Napulo ka Pangutana Bahin sa Sekso Gitubag

 1 Ang sekso ba mao ang orihinal nga sala nga nahimo ni Adan ug Eva sa tanaman sa Eden?

▪ Tubag: Daghang tawo ang nagtuo nga ang gidiling bunga sa tanaman sa Eden naghawas sa seksuwal nga relasyon. Apan, dili na maoy gitudlo sa Bibliya.

Hunahunaa: Bisan sa wala pa lalanga si Eva, ang Diyos nagbaod na kang Adan nga dili kaonon ang bunga “sa kahoy sa kahibalo sa maayo ug sa daotan.” (Genesis 2:​15-18) Sanglit nag-inusara pa man si Adan niadto, kini nga pagdili wala gayod magtumong sa seksuwal nga relasyon. Dugang pa, ang Diyos naghatag kang Adan ug Eva ug tin-awng sugo nga ‘magmabungahon ug magdaghan ug pun-on ang yuta.’ (Genesis 1:28) Mosugo kaha ang mahigugmaong Diyos sa unang magtiayon nga ‘pun-on ang yuta’​—⁠nga siyempre, maglangkit sa seksuwal nga relasyon​—⁠ug dayon hukman silag kamatayon tungod sa pagsunod nila sa iyang sugo?​—⁠1 Juan 4:⁠8.

Dugang pa, nag-inusara si Eva sa dihang siya ‘mikuha sa gidiling bunga ug mikaon niini. Human niana siya mihatag usab ug pipila sa iyang bana sa dihang nahiuban na kaniya ug siya mikaon niini.’​—⁠Genesis 3:⁠6.

Lain pa, si Adan ug Eva wala badlonga sa dihang sila nagdulog ug nagpatunghag mga anak. (Genesis 4:​1, 2) Tin-aw, ang bunga nga gikaon ni Adan ug Eva wala maghawas sa seksuwal nga relasyon kondili maoy literal nga bunga sa kahoy.

 2 Gidili ba sa Bibliya ang seksuwal nga kalipay?

▪ Tubag: Ang unang basahon sa Bibliya nagpadayag nga ang Diyos maoy naglalang sa tawo ingong “lalaki ug babaye.” Ang Diyos miingon nga ang iyang linalang “maayo kaayo.” (Genesis 1:​27, 31) Sa ulahi, giinspirar sa Diyos ang usa ka magsusulat sa Bibliya sa paghatag niining sugoa sa mga bana: “Pagmaya uban sa asawa sa imong pagkabatan-on . . . Tugoting ang iyang mga dughan magtagbaw kanimo sa kalipay sa tanang panahon.” (Proverbio 5:​18, 19) Gipakita ba niini nga gidili sa Bibliya ang seksuwal nga kalipay?

Gipakita sa kamatuoran nga gawas sa pagpahinabo sa pagsanay, ang Diyos naglalang sa mga organo sa sekso diin ang magtiayon makapahayag sa ilang gugma sa usag usa sa paagi nga sila malipay. Ang maong relasyon makatagbaw sa pisikal ug emosyonal nga panginahanglan sa magtiayon.

 3 Giuyonan ba sa Bibliya ang pagpuyopuyo?

▪ Tubag: Ang Bibliya tin-awng nag-ingon nga “hukman sa Diyos ang mga makihilawason.” (Hebreohanon 13:⁠4) Ang Gregong pulong sa pakighilawas, ang por·neiʹa, nagtumong sa sayop nga paggamit sa mga organo sa sekso niadtong dili minyo.a Busa, sayop atubangan sa Diyos ang pagpuyopuyo​—⁠bisan pag nagplano silang magminyo sa ulahi.

Bisan pag nagkahigugmaay, gibaod gihapon sa Diyos nga ang lalaki ug babaye magminyo una sa dili pa magdulog. Ang Diyos maoy naglalang kanato uban ang katakos nga mahigugma. Ang pangunang hiyas sa Diyos mao ang gugma. Busa, duna siyay maayong katarongan nga mosugo nga ang pakigsekso himoon lamang sa minyong magtiayon, ingon sa isaysay sa sunod nga artikulo.

 4 Dalawaton ba ang poligamiya?

▪ Tubag: Dihay higayon nga gitugotan sa Diyos ang lalaki nga makabatog kapin sa usa ka asawa. (Genesis 4:19; 16:​1-4; 29:18–30:24) Apan dili gyod niya kahikayan nga ang lalaki mangasawag daghan. Gihatagan niya si Adan ug usa lang ka asawa.

Ang Diyos naghatag kang Jesu-Kristo ug awtoridad nga ibalik ang Iyang orihinal nga sukdanan sa pagbatog usa lang ka asawa. (Juan 8:28) Sa dihang gipangutana bahin sa kaminyoon, si Jesus miingon: “Siya nga naglalang kanila sukad sa sinugdan nagbuhat kanila nga lalaki ug babaye ug nag-ingon, ‘Tungod niini ang usa ka lalaki mobiya sa iyang amahan ug sa iyang inahan ug moipon sa iyang asawa, ug ang duha mahimong usa ka unod.’ ”​—⁠Mateo 19:​4, 5.

Sa ulahi, ang usa sa mga tinun-an ni Jesus giinspirar sa Diyos sa pagsulat: “Ang matag lalaki magbaton ug kaugalingong asawa ug ang matag babaye magbaton ug kaugalingong bana.” (1 Corinto 7:⁠2) Ang Bibliya nag-ingon usab nga ang minyong lalaki sa Kristohanong kongregasyon nga hatagag linaing responsabilidad kinahanglang “bana sa usa ka asawa.”​—⁠1 Timoteo 3:​2, 12.

 5 Sayop ba kon ang magtiayon mogamit ug kontraseptibo?

▪ Tubag: Si Jesus wala magsugo sa iyang mga sumusunod nga manganak o dili manganak. Ang iyang mga tinun-an wala usab magsugo niana. Dili nato mabasa sa Bibliya nga klarong gidili ang pagpugong sa pagpanganak.

Busa, ang mga magtiayon makahukom kon sila ba manganak o dili. Makahukom sab sila kon pila ka anak ang gusto nila ug kon kanus-a sila manganak. Kon ang bana ug asawa buot mogamit ug kontraseptibo nga dili makahulog sa gisabak, ila kanang personal nga desisyon ug responsabilidad.b Walay angayng mohukom nila.​—⁠Roma 14:​4, 10-13.

 6 Sayop ba ang aborsiyon?

▪ Tubag: Alang sa Diyos ang kinabuhi sagrado, ug bisan ang embryo giisip niya ingong buhing linalang. (Salmo 139:16) Ang Diyos nag-ingon nga ang usa manubag kon siya makahimog kadaot sa wala pa matawong bata. Busa, sa iyang panglantaw, ang pagpatay sa wala pa matawong bata maoy pagbuno.​—⁠Exodo 20:13; 21:​22, 23.

Apan, komosta kon panahon sa pagpanganak mameligrong mamatay ang inahan o kaha ang bata? Nianang kahimtanga, ang magtiayon kinahanglang modesisyon kon kinsay luwason.c

 7 Gitugotan ba sa Bibliya ang diborsiyo?

▪ Tubag: Oo. Apan, usa lang ka rason ang gihisgotan ni Jesus nga motapos sa kaminyoon. Siya miingon: “Bisan kinsa nga makigdiborsiyo sa iyang asawa, gawas kon tungod sa pakighilawas [pagpakigsekso gawas sa kaminyoon], ug magminyog lain makapanapaw.”​—⁠Mateo 19:⁠9.

Gidumtan sa Diyos ang pakigdiborsiyo nga gipasukad sa pagpanglimbong ug pagbudhi. Manubag kaniya kadtong mobiya sa ilang kapikas nga walay igong hinungdan, ilabina kon ang ilang motibo mao ang pagkuhag laing kapikas.​—⁠Malaquias 2:​13-16; Marcos 10:⁠9.

 8 Giuyonan ba sa Diyos ang homoseksuwalidad?

▪ Tubag: Ang Bibliya tin-awng nagdili sa pakighilawas, nga naglakip sa homoseksuwal nga relasyon. (Roma 1:​26, 27; Galacia 5:​19-21) Bisag klarong giingon sa Bibliya nga wala uyoni sa Diyos ang maong pagkinabuhi, nasayod usab kita nga “gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.”​—⁠Juan 3:⁠16.

Ang matuod nga mga Kristohanon dili mokonsentir sa homoseksuwal nga relasyon, apan magpakita silag kalulot sa tanan. (Mateo 7:12) Buot sa Diyos nga ‘pasidunggan ang tanang matang sa mga tawo.’ Busa, ang matuod nga mga Kristohanon dili magdumot sa mga homoseksuwal.​—⁠1 Pedro 2:⁠17.

 9 Daotan ba ang phone sex, “sexting,” o cybersex?

▪ Tubag: Ang phone sex maoy dili angayng pagpakighisgot bahin sa sekso o pagpaminaw ug law-ayng mga mensahe sa telepono. Ang “sexting” maoy pagpadalag law-ayng mga larawan ug text message pinaagig cell phone. Ang cybersex naglangkit sa mga panaghisgot ug buhat diha sa Internet nga makapukaw sa seksuwal nga gana.

Ang Bibliya wala maghisgot nga espesipiko sa modernong mga buhat sama niini. Apan kini nag-ingon: “Ang pakighilawas ug ang tanang matang sa kahugawan o kadalo dili gayod angay hisgotan sa inyong taliwala, ingon nga nahiangay sa mga balaan; ni ang makauulaw nga panggawi ni binuang nga sinultihan ni malaw-ay nga pagpanistis, mga butang nga dili angay.” (Efeso 5:​3, 4) Ang mga buhat sama sa phone sex, “sexting,” ug cybersex magpatunghag hiwi nga panglantaw sa sekso ug mag-awhag sa mga tawo sa pagtagbaw sa ilang gana sa sekso gawas sa kaminyoon. Imbes tabangan ang mga tawo nga kontrolahon ang seksuwal nga gana, gipasiugda niini ang hinakog nga pagtagbaw sa kaugalingon.

10Unsay panglantaw sa Bibliya sa masturbasyon?

▪ Tubag: Ang Bibliya wala maghisgot nga espesipiko sa masturbasyon​—⁠ang tinuyo nga pag-ugay-ugay sa kinatawo aron mapukaw ang gana sa sekso. Apan, ang Pulong sa Diyos nagsugo sa mga Kristohanon: “Busa, patya ang inyong mga sangkap sa lawas nga anaa sa yuta maylabot sa pakighilawas, kahugawan, [ug dili angayng] seksuwal nga gana.”​—⁠Colosas 3:⁠5.

Ang masturbasyon nagpasiugdag sayop ug hinakog nga panglantaw sa sekso. Ang Bibliya nagpasalig kanato nga ang Diyos makahatag ug “gahom nga labaw sa kasarangan” niadtong sinserong naningkamot sa pagbiya niini nga bisyo.​—⁠2 Corinto 4:7; Filipos 4:⁠13.

[Mga footnote]