Paghimog Tibuok-Kalag nga mga Halad Kang Jehova
“Bisan unsay inyong ginabuhat, buhata kini nga tibuok-kalag ingon nga alang kang Jehova.”—COL. 3:23.
1-3. (a) Ang kamatayon ba ni Jesus nagpasabot nga wala na kinahanglana ang bisan unsang halad gikan kanato? Ipatin-aw. (b) Unsang pangutana bahin sa mga halad karon ang mitungha?
SA UNANG siglo K.P., gipadayag ni Jehova sa iyang katawhan nga ang halad lukat ni Jesus nagtapos sa Moisesnong Balaod. (Col. 2:13, 14) Ang tanang matang sa halad nga ginahimo sa mga Hudiyo sulod sa gatosan ka tuig wala na kinahanglana ug wala nay bili. Natuman na sa Balaod ang papel niini ingong “magtutudlo nga nagatultol ngadto kang Kristo.”—Gal. 3:24.
2 Wala kini magpasabot nga ang mga Kristohanon dili na interesado sa mga halad. Gani, si apostol Pedro naghisgot sa panginahanglan nga “magtanyag ug espirituwal nga mga halad nga dalawaton sa Diyos pinaagi kang Jesu-Kristo.” (1 Ped. 2:5) Dugang pa, gipatin-aw ni apostol Pablo nga ang matag bahin sa kinabuhi sa usa ka dedikadong Kristohanon nahisamag “usa ka halad.”—Roma 12:1.
3 Busa ang usa ka Kristohanon mohimog mga halad kang Jehova pinaagi sa paghatag o sa pagsakripisyog mga butang para kaniya. Base sa ato nang nahibaloan bahin sa mga halad sa mga Israelinhon, unsaon nato pagtino nga ang atong mga halad karon dalawaton kang Jehova?
SA MATAG ADLAWNG PAGKINABUHI
4. Unsay angay natong hinumdoman bahin sa atong matag adlawng buluhaton?
4 Lagmit matingala kita kon sa unsang paagi ang atong ginahimo matag adlaw nalangkit sa paghimog mga halad kang Jehova. Ang mga buluhaton sa balay, sa eskuylahan, sa trabahoan, pagpamalit, ug uban pa daw wala kaayoy kalabotan sa espirituwal nga mga butang. Apan kon ikaw nakapahinungod na kang Jehova o nagplanong magpahinungod sa dili madugay, angay nimong hinumdoman nga kining mga buluhatona makaapektar sa imong relasyon sa Diyos. Kita mga Kristohanon 24 oras kada adlaw, ug kinahanglang ipadapat nato ang mga prinsipyo sa Bibliya sa matag bahin sa atong kinabuhi. Busa si Pablo nag-awhag kanato: “Bisan unsay inyong ginabuhat, buhata kini nga tibuok-kalag ingon nga alang kang Jehova, ug dili alang sa mga tawo.”—Basaha ang Colosas 3:18-24.
5, 6. Unsay atong tagdon nga angayng makaapektar sa atong pamesti ug panggawi sa matag adlaw?
5 Ang atong buluhaton sa matag adlaw dili bahin sa atong pag-alagad sa Diyos. Apan ang awhag ni Pablo nga mobuhat nga “tibuok-kalag ingon nga alang kang Jehova” magpahunahuna kanato kon unsay angay natong panggawi sa tanang panahon. Busa unsaon nato kini pagpadapat? Ang ato bang panggawi ug pamesti kanunayng haom ingong mga Kristohanon? O samtang naghimo sa atong matag adlawng buluhaton, maulaw ba tang magpaila ingong mga Saksi ni Jehova tungod sa atong panggawi o pamesti? Dili gayod nato kana tugotang mahitabo! Ang katawhan ni Jehova dili buot mobuhat ug bisan unsa nga makadaot sa ngalan sa Diyos.—Isa. 43:10; 2 Cor. 6:3, 4, 9.
6 Atong susihon kon sa unsang paagi ang tinguha sa pagbuhat nga “tibuok-kalag ingon nga alang kang Jehova” makaapektar sa daghang bahin sa atong kinabuhi. Samtang ato kining susihon, hinumdomi nga ang tanang ihalad sa mga Israelinhon kang Jehova kinahanglang mao ang ilang kinamaayohan.—Ex. 23:19.
KON SA UNSANG PAAGI MAAPEKTOHAN ANG IMONG KINABUHI
7. Unsay nalangkit sa Kristohanong pagpahinungod?
7 Dihang nagpahinungod ka kang Jehova, dili ba wala ka magpanuko sa paghimo sa maong desisyon? Samag miingon ka nga sa matag bahin sa imong kinabuhi, imo gayong unahon si Jehova. (Basaha ang Hebreohanon 10:7.) Usa kadto ka maayong desisyon. Seguradong imo nang nasinati nga kon imong sayron ang kabubut-on ni Jehova bahin sa usa ka butang ug molihok uyon niini, maayo gayod ang resulta. (Isa. 48:17, 18) Balaan ug malipayon ang katawhan sa Diyos kay ilang gipabanaag ang mga hiyas sa Usa nga nagtudlo kanila.—Lev. 11:44; 1 Tim. 1:11.
8. Unsay kahulogan para kanato nga giisip ni Jehova ang mga halad kaniadto ingong balaan?
8 Ang mga halad nga gitanyag sa mga Israelinhon kang Jehova giisip nga balaan. (Lev. 6:25; 7:1) Ang Hebreohanong termino nga gihubad ug “pagkabalaan” dunay ideya sa pagkalinain, o pagkaeksklusibo ngadto sa Diyos. Aron ang atong mga halad dalawaton kang Jehova, kini kinahanglang bulag sa kalibotan ug wala mahugawi sa impluwensiya niini. Dili nato higugmaon ang mga butang nga gidumtan ni Jehova. (Basaha ang 1 Juan 2:15-17.) Kini tin-awng nagpasabot nga angay natong likayan ang bisan unsang pagpakig-uban o kalangkitan nga makahugaw kanato sa panglantaw sa Diyos. (Isa. 2:4; Pin. 18:4) Nagpasabot usab kini nga dili kita padayong motan-aw o maghanduraw sa mahugaw o imoral nga mga butang.—Col. 3:5, 6.
9. Nganong hinungdanon ang atong paagi sa pagtratar sa uban?
9 Giawhag ni Pablo ang mga isigkamagtutuo: ‘Ayaw kalimti ang pagbuhat ug maayo ug ang pagpaambit sa mga butang ngadto sa uban, kay ang maong mga halad gikahimut-an sa Diyos.’ (Heb. 13:16) Busa ang pagbuhat ug maayo ug pagtabang sa uban isipon ni Jehova nga usa ka dalawatong halad kaniya. Ang gugma ug kahangawa alang sa uban maoy timailhan sa matuod nga mga Kristohanon.—Juan 13:34, 35; Col. 1:10.
MGA HALAD SA PAGSIMBA
10, 11. Unsay panglantaw ni Jehova sa atong pagsangyaw ug pagsimba, ug unsay angayng epekto niini kanato?
10 Ang usa ka paagi nga kita makabuhat ug maayo sa uban mao ang “pagpahayag sa dayag bahin sa atong paglaom.” Gipahimuslan mo ba ang matag kahigayonan nga makasangyaw? Kining hinungdanong buluhaton gitawag ni apostol Pablo nga ‘halad sa pagdayeg, nga mao, ang bunga sa mga ngabil nga naghimog pagpahayag sa dayag sa ngalan sa Diyos.’ (Heb. 10:23; 13:15; Os. 14:2) Maayong susihon ang gidaghanon sa oras nga atong gigugol sa pagsangyaw ug kon unsaon pagpauswag ang atong paagi sa pagsangyaw. Makatabang nato niining bahina ang daghang bahin sa Tigom sa Pag-alagad. Apan sanglit ang atong pagsangyaw sa kanataran ug sa di-pormal nga paagi maoy “halad sa pagdayeg,” usa ka bahin sa atong pagsimba, angayng himoon nato ang kinamaayohan alang niana. Bisag lainlain ang atong kahimtang, ang gidaghanon sa oras nga atong gigugol sa pagsangyaw magbanaag sa atong pagpabili sa espirituwal nga mga butang.
11 Ang mga Kristohanon regular nga nagsimba kang Jehova sa pribado man o ingong grupo. Siya nagsugo niana. Bisag dili na kita kinahanglang mosunod sa balaod sa Igpapahulay o moadto sa Jerusalem alang sa mga pista, duna gihapon kitay makat-onan sa maong mga balaod. Matag adlaw daghan kitag buluhaton, apan gidahom sa Diyos nga mogahin kitag panahon sa pagtuon sa Bibliya, pag-ampo, ug pagtambong sa mga tigom. Ang mga ulo sa pamilya kinahanglang manguna sa pagdumala sa pamilyahanong pagsimba. (1 Tes. 5:17; Heb. 10:24, 25) Bahin sa espirituwal nga mga kalihokan, maayong pangutan-on ang kaugalingon, ‘Mapauswag pa ba nako ang kalidad sa akong pagsimba?’
12. (a) Gipakasama karon sa unsa ang pagtanyag ug insenso sa karaang pagsimba? (b) Sa unsang paagi kini nga pagtandi makaapekto sa atong mga pag-ampo?
12 Si Haring David miawit kang Jehova: “Hinaot ang akong pag-ampo maandam ingon sa insenso sa imong atubangan.” (Sal. 141:2) Hunahunaa kadiyot ang imong mga pag-ampo—ang kasubsob ug kalidad niini. Gitandi sa basahon sa Pinadayag “ang mga pag-ampo sa mga balaan” ngadto sa insenso, sa diwa nga ang dalawatong mga pag-ampo makaabot kang Jehova samag humot nga alimyon. (Pin. 5:8) Sa karaang Israel, ang insenso nga kanunayng gitanyag diha sa halaran ni Jehova kinahanglang andamon pag-ayo. Dawaton lang kini ni Jehova kon kini gitanyag sumala sa mga lagda nga iyang gihatag. (Ex. 30:34-37; Lev. 10:1, 2) Kon ingon usab niana ang atong mga pag-ampo, makaseguro kita nga kini dalawaton kang Jehova.
PAGHATAG UG PAGDAWAT
13, 14. (a) Unsay gihimo ni Epafrodito ug sa kongregasyon sa Filipos alang kang Pablo, ug unsay pag-isip niini sa apostol? (b) Sa unsang paagi nato masundog ang panig-ingnan ni Epafrodito ug sa mga taga-Filipos?
13 Ang pinansiyal nga mga amot alang sa tibuok kalibotang buluhaton gipakasamag halad, dako man o gamay ang atong giamot. (Mar. 12:41-44) Sa unang siglo K.P., ang kongregasyon sa Filipos nagpadala kang Epafrodito ngadto sa Roma aron maatiman ang panginahanglan ni Pablo. Dala niya ang gasang salapi gikan sa kongregasyon. Dili kini ang unang higayon nga sila mitabang kang Pablo. Dili nila gustong mabalaka pa si Pablo sa pinansiyal aron makagahin siyag mas dakong panahon sa ministeryo. Unsay pag-isip ni Pablo sa maong gasa? Iya kining gitawag nga “usa ka humot nga alimyon, usa ka dalawatong halad, nga makapahimuot pag-ayo sa Diyos.” (Basaha ang Filipos 4:15-19.) Gipabilhan gayod ni Pablo ang kaayo sa mga taga-Filipos, ug nalipay usab si Jehova.
14 Karon, gipabilhan usab ni Jehova ang atong mga amot alang sa tibuok kalibotang buluhaton. Dugang pa, siya misaad nga kon unahon nato ang intereses sa Gingharian, siya motagana sa atong espirituwal ug pisikal nga panginahanglan.—Mat. 6:33; Luc. 6:38.
IPAKITA ANG IMONG PAGKAMAPASALAMATON
15. Unsa ang pipila ka butang nga ikaw mapasalamaton kang Jehova?
15 Daghan kitag rason nga magpasalamat kang Jehova. Dili ba angay kitang magpasalamat kaniya matag adlaw sa gasa nga kinabuhi? Gitagana niya ang tanan aron kita mabuhi—pagkaon, besti, ug puy-anan ingon man ang hangin nga atong gihanggab. Dugang pa, ang atong pagtuo nga gibase sa tukmang kahibalo naghatag kanatog paglaom. Haom lang nga kita mosimba ug mohimog mga halad sa pagdayeg kang Jehova tungod sa iyang pagka-Diyos ug sa iyang gihimo alang kanato.—Basaha ang Pinadayag 4:11.
16. Unsay angay natong sanong sa halad lukat ni Kristo?
16 Sa atong nakat-onan sa miaging artikulo, ang labing bililhong gasa sa Diyos alang sa tawo mao ang halad lukat ni Kristo. Kini maoy talagsaong kapahayagan sa iyang gugma kanato. (1 Juan 4:10) Unsay angay natong sanong niini? Si Pablo miingon: “Ang gugma nga iya ni Kristo nagatukmod kanamo, tungod kay mao kini ang among gikahukom, nga ang usa ka tawo namatay alang sa tanan; . . . ug siya namatay alang sa tanan aron sila nga nagakinabuhi magkinabuhi dili na alang sa ilang kaugalingon, kondili alang kaniya nga namatay alang kanila ug gibangon.” (2 Cor. 5:14, 15) Sa diwa, si Pablo nag-ingon nga kon atong pabilhan ang gihimo sa Diyos, gamiton nato ang atong kinabuhi sa pagpasidungog Kaniya ug sa Iyang Anak. Ikapakita nato ang atong gugma ug pagpabili sa Diyos ug kang Kristo pinaagi sa atong pagkamasinugtanon ug sa atong tinguha sa pagsangyaw ug paghimog tinun-an.—1 Tim. 2:3, 4; 1 Juan 5:3.
17, 18. Giunsa sa uban pagpauswag ang ilang halad sa pagdayeg kang Jehova? Paghatag ug pananglitan.
17 Mapauswag pa ba nimo ang halad sa pagdayeg nga imong gitanyag sa Diyos? Human mapamalandong ang tanang maayong butang nga gihimo ni Jehova alang kanila, daghan ang nag-organisar sa ilang panahon ug kalihokan aron mapauswag ang ilang pagpakigbahin sa pagsangyaw sa Gingharian o sa ubang teokratikanhong kalihokan. Ang uban nag-oksilyare payunir ug usa ka bulan o kapin pa matag tuig, samtang ang pipila nagregular payunir. Ang uban usab miduyog sa mga proyekto sa pagpanukod. Dili ba maayo kini nga mga paagi sa pagpakita sa atong pagpasalamat? Kon himoon uban ang hustong motibo—ang pagpabili ug pagpasalamat—kini nga mga buhat sa sagradong pag-alagad dalawaton sa Diyos.
18 Daghang Kristohanon ang napalihok sa pagpasalamat kang Jehova. Usa kanila si Morena. Siya gimatuto ingong Katoliko apan daghan siyag pangutana bahin sa Diyos ug sa kahulogan sa kinabuhi. Nangita siyag tubag niini diha sa Katolisismo ug sa mga pilosopiya sa Asia. Apan dili siya kombinsido sa ilang mga tubag. Natin-awan lang siya dihang nagtuon siya sa Bibliya uban sa mga Saksi ni Jehova. Mapasalamaton kaayo si Morena sa mga tubag sa Kasulatan kay naghatag kini kaniyag tinuod nga kalipay. Busa buot niyang moalagad kang Jehova sa tibuok niyang kinabuhi. Human sa iyang bawtismo, nag-oksilyare payunir dayon siya ug ngadtongadto nagregular payunir. Milabay na ang 30 ka tuig, ug hangtod karon si Morena anaa gihapon sa bug-os panahong pag-alagad.
19. Unsaon nimo pagpauswag ang imong mga halad kang Jehova?
19 Siyempre, dili tanan ang makapayunir. Bisan unsay atong mahimo sa pag-alagad kang Jehova, kitang tanan makatanyag ug dalawatong espirituwal nga mga halad kaniya. Sa atong panggawi, atong ipadapat ang mga prinsipyo sa Bibliya ug hinumdoman nga kita naghawas kang Jehova sa tanang panahon. Sa pagtuo, kita bug-os nga nagsalig sa katumanan sa mga katuyoan sa Diyos. Sa maayong mga buhat, makigbahin kita sa pagpakaylap sa maayong balita. Aron ipakita nga kita mapasalamaton gayod sa tanang gihimo ni Jehova alang kanato, padayon kitang mohimog tibuok-kalag nga mga halad kang Jehova.
[Blurb sa panid 25]
Ang kaayo ba ni Jehova nagpalihok kanimo sa pagpauswag sa imong halad sa pagdayeg?
[Hulagway sa panid 23]
Gipahimuslan mo ba ang matag kahigayonan nga makasangyaw?