Ikaw ba Larinong Nagasulti sa “Putli nga Pinulongan”?
“Ihatag ko sa mga katawhan ang kausaban ngadto sa putli nga pinulongan, aron silang tanan magatawag sa ngalan ni Jehova.”—SOF. 3:9.
1. Unsang kahibulongang gasa ang gihatag ni Jehova kanato?
SI Jehova nga Diyos, ang Maglalalang sa tawo, mao ang tinubdan sa gasa sa pinulongan. (Ex. 4:11, 12) Iyang gihatagan ang unang tawo nga si Adan ug katakos sa pagsulti ug sa pagmugnag bag-ong mga pulong aron madugangan ang iyang bokabularyo. (Gen. 2:19, 20, 23) Pagkakahibulongan niining gasaha! Tungod niini, ang mga tawo makakomunikar na sa ilang langitnong Amahan ug makadayeg sa iyang mahimayaong ngalan.
2. Nganong lainlain na mag pinulongan ang mga tawo?
2 Sa unang 17 ka siglo nga paglungtad sa tawo, ang tanan nagsultig usa ra ka pinulongan, nga may “usa ka hugpong sa mga pulong.” (Gen. 11:1) Dayon nahitabo ang rebelyon sa adlaw ni Nimrod. Gisupak sa mga tawo ang mga instruksiyon ni Jehova, ug sila determinadong magtapok sa usa ra ka dapit nga sa ulahi gitawag ug Babel. Sila nagtukod ug usa ka dako kaayong torre, dili aron sa paghimaya kang Jehova, kondili aron sa ‘paghimog bantog nga ngalan’ alang sa ilang kaugalingon. Tungod niini gilahugay ni Jehova ang orihinal nga pinulongan sa maong mga rebelde mao nga sila misugod sa pagsultig lainlaing pinulongan. Busa, sila nagkatibulaag sa tibuok yuta.—Basaha ang Genesis 11:4-8.
3. Unsay nahitabo sa dihang gilahugay ni Jehova ang sinultihan sa mga rebelde sa Babel?
3 Ang pipila nag-ingon nga kapig 6,800 ka pinulongan ang gigamit karon sa tibuok kalibotan. Ang matag usa niini nagkinahanglag lainlaing sistema sa panghunahuna. Busa, lagmit nga sa dihang gilahugay ni Jehova nga Diyos ang sinultihan sa maong mga rebelde, bug-os niyang gihanaw sa ilang panumdoman ang pinulongan nga ilang gigamit kaniadto. Iyang gibutang sa ilang mga kaisipan ang bag-ong mga bokabularyo, sistema sa panghunahuna, ug bag-ong mga gramarya. Kanay hinungdan nga gitawag ug Babel o “Kalibog” ang dapit nga gitukoran sa maong torre! (Gen. 11:9) Makaiikag nga Bibliya lamang ang nagpatin-aw kon sa unsang paagi nagsugod ang daghang pinulongan.
Usa ka Bag-o, Putli nga Pinulongan
4. Unsay gitagna ni Jehova nga mahitabo sa atong panahon?
4 Tingali naikag ka gayod sa asoy sa Bibliya bahin sa gihimo sa Diyos didto sa Babel, apan mas makaiikag ug mas hinungdanon pa ang nagakahitabo sa atong panahon. Pinaagi sa iyang manalagna nga si Sofonias, si Jehova mitagna: “Nianang panahona ihatag ko sa mga katawhan ang kausaban ngadto sa putli nga pinulongan, aron silang tanan magatawag sa ngalan ni Jehova, aron magaalagad kaniya abaga sa abaga.” (Sof. 3:9) Unsa ang maong “putli nga pinulongan,” ug sa unsang paagi kita larinong makasulti niana?
5. Unsa ang putli nga pinulongan, ug unsay miresulta niini nga kausaban sa pinulongan?
5 Ang putli nga pinulongan mao ang kamatuoran bahin kang Jehova nga Diyos ug sa iyang mga katuyoan nga mabasa diha sa iyang Pulong, ang Bibliya. Kana nga “pinulongan” naglakip sa hustong pagsabot sa kamatuoran bahin sa Gingharian sa Diyos ug kon sa unsang paagi kini magbalaan sa ngalan ni Jehova, magbayaw sa iyang soberanya, ug magdalag walay kataposang mga panalangin sa matinumanong katawhan. Unsay moresulta sa maong kausaban sa pinulongan? Kita gisultihan nga ang mga tawo “magatawag sa ngalan ni Jehova” ug “magaalagad kaniya abaga sa abaga.” Lahi sa nahitabo sa Babel, kini nga kausaban ngadto sa putli nga pinulongan miresulta sa kadayeganan sa ngalan ni Jehova ug panaghiusa sa iyang katawhan.
Pagkat-on sa Putli nga Pinulongan
6, 7. (a) Unsay nalangkit sa pagkat-on ug usa ka bag-ong pinulongan, ug sa unsang paagi mapadapat kini sa pagtuon sa putli nga pinulongan? (b) Unsay atong hisgotan karon?
6 Kon ang usa gustong makakat-on ug laing pinulongan, dili lamang pagsag-ulo sa bag-ong mga pulong ang kinahanglan niyang buhaton. Kinahanglan usab niyang tun-an ang bag-ong sistema sa panghunahuna. Lagmit lahi ang estilo sa lohika ug pasiaw sa ubang pinulongan. Ang paglitok sa bag-ong mga pulong nagkinahanglag kausaban sa paggamit sa mga sangkap sa pagpanulti, sama sa dila. Mao usab kana ang angay natong buhaton kon magtuon kita sa putli nga pinulongan sa kamatuoran sa Bibliya. Labaw pa ang gikinahanglan kay sa yanong pagtuon sa pipila ka pangunang mga pagtulon-an sa Bibliya. Aron mahimo kitang larino sa pagsulti sa maong bag-ong pinulongan, kinahanglan natong usbon ug bag-ohon ang atong kaisipan.—Basaha ang Roma 12:2; Efeso 4:23.
7 Unsay makatabang kanato sa pagsabot sa putli nga pinulongan ug sa pagsulti niana sa larinong paagi? Sama sa pagtuon ug usa ka bag-ong pinulongan, adunay pipila ka pangunang mga paagi nga makatabang kanato aron mahanas kita sa pagsulti sa pinulongan sa kamatuoran sa Bibliya. Atong hisgotan karon ang pipila sa pangunang mga paagi nga gigamit sa mga tawo sa pagkat-on ug laing pinulongan, ug atong tan-awon kon sa unsang paagi ato kining magamit sa pagkat-on niining bag-ong mahulagwayon nga pinulongan.
Pagsulti sa Putli nga Pinulongan sa Larinong Paagi
8, 9. Unsay kinahanglan natong buhaton kon gusto kitang makakat-on sa putli nga pinulongan, ug nganong hinungdanon kaayo kini?
8 Patalinghog pag-ayo. Sa sinugdan, ang usa ka bag-ong pinulongan daw imposible gayong masabtan sa usa nga wala pa sukad makadungog niana. (Isa. 33:19) Apan kon iya kining patalinghogan pag-ayo, anam-anam niyang masabtan ang pipila ka pulong ug mamatikdan ang sistema sa pagpanulti. Sa samang paagi, kita giawhag: “Kinahanglan kitang mohatag ug labaw pa kay sa kasagarang pagtagad sa mga butang nga atong nadungog, aron dili gayod kita maanod.” (Heb. 2:1) Sublisubling giawhag ni Jesus ang iyang mga sumusunod: “Siya nga may mga igdulungog magpatalinghog.” (Mat. 11:15; 13:43; Mar. 4:23; Luc. 14:35) Oo, kinahanglan natong ‘pamation ug sabton ang diwa’ sa atong nadunggan aron mouswag ang atong pagsabot sa putli nga pinulongan.—Mat. 15:10; Mar. 7:14.
9 Ang pagpatalinghog nagkinahanglag konsentrasyon, apan kini mapuslanon gayod. (Luc. 8:18) Panahon sa atong mga tigom sa kongregasyon, kita ba naminaw pag-ayo sa mga impormasyong gipatin-aw, o naglatagaw ba ang atong hunahuna? Kita kinahanglang maminaw pag-ayo, kay kon dili, mahimong mahabol ang atong pandungog.—Heb. 5:11.
10, 11. (a) Dugang pa sa pagpatalinghog pag-ayo, unsa pa ang kinahanglan natong buhaton? (b) Unsa pay nalangkit sa pagsulti sa putli nga pinulongan?
10 Sundoga ang larinong mga mamumulong. Dugang pa sa pagpatalinghog pag-ayo, kinahanglang sundogon usab sa mga nagtuon ug bag-ong pinulongan ang sinultihan sa larinong mga mamumulong. Kini makatabang sa mga nagtuon nga malikayan ang gahing linitokan, aron dili malisdan ang uban sa pagsabot kanila. Sa susama, kinahanglang mokat-on kita gikan sa mga tawong adunay “arte sa pagpanudlo” sa bag-ong pinulongan. (2 Tim. 4:2) Patabang kanila. Magmaandam sa pagdawat sa ilang koreksiyon sa imong mga sayop.—Basaha ang Hebreohanon 12:5, 6, 11.
11 Ang pagsulti sa putli nga pinulongan wala lamang maglangkit sa pagtuo sa kamatuoran ug sa pagtudlo niini ngadto sa uban kondili sa pagpahiuyon usab sa atong mga panggawi sa mga balaod ug mga prinsipyo sa Diyos. Aron matabangan kita sa paghimo niini, kinahanglang sundogon nato ang uban, lakip ang ilang pagtuo ug kasibot. Kini naglakip usab sa pagsundog sa tibuok pagkinabuhi ni Jesus. (1 Cor. 11:1; Heb. 12:2; 13:7) Kon padayon natong buhaton kini, moresulta kini sa panaghiusa sa katawhan sa Diyos, mao nga managsama na ang atong pagsulti sa putli nga pinulongan.—1 Cor. 4:16, 17.
12. Sa unsang paagi ang pagsag-ulo nalangkit sa pagtuon ug bag-ong pinulongan?
12 Pagsag-ulo. Daghang bag-ong mga butang ang kinahanglang sag-ulohon sa mga nagtuon ug pinulongan. Lakip niana ang pagsag-ulo ug bag-ong mga pulong. Ang pagsag-ulo makatabang gayod sa mga Kristohanon nga malarino sa pagsulti sa putli nga pinulongan. Mapuslanon gayod ang pagsag-ulo sa mga ngalan sa mga basahon sa Bibliya nga sunodsunod. Gihimong tumong sa pipila ang pagsag-ulo sa pipila ka teksto sa Bibliya. Namatikdan sa uban nga mapuslanon usab ang pagsag-ulo sa mga awit sa Gingharian, sa mga ngalan sa mga tribo sa Israel ug sa 12 ka apostoles, ug sa mga hiyas sa bunga sa espiritu. Sa karaang mga panahon, daghang Israelinhon ang nakasag-ulo ug mga salmo. Sa atong panahon, nasag-ulo sa usa ka batang lalaki ang kapin sa 80 ka teksto sa Bibliya sa dihang siya sayis anyos pa lang. Ato bang magamit usab sa mapuslanong paagi kining maong bililhong katakos?
13. Nganong hinungdanon kaayo ang pagsubli?
13 Ang pagsubli makatabang sa paghinumdom, ug ang sublisubli nga mga pahinumdom maoy hinungdanong bahin sa atong Kristohanong edukasyon. Si apostol Pedro miingon: “Buot ko nga magpahinumdom kaninyo kanunay bahin niining mga butanga, bisan kon kamo nahibalo na niini ug malig-on na diha sa kamatuoran nga anaa kaninyo.” (2 Ped. 1:12) Nganong gikinahanglan nato ang mga pahinumdom? Tungod kay kini magpalalom sa atong pagsabot, magpasangkad sa atong panghunahuna, ug magpalig-on sa atong determinasyon nga magmasinugtanon kang Jehova. (Sal. 119:129) Ang pagsubli kanunay sa mga sukdanan ug mga prinsipyo sa Diyos motabang kanato sa pagsusi sa atong kaugalingon ug sa pagsukol sa kiling nga mahimong “malimtanong tigpaminaw.” (Sant. 1:22-25) Kon dili nato pahinumdoman kanunay ang atong kaugalingon bahin sa kamatuoran, mahimong maimpluwensiyahan sa ubang butang ang atong kasingkasing mao nga dili na klaro ang atong pagsulti sa putli nga pinulongan.
14. Unsay makatabang kanato kon kita nagtuon sa putli nga pinulongan?
14 Basahag kusog. (Pin. 1:3) Ang pipila nga nagtuon ug bag-ong pinulongan hilom lang nga nagtuon niini, apan dili kini mopatunghag kinamaayohang resulta. Sa dihang magtuon kita sa putli nga pinulongan, usahay kinahanglan tingaling basahon nato kini “sa hinayng tingog” sa pagtabang sa atong konsentrasyon. (Basaha ang Salmo 1:1, 2.) Pinaagi niini masilsil gayod sa atong hunahuna ang impormasyon nga atong gibasa. Sa Hebreohanong pinulongan, ang ekspresyong “pagbasa sa hinayng tingog” nalangkit gayod sa pagpamalandong. Sama nga ang paghilis sa atong gikaon gikinahanglan aron kita makabenepisyo niini, ang pagpamalandong gikinahanglan usab aron atong masabtan pag-ayo ang atong gibasa. Naggahin ba kitag igong panahon sa pagpamalandong sa atong gitun-an? Human sa atong pagbasa sa Bibliya, kinahanglang pamalandongon nato kana.
15. Sa unsang paagi atong matun-an ang “gramarya” sa putli nga pinulongan?
15 Sabta ang gramarya. Hinungdanon nga atong tun-an ang gramarya o ang kahan-ayan sa mga pulong ug mga lagda sa bag-ong pinulongan nga atong gitun-an. Pinaagi niini atong masabtan pag-ayo ang sistema sa maong pinulongan aron kita makasulti niana sa larinong paagi. Maingon nga ang usa ka pinulongan adunay sumbanan sa mga pulong, ang putli nga pinulongan sa Kasulatanhong kamatuoran aduna usay “sumbanan sa makapahimsog nga mga pulong.” (2 Tim. 1:13) Kinahanglang sundogon nato kana nga “sumbanan.”
16. Unsa nga kiling ang kinahanglan natong buntogon, ug sa unsang paagi atong mahimo kini?
16 Magpadayon sa pag-uswag. Ang usa ka tawo mahimong may nakat-onan na ug makaestorya nag diyutay sa maong pinulongan apan dili na maningkamot sa pag-uswag. Mahimong motungha usab kanang problemaha niadtong nagsulti sa putli nga pinulongan. (Basaha ang Hebreohanon 5:11-14.) Unsay makatabang kanato sa pagbuntog niini nga kiling? Magpadayon sa pagpaningkamot nga mouswag pa ang imong kahibalo sa maong pinulongan. “Karon nga ato nang gibiyaan ang pangunang doktrina mahitungod kang Kristo, manag-uswag kita ngadto sa pagkahamtong, nga dili na magpahimutang pag-usab sa patukoranan, nga mao, ang paghinulsol gikan sa patay nga mga buhat, ug ang pagtuo ngadto sa Diyos, ang pagtulon-an bahin sa mga bawtismo ug ang pagpandong sa mga kamot, ang pagkabanhaw sa mga patay ug ang walay kataposang paghukom.”—Heb. 6:1, 2.
17. Nganong hinungdanon ang regular nga batasan sa pagtuon? Iilustrar.
17 Pag-eskedyul ug tinong mga panahon sa pagtuon. Ang mugbo apan regular mas mapuslanon kay sa tag-as apan talagsa ra nga pagtuon. Pagtuon sa dihang alerto ang imong hunahuna ug dili daling malinga. Ang pagtuon ug bag-ong pinulongan maoy sama sa paghimog usa ka dalandalan diha sa lasang. Kon mas kanunay kanang agian, mas sayon ang pagpanaw. Kon dili kana maagian sa taas nga panahon, malibon kana. Busa gikinahanglan gayod ang pagkamalahutayon ug pagkamakanunayon! (Dan. 6:16, 20) Mainampoong “magpadayon sa pagtukaw uban ang bug-os nga pagkamakanunayon” sa pagsulti sa putli nga pinulongan sa kamatuoran sa Bibliya.—Efe. 6:18.
18. Nganong angay natong isulti ang putli nga pinulongan sa tanang higayon?
18 Isulti kini kanunay! Ang pipila nga nagtuon ug bag-ong pinulongan lagmit magpanuko sa pagsulti niana kay sila maulaw o mahadlok nga masayop. Makapugong kana sa ilang pag-uswag. May usa ka panultihon nga nag-ingon nga ang kanunayng pagbansay makapahanas. Busa, kon kanunayng isulti sa usa ang bag-ong pinulongan, mas malarino siya sa pagsulti niana. Kinahanglan usab natong isulti ang putli nga pinulongan sa tanang higayon. “Pinaagi sa kasingkasing ang usa nagapasundayag ug pagtuo alang sa pagkamatarong, apan pinaagi sa baba ang usa nagahimog pagpahayag sa dayag alang sa kaluwasan.” (Roma 10:10) Dili lamang panahon sa atong bawtismo nga kita nagahimog ‘dayag nga pagpahayag’ kondili sa matag higayon usab nga kita nagasulti bahin kang Jehova, lakip na sa dihang kita nagsangyaw. (Mat. 28:19, 20; Heb. 13:15) Kita makasulti usab sa putli nga pinulongan panahon sa atong mga tigom pinaagig mugbo apan tin-aw nga mga komento.—Basaha ang Hebreohanon 10:23-25.
Maghiusa Kita sa Pagsulti sa Putli nga Pinulongan sa Pagdayeg Kang Jehova
19, 20. (a) Unsang katingalahang butang ang napalampos sa mga Saksi ni Jehova karon? (b) Unsay determinado nimong buhaton?
19 Makaiikag gayod ang nahitabo sa Jerusalem sa Dominggo sa buntag, Sivan 6, tuig 33 K.P.! Sa wala pay alas nuybe sa buntag niadtong adlawa, ang mga nagtigom sa itaas nga lawak milagrosong “misugod sa pagsulti sa lainlaing mga pinulongan.” (Buh. 2:4) Ang mga alagad sa Diyos karong adlawa wala na magbaton ug gasa sa pinulongan. (1 Cor. 13:8) Bisan pa niana, ang mga Saksi ni Jehova nagmantala karon sa maayong balita sa Gingharian diha sa kapig 430 ka lainlaing pinulongan.
20 Mapasalamaton gayod kita nga bisag lainlain kitag pinulongan, kita nagkahiusa sa pagsulti sa putli nga pinulongan sa kamatuoran sa Bibliya! Sukwahi gayod kini sa nahitabo sa Babel. Ang katawhan ni Jehova naggamit ug usa lamang ka pinulongan sa pagdayeg sa iyang ngalan. (1 Cor. 1:10) Hinaot nga magmadeterminado kita sa pag-alagad “abaga sa abaga” uban sa atong mga igsoon sa tibuok kalibotan samtang magpadayon kita sa pagkat-on ug sulti sa putli nga pinulongan sa mas larinong paagi, alang sa kahimayaan sa atong langitnong Amahan, si Jehova.—Basaha ang Salmo 150:1-6.
Unsay Imong Tubag?
• Unsa ang putli nga pinulongan?
• Unsay nalangkit sa atong pagsulti sa putli nga pinulongan?
• Unsay makatabang kanato sa pagsulti sa putli nga pinulongan sa larinong paagi?
[Kahon sa panid 23]
Pauswaga ang Imong Kalarino sa Pagsulti sa Putli nga Pinulongan Pinaagi sa
◆ pagpatalinghog pag-ayo.
◆ pagsundog sa larinong mga mamumulong.
◆ pagsag-ulo ug pagsubli.
◆ pagbasag kusog.
◆ pagtuon sa “gramarya.”
◆ pagpadayon sa pag-uswag.
◆ pag-eskedyul ug tinong mga panahon sa pagtuon.
◆ pagsulti niana.
[Mga hulagway sa panid 24]
Ang katawhan ni Jehova nagkahiusa sa pagsulti sa putli nga pinulongan