Tugoti “ang Balaod sa Mahigugmaong-Kalulot” nga Magbantay sa Imong Sinultihan
“Siya nagbuka sa iyang baba uban ang kaalam, ug ang balaod sa mahigugmaong-kalulot anaa sa iyang dila.”—PROV. 31:26.
1, 2. (a) Unsang hiyasa ang maayong ugmaron sa mga magsisimba ni Jehova? (b) Unsay hisgotan niining artikuloha?
ANG bug-at nga mensahe nga nadawat ni Haring Lemuel gikan sa iyang inahan naglakip ug importanteng kuwalipikasyon sa usa ka maayong asawa. Kini nag-ingon: “Siya nagbuka sa iyang baba uban ang kaalam, ug ang balaod sa mahigugmaong-kalulot anaa sa iyang dila.” (Prov. 31:1, 10, 26) Ang mahigugmaong-kalulot maoy tilinguhaong butang diha sa dila sa usa ka maalamong babaye maingon man sa tanan nga buot magpahimuot kang Jehova nga Diyos. (Basaha ang Proverbio 19:22.) Ang tanang matuod nga magsisimba angayng magpakitag mahigugmaong-kalulot diha sa ilang sinultihan.
2 Unsa ang mahigugmaong-kalulot? Kang kinsa kini ipakita? Unsay motabang kanato aron maanaa sa atong dila “ang balaod sa mahigugmaong-kalulot”? Sa unsang paagi ang pagbuhat niana makaapektar sa atong pagpakigsulti sa atong pamilya ug sa mga isigka-Kristohanon?
Kalulot nga Gipalihok sa Maunongong Gugma
3, 4. (a) Unsa ang mahigugmaong-kalulot? (b) Unsay kalainan sa mahigugmaong-kalulot ug sa kinaiyanhon o tawhanong kalulot?
3 Ang mahigugmaong-kalulot naglakip sa mga hiyas nga gugma ug kalulot. Naglangkit kini ug kalulot, sa ato pa, ang pagbaton ug personal nga interes sa uban ug pagpakita niana sa pulong ug buhat. Sanglit nalakip usab niana ang gugma, ang pagpakitag mahigugmaong-kalulot nagpasabot ug pagpakitag interes sa uban tungod sa atong gugma kanila. Apan, ang orihinal nga pulong alang sa mahigugmaong-kalulot nagkahulogan ug labaw pa kay sa kalulot nga gipalihok sa gugma. Kini nagpasabot ug kinabubut-on ug maunongong pagpakitag kalulot ngadto sa usa ka tawo hangtod nga malampos ang atong maayong intensiyon.
4 Aduna pay laing kalainan ang mahigugmaong-kalulot ug ang kinaiyanhong kalulot. Ang kinaiyanhon o tawhanong kalulot mahimong ipakita bisan sa dili nato kaila. Sa dihang nalunod ang barkong gisakyan ni apostol Pablo ug sa 275 pa ka tawo, sila gipakitaag tawhanong kalulot sa mga molupyo sa isla sa Malta—mga tawo nga wala nila makaila sukad. (Buh. 27:37–28:2) Sa laing bahin, ang mahigugmaong-kalulot makita diha sa mga indibiduwal nga nagmaunongon sa usag usa tungod sa ilang suod nga relasyon.a Mao kini gipakita sa mga Kenihanon sa “tanang anak sa Israel sa dihang migula sila gikan sa Ehipto.”—1 Sam. 15:6.
Gikinahanglan ang Pagpamalandong ug Pag-ampo
5. Unsay motabang kanato sa pagpugong sa atong dila?
5 Dili sayon ang pagpakitag mahigugmaong-kalulot diha sa atong sinultihan. Ang disipulong si Santiago misulat bahin sa dila: “Walay usa ka tawo ang arang nga makapaaghop niini. Usa ka dili-mapugngan makadaot nga butang, kini puno sa hilo nga makamatay.” (Sant. 3:8) Unsay makatabang kanato sa pagpugong niining sangkap sa lawas nga lisod kontrolahon? Ang gipamulong ni Jesus sa mga lider sa relihiyon sa iyang adlaw motabang kanato sa pagsabot niini. Siya miingon: “Gikan sa kadagaya sa kasingkasing ang baba mosulti.” (Mat. 12:34) Aron ang mahigugmaong-kalulot magpugong sa atong dila, kinahanglang itisok nato kana sa atong kasingkasing—ang atong sulod nga pagkatawo. Atong tan-awon kon sa unsang paagi ang pagpamalandong ug pag-ampo motabang kanato sa paghimo niana.
6. Nganong angay natong palandongon ang mga asoy diin nagpakita si Jehova ug mahigugmaong-kalulot?
6 Ang Bibliya nag-ingon nga si Jehova “dagaya sa mahigugmaong-kalulot.” (Ex. 34:6) “Oh Jehova, ang yuta napuno sa imong mahigugmaong-kalulot,” miawit ang salmista. (Sal. 119:64) Ang Kasulatan adunay daghang asoy kon sa unsang paagi si Jehova nagpakitag mahigugmaong-kalulot sa iyang mga magsisimba. Kon mogahin kitag panahon sa pagpamalandong uban ang pagpasalamat sa ‘mga pakiglabot ni Jehova,’ matisok sa atong kasingkasing ang tinguha sa pag-ugmad niining diyosnong hiyas.—Basaha ang Salmo 77:12.
7, 8. (a) Sa unsang paagi gipakita ni Jehova ang iyang mahigugmaong-kalulot kang Lot ug sa iyang pamilya? (b) Unsay gibati ni David sa dihang gipakitaan siya sa Diyos ug mahigugmaong-kalulot?
7 Pananglitan, palandonga kon sa unsang paagi giluwas ni Jehova ang pag-umangkon ni Abraham nga si Lot uban sa iyang pamilya sa dihang Iyang gilaglag ang Sodoma, ang siyudad nga ilang gipuy-an. Sa dihang hapit na kanang mahitabo, ang mga manulonda nga miadto kang Lot nag-awhag kaniya sa pagbiya dayon sa siyudad uban sa iyang pamilya. “Sa dihang siya nagpadayon sa paglanganlangan,” miingon ang Bibliya, “tungod sa kaluoy ni Jehova kaniya, ang mga [manulonda] naghawid sa iyang kamot ug sa kamot sa iyang asawa ug sa mga kamot sa iyang duha ka anak nga babaye ug ilang gidala siya sa gawas ug gipahimutang sa gawas sa siyudad.” Wala ba matandog ang atong kasingkasing sa dihang atong gipamalandong kining maong buhat sa pagluwas? Wala ba kini magtukmod kanato sa paghunahuna nga kana maoy pagpahayag sa Diyos sa iyang mahigugmaong-kalulot?—Gen. 19:16, 19.
8 Tagda usab ang panig-ingnan ni Haring David, kinsa miawit: ‘Si Jehova nagapasaylo sa tanan mong kasaypanan, siya nagaayo sa tanan mong balatian.’ Mapasalamaton gayod si David nga gipasaylo siya sa iyang sala uban kang Batseba! Iyang gidayeg si Jehova pinaagi sa pag-ingon: “Ingon nga ang mga langit hataas kay sa yuta, ang iyang mahigugmaong-kalulot labaw ngadto kanila nga nahadlok kaniya.” (Sal. 103:3, 11) Ang pagpamalandong niini ug sa uban pang mga asoy sa Kasulatan magtukmod kanato sa pagpasalamat sa mahigugmaong-kalulot ni Jehova ug sa pagdayeg kaniya. Kon mas mapasalamaton kita, mas mapalihok kita sa pagsundog sa matuod nga Diyos.—Efe. 5:1.
9. Unsang hinungdanong rason kon nganong ang mga magsisimba ni Jehova magpakitag mahigugmaong-kalulot diha sa ilang adlaw-adlawng pagkinabuhi?
9 Ang Kasulatanhong mga panig-ingnan nagpakita nga si Jehova nagpasundayag sa iyang mahigugmaong-kalulot—iyang maunongong gugma—niadtong aduna nay suod nga relasyon kaniya. Komosta kadtong wala makabaton nianang maong relasyon? Gipakitaan ba usab silag kalulot? Oo. “[Ang Diyos] maluloton ngadto sa mga dili-mapasalamaton ug sa daotan,” nag-ingon ang Lucas 6:35. ‘Siya nagapasubang sa iyang adlaw diha sa mga tawong daotan ug sa mga maayo ug nagapaulan diha sa mga tawong matarong ug sa mga dili-matarong.’ (Mat. 5:45) Sa wala pa kita makadangat sa kamatuoran, kita gipakitaan na sa Diyos ug kalulot. Apan, ingong iyang mga magsisimba kita gipakitaan niyag maunongong gugma—ang iyang mahigugmaong-kalulot. (Basaha ang Isaias 54:10.) Mapasalamaton gayod kita niana! Usa usab kana ka hinungdanong rason nga kita magpakitag mahigugmaong-kalulot sa atong sinultihan maingon man sa ubang bahin sa atong adlaw-adlawng pagkinabuhi!
10. Nganong ang pag-ampo maoy bililhon kaayong tabang sa pag-ugmad ug mahigugmaong-kalulot?
10 Ang pag-ampo maoy bililhon kaayong tabang sa pag-ugmad ug mahigugmaong-kalulot. Tungod kini kay ang gugma ug kalulot maoy mga bahin sa bunga sa balaang espiritu ni Jehova. (Gal. 5:22) Kon magpagiya kita sa maong espiritu, matisok diha sa atong kasingkasing ang mahigugmaong-kalulot. Ang labing direktang paagi nga madawat nato ang balaang espiritu maoy pinaagi sa pagpangayo niana diha sa pag-ampo. (Luc. 11:13) Haom gayod nga kanunay natong pangayoon ang espiritu sa Diyos ug tugotan kana nga mogiya kanato. Oo, gikinahanglan ang pagpamalandong ug pag-ampo aron maanaa sa atong dila ang balaod sa mahigugmaong-kalulot.
Maanaa sa Dila sa mga Magtiayon
11. (a) Giunsa nato pagkahibalo nga gidahom ni Jehova nga ang mga bana magpakitag mahigugmaong-kalulot sa ilang asawa? (b) Sa unsang paagi ang balaod sa mahigugmaong-kalulot motabang sa bana sa pagpugong sa iyang dila?
11 Si apostol Pablo nagtambag sa mga bana: “Magpadayon sa paghigugma sa inyong mga asawa, ingon nga si Kristo nahigugma usab sa kongregasyon ug nagtugyan sa iyang kaugalingon alang niini.” (Efe. 5:25) Gipahinumdoman usab sila ni Pablo sa gipamulong ni Jehova kang Adan ug Eva. Ang apostol misulat: “Ang lalaki mobiya sa iyang amahan ug sa iyang inahan ug siya moipon sa iyang asawa, ug ang duha mahimong usa ka unod.” (Efe. 5:31) Busa, gidahom ni Jehova nga ang mga bana magmaunongon sa ilang asawa, nga kanunayng magpakita kanila ug mahigugmaong-kalulot. Ang bana kansang dila gigiyahan sa maunongong gugma dili magyagyag sa kasaypanan sa iyang asawa o magtamay kaniya. Siya malipayng modayeg sa iyang asawa. (Prov. 31:28) Kon motungha ang mga problema, ang mahigugmaong-kalulot magtukmod sa bana sa pagpugong sa iyang dila aron dili maulawan ang iyang asawa.
12. Sa unsang paagi ang sinultihan sa asawa magpakita nga ang balaod sa mahigugmaong-kalulot nagagiya sa iyang dila?
12 Ang balaod sa mahigugmaong-kalulot angayng mogiya usab sa dila sa asawa. Kinahanglan nga ang iyang sinultihan dili maimpluwensiyahan sa espiritu sa kalibotan. Kay “adunay halawom nga pagtahod sa iyang bana,” siya mosultig maayong mga butang bahin kaniya diha sa publiko, sa ingon, mas modako ang pagtahod sa uban sa iyang bana. (Efe. 5:33) Kon dili siya mouyon sa opinyon sa iyang bana, dili niya kana kuwestiyonon atubangan sa mga anak aron dili mawala ang ilang pagtahod sa ilang amahan. Makigsulti siya sa iyang bana bahin niana nga silasila ra. “Ang babayeng tinuod nga maalamon nagtukod sa iyang balay,” nag-ingon ang Bibliya. (Prov. 14:1) Ang iyang balay maoy makapalipay nga dapit alang sa tibuok pamilya.
13. Asa ilabinang ipadapat ang balaod sa mahigugmaong-kalulot, ug sa unsang paagi kana mahimo?
13 Bisan diha sa balay, kinahanglan nga padayong gamiton sa mga magtiayon ang ilang dila sa matinahorong paagi. “Isalikway gayod kining tanan,” misulat si Pablo, “kapungot, kasuko, pagkadaotan, mapasipalahong sinultihan, ug malaw-ayng pulong gikan sa inyong baba.” Siya midugang: “Isul-ob ninyo ang malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob. . . . Isul-ob ninyo ang gugma, kay kini maoy usa ka hingpit nga bugkos sa panaghiusa.” (Col. 3:8, 12-14) Sa dihang ang mga anak kanunayng makadungog ug mahigugmaon ug malulotong sinultihan diha sa panimalay, dili lamang sila magdako nga malipayon kondili mahimong masundog nila ang paagi sa ilang ginikanan sa pagpakig-estorya.
14. Sa unsang paagi ang mga ulo sa pamilya makagamit sa ilang dila sa paghupay sa ilang pamilya?
14 Ang salmista misulat bahin kang Jehova: “Palihog, hupayon mo unta ako sa imong mahigugmaong-kalulot.” (Sal. 119:76) Ang usa ka talagsaong paagi diin si Jehova naghupay sa iyang katawhan maoy pinaagi sa paghatag kanilag tambag ug giya. (Sal. 119:105) Sa unsang paagi ang mga ulo sa pamilya makabenepisyo sa panig-ingnan sa atong langitnong Amahan ug makagamit sa ilang dila sa paghupay sa ilang pamilya? Mahimo nila kana pinaagi sa paghatag ug gikinahanglang giya ug pagdasig. Usa gayod ka maayong kahigayonan ang gabii sa Pamilyahanong Pagsimba sa pagkaplag ug espirituwal nga mga bahandi!—Prov. 24:4.
Ipakita ang Maunongong Gugma sa mga Isigkamagtutuo
15. Sa unsang paagi ang mga ansiyano ug ang ubang hamtong sa espirituwal nga mga igsoon makagamit sa ilang dila sa pagpanalipod sa uban diha sa kongregasyon?
15 “Tugoti nga ang imong mahigugmaong-kalulot ug ang imong kamatinud-anon manalipod kanunay kanako,” miampo si Haring David. (Sal. 40:11) Sa unsang paagi ang mga ansiyano ug ang ubang hamtong sa espirituwal nga mga igsoon makasundog kang Jehova niining bahina? Ang paggamit sa atong dila aron isentro ang pagtagad sa Kasulatanhong impormasyon magpakita gayod ug mahigugmaong-kalulot.—Prov. 17:17.
16, 17. Sa unsang mga paagi nato ikapakita nga ang atong sinultihan gigiyahan sa balaod sa mahigugmaong-kalulot?
16 Unsay angay natong buhaton kon atong mamatikdan nga ang usa ka Kristohanon wala na magsunod sa mga prinsipyo sa Bibliya? Dili ba nga ang mahigugmaong-kalulot magtukmod kanato sa paggamit sa atong dila sa pagtul-id kaniya? (Sal. 141:5) Kon nahibalo kita nga ang usa ka igsoon nakahimog seryosong sala, ang maunongong gugma magpalihok kanato sa pag-awhag sa nakasala sa ‘pagtawag sa mga ansiyano sa kongregasyon,’ aron sila ‘mag-ampo alang kaniya, nga maghaplas kaniya ug lana sa ngalan ni Jehova.’ (Sant. 5:14) Kon ang nakasala dili moduol sa mga ansiyano, ang dili nato pagtug-an niana magpakita nga wala kitay mahigugmaong-kalulot kaniya. Lagmit ang pipila kanato mibatig kahigawad, kasubo, kawalay-pulos, o kapakyasan. Ang usa ka maayong paagi nga atong ikapakita nga ang balaod sa mahigugmaong-kalulot anaa sa atong dila mao ang ‘paghupay sa magul-anong mga kalag.’—1 Tes. 5:14.
17 Unsay atong buhaton kon ang mga kaaway sa Diyos magpakaylap ug mga hulungihong bahin sa atong mga isigkamagtutuo? Inay dudahan ang integridad sa atong mga igsoon, dili nato kana angayng panumbalingon. Kon maminaw ang nag-akusar, mahimo nato siyang pangutan-on kon duna bay basehanan ang iyang gisulti. Kon pugson kita sa mga kaaway sa Diyos sa pagtug-an kon asa ang atong mga igsoon, ang atong maunongong gugma mopugong kanato sa paghatag ug impormasyon.—Prov. 18:24.
Ang Magpakitag “Mahigugmaong-Kalulot Makakaplag ug Kinabuhi”
18, 19. Nganong dili angayng mobulag sa atong dila ang balaod sa mahigugmaong-kalulot sa dihang makiglabot kita sa atong mga isigkamagtutuo?
18 Angay kitang magpakitag maunongong gugma diha sa atong pagpakiglabot sa atong mga isigkamagtutuo. Bisan sa lisod nga kahimtang, kinahanglang dili mobulag sa atong dila ang balaod sa mahigugmaong-kalulot. Si Jehova wala malipay sa dihang ang mahigugmaong-kalulot sa mga anak sa Israel nahimong “sama sa yamog nga sayong mahanaw.” (Os. 6:4, 6) Hinunoa, malipay siya kon kita padayong magpakitag mahigugmaong-kalulot. Tagda kon sa unsang paagi niya gipanalanginan ang nagbuhat niana.
19 Ang Proverbio 21:21 nag-ingon: “Siya nga nagatinguha sa pagkamatarong ug sa mahigugmaong-kalulot makakaplag ug kinabuhi, pagkamatarong ug himaya.” Lakip sa mga panalangin nga madawat sa maong tawo mao ang kinabuhing walay kataposan. Si Jehova motabang kaniya nga “makapangupot pag-ayo sa tinuod nga kinabuhi.” (1 Tim. 6:12, 19) Nan, “ipakita [gayod nato] sa usag usa ang mahigugmaong-kalulot.”—Zac. 7:9.
[Footnote]
a Alang sa dugang impormasyon kon sa unsang paagi ang mahigugmaong-kalulot nalahi sa pagkamaunongon, gugma, ug kalulot, tan-awa ang Mayo 15, 2002 nga gula sa Ang Bantayanang Torre, panid 12-13, 18-19.
Makapatin-aw Ka Ba?
• Unsa ang mahigugmaong-kalulot?
• Sa unsang paagi maanaa sa atong dila ang balaod sa mahigugmaong-kalulot?
• Sa unsang paagi ang mga magtiayon makapakitag maunongong gugma diha sa ilang sinultihan?
• Unsay nagpakita nga ang balaod sa mahigugmaong-kalulot anaa sa atong dila sa dihang makiglabot kita sa atong mga isigkamagtutuo?
[Hulagway sa panid 23]
Gibayaw ni David ang mahigugmaong-kalulot ni Jehova
[Hulagway sa panid 24]
Duna ka bay regular nga Pamilyahanong Pagsimba?