naglangkit sa usa ka “sagradong tinago” nga anam-anam nga gipadayag latas sa kasiglohan.—Efeso 1:10; 3:9.

 9. Sa unsang paagi inanayng gipadayag ni Jehova ang sagradong tinago sa iyang kabubut-on?

⁹ Pinaagi sa sunodsunod nga mga pakigsaad, inanay nga gipadayag ni Jehova kon sa unsang paagi matuman ang iyang katuyoan mahitungod sa Binhi nga gisaad didto sa Eden. Ang iyang pakigsaad kang Abraham nagpadayag nga ang gisaad nga Binhi moabot sa yuta diha sa kaliwatan ni Abraham ug mao ang paagi diin ang “tanang nasod sa yuta” magpanalangin sa ilang kaugalingon. Ang maong pakigsaad nagpaila usab nga adunay kauban ang pangunang bahin sa binhi. (Genesis 22:17, 18) Ang pakigsaad sa Balaod nga gihimo uban sa unodnong Israel nagbutyag sa katuyoan ni Jehova nga makabaton ug “usa ka gingharian sa mga saserdote.” (Exodo 19:5, 6) Ang pakigsaad kang David nagpakita nga ang Binhi mao ang mahimong Pangulo sa usa ka Gingharian hangtod sa panahong walay tino. (2 Samuel 7:12, 13; Salmo 89:3, 4) Sa dihang ang mga Hudiyo naagak na sa Balaod sa pakigsaad ngadto sa Mesiyas, gipadayag ni Jehova ang uban pang mga bahin sa katumanan sa iyang katuyoan. (Galacia 3:19, 24) Ang mga tawo nga makauban sa pangunang bahin sa binhi maglangkob sa gitagna nga “gingharian sa mga saserdote” ug pagadad-on ngadto sa “usa ka bag-ong pakigsaad” ingong bag-ong “Israel,” usa ka espirituwal nga nasod.—Jeremias 31:31-34; Hebreohanon 8:7-9.c

10, 11. (a) Sa unsang paagi gipadayag ni Jehova ang gitagna nga Binhi? (b) Nganong ang bugtong-Anak sa Diyos mianhi man sa yuta?

¹⁰ Aron matuman ang katuyoan sa Diyos, miabot ang panahon nga motungha dinhi sa yuta ang gitagna nga Binhi. Gipadala ni Jehova si manulondang Gabriel aron pahibaloon si Maria nga siya manganak ug usa ka anak nga lalaki nga pagatawgong Jesus. Ang manulonda miingon kaniya: “Kini siya mahimong bantogan ug pagatawgong Anak sa Labing Hataas; ug ihatag kaniya ni Jehova nga Diyos ang trono ni David nga iyang amahan, ug magamando siya ingon nga hari sa balay ni Jacob hangtod sa kahangtoran, ug walay pagkatapos ang iyang gingharian.” (Lucas 1:32, 33) Busa naklaro na kon kinsa ang gisaad nga Binhi.—Galacia 3:16; 4:4.

¹¹ Ang bugtong-Anak ni Jehova paanhion sa yuta ug pagasulayan hangtod sa kamatayon. Ang hingpit nga tubag sa hagit ni Satanas magdepende kang Jesus. Magmatinumanon ba siya sa iyang Amahan? Kini naglangkit ug sagradong tinago. Gipatin-aw sa ulahi ni apostol Pablo ang papel ni Jesus: “Ang sagradong tinago niining diyosnong pagkamahinalaron: ‘Siya gipadayag diha sa unod, gipahayag nga matarong diha sa espiritu, nagpakita sa mga manulonda, giwali taliwala sa kanasoran, gituohan dinhi sa kalibotan, gidawat sa itaas diha sa kahimayaan.’” (1 Timoteo 3:16) Oo, pinaagi sa iyang dili-matarog nga integridad hangtod sa iyang kamatayon, gihatag ni Jesus ang hingpit nga tubag sa hagit ni Satanas. Apan ang ubang mga detalye sa sagradong tinago wala pa mabutyag.

‘Ang Sagradong Tinago sa Gingharian sa Diyos’

12, 13. (a) Unsa ang usa ka bahin sa ‘sagradong tinago sa gingharian sa Diyos’? (b) Unsay nalangkit sa pagpili ni Jehova ug limitadong gidaghanon sa mga tawo nga moadto sa langit?

¹² Panahon sa usa sa iyang mga panaw sa pagsangyaw sa Galilea, gipaila ni Jesus nga ang sagradong tinago dakog kalabotan sa iyang Mesiyanikong Ginghariang kagamhanan. Iyang giingnan ang iyang mga tinun-an: “Kaninyo gitugot ang pagsabot sa sagradong mga tinago sa gingharian sa mga langit [“gingharian sa Diyos,” Marcos 4:11].” (Mateo 13:11) Ang usa ka bahin nianang maong tinago naglangkit sa pagpili ni Jehova ug usa ka “gamayng panon” sa 144,000 ka tawo nga makauban sa iyang Anak ingong bahin sa binhi, aron magmando uban kaniya sa langit.—Lucas 12:32; Pinadayag 14:1, 4.

¹³ Tungod kay ang mga tawo gilalang man aron papuy-on sa yuta, gikinahanglan nga si Jehova magpatungha ug “usa ka bag-ong linalang” aron ang pipila ka tawo makaadto sa langit. (2 Corinto 5:17) Nagsulti ingong usa niadtong gipili nga makabaton niining talagsaong langitnong paglaom, si apostol Pedro misulat: “Bulahan ang Diyos ug Amahan sa atong Ginoong Jesu-Kristo, kay sumala sa iyang dakong kaluoy kita iyang gipahimugso pag-usab ngadto sa usa ka buhi nga paglaom pinaagi sa pagkabanhaw ni Jesu-Kristo gikan sa mga patay, ngadto sa usa ka dili-madunoton ug wala-mahugawi ug dili-malawos nga panulondon. Gitagana kini sa mga langit alang kaninyo.”—1 Pedro 1:3, 4.

14. (a) Sa unsang paagi ang mga dili-Hudiyo nalangkit sa ‘sagradong tinago sa gingharian sa Diyos’? (b) Nganong nasabtan man nato kining “lawom nga mga butang sa Diyos”?

¹⁴ Ang laing bahin sa sagradong tinago maylabot sa umaabot nga Ginghariang kagamhanan mao ang kabubut-on sa Diyos nga ilakip ang mga dili-Hudiyo sa pipila ka tawo nga pilion nga magmando uban ni Kristo sa langit. Gipatin-aw ni Pablo kining bahina sa “pagdumala,” o paagi ni Jehova sa pagdumala sa katumanan sa iyang katuyoan: “Sa ubang mga kaliwatan kini nga tinago wala ipahibalo ngadto sa mga anak sa mga tawo ingon sa pagkapadayag niini karon ngadto sa iyang balaang mga apostoles ug mga manalagna pinaagi sa espiritu, nga mao, nga ang katawhan sa kanasoran mahimong kaubang mga manununod ug kaubang mga sangkap sa lawas ug mga mag-aambit uban kanato sa saad nga nahiusa kang Kristo Jesus pinaagi sa maayong balita.” (Efeso 3:5, 6) Ang kahulogan niining bahina sa sagradong tinago gipadayag ngadto sa “balaang mga apostoles.” Sa susama karon, kon wala pa ang tabang sa balaang espiritu, dili nato masabtan kining “lawom nga mga butang sa Diyos.”—1 Corinto 2:10; 4:1; Colosas 1:26, 27.

15, 16. Nganong gipili man ni Jehova ang kaubang mga magmamando ni Kristo gikan sa katawhan?

¹⁵ “Ang usa ka gatos ug kap-atag-upat ka libo” nga nakita nga nagbarog uban sa “Kordero” diha sa langitnong Bukid sa Zion giingon nga “gipalit gikan sa yuta,” “gipalit gikan sa katawhan ingong mga unang bunga ngadto sa Diyos ug sa Kordero,” si Kristo Jesus. (Pinadayag 14:1-4) Gipili ni Jehova ang una sa iyang langitnong mga anak nga mahimong pangunang bahin sa binhi nga gisaad sa Eden, apan nganong gipili man niya ang mga kauban ni Jesus gikan sa katawhan? Gipatin-aw ni apostol Pablo nga kining limitadong gidaghanon “tinawag sumala sa katuyoan [ni Jehova],” “sumala sa gikahimut-an sa iyang kabubut-on.”—Roma 8:17, 28-30; Efeso 1:5, 11; 2 Timoteo 1:9.

¹⁶ Ang katuyoan ni Jehova mao ang pagbalaan sa iyang dako ug balaang ngalan ug pagbindikar sa iyang unibersohanong pagkasoberano. Pinaagi sa iyang labing maalamon nga “pagdumala,” o paagi sa pagdumala sa mga butang, gipadala ni Jehova ang iyang panganay nga Anak dinhi sa yuta, diin siya gisulayan hangtod sa kamatayon. Dugang pa, gitino ni Jehova nga ang Mesiyanikong Ginghariang kagamhanan sa iyang Anak maglakip sa mga tawo nga nagbayaw usab sa Iyang pagkasoberano hangtod sa kamatayon.—Efeso 1:8-12; Pinadayag 2:10, 11.

17. Nganong malipay kita nga si Kristo ug ang iyang kaubang mga magmamando nagkinabuhi kanhi ingong mga tawo?

¹⁷ Gipakita ni Jehova ang iyang dakong gugma alang sa mga kaliwat ni Adan pinaagi sa pagpadala sa iyang Anak dinhi sa yuta ug pinaagi sa pagpili gikan sa katawhan niadtong mahimong kaubang mga magmamando sa Anak diha sa Ginghariang kagamhanan. Sa unsang paagi makabenepisyo kana sa uban nga nagmatinumanon kang Jehova, sukad pa sa panahon ni Abel? Natawo ingong mga ulipon sa sala ug kamatayon, ang dili-hingpit nga mga tawo kinahanglang mamaayo sa espirituwal ug pisikal ug makadangat sa kahingpitan, sumala sa orihinal nga katuyoan ni Jehova alang sa katawhan. (Roma 5:12) Makapahupay kaayo alang sa tanan nga naglaom ug walay-kataposang kinabuhi dinhi sa yuta nga mahibalo nga ang ilang Hari magpakita kanila ug gugma ug malulotong pagsabot sama sa iyang gipakita sa iyang mga tinun-an panahon sa iyang yutan-ong ministeryo! (Mateo 11:28, 29; Hebreohanon 2:17, 18; 4:15; 7:25, 26) Ug makapadasig kaayo nga maamgohan nila nga ang mga hari-saserdote nga kauban ni Kristo didto sa langit maoy mga babaye ug lalaki sa pagtuo nga nakigbisog usab sa personal nga mga kahuyangan ug nakasinati sa mga suliran sa kinabuhi sama kanato!—Roma 7:21-25.

Ang Dili-Mapakyas nga Katuyoan ni Jehova

18, 19. Nganong ang gipamulong ni Pablo sa Efeso 1:8-11 mas klaro na kanato, ug unsay hisgotan sa sunod nga artikulo?

¹⁸ Mas masabtan nato karon ang kahulogan sa gipamulong ni Pablo ngadto sa dinihogang mga Kristohanon, nga makita diha sa Efeso 1:8-11. Siya miingon nga gipahibalo ni Jehova kanila “ang sagradong tinago sa iyang kabubut-on,” nga sila “natudlo ingong mga manununod” uban kang Kristo, ug sila “gimbut-an daan sumala sa katuyoan niya nga nagapalihok sa tanang butang sumala sa gilaraw sa iyang kabubut-on.” Atong nasabtan nga kini mohaom sa kahibulongang “pagdumala” ni Jehova sa mga butang alang sa katumanan sa iyang katuyoan. Makatabang usab kini kanato sa pagsabot kon nganong pipila lamang ka Kristohanon nga nagtambong sa Panihapon sa Ginoo ang makig-ambit sa mga emblema.

¹⁹ Sa sunod nga artikulo, atong masabtan kon unsay kahulogan sa Memoryal sa kamatayon ni Kristo alang sa mga Kristohanon kansang paglaom langitnon. Mahibaloan usab nato kon nganong ang milyonmilyon kansang paglaom mao ang pagpuyo sa yuta sa walay kataposan angayng mainteresado pag-ayo sa gisimbolohan sa Memoryal.

[Mga footnote]

Agig Pagsubli

• Nganong gilalang ni Jehova ang yuta ug gibutang ang tawo diha niana?

• Nganong ang bugtong-Anak ni Jehova kinahanglang pagasulayan dinhi sa yuta?

• Nganong mipili man si Jehova ug mga tawo ingong kaubang mga magmamando ni Kristo?