Ika-130 nga Graduwasyon sa Gilead
Usa ka Adlaw nga Punog Paglaom ug Kahinam
WALAY duhaduha, ang graduwasyon sa ika-130 nga klase sa Watchtower Bible School of Gilead nakahatag ug paglaom ug kahinam. Sa Sabado, Marso 12, 2011, kapin sa 8,500 ang mitambong niini, lakip ang mga estudyante ug ang ilang pamilya ug mga higala. Ang tanan naghinamhinam, dili lamang niining adlawa kondili sa umaabot usab niining nabansayng mga misyonaryo nga ipadala sa lainlaing dapit aron sa pagtudlo sa mga tawo bahin sa Bibliya.
“Malipayon Kadtong Tanan nga Nagapaabot” Kang Jehova
Kanang makapahupayng mga pulong, nga gikutlo sa Isaias 30:18, maoy tema sa pakigpulong ni Geoffrey Jackson, membro sa Nagamandong Lawas sa mga Saksi ni Jehova ug tsirman sa programa. Uban ang kadasig ug diyutayng pasiaw, iyang gipahalipayan ang mga estudyante sa ilang paglahutay sa kurso sa Gilead ug gipasaligan sila nga makalahutay usab sila niining kulbahinam nga adlaw. Unsay angayng dahomon sa mga estudyante? Iyang gihisgotan ang tulo ka praktikal nga punto sa Isaias 30:18-21.
Una, si Brader Jackson miingon, “Kamo makadahom nga si Jehova magpatalinghog sa inyong pag-ampo.” Iyang gihisgotan ang pasalig diha sa bersikulo 19: “[Ang Diyos] sa walay pakyas magpakitag pabor kanimo sa tingog sa imong pagtuaw.” Miingon si Brader Jackson nga ang pulong “kanimo” niini nga bersikulo nagpasabot nga si Jehova magpatalinghog sa atong tagsa-tagsa ka pag-ampo. “Ingong Amahan, si Jehova dili mangutana, ‘Nganong dili man ka lig-on sama sa uban?’ Hinunoa, siya mamati pag-ayo sa matag usa kanato. Ug siya motubag.”
Ikaduha, giila sa mamumulong nga duna gayod unyay mga problema. “Si Jehova wala mag-ingon nga ang kinabuhi hayahay, apan siya motabang kanato.” Ingon sa gipakita sa bersikulo 20, ang Diyos nagtagna nga sa dihang likosan ang Israel, ang kasakit ug pagpanglupig sama ra ka komon sa tinapay ug tubig. Bisan pa niana, si Jehova kanunayng andam motabang sa iyang katawhan. Ang mga estudyante sa Gilead makaatubang usab ug mga problema ug hagit nga tingali lahi sa ilang gidahom! Si Brader Jackson midugang, “Apan makadahom kamo nga si Jehova motabang kaninyo sa pagsagubang sa matag problema.”
Ikatulo, gipahinumdoman niya ang mga estudyante nga ingon sa gipakita sa bersikulo 20 ug 21, “makadahom kamo nga adunay giya—busa pangitaa kana!” Siya miingon nga ang matag Kristohanon karon kinahanglang mamati pag-ayo sa gipamulong ni Jehova pinaagi sa Bibliya ug sa binase-sa-Bibliyang mga publikasyon. Ang mamumulong mainitong nag-awhag sa mga estudyante sa pagbasa sa Bibliya sa adlaw-adlaw, kay kini nagkahulogag kinabuhi.
“Tugoting ang Kalisang Kang Jehova Modangat Kaninyo”
Si Anthony Morris sa Nagamandong Lawas nagsaysay sa kahulogan sa pamulong nga “ang kalisang kang Jehova.” (2 Cronicas 19:7) Kanang mga pulonga wala magtumong sa sayop nga matang sa kahadlok, kondili sa pagpaningkamot sa pagbuhat ug matarong, usa ka kahadlok nga inubanag lalom ug kinasingkasing nga pagtahod. “Kanang matanga sa kahadlok ang angay ninyong bation sa inyong asaynment,” maoy tambag ni Brader Morris sa mga estudyante. Sa unsang paagi nila ikapakita kining lalom nga pagtahod kang Jehova? Ang mamumulong naghisgot ug duha ka praktikal nga paagi.
Una, giawhag ni Brader Morris ang mga estudyante sa pagpadapat sa tambag sa Santiago 1:19: “Magmaabtik sa pagpaminaw, magmahinay sa pagsulti.” Siya miingon nga ang mga estudyante daghag nakat-onan sulod sa lima-ka-bulan nga kurso, apan dili nila kana angayng ipasiatab diha sa ilang mga teritoryo. “Kinahanglang mamati una kamo,” siya miingon. “Pamati kamo sa kongregasyon ug niadtong nanguna sa nasod diin kamo mag-alagad; paminawa ang ilang isulti bahin sa ilang nasod ug kultura. Ayaw pagpanuko sa pag-ingon, ‘Wala ko mahibalo.’ Samtang nagkadaghan ang inyong makat-onan, inyong maamgohan nga daghan pa diay kaayo mog angayng tun-an.”
Ikaduha, gibasa ni Brader Morris ang Proverbio 27:21: “Ang dalisayanan nga kulon maoy alang sa plata, ug ang hudno alang sa bulawan; ang usa ka tawo pagalunsayon sumala sa pagdayeg kaniya.” Iyang gisaysay nga maingon nga ang bulawan ug plata kinahanglang dalisayon, o pagalunsayon, kita usab madalisay pinaagi sa pagdayeg. Sa unsang paagi? Kon dunay modayeg nato, kita masulayan. Mahimong motultol kini sa garbo ug pagkadaot sa atong relasyon sa Diyos, o mahimong ilhon nato nga duna tay obligasyon kang Jehova ug mas maningkamot nga sundon ang iyang mga sukdanan. Busa, gidasig ni Brader Morris ang mga estudyante nga lantawon ang pagdayeg sa hustong paagi—ingong kahigayonan sa pagpamatuod nga sila naghupot ug maayong matang sa “kahadlok kang Jehova.”
“Pabilhi ang Inyong Misyon”
Si Guy Pierce sa Nagamandong Lawas maoy mihatag sa pangunang pakigpulong gamit kini nga tema. Iyang gisaysay nga ang pulong “misyonaryo” nagkahulogang “usa nga gipadala alang sa usa ka misyon.” Busa, matod niya, daghang organisasyon ang nagpadalag mga misyonaryo alang sa lainlaing misyon. Ang kadaghanan niini nasentro sa pagpanambal ug sa politikanhong solusyon sa mga problema sa kalibotan. “Apan lahi ang inyong misyon,” siya miingon. Sa unsang paagi?
Sa ilang pagtuon sa Bibliya, ang mga estudyante daghag nakat-onang asoy bahin sa pagpanambal. Sa dihang gibanhaw ni Jesus ang usa ka dalagita, ang mga ginikanan “nalipay pag-ayo.” (Marcos 5:42) Sa susama, sa dihang ang mga buta milagrosong giayo, dako ang ilang kalipay. Ang usa sa mga rason sa maong mga milagro maoy aron ipakita kanato kon unsay himoon ni Kristo sa umaabot nga bag-ong kalibotan, diin nianang panahona ang “dakong panon” sa matarong nga mga tawo, nga maluwas sa kalaglagan niining daotang sistema sa mga butang, mamaayo sa tanang balatian. (Pinadayag 7:9, 14) Ang ilang mga minahal, nga ilang abiabihon sa pagkabanhaw, mahingpit na usab ug panglawas. Handurawa ang ilang kalipay!
Apan, sama sa gisaysay ni Brader Pierce, ang pisikal nga pagpanambal dili gayod mao ang labing hinungdanong matang sa pagpanambal. Ang giayo ni Jesus sa ngadtongadto nasakit gihapon. Ang iyang gibanhaw namatay ra gihapon. Bisan ang mga buta nga iyang giayo nawad-an pag-usab sa panan-aw sa dihang namatay. Ang labawng hinungdanon mao ang espirituwal nga pagpanambal nga gihimo ni Jesus. Ang mga misyonaryo sa Gilead may misyon usab nga sama niini. Ilang tabangan ang mga tawo nga mapasig-uli sa atong langitnong Amahan aron mabuhi sa espirituwal nga diwa. Kadto lamang naayo sa espirituwal nga diwa ang makabatog kinabuhing dayon. “Kana nga espirituwal nga pagpanambal,” matod ni Brader Pierce, “ang makahatag ug pagdayeg sa Diyos. Pinaagi niana, molampos kamo sa inyong ministeryo.”
Tulo pa ka Importanteng Bahin sa Programa
“Usa ba Kini ka Maayong Adlaw?” Kini ang gisukna ni Robert Rains nga membro sa Komite sa Sanga sa United States. Iyang gidasig ang mga estudyante nga himoon ang matag adlaw sa pagmisyonaryo ingong maayong adlaw pinaagi sa maalamong paggamit sa panahon, pagdangop sa Pulong sa Diyos kon dunay mga problema, ug sa pagsalig kang Jehova diha sa pag-ampo.
“Himoon ba Ninyong Bag-o ang Daan?” Ang instruktor sa Gilead nga si Mark Noumair misukna niana sa iyang pakigpulong. Iyang gipatin-aw ang 1 Juan 2:7, 8, diin gihisgotan ni apostol Juan ang “daang sugo” nga usa usab ka “bag-ong sugo.” Pareho kining nagtumong sa mao ra nga sugo—nga ang mga sumusunod ni Kristo maghigugmaay sa usag usa uban ang pagsakripisyo sa kaugalingon. (Juan 13:34, 35) Ang sugo ikaingong daan sa pagkaagi nga kini gihatag mismo ni Jesus sa iyang mga sumusunod pipila ka dekada na ang milabay; apan kini usab bag-o kay ang mga Kristohanon nag-atubag bag-ong mga hagit ug kinahanglang magpakitag gugma sa bag-o ug mas bug-os nga paagi. Ang mga misyonaryo usab nag-atubang ug bag-ong mga kahimtang ug kinahanglang makakat-on sa pagpakitag gugma sa bag-ong paagi. Unsay sekreto sa pagbuhat niini?
“Ayaw buhata ang butang nga imong giayran,” nagtambag si Brader Noumair. Kon dunay batasan nga dili nato gusto apan ato kanang buhaton, kana makadaot kanato. Sa laing bahin, kon mangita tag mga paagi sa pagpakitag gugma, atong gipasidlak ang “tinuod nga kahayag” ug mawala ang espirituwal nga kangitngit.
“Lukdoa ang Palas-anon.” Ang laing instruktor sa Gilead nga si Michael Burnett, nagtagik niining praktikal nga tema. Siya naghisgot bahin sa mga tawo sa Aprika nga maglukdog bug-at nga mga karga. Maggamit silag kata, usa ka gamayng panapton nga giluko ug ihanig sa ulo aron sayon ang paglukdo ug mabalanse ang karga ug makalakaw silag tarong. Ang mga misyonaryo sa Gilead adunay bug-at nga mga responsibilidad sa ilang teritoryo, apan sila gihatagag tabang nga samag kata: ang kompletong pagbansay nga binase sa Bibliya. Kon ilang ipadapat ang ilang nakat-onan, dili kaayo sila malisdan sa ilang responsibilidad ug makapabiling timbang.
Mga Eksperyensiya ug Interbiyo
Ang pagbansay sa Gilead School naglakip sa panahon nga igugol diha sa ministeryo uban sa lokal nga kongregasyon sa mga Saksi ni Jehova. Si William Samuelson, nga nagdumala sa Theocratic Schools Department, nag-asoy sa pipila ka eksperyensiya sa mga estudyante, ubos sa temang “Ayaw Papahulaya ang Imong Kamot.” (Ecclesiastes 11:6) Pinaagi sa pagpasundayag sa aktuwal nga panghitabo, gipakita sa mga estudyante ang ilang kakugi sa ministeryo, nga nangitag mga paagi sa pagsangyaw sa maayong balita diha sa ayroplano, restawran, ug sa gasolinahan. Sila nagsangyaw sa balay ug balay, sa di-pormal nga paagi, ug pinaagig sulat. Wala gayod nila papahulaya ang ilang kamot, ug maayo kaayo ang resulta.
Dayon, ang kawani sa Gilead nga si Kenneth Stovall nag-interbiyog tulo ka brader nga dugay na sa misyonaryong buluhaton—si Barry Hill nga nag-alagad sa Ecuador ug sa Dominican Republic, Eddie Mobley sa Côte d’Ivoire, ug si Tab Honsberger sa Senegal, Benin, ug Haiti. Nindot ang ilang pagkahan-ay sa temang “Sulayi si Jehova ug Aniha ang mga Panalangin.” (Malaquias 3:10) Pananglitan, si Brader Hill nag-asoy kon giunsa nila sa iyang asawa pagpahiuyon sa klima sa Ecuador nga may panahong init ug abogon ug may panahong init ug lapokon. Siya nahinumdom nga sulod sa duha ka tuig ug tunga, kinahanglan silang maligo gamit ang balde. Apan wala gayod sila makahunahunag biya; ilang gibati nga ang ilang asaynment maoy panalangin ni Jehova. “Mao na kiniy among kinabuhi,” siya miingon.
Sa pagtapos sa programa, ang usa sa mga estudyante nagbasag makapatandog nga sulat gikan sa klase nga nagpahayag sa ilang kinasingkasing nga apresasyon sa tunghaan. “Ang among pagtuo nalig-on gayod,” nag-ingon ang sulat, “ug nahibalo kami nga kini maoy sinugdanan lamang sa buluhaton.” Ang tanang estudyante nakadawat sa ilang diploma ug giasayn sa lainlaing nasod. Gitapos ni Brader Jackson ang programa pinaagi sa pagpasalig sa mga estudyante nga sila makalaom sa tabang ni Jehova, ilabina kon makaatubang silag mga suliran. Ang tanang nanambong mibiya nga punog paglaom ug kahinam. Sa walay duhaduha, gamiton ni Jehova kining bag-ong mga misyonaryo sa pagpalampos sa buluhaton.
[Chart/Mapa sa panid 31]
ESTADISTIKA SA KLASE
9 ka nasod nga girepresentahan
34.0 aberids nga edad
18.6 aberids nga tuig sukad sa bawtismo
13.1 aberids nga tuig sa bug-os-panahong pag-alagad
[Mapa]
(Alang sa aktuwal nga porma, tan-awa ang publikasyon)
Ang mga estudyante giasayn sa mga nasod nga gipakita sa ubos
MGA NASOD NGA GIASAYNAN
ARGENTINA
ARMENIA
BURKINA FASO
BURUNDI
CONGO (KINSHASA)
CZECH REPUBLIC
HAITI
HONG KONG
INDONESIA
KENYA
LITHUANIA
MALAYSIA
MOZAMBIQUE
NEPAL
PAPUA NEW GUINEA
ROMANIA
SENEGAL
TANZANIA
UGANDA
ZIMBABWE
[Hulagway sa panid 31]
Ika-130 nga Klase nga Migraduwar sa Watchtower Bible School of Gilead
Sa listahan sa ubos, ang mga laray ginumerohan gikan sa atubangan ngadto sa likod, ug ang mga ngalan gilista gikan sa wala ngadto sa tuo sa matag laray.
(1) Molina, Z.; Bassolino, S.; Alatsis, C.; Arroyo, A.; Niño, L.; Merkling, S.; Clark, M.
(2) Little, C.; Tibaudo, S.; Jakobsson, S.; Moreno, J.; Rodriguez, A.; Lee, K.; Cárdenas, H.; Aguilar, L.
(3) Clairbush, A.; Polley, A.; Caldwell, S.; Adame, J.; Hildebrandt, S.; Shoemaker, I.; Grohman, N.; Galvez, G.
(4) Clark, J.; Bassolino, A.; Packham, K.; Adame, J.; Knaus, M.; Niño, M.; Moreno, R.; Galvez, J.
(5) Rodriguez, D.; Geynes, M.; Molina, J.; Aguilar, A.; Alatsis, I.; Manno, A.; Grohman, R.; Packham, J.
(6) Geynes, S.; Cárdenas, M.; Arroyo, C.; Manno, C.; Merkling, J.; Lee, H.; Clairbush, X.; Jakobsson, P.
(7) Little, J.; Hildebrandt, B.; Shoemaker, M.; Knaus, K.; Caldwell, J.; Tibaudo, F.; Polley, C.