Ginatigom ni Jehova ang Iyang Pamilya
‘Ako nangaliyupo kaninyo sa pagsunod sa pagkausa sa espiritu.’—EFE. 4:1, 3.
UNSAON NIMO PAGPATIN-AW?
Unsay katuyoan sa pagdumala o administrasyon sa Diyos?
Unsaon nato sa ‘pagsunod sa pagkausa sa espiritu’?
Unsay makatabang kanato nga “magmaluloton sa usag usa”?
1, 2. Unsay katuyoan ni Jehova alang sa yuta ug sa tawo?
PAMILYA. Unsay mosantop sa imong hunahuna niining pulonga? Pagminahalay? Kalipay? Pagtinabangay alang sa usa ka tumong? Luwas nga dapit diin ang usa magdako, makakat-on, ug makapaambit sa iyang ideya? Lagmit kanay imong mahunahunaan kon nagdako ka sa mahigugmaong pamilya. Si Jehova mao ang Tagmugna sa pamilya. (Efe. 3:14, 15) Katuyoan niya nga ang iyang mga linalang sa langit ug sa yuta mobating luwas, may pagsalig sa usag usa, ug magkahiusa ingong pamilya.
2 Human makasala, ang mga tawo dili na bahin sa pamilya sa Diyos. Apan wala mausab ang katuyoan ni Jehova. Paneguroon niya nga ang Paraisong yuta mapuno sa mga kaliwat ni Adan ug Eva. (Gen. 1:28; Isa. 45:18) Naandam na niya ang tanang gikinahanglan sa pagtuman sa iyang katuyoan. Ang pipila niini gihisgotan sa basahon sa Efeso, nga ang tema maoy panaghiusa. Atong tagdon ang pipila ka bersikulo niini ug susihon kon sa unsang paagi kita mogawi nga nahiuyon sa katuyoan ni Jehova sa paghiusa sa iyang mga linalang.
ANG ADMINISTRASYON UG ANG BULUHATON NIINI
3. Unsa ang pagdumala o administrasyon sa Diyos nga gihisgotan sa Efeso 1:10, ug kanus-a nagsugod ang unang yugto niini?
3 Giingnan ni Moises ang mga Israelinhon: “Si Jehova nga atong Diyos maoy usa lamang ka Jehova.” (Deut. 6:4) Ang tanang ginahimo ni Jehova kanunayng nahiuyon sa iyang katuyoan. Busa sa dihang ‘miabot ang kinutoban sa tinudlong kapanahonan,’ gisugdan sa Diyos ang “usa ka pagdumala” o administrasyon—ang kahikayan sa paghiusa sa tanan niyang intelihenteng linalang. (Basaha ang Efeso 1:8-10.) Kini nga administrasyon dunay duha ka yugto. Sa unang yugto, giandam sa Diyos ang mga dinihogan aron mopuyo sa langit. Kini nagsugod sa Pentekostes 33 K.P. sa dihang gisugdan ni Jehova pagtigom ang mga dinihogan aron magmando sa langit uban ni Jesu-Kristo, ingong ilang Ulo. (Buh. 2:1-4) Sanglit ang mga dinihogan gipahayag nga matarong pinasukad sa halad lukat ni Kristo, sila nahibalo nga sila gisagop na ingong “mga anak sa Diyos.”—Roma 3:23, 24; 5:1; 8:15-17.
4, 5. Unsa ang ikaduhang yugto sa administrasyon sa Diyos?
4 Sa ikaduhang yugto, giandam sa Diyos kadtong mopuyo sa Paraisong yuta ubos sa Mesiyanikong Gingharian ni Kristo. Ang “dakong panon” maoy unang mopuyo sa Paraiso. (Pin. 7:9, 13-17; 21:1-5) Sulod sa Usa ka Libo ka Tuig nga Pagmando, moduyog kanila ang binilyong banhawon. (Pin. 20:12, 13) Kana maghatag kanatog dakong kahigayonan sa pagpasundayag sa atong panaghiusa! Human sa usa ka libo ka tuig, ang “mga butang sa yuta” mailalom sa kataposang pagsulay. Kadtong magmatinumanon sagopon ingong yutan-ong “mga anak sa Diyos.”—Roma 8:21; Pin. 20:7, 8.
5 Kining duha ka yugto sa administrasyon sa Diyos nagpadayon hangtod karon—ang para sa langit ug ang para sa yuta. Apan ingong indibiduwal, sa unsang paagi kita mogawi nga nahiuyon sa administrasyon sa Diyos?
‘SUNDA ANG PAGKAUSA SA ESPIRITU’
6. Giunsa pagpakita sa Bibliya nga ang mga Kristohanon angayng magtigom?
6 Gipakita sa Bibliya nga ang mga Kristohanon angayng magtigom. (1 Cor. 14:23; Heb. 10:24, 25) Apan ang tinuod nga panaghiusa wala magpasabot nga magtapok lang sa usa ka dapit, sama sa mga tawo nga anaa sa merkado o sa sports complex. Aron mabatonan ang tinuod nga panaghiusa, atong ipadapat ang mga instruksiyon ni Jehova ug magpagiya sa iyang balaang espiritu.
7. Unsay kahulogan sa ‘pagsunod sa pagkausa sa espiritu’?
7 Pinaagi sa halad lukat ni Jesus, gipahayag ni Jehova nga matarong ang mga dinihogan ug ang ubang mga karnero. Iyang giisip ang mga dinihogan ingong iyang mga anak ug ang ubang karnero ingong iyang mga higala. Apan samtang nagpuyo pa kita niining daang sistema, motungha gihapon ang mga kabingkilan. (Roma 5:9; Sant. 2:23) Kanay hinungdan nga ang Bibliya nagtambag kanato nga “mag-inantosay sa usag usa.” Unsay angay natong himoon aron kita magkahiusa? Atong ugmaron ang “bug-os nga pagpaubos sa hunahuna.” Dugang pa, si Pablo nag-awhag nga manlimbasog kita sa ‘pagsunod sa pagkausa sa espiritu sa nagahiusang bugkos sa pakigdait.’ (Basaha ang Efeso 4:1-3.) Ato kining mapadapat kon magpagiya kita sa balaang espiritu, ug sa ingon atong mapasundayag ang bunga niini. Ang bunga sa espiritu makatabang sa pagsulbad sa mga kabingkilan, dili sama sa mga buhat sa unod nga maoy hinungdan kanunay sa pagkabahinbahin.
8. Sa unsang paagi ang “mga buhat sa unod” makadaot sa panaghiusa?
8 Tagda kon sa unsang paagi ang “mga buhat sa unod” makadaot sa panaghiusa. (Basaha ang Galacia 5:19-21.) Ang pakighilawas magpahilayo sa usa gikan kang Jehova ug sa kongregasyon. Ang pagpanapaw makahatag ug dakong kasakit sa pamilya ug makadaot sa relasyon tali sa anak ug ginikanan, ug tali sa magtiayon. Ang kahugawan makadaot sa relasyon sa usa uban sa Diyos ug sa iyang relasyon uban sa mga nahigugma kaniya. Pananglitan, kon atong itapot ang duha ka butang gamit ang glue, kinahanglang limpiyo ang duha ka bahin nga atong itapot. Ang walay kaulaw nga panggawi nagpakita nga ang usa bug-os nagbalewala sa matarong nga mga balaod sa Diyos ug dili mahinulsolon. Ang uban pang mga buhat sa unod magpahilayo sa usa gikan sa Diyos ug sa uban. Ang maong mga panggawi sukwahi gayod sa personalidad ni Jehova.
9. Unsaon nato pagtino kon kita ba ‘matinuorong nanlimbasog sa pagsunod sa pagkausa sa espiritu’?
9 Busa angay natong pangutan-on ang atong kaugalingon: “Nanlimbasog ba gyod ko sa ‘pagsunod sa pagkausa sa espiritu sa nagahiusang bugkos sa pakigdait’? Unsay sagad nakong reaksiyon dihang duna koy problema batok sa usa ka igsoon? Gipanulti ba nako ni sa uban aron modapig sila nako? Maghulat ba ko nga ang mga ansiyano maoy mosulbad sa maong problema inay nga ako ang maningkamot nga makigdait sa igsoon? Kon dunay igsoon nga nasilo nako, ako ba siyang gilikaylikayan aron dili mahisgotan ang problema?” Kini ba nga mga panggawi nahiuyon sa katuyoan ni Jehova nga tigomon pag-usab ang tanang butang diha kang Kristo?
10, 11. (a) Nganong hinungdanon nga makigdait sa atong mga igsoon? (b) Unsay himoon aron makaamot sa kalinaw ug pag-uswag sa kongregasyon?
10 Si Jesus miingon: “Nan, kon ikaw nagadala sa imong gasa ngadto sa halaran ug didto mahinumdom ka nga ang imong igsoon may butang nga batok kanimo, biyai ang imong gasa didto atubangan sa halaran, ug lakaw; pakigdait una sa imong igsoon, ug unya, sa makabalik ka na, ihalad ang imong gasa. Pakighusay sa madali.” (Mat. 5:23-25) Si Santiago miingon nga “ang bunga sa pagkamatarong may binhi nga gipugas ubos sa malinawong mga kahimtang alang niadtong nagapakigdait.” (Sant. 3:17, 18) Busa dili kita makapadayon sa pagbuhat kon unsay matarong kon dili kita makigdait sa uban.
11 Sa pag-ilustrar, gibanabana nga sa mga nasod nga nakasinatig gubat, 35 porsiyento sa ilang yuta ang wala na tamni kay ang mga mag-uuma nahadlok sa gilubong nga mga bomba. Dihang dunay bomba nga mobuto, ang mga uma biyaan, ang mga baryo mawad-an ug pangabuhian, ug wala nay masuplay nga pagkaon diha sa mga siyudad. Sa samang paagi, kita mahisamag gilubong nga bomba kon duna kitay tinamdan nga makapugong sa atong espirituwal nga pag-uswag ug makadaot sa kalinaw tali sa mga igsoon. Apan pinaagi sa pagpasaylo dayon ug paghimog maayo sa uban, kita makaamot sa kalinaw ug pag-uswag sa kongregasyon.
12. Sa unsang paagi ang mga ansiyano makatabang kanato nga magkahiusa?
12 Dugang pa, ang “mga gasa [nga] mga lalaki” makatabang sa panaghiusa. Sila gihatag aron matabangan kita nga “makadangat sa pagkausa sa pagtuo.” (Efe. 4:8, 13) Samtang ang mga ansiyano nakig-uban kanato sa pag-alagad kang Jehova ug naghatag kanatog Kasulatanhong tambag, ila kitang ginatabangan nga mouswag sa pagsul-ob sa bag-ong personalidad. (Efe. 4:22-24) Imo bang giisip nga ang ilang mga tambag maoy paagi ni Jehova sa pag-andam kanimo sa bag-ong kalibotan ubos sa pagmando sa iyang Anak? Mga ansiyano, naningkamot ba kamo sa pagtul-id sa uban sa paagi nga mobati sila nga gusto ninyo silang tabangan?—Gal. 6:1.
“MAGMALULOTON SA USAG USA”
13. Unsay resulta kon dili nato ipadapat ang tambag sa Efeso 4:25-32?
13 Gihisgotan sa Efeso 4:25-29 ang pipila ka panggawi nga angay natong likayan. Kini naglakip sa pagpamakak, pagkapungot, pagkatapolan, ug pagsultig mangil-ad nga mga pulong inay sa maayo ug makapadasig nga mga pulong. Kon dili ipadapat sa usa kining tambaga, iyang mapaguol ang espiritu sa Diyos, kay ang balaang espiritu maoy puwersa nga makapahiusa sa mga tawo. (Efe. 4:30) Aron makab-ot ang kalinaw ug panaghiusa, kinahanglang ipadapat usab nato ang sunod nga gisulat ni Pablo: “Isalikway ninyo ang tanang mapangdaot nga kayugot ug kasuko ug kapungot ug sininggitay ug mapasipalahong sinultihan uban sa tanang pagkadaotan. Apan magmaluloton sa usag usa, magmalumo uban ang pagkamabination, kinabubut-on nga magpasaylo sa usag usa ingon nga ang Diyos usab pinaagi kang Kristo kinabubut-on nga nagpasaylo kaninyo.”—Efe. 4:31, 32.
14. (a) Unsay gipaila sa tambag nga “magmaluloton”? (b) Unsay motabang nato nga magmaluloton?
14 Ang tambag nga “magmaluloton” nagpakita nga dunay mga higayon nga dili kita maluloton ug nga kinahanglang mouswag kita sa pagpakitag kalulot. Angay natong isipon nga ang pagbati sa uban mas hinungdanon kay sa atoa. (Filip. 2:4) Basin duna kitay gustong isulti nga makapakatawa o makapabilib sa uban, apan maluloton kaha kini? Kon atong hunahunaon daan ang atong isulti, kana motabang nato nga “magmaluloton.”
KAT-ONI ANG GUGMA UG PAGTAHOD SULOD SA PAMILYA
15. Sumala sa Efeso 5:28, sa unsang paagi masundog sa mga bana si Kristo?
15 Gitandi sa Bibliya ang relasyon ni Kristo sa kongregasyon ngadto sa relasyon sa bana ug asawa. Gipasiugda niini ang pagpanguna, gugma, ug pag-atiman nga angayng ipakita sa bana ngadto sa iyang asawa ug ang pagpasakop nga angayng ipakita sa asawa ngadto sa iyang bana. (Efe. 5:22-33) Dihang si Pablo miingon, “sa samang paagi, ang mga bana kinahanglang mahigugma sa ilang mga asawa ingon sa ilang kaugalingong mga lawas,” unsa nga “paagi” ang iyang gitumong? (Efe. 5:28, Ang Biblia, NCV) Sa nag-unang mga bersikulo, gitumong ni Pablo ang paagi ni Kristo. Siya miingon nga ‘si Kristo nahigugma sa kongregasyon, nagtugyan sa iyang kaugalingon alang niini, ug naghinlo niini pinaagi sa paghugas ug tubig pinaagi sa pulong.’ Busa, ang bana kinahanglang alisto sa pag-atiman sa espirituwalidad sa iyang pamilya. Sa ingon, siya nagabuhat nga nahiuyon sa katuyoan sa Diyos sa pagtigom pag-usab sa tanang butang diha kang Kristo.
16. Unsay resulta kon tumanon sa mga ginikanan ang ilang responsabilidad diha sa panimalay?
16 Angayng hinumdoman sa mga ginikanan nga si Jehova ang naghatag kanilag responsabilidad sa pag-atiman sa mga anak. Ikasubo nga daghan karon ang “walay kinaiyanhong pagbati.” (2 Tim. 3:1, 3) Wala tumana sa daghang amahan ang ilang responsabilidad, ug kini dunay dili maayong epekto sa ilang mga anak. Apan gitambagan ni Pablo ang Kristohanong mga amahan: “Ayaw palagota ang inyong mga anak, kondili magpadayon sa pagmatuto kanila sa disiplina ug sa pagdumala-sa-kaisipan ni Jehova.” (Efe. 6:4) Sa pamilya unang makakat-on ang mga anak bahin sa gugma ug pagtahod sa awtoridad. Ang mga ginikanan nga malamposong nagtudlo niini milihok uyon sa administrasyon ni Jehova. Kinahanglang maningkamot ang mga ginikanan nga bation sa ilang mga anak nga sila gihigugma. Busa atong kontrolahon ang atong kasuko ug dili singka-singkahan ang atong mga anak. Pinaagi niini, atong gitudloan ang atong mga anak kon unsaon sa pagpakitag gugma ug pagtahod sa awtoridad. Kini mag-andam kanila alang sa bag-ong kalibotan sa Diyos.
17. Unsay gikinahanglan aron masuklan ang Yawa?
17 Angay natong hinumdoman nga ang Yawa, nga maoy unang nagdaot sa kalinaw sa uniberso, mobabag gayod sa atong mga paningkamot sa pagbuhat sa kabubut-on sa Diyos. Gisunod sa daghang tawo karon ang gusto ni Satanas sa dihang sila nagdiborsiyo, nagpuyopuyo, ug nagkonsentir sa pagminyo sa mga homoseksuwal. Bisag uso o dalawaton na kana karon, dili nato sundogon ang maong mga panggawi o tinamdan. Si Kristo mao ang atong sulondan. (Efe. 4:17-21) Busa aron masuklan ang Yawa ug ang iyang mga demonyo, angay natong “isul-ob ang kompletong armadura gikan sa Diyos.”—Basaha ang Efeso 6:10-13.
“MAGPADAYON SA PAGLAKAW DIHA SA GUGMA”
18. Unsa ang yawi sa Kristohanong panaghiusa?
18 Ang tinuod nga yawi sa Kristohanong panaghiusa mao ang gugma. Kon kita kinasingkasing nga nahigugma sa atong “usa ka Ginoo,” sa atong “usa ka Diyos,” ug sa usag usa, kita determinado nga “mosunod sa pagkausa sa espiritu sa nagahiusang bugkos sa pakigdait.” (Efe. 4:3-6) Si Jesus miampo bahin niini nga gugma: “Naghangyo ako, dili mahitungod kanila lamang, kondili mahitungod usab kanilang nagbutang ug pagtuo kanako pinaagi sa ilang pulong; aron nga silang tanan mahimong usa, ingon nga ikaw, Amahan, nahiusa kanako ug ako nahiusa kanimo, nga sila usab mahiusa unta kanato . . . Ug gipaila ko ang imong ngalan kanila ug igapaila pa kini, aron nga ang gugma nga imong gibati kanako maanaa unta kanila ug ako mahiusa kanila.”—Juan 17:20, 21, 26.
19. Unsay imong determinadong buhaton?
19 Kon nalisdan kita sa pagbag-o sa usa ka dili maayong tinamdan, hinaot nga ang gugma magtukmod kanato sa pag-ampo sama sa salmista: “Bug-osa ang akong kasingkasing sa pagkahadlok sa imong ngalan.” (Sal. 86:11) Magmadeterminado kita nga suklan ang mga paningkamot sa Yawa nga ipahilayo kita gikan sa atong Amahan ug sa kongregasyon. Maningkamot usab kita nga “mahimong mga tigsundog sa Diyos, ingon nga hinigugmang mga anak, ug magpadayon sa paglakaw diha sa gugma”—diha sa pamilya, sa atong ministeryo, ug sa kongregasyon.—Efe. 5:1, 2.
[Hulagway sa panid 29]
Gibiyaan niya ang iyang gasa atubangan sa halaran ug nakigdait una sa iyang igsoon
[Hulagway sa panid 31]
Mga ginikanan, tudloi ang inyong mga anak sa pagpakitag pagtahod