Matapos ba Gayod ang Kabangisan?

DAGHAN gayod ang mouyon nga ang kahakog maoy pangunang hinungdan sa kabangisan sa kalibotan karon. Ang mga binhi nga gipugas daghang katuigan kanhi sa ako-una nga kaliwatan nagpatunghag katilingban diin ang kadaghanan naghunahuna lamang sa kaugalingon. Daghan ang mobuhat sa tanan aron lang makuha ang ilang gusto, nga subsob moresulta sa mabangis nga mga buhat. Kini tinuod dili lamang sa mga indibiduwal kondili sa entirong mga nasod.

Ang kinabuhi sa isigkatawo morag dili na hinungdanon. Ang ubang mga tawo ganahan gani nga mohimog kabangisan. Malingaw sila niini, sama gayod sa mga kriminal nga misugid nga ilang dagmalan ang uban tungod sa kaukyab nga ilang bation sa pagbuhat niana. Ug komosta ang milyonmilyong tawo nga gustong motan-awg mapintas ug mabangis nga mga salida nga tungod niana nakasapig dako ang industriya sa pelikula? Ang kanunayng pagkaladlad sa linuog nga mga buhat pinaagi sa kalingawan ug sa media maoy hinungdan nga ang uban dili na mobatig kaluoy.

Ang kabangisan subsob nga makadaot sa hunahuna ug maoy sinugdanan sa sunod-sunod nga mga buhat sa kapintasan. Mahitungod sa kapintasan nga gipatungha sa kabangisan, si Noemí Díaz Marroquín, kinsa nagtudlo didto sa National Autonomous University of Mexico, nag-ingon: “Ang kapintasan makat-onan, kini maoy bahin sa kultura . . . Kita makakat-on sa pagbuhat ug kapintasan sa dihang ang atong palibot nagtugot ug nag-awhag niana.” Busa, kadtong nakaagom sa pag-abuso lagmit kaayong mag-abuso sa uban, tingali sa samang mga paagi nga sila giabusohan.

Sa ubang mga kaso, kadtong sayop nga naggamit sa mga substansiya sama sa alkoholikong mga ilimnon ug mga droga sa ngadtongadto lagmit mahimong bangis. Anaa usab ang mga indibiduwal nga dili tagbaw sa ilang kagamhanan tungod kay wala niini ikatagana ang mga panginahanglan sa mga tawo. Ang uban kanila, kay gustong ipahibalo ang ilang mga panglantaw, mohimog mabangis nga mga buhat ug magpalambo sa terorismo, nga sagad makadaot sa mga inosente.

Apan makapangutana ka tingali: ‘Nakakat-on ba ang mga tawo sa paglihok nga mabangison sa ilang kaugalingon lamang? Unsay nagpaluyo niining presenteng kahimtang?’

Kinsa ba Gayod ang Nagpaluyo sa Kabangisan?

Ang Bibliya nagtug-an kanato nga si Satanas nga Yawa adunay kusganong impluwensiya niining kalibotana, nga nagtawag kaniyang “ang diyos niini nga sistema sa mga butang.” (2 Corinto 4:4) Siya mao ang labing hakog ug bangis nga persona sa uniberso. Haom ang pagkahubit ni Jesus kaniya ingong “mamumuno” ug “amahan sa bakak.”—Juan 8:44.

Sukad sa pagsupak ni Adan ug Eva, ang tawo nailalom sa gamhanang impluwensiya ni Satanas. (Genesis 3:1-7, 16-19) Mga 15 ka tuig human motalikod kang Jehova ang unang tawhanong magtiayon, ang rebelyosong mga manulonda nagsul-ob ug tawhanong mga lawas, nakigrelasyon sa mga babaye, ug nakapatungha ug mga mestiso nga gitawag ug Nepilim. Unsa may ilang linaing hiyas? Ang ilang ngalan naghatag sa tubag. Kini nagpasabot ug “mga Tigpukan,” o “silang nagpahinabo nga ang uban mapukan.” Dayag nga sila maoy mapintas nga mga indibiduwal nga nagpahinabog kabangisan ug imoralidad nga natapos lamang sa dihang gipahinabo sa Diyos ang Lunop. (Genesis 6:4, 5, 17) Bisan tuod ang mga Nepilim nangalaglag sa Lunop, ang ilang mga amahan namalik ngadto sa espirituhanong dapit ingong dili-makitang mga demonyo.—1 Pedro 3:19, 20.

Ang kabangis niining rebelyosong mga manulonda nadayag diha sa kaso sa usa ka bata nga gigamhan sa demonyo sa adlaw ni Jesus. Ang demonyo subli-subling nagpakirigkirig sa bata, nga naglabay niini ngadto sa kalayo ug ngadto sa tubig sa tuyo nga kini mamatay. (Marcos 9:17-22) Klaro nga ang maong “daotang mga puwersa nga espirituhanon” nagbanaag sa kawalay-kaluoy sa ilang mabangis nga komander, si Satanas nga Yawa.—Efeso 6:12.

Karon, ang impluwensiya sa mga demonyo nagpadayon sa pagpalambo sa kabangisan sa tawo, ingon sa gitagna diha sa Bibliya: “Sa kataposang mga adlaw moabot ang makuyaw nga mga panahong lisod sagubangon. Kay ang mga tawo unya magmahigugmaon sa ilang kaugalingon, . . . mapagawalon, mapahitas-on, . . . dili-mapasalamaton, dili-maunongon, walay kinaiyanhong pagbati, dili-ikasabot, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig ulo, nangburot sa garbo, mga mahigugmaon sa kalipayan inay nga mga mahigugmaon sa Diyos, nga nagbaton sa dagway sa diyosnong pagkamahinalaron apan nagpanghimakak sa gahom niini.”—2 Timoteo 3:1-5.

Ang mga tagna sa Bibliya nagpadayag nga ang atong panahon ilabinang malisod tungod kay human matukod niadtong 1914 ang Gingharian sa Diyos pinaagi kang Kristo Jesus, si Satanas ug ang iyang panon sa mga demonyo gipalayas gikan sa mga langit. Ang Bibliya nagpahayag: “Alaot ang yuta ug ang dagat, tungod kay ang Yawa nanaog kaninyo, nga may dakong kasuko, kay nahibalo nga hamubo na lamang ang iyang panahon.”—Pinadayag 12:5-9, 12.

Nagpasabot ba kini nga dili na moarang-arang ang kahimtang? Si Díaz Marroquín, nga gikutlo ganina, nag-ingon nga “ang mga tawo makahimo sa pagwagtang” sa dili-maayong panggawi. Apan, kay ang impluwensiya ni Satanas kaylap man kaayo sa yuta karon, lisod wagtangon sa tawo ang kapintasan, gawas kon tugotan niya ang lahi, labaw nga puwersa nga moimpluwensiya sa iyang paagi sa paghunahuna ug paglihok. Unsa man kining puwersaha?

Posibleng Mahitabo ang mga Kausaban—Sa Unsang Paagi?

Ikalipay nga ang balaang espiritu sa Diyos mao ang labing gamhanang puwersa nga naglungtad, ug kini makabuntog sa bisan unsang impluwensiya sa demonyo. Kini nagpalambo sa gugma ug kaayohan sa mga tawo. Aron mapuno sa balaang espiritu sa Diyos, si bisan kinsa nga nagtinguha sa pagpahimuot kang Jehova kinahanglang maglikay bisan sa panggawi nga kaamgid sa kabangisan. Nagkinahanglan kinig pagbag-o sa atong personalidad aron mahiuyon kini sa kabubut-on sa Diyos. Ug unsa man kanang maong kabubut-on? Kabubut-on sa Diyos nga atong sundogon ang iyang paagi kutob sa mahimo. Nalangkit niini ang paglantaw sa uban sumala sa paglantaw sa Diyos kanila.—Efeso 5:1, 2; Colosas 3:7-10.

Ang pagtuon sa paagi sa pagdumala sa Diyos sa mga butang makapakombinsir kanimo nga si Jehova wala gayod magpakitag kawalay-interes sa uban. Wala gayod siya magtratar ni bisan kinsang tawo o sa bisan unsang mananap sa dili-makataronganong paagi.a (Deuteronomio 22:10; Salmo 36:7; Proverbio 12:10) Siya nagsalikway sa kabangisan ug sa tanan nga nagbuhat niana. (Proverbio 3:31, 32) Ang bag-ong personalidad nga gisugo ni Jehova nga ugmaron sa mga Kristohanon motabang kanila sa pag-isip sa uban nga labaw ug sa pagtahod kanila. (Filipos 2:2-4) Kanang bag-ong Kristohanong personalidad naglakip sa “malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob.” Kinahanglang ilakip ang gugma, “kay kini maoy usa ka hingpit nga bugkos sa panaghiusa.” (Colosas 3:12-14) Dili ka ba mouyon nga lahi unta kaayo ang kahimtang sa kalibotan kon dagaya pa ang maong mga hiyas?

Apan, mangutana ka tingali kon posible ba gayod ang dumalayong mga kausaban sa personalidad. Aw, tagda ang usa ka tinuod-kinabuhi nga panig-ingnan. Subsob nga singgitan ni Martínb ang iyang asawa atubangan sa ilang mga anak ug kulatahon kini pag-ayo. Usa ka higayon niana, nahimong peligroso kaayo ang situwasyon nga ang mga bata kinahanglang magpakitabang sa mga silingan. Paglabay sa daghang katuigan, ang pamilya nagsugod pagtuon sa Bibliya uban sa mga Saksi ni Jehova. Nakat-onan ni Martín nga angay niyang bag-ohon ang iyang personalidad ug ang pagtratar niya sa uban. Nakahimo ba siya sa pagbag-o? Mitubag ang iyang asawa: “Kaniadto, laig kinaiya ang akong bana kon masuko. Tungod niini, gubot kaayo ang among pamuyo sulod sa dugayng panahon. Walay mga pulong nga igong makapahayag sa akong pagpasalamat kang Jehova tungod sa iyang pagtabang kang Martín nga magbag-o. Karon siya usa na ka maayong amahan ug buotan kaayong bana.”

Usa lamang kana ka pananglitan. Sa tibuok yuta, milyonmilyon nga nagtuon sa Bibliya uban sa mga Saksi ni Jehova ang mihunong na sa pagbuhat ug kabangisan. Oo, posible ang pagbag-o.

Hapit Nang Matapos ang Tanang Kabangisan

Sa haduol nga umaabot, ang Gingharian sa Diyos—usa ka kagamhanan nga natukod na karon sa mga langit uban ang mabinationg Magmamando nga si Kristo Jesus—bug-os nang magmando sa tibuok yuta. Gipapahawa na niini sa mga langit si Satanas, ang tuboran sa tanang kabangisan, ug ang iyang mga demonyo. Sa dili madugay, ang Gingharian sa Diyos magtagbaw sa mga panginahanglan sa mahigugmaon-sa-kalinaw nga mga sakop niini dinhi sa yuta. (Salmo 37:10, 11; Isaias 11:2-5) Mao kana ang bugtong tinuod nga solusyon sa mga problema sa kalibotan. Apan komosta kon samtang nagpaabot sa iyang Gingharian, nahiagom ka sa kabangisan?

Ang pagpanimalos dili makatabang. Moresulta lamang kana sa dugang kabangisan. Ang Bibliya nag-awhag kanato sa pagsalig kang Jehova, kinsa sa iyang gitakdang panahon ‘maghatag sa matag usa sumala sa iyang mga dalan, sumala sa bunga sa iyang mga pakiglabot.’ (Jeremias 17:10) (Tan-awa ang nagaubang kahon, “Kon Unsay Buhaton sa Dihang Mahiagom sa Kabangisan.”) Tinuod, mag-antos ka tingali tungod kay nahiagom ka sa usa ka mabangis nga krimen. (Ecclesiastes 9:11) Bisan pa niana, mahimong wagtangon sa Diyos ang mga resulta sa bisan unsang kabangisan, bisan ang kamatayon. Sumala sa iyang saad, kadtong anaa sa iyang panumdoman nga nawad-an sa ilang kinabuhi tungod sa kabangisan mabuhi pag-usab.—Juan 5:28, 29.

Bisan tuod posible gihapon nga mahiagom kita sa kabangisan, makakaplag kitag kahupayan sa pagbaton ug suod nga relasyon uban sa Diyos ug lig-ong pagtuo sa iyang mga saad. Tagda si Sara kinsa nagmatuto sa iyang duha ka anak nga lalaki ug nagsuportar kanila aron makakuhag maayong edukasyon nga walay tabang sa usa ka bana. Pagkatigulang na niya, giabandonar siya sa iyang mga anak, nga wala magsustento kaniya ni mag-atiman kaniya sa dihang siya nagmasakiton. Apan, si Sara, nga usa na ka Kristohanon karon, miingon: “Bisan tuod dili nako kapugngan ang pagbatig kasubo, wala gayod ako pasagdi ni Jehova. Akong nabatyagan ang iyang tabang pinaagi sa akong espirituwal nga mga igsoon, kinsa kanunayng nag-atiman kanako. Hugot ang akong pagtuo nga sa dili madugay iyang sulbaron dili lamang ang akong mga problema kondili usab ang suliran niadtong tanan nga nagasalig sa iyang gahom ug nagatuman sa iyang mga sugo.”

Kinsa ang espirituwal nga mga igsoon nga gihisgotan ni Sara? Sila mao ang iyang Kristohanong mga kauban, nga mga Saksi ni Jehova. Sila naglangkob sa tibuok-kalibotang mga igsoon sa mabinationg mga tawo kinsa kombinsido nga sa dili madugay matapos na ang kabangisan. (1 Pedro 2:17) Mahanaw na si Satanas nga Yawa, ang pangunang responsable sa kabangisan, lakip na kadtong nagagawi nga sama kaniya. Kining “panahon sa linuog nga mga buhat,” sumala sa pagtawag niini sa usa ka magsusulat, dili na maglungtad. Nganong dili magpakisayod bahin niining maong paglaom pinaagi sa pagpakigkita sa usa sa mga Saksi ni Jehova?

[Mga footnote]

[Kahon sa panid 6]

Kon Unsay Buhaton sa Dihang Mahiagom sa Kabangisan

Ang pulong sa Diyos nagtanyag ug praktikal nga tambag kon unsaon pag-atubang ang kabangisan. Tagda kon sa unsang paagi mapadapat nimo ang mosunod nga maalamong mga pulong:

“Ayaw pag-ingon: ‘Mobalos ako sa daotan!’ Paglaom kang Jehova, ug siya magaluwas kanimo.”—Proverbio 20:22.

“Kon ikaw makakita nga gilupigan ang usa nga diyutayg kahinguhaan ug mapintasong gisakmit ang hustisya ug pagkamatarong . . . , ayaw kahibulong sa maong butang, kay ang usa nga labi pang hataas kay sa usa nga hataas nagasud-ong.”—Ecclesiastes 5:8.

“Malipayon ang mga malumog-buot, sanglit sila magapanunod sa yuta.”—Mateo 5:5.

“Busa, ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila.”—Mateo 7:12.

“Ayaw balosi si bisan kinsa ug daotan tungod sa daotan. Pagtagana ug maayong mga butang sa atubangan sa tanang tawo. Kon mahimo, kutob sa inyong maarangan, makigdinaitay sa tanang tawo. Ayaw kamo pagpanimalos, mga hinigugma, kondili hatagig dapit ang kapungot; kay nahisulat: ‘Akoa ang panimalos; ako magabalos, nag-ingon si Jehova.’”—Roma 12:17-19.

“Bisan si Kristo nag-antos alang kaninyo, nga nagbilin kaninyog sulondan aron kamo managsunod pag-ayo sa iyang mga tunob. . . . Sa gisultihan siya ug pasipala, wala siya mobalos sa pagsultig pasipala. Sa nag-antos siya wala siya manghulga, apan nagpadayon sa pagpiyal sa iyang kaugalingon ngadto sa usa nga nagahukom sa pagkamatarong.”—1 Pedro 2:21-23.

[Mga hulagway sa panid 7]

Daghan nga natudloan ni Jehova ang mihunong na sa pagbuhat ug kabangisan