Hinumdomi Kadtong Anaa sa Bug-os Panahong Pag-alagad

 1. Unsay pagbati ni Pablo niadtong makugihong nag-alagad kang Jehova?

SI APOSTOL Pablo nahinumdom niadtong naghago alang sa maayong balita. Siya misulat: “Kami walay-hunong nga nahinumdom sa inyong buhat sa pagtuo ug sa inyong mahigugmaong paghago ug sa inyong pag-antos tungod sa inyong paglaom diha sa atong Ginoong Jesu-Kristo atubangan sa atong Diyos ug Amahan.” (1 Tes. 1:3) Sa pagkatinuod, si Jehova nahinumdom sa mahigugmaong mga paghago sa tanang matinumanong nag-alagad kaniya, dako man o gamay ang ilang nahimo depende sa ilang kahimtang.—Heb. 6:10.

 2. Unsay atong hisgotan niining artikuloha?

² Daghan sa atong isigkaalagad—kaniadto ug karon—mihimog dagkong sakripisyo aron makaalagad kang Jehova sa bug-os panahon. Atong hisgotan kon sa unsang paagi ang pipila nag-alagad sa unang siglo. Hisgotan usab nato ang pipila ka matang sa bug-os panahong pag-alagad sa modernong panahon ug kon sa unsang paagi kita makatabang niadtong anaa sa maong pag-alagad.

3, 4. (a) Unsang matang sa pag-alagad ang gihimo sa pipila sa unang siglo? (b) Sa unsang paagi natagan-an ang ilang pisikal nga panginahanglan?

³ Wala madugay human sa iyang bawtismo, gisugdan ni Jesus ang usa ka tibuok kalibotang buluhaton. (Luc. 3:21-23; 4:14, 15, 43) Human sa iyang kamatayon, ang iyang mga apostoles mao ang nanguna sa pagpakaylap niining buluhatong pagsangyaw. (Buh. 5:42; 6:7) Ang pipila ka Kristohanon, sama kang Felipe, nag-alagad ingong mga tig-ebanghelyo ug misyonaryo sa Palestina. (Buh. 8:5, 40; 21:8) Si Pablo ug ang uban mipanaw sa lagyong dapit. (Buh. 13:2-4; 14:26; 2 Cor. 1:19) Ang pipila—pananglitan, si Silvano (Silas), Marcos, ug Lucas—nag-alagad usab ingong mga magkokopya o magsusulat. (1 Ped. 5:12) Daghang Kristohanong babaye ang mitabang sa maong matinumanong mga brader. (Buh. 18:26; Roma 16:1, 2) Sa Kristohanon Gregong Kasulatan, atong mabasa ang ilang makaiikag nga mga kasinatian, ug gipakita niini nga mga asoy nga gipabilhan ni Jehova ang iyang mga alagad.

⁴ Sa unsang paagi natagan-an sa materyal ang bug-os panahong mga alagad kaniadto? Usahay, may modapit nila sa pagpangaon, mopaestar nila sa balay, o motabang nila sa laing paagi, apan wala nila obligaha ang mga igsoon nga buhaton kana. (1 Cor. 9:11-15) Ang pipila ka indibiduwal ug kongregasyon kinabubut-ong mitabang kanila. (Basaha ang Buhat 16:14, 15; Filipos 4:15-18.) May mga panahon usab nga si Pablo ug ang iyang mga kauban sa panaw partaym nga nagtrabaho alang sa ilang mga galastohan.

 5. Unsay gibati sa usa ka magtiayon bahin sa ilang kinabuhi ingong bug-os panahong mga alagad?

⁵ Karon, daghan usab ang anaa sa lainlaing matang sa bug-os panahong pag-alagad. (Tan-awa ang kahon nga “Lainlaing Matang sa Bug-os Panahong Pag-alagad.”) Unsay ilang pagbati sa ilang gipiling karera? Mahimo nimo kanang ipangutana kanila, ug lagmit madasig ka kon buhaton nimo kana. Tagda ang usa ka pananglitan: Ang usa ka brader nga nakaalagad ingong regular payunir, espesyal payunir, misyonaryo, ug Bethelite sa langyawng nasod miingon: “Para nako ang pagsulod sa bug-os panahong pag-alagad maoy usa sa labing maayong desisyon nga akong nahimo sukad. Sa edad nga 18, nalisdan ko sa pagdesisyon kon moeskuyla ba ko sa unibersidad, motrabahog full-time, o magpayunir. Apan akong napamatud-an nga si Jehova dili gayod malimot sa mga sakripisyo nga imong himoon sa pag-alagad kaniya nga bug-os panahon. Nagamit nako ang mga katakos nga gihatag ni Jehova kanako nga dili unta nako magamit kon gipili pa nako ang kalibotanong karera.” Ang iyang asawa miingon: “Ang matag asaynment nakatabang nako nga mouswag. Gibati namo nga kanunay ming giproteksiyonan ug gigiyahan ni Jehova, ug dili unta namo kana masinati kon wala pa mi mohimog mga sakripisyo. Kada adlaw kong magpasalamat kang Jehova sa among kinabuhi ingong bug-os panahong mga alagad.” Gusto ba usab nimong mobatig ingon niana sa imong kinabuhi?

 6. Unsay pagbati ni Jehova sa atong pag-alagad kaniya?

⁶ Siyempre, tungod sa sirkumstansiya, may pipila nga dili makahimo sa pagsulod sa bug-os panahong ministeryo karon. Makasalig kita nga gipabilhan usab ni Jehova ang ilang tibuok kalag nga mga paningkamot. Hinumdomi kadtong ginganlan ni Pablo sa Filemon 1-3, lakip na ang tanang membro sa kongregasyon sa Colosas. (Basaha.) Si Pablo nagpabili kanila, mao man usab si Jehova. Sa samang paagi, ang atong langitnong Amahan nagpabili sa imong pag-alagad. Apan, sa unsang paagi ka makatabang sa bug-os panahong mga alagad karon?

7, 8. Unsay nalangkit sa pag-alagad ingong payunir, ug sa unsang paagi ang uban diha sa kongregasyon makatabang sa mga payunir?

⁷ Sama sa mga tig-ebanghelyo sa unang siglo, ang masibotong mga payunir maoy dakong tinubdan sa pagdasig diha sa mga kongregasyon. Daghan ang naningkamot nga makagugol ug 70 ka oras kada bulan sa ministeryo. Sa unsang paagi ka makatabang kanila?

⁸ Usa ka payunir nga sister nga si Shari miingon: “Ang mga payunir lig-on tan-awon, kay kada adlaw man silang mosangyaw. Bisan pa niana, nagkinahanglan silag pagdasig.” (Roma 1:11, 12) Ang laing sister nga nakapayunir sulod sa pipila ka tuig miingon bahin sa mga payunir sa ilang kongregasyon: “Puliki kaayo sila sa buluhaton. Dihang may mopasakay nila padulong sa teritoryo, modapit nilag pangaon, mohatag nilag panggasolina o ubang materyal nga tabang, sila mapasalamaton. Mobati sila nga gipabilhan sila.”

9, 10. Unsay gihimo sa uban sa pagtabang sa mga payunir sa ilang kongregasyon?

⁹ Gusto ka bang motabang sa mga payunir diha sa ministeryo? Ang usa ka payunir nga si Bobbi mihangyo: “Nagkinahanglan mig dugang tabang kon weekdays.” Ang laing payunir sa mao gihapong kongregasyon midugang: “Lisod kaayo mangitag partner sa hapon.” Ang usa ka sister nga nag-alagad karon sa Brooklyn Bethel nahinumdom dihang payunir pa siya: “Usa ka sister nga may sakyanan ang miingon, ‘Kon wala gani kay partner, tawga lang ko, ug ubanan ta ka.’ Nakatabang gayod siya sa akong pagpayunir.” Nakamatikod usab si Shari niini: “Human sa pagsangyaw, ang mga payunir nga dili minyo sagad mag-inusara. Sa popanahon, mahimo nimo silang dapiton nga moapil sa inyong pamilyahanong pagsimba. Madasig usab sila kon iapil sila sa ubang kalihokan.”

¹⁰ Usa ka sister nga mga 50 ka tuig na sa bug-os panahong pag-alagad nahinumdom sa tabang nga nadawat niya ug sa uban pang dili minyong sister: “Ang among mga ansiyano mobisita sa mga payunir matag pipila ka bulan. Mangomosta sila sa among panglawas ug sekular nga trabaho ug kon duna ba miy mga problema. Nahingawa gyod sila namo. Moduaw sila sa among apartment aron makita kon nagkinahanglan mig tabang.” Kini magpahinumdom tingali kanimo sa pagpabili ni Pablo sa tabang nga iyang nadawat gikan sa usa ka padre-depamilya sa Efeso.—2 Tim. 1:18.

11. Unsay nalangkit sa pag-alagad ingong espesyal payunir?

¹¹ Ang ubang kongregasyon may mga espesyal payunir. Daghan niini nga mga igsoon ang naggugol ug 130 ka oras kada bulan sa ministeryo. Tungod sa dakong panahon nga ilang gigugol sa ministeryo ug sa pagtabang sa lain pang paagi, gamay na lang o wala na silay panahon sa sekular nga trabaho. Ang sangang buhatan nagtagana kanilag kasarangang alawans kada bulan aron makapokus sila sa ilang ministeryo.

12. Sa unsang paagi ang mga ansiyano ug ang uban makatabang sa mga espesyal payunir?

¹² Sa unsang paagi kita makatabang sa mga espesyal payunir? Ang usa ka ansiyano nga nag-alagad sa sangang buhatan ug kanunayng nakigkomunikar sa daghang espesyal payunir miingon: “Kinahanglan silang estoryahon sa mga ansiyano, susihon ang ilang kahimtang, ug dayon tinoon kon sa unsang paagi sila matabangan. Ang ubang Saksi naghunahuna nga ang mga espesyal payunir wala na magkinahanglag tabang kay naa man silay alawans, apan ang mga igsoon sa kongregasyon makatabang kanila sa daghang paagi.” Ug sama sa mga regular payunir, pabilhan sa mga espesyal payunir kon duna silay makauban sa ministeryo. Makatabang ka ba nianang paagiha?

13, 14. (a) Unsay angay natong hinumdoman bahin sa mga magtatan-aw sa sirkito? (b) Unsay imong ikatabang niadtong anaa sa nagapanawng buluhaton?

¹³ Ang mga magtatan-aw sa sirkito ug ang ilang asawa maoy lig-on sa espirituwal ug kanunayng nagdasig kanato. Apan angay natong hinumdoman nga nagkinahanglan sab silag pagdasig ug kauban sa ministeryo. Malipay usab sila kon iapil sila sa kasarangang lingawlingaw. Komosta kon sila masakit o maospital, tingali nagkinahanglag operasyon o physical therapy? Malipay gayod sila dihang ang mga igsoon moduaw ug motabang sa ilang mga panginahanglan. Mahinumdoman nato niini si Lucas, ang “hinigugmang mananambal” ug magsusulat sa mga Buhat, kinsa nagpakitag kahingawa kang Pablo ug sa mga kauban niini sa panaw.—Col. 4:14; Buh. 20:5–21:18.

¹⁴ Ang nagapanawng mga magtatan-aw ug ang ilang asawa nagkinahanglag suod nga mga higala, ug ila kanang gipabilhan. Usa ka magtatan-aw sa sirkito ang misulat: “Ang akong mga higala daw nahibalo kon kanus-a ko nagkinahanglag pagdasig. Mangutana sila nako, mao nga dili na ko maglisod pagsulti sa akong mga problema. Ang ilang pagkahimong maayong mamiminaw nakatabang gayod kanako.” Pabilhan pag-ayo sa mga magtatan-aw sa sirkito ug sa ilang asawa ang personal nga interes nga ipakita sa mga igsoon.

15, 16. Nganong hinungdanon ang buluhaton niadtong nag-alagad sa Bethel ug sa mga Assembly Hall, ug sa unsang paagi kita makatabang kanila?

¹⁵ Sa tibuok kalibotan, kadtong nag-alagad sa Bethel ug sa mga Assembly Hall nakatabang gayod sa buluhaton sa Gingharian sa mga nasod nga gidumala sa ilang sangang buhatan. Kon may mga Bethelite sa inyong kongregasyon o sirkito, sa unsang paagi nimo ikapakita nga nahinumdom ka kanila?

¹⁶ Kon bag-o pa lang sila sa Bethel, tingali mingawon sila sa ilang pamilya ug mga higala. Malipay gayod sila kon ang ilang mga kauban sa Bethel ug sa bag-ong kongregasyon makighigala nila! (Mar. 10:29, 30) Ang ilang mga eskedyul sa buluhaton sa Bethel magtugot kanila sa pagtambong sa mga tigom ug paggawas sa kanataran kada semana. Apan usahay, duna silay ekstrang mga asaynment. Kon ang mga igsoon sa kongregasyon makasabot niini ug magpakitag apresasyon sa mga Bethelite ug sa ilang buluhaton, ang tanan makabenepisyo.—Basaha ang 1 Tesalonica 2:9.

17, 18. Unsa ang pipila sa mga buluhaton sa bug-os panahong mga alagad nga gikan sa laing nasod?

¹⁷ Kadtong giasayn nga moalagad sa laing nasod mabag-ohan tingali sa mga pagkaon, pinulongan, kostumbre, ug sa kahimtang. Nganong andam silang moatubang sa maong mga hagit?

¹⁸ Ang pipila maoy mga misyonaryo, nga maggugol sa kadaghanan sa ilang panahon sa ministeryo aron daghan ang makabenepisyo sa ilang linaing pagbansay. Ang sangang buhatan magtaganag kasarangang puy-anan ug alawans alang sa ilang pangunang panginahanglan. Ang uban maasayn sa laing nasod aron moalagad sa sangang buhatan o motabang sa pagpanukod ug mga pasilidad sa sangang buhatan, remote translation office, Assembly Hall, o mga Kingdom Hall. Tagan-an silag pagkaon, kasarangang puy-anan, ug ubang panginahanglan. Sama sa mga Bethelite, sila regular nga motambong sa mga tigom ug makig-ambit sa ministeryo, busa panalangin gayod sila sa kongregasyon sa daghang paagi.

19. Unsay angay natong hinumdoman bahin niadtong bug-os panahong mga alagad gikan sa laing nasod?

¹⁹ Sa unsang paagi ka makatabang kanila? Hinumdomi nga tingali, ilabina sa sinugdan, mabag-ohan sila sa atong pagkaon. Busa kon imo silang dapiton sa pagpangaon, mahimo nimo silang pangutan-on kon unsay gusto nilang kaonon o tilawan. Magmapailobon samtang magkat-on sila sa atong pinulongan ug mga kostumbre. Magkinahanglan tingalig taastaas nga panahon una sila makasabot sa tanan natong isulti, apan sa malulotong paagi mahimo nimo silang tabangan sa paglitok. Gusto nilang mokat-on!

20. Sa unsang paagi kita makatabang sa bug-os panahong mga alagad ug sa ilang mga ginikanan?

²⁰ Ang bug-os panahong mga alagad matigulang, mao man usab ang ilang mga ginikanan. Kon Saksi ang mga ginikanan, tingali gusto gayod nila nga ang ilang mga anak magpabilin sa ilang mga pribilehiyo. (3 Juan 4) Siyempre, kon ang ilang ginikanan kinahanglan nang atimanon, buhaton sa bug-os panahong mga alagad ang ilang maarangan ug kanunay kining duawon kon posible. Apan makatabang ug dako sa bug-os panahong mga alagad kon may mga igsoon nga andam motabang sa pag-atiman sa ilang tigulang nang mga ginikanan. Hinumdomi nga ang bug-os panahong mga alagad dunay dakong responsabilidad sa labing hinungdanong buluhaton sa yuta karon. (Mat. 28:19, 20) Ikaw ba o ang inyong kongregasyon makatabang kon ang mga ginikanan sa bug-os panahong mga alagad nagkinahanglag tabang?

21. Unsay pagbati niadtong anaa sa bug-os panahong pag-alagad maylabot sa tabang ug pagdasig nga gihatag sa uban?

²¹ Kadtong misulod sa bug-os panahong ministeryo naghimo niana, dili aron madato, kondili aron mahatag nila kang Jehova ang ilang kinamaayohan ug makatabang sa uban. Busa pabilhan gayod nila ang bisan unsang tabang nga imong ikahatag. Ang usa ka sister nga nag-alagad sa langyawng nasod nagpahayag sa gibati sa daghan: “Bisag ang usa ka mubong sulat sa pagpasalamat nagpakita nga ang uban naghunahuna kanimo ug nga sila nalipay sa imong mga sakripisyo.”

22. Unsay imong pagbati sa bug-os panahong pag-alagad?

²² Ang pag-alagad kang Jehova sa bug-os panahon mao gayod ang labing maayong paagi sa pagkinabuhi. Dili kini sayon, apan kini mapuslanon ug makapalipay. Ug giandam ta niini alang sa walay kataposan nga malipayong pag-alagad ilalom sa Gingharian sa Diyos. Hinaot nga kita ‘walay-hunong nga mahinumdom sa buhat sa pagtuo ug sa mahigugmaong paghago’ niadtong anaa sa bug-os panahong pag-alagad.—1 Tes. 1:3.