Nganong Mohatag sa Usa nga Tag-iya sa Tanang Butang?

1, 2. Sa unsang paagi mahinatagon si Jehova kanato?

SI Jehova mahinatagong Diyos. Gikan kaniya ang tanan natong nabatonan. Siya ang tag-iya sa tanang bulawan, plata, ug ubang bililhong butang sa yuta, ug gigamit niya kini aron mahimong posible ang kinabuhi dinhi sa yuta. (Sal. 104:13-15; Hag. 2:8) Ang Bibliya daghag asoy kon giunsa paggamit ni Jehova ang iyang bililhong mga butang sa milagrosong paagi aron matagan-an ang iyang katawhan.

² Sulod sa 40 ka tuig, gitagan-an ni Jehova ang nasod sa Israel ug mana ug tubig samtang didto sila sa kamingawan. (Ex. 16:35) Tungod niana, “walay nakulang kanila.” (Neh. 9:20, 21) Pinaagi kang propetang Eliseo, milagrosong gipadaghan ni Jehova ang diyutayng lana sa matinumanong babayeng balo. Ang maong regalo gikan sa Diyos nakatabang niya nga mabayran ang iyang utang ug human niana, may igo pa siyang kuwarta para niya ug sa iyang mga anak aron sila mabuhi. (2 Hari 4:1-7) Sa tabang ni Jehova, milagrosong nakatagana si Jesus ug pagkaon ug bisan kuwarta dihang gikinahanglan.​—Mat. 15:35-38; 17:27.

 3. Unsay atong hisgotan niining artikuloha?

³ Puwedeng gamiton ni Jehova ang tanan niyang bililhong butang aron suportahan ang iyang yutan-ong mga linalang. Bisan pa niana, gidasig gihapon niya ang iyang mga alagad nga gamiton ang ilang materyal nga mga butang sa pagsuportar sa buluhaton sa iyang organisasyon. (Ex. 36:3-7; basaha ang Proverbio 3:9.) Nganong gidahom ni Jehova nga mohatag ta kaniya sa atong bililhong mga butang? Sa unsang paagi ang matinumanong mga alagad kaniadto miamot para sa buluhaton sa katawhan ni Jehova? Giunsa paggamit sa organisasyon ang atong donasyon? Hisgotan niining artikuloha ang mga tubag sa maong mga pangutana.

 4. Unsay atong gipakita kang Jehova kon suportahan nato ang iyang buluhaton?

⁴ Mohatag ta kang Jehova tungod sa atong gugma ug pagpasalamat kaniya. Madasig gyod ta dihang hunahunaon ang tanang gihimo ni Jehova para kanato. Dihang gisaysay ang mga kinahanglanon sa pagtukod sa templo, giila ni Haring David nga ang tanan natong nabatonan naggikan kang Jehova ug ang bisan unsa nga atong ihatag kang Jehova naggikan sa gihatag niya kanato.​—Basaha ang 1 Cronicas 29:11-14.

 5. Giunsa pagpakita sa Kasulatan nga importanteng bahin sa tinuod nga pagsimba ang kinabubut-ong paghatag?

⁵ Ang atong paghatag maoy paagi usab sa pagsimba kang Jehova. Sa panan-awon, nadungog ni apostol Juan ang mga alagad ni Jehova sa langit nga nag-ingon: “Takos ikaw, Jehova, nga among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.” (Pin. 4:11) Seguradong mouyon ka nga takos si Jehova sa tanang himaya ug pasidungog, busa ihatag nato kaniya ang atong kinamaayohan. Pinaagi kang Moises, gisugo ni Jehova ang nasod sa Israel sa pag-atubang kang Jehova sa tulo ka tinuig nga pista. Ang paghatag maoy bahin sa ilang pagsimba sa maong mga pista. Busa, ang mga Israelinhon gisugo nga dili “moatubang kang Jehova nga walay dala.” (Deut. 16:16) Karon usab, importanteng bahin sa pagsimba ang kinabubut-ong paghatag ingong apresasyon ug pagsuportar sa buluhaton sa yutan-ong bahin sa organisasyon ni Jehova.

 6. Nganong makaayo kanato ang paghatag? (Tan-awa ang hulagway sa sinugdan sa artikulo.)

⁶ Makaayo kanato ang pagkahimong mahinatagon ug dili lang tigdawat. (Basaha ang Proverbio 29:21.) Hunahunaa ang usa ka bata nga mihatag ug regalo sa iyang ginikanan gikan sa gamayng alawans nga gihatag nila kaniya. Maapresyar gyod sa ginikanan ang maong regalo! Ang usa ka anak nga tingali nagpayunir ug nagpuyo uban sa iyang ginikanan mahimong mohatag ug kuwarta para makatabang sa mga galastohan sa balay. Bisag dili nâ dahomon sa ginikanan, dawaton tingali nila ang maong regalo kay usa nâ ka paagi nga ikapakita sa anak ang apresasyon sa ilang gihimo para kaniya. Sa susama, nahibalo si Jehova nga ang paghatag gikan sa atong bililhong mga butang makaayo kanato.

7, 8. Sa unsang paagi ang katawhan ni Jehova kaniadto naghatag ug panig-ingnan sa pag-amot (a) para sa espesipikong mga proyekto? (b) para sa pagsuportar sa buluhaton?

⁷ Gihisgotan sa Kasulatan nga ang katawhan ni Jehova miamot alang sa iyang buluhaton. Sa pipila ka kahimtang, miamot sila para sa espesipikong mga proyekto. Pananglitan, si Moises nangayog donasyon para sa pagtukod sa tabernakulo. Gihimo sab kana ni Haring David sa pagtukod sa templo. (Ex. 35:5; 1 Cron. 29:5-9) Sa panahon ni Haring Jehoas, gigamit sa mga saserdote ang nakolektang kuwarta aron ayohon ang balay ni Jehova. (2 Hari 12:4, 5) Sa unang Kristohanong kongregasyon, dihang nahibaloan sa mga igsoon ang panginahanglan tungod sa gutom, “naninguha ang mga tinun-an nga ang matag usa kanila sumala sa iyang maarangan, [makapadalag] hinabang ngadto sa mga igsoon nga nagpuyo sa Judea.”​—Buh. 11:27-30.

⁸ Sa pipila ka kahimtang, ang katawhan ni Jehova miamot para niadtong nanguna sa buluhaton. Ubos sa Moisesnong Balaod, ang mga Levihanon walay panulondon nga sama nianang sa ubang tribo. Hinunoa, ang mga Israelinhon mihatag kanilag ikapulo, nga nakatabang sa mga Levihanon sa pagpokus sa ilang buluhaton sa tabernakulo. (Num. 18:21) Sa susama, si Jesus ug ang iyang mga apostoles nakabenepisyo sa pagkamahinatagon sa mga babaye “nga nag-alagad kanila gikan sa ilang mga kabtangan.”​—Luc. 8:1-3.

 9. Asa gikan ang mga amot kaniadto?

⁹ Siyempre, lainlain ang gigikanan sa maong mga amot. Dihang miamot para sa pagtukod sa tabernakulo didto sa kamingawan, apil tingali sa giamot sa mga Israelinhon ang mga butang nga ilang gidala gikan sa Ehipto. (Ex. 3:21, 22; 35:22-24) Sa unang siglo, gibaligya sa pipila ka Kristohanon ang ilang kabtangan, sama sa yuta o balay, ug gidala ang kuwarta ngadto sa mga apostoles. Dayon, iapod-apod kini sa mga apostoles ngadto sa nanginahanglan. (Buh. 4:34, 35) Ang uban magtigom ug kuwarta ug regular nga moamot aron makasuportar sa buluhaton. (1 Cor. 16:2) Busa, ang tanang klase sa tawo, dato man o pobre, puwedeng makaamot.​—Luc. 21:1-4.

10, 11. (a) Unsaon nato pagsundog ang pagkamahinatagon sa mga alagad ni Jehova kaniadto? (b) Unsay imong pagbati sa pribilehiyo nga makasuportar sa buluhaton sa Gingharian?

¹⁰ Karon, hangyoon tingali ta nga moamot para sa espesipikong katuyoan. Pananglitan, tukoran ba ug bag-ong Kingdom Hall ang inyong kongregasyon? O kinahanglan bang ayohon ang inyong Kingdom Hall? Tingali nahibalo ta nga nagkinahanglag pinansiyal nga tabang ang pag-ayo sa atong sangang buhatan, ang kombensiyon nga atong tambongan, o ang atong mga igsoon nga nakasinatig katalagman. Moamot pod ta sa pagsuportar niadtong nagtrabaho sa hedkuwarter ug sa mga sangang buhatan sa tibuok kalibotan. Ang atong mga donasyon nagsuportar sa mga misyonaryo, espesyal payunir, ug niadtong naa sa sirkitong buluhaton. Ang imo pod tingaling kongregasyon may resolusyon nga mohatag ug amot para sa tibuok kalibotang pagpanukod ug mga Assembly Hall ug Kingdom Hall, nga magamit sa atong mga igsoon sa tibuok yuta.

¹¹ Kitang tanan makasuportar sa buluhaton ni Jehova niining kataposang mga adlaw. Kadaghanan sa naghatag ug donasyon wala magpaila. Dili nato ipahibalo kon pilay atong gihulog sa contribution box sa Kingdom Hall, o gihatag nga donasyon online pinaagi sa jw.org. Mobati tingali ta nga wala kaayoy ikatabang ang atong gamayng donasyon. Pero, kadaghanan sa donasyon karon naggikan sa gagmayng regalo imbes sa dagkong amot. Bisan ang atong pobre nga mga igsoon nagsundog sa mga taga-Macedonia nga mihangyo sa pribilehiyo sa paghatag bisan sa “hilabihang kakabos.”​—2 Cor. 8:1-4.

12. Sa unsang paagi ang organisasyon naningkamot sa paggamit sa mga donasyon sa hustong paagi?

¹² Uban ang pag-ampo ug pagpamalandong, naningkamot ang Nagamandong Lawas nga mahimong matinumanon ug maalamon sa paggamit sa pondo sa organisasyon. (Mat. 24:45) Ang mga donasyon nga nadawat gibadyet ug gigasto sa maalamong paagi. (Luc. 14:28) Sa kapanahonan sa Bibliya, ang matinumanong mga alagad nga nag-atiman sa mga donasyon misunod sa mga kahikayan aron maseguro nga gamiton lang kini sa kon unsay katuyoan niini. Pananglitan, si Esdras mibalik sa Jerusalem dala ang giamot sa Persianong hari​—bulawan, plata, ug ubang butang nga mokantidad karon ug kapig $100 milyon (U.S.). Kini gilantaw ni Esdras ingong boluntaryong halad kang Jehova ug mihatag siyag detalyadong mga instruksiyon aron maproteksiyonan kini samtang magbiyahe sila agi sa peligrosong dapit. (Esd. 8:24-34) Si apostol Pablo nangolektag donasyon aron sa pagtabang sa mga igsoon sa Judea. Mihatag siyag mga instruksiyon aron kadtong magdala sa donasyon mohimog “matinud-anong pagtagana, dili lamang sa panan-aw ni Jehova, kondili usab sa panan-aw sa mga tawo.” (Basaha ang 2 Corinto 8:18-21.) Agig pagsundog kang Esdras ug Pablo, ang atong organisasyon nagsunod gayod sa mga kahikayan kon unsaon paggamit ang mga donasyon.

13. Unsaon nato paglantaw ang di pa dugayng pagpasimple nga gihimo sa organisasyon?

¹³ Ang usa ka pamilya mohimo tingalig mga kausaban aron dili sila mogastog labaw kay sa ilang kita o kaha pasimplehon ang ilang kinabuhi ug menosan ang ilang gasto aron mohimog dugang para kang Jehova. Tinuod sab kana sa organisasyon ni Jehova. Di pa dugay, daghang nindot ug bag-ong mga proyekto ang organisasyon. Usahay, mas dako ang magasto kay sa madawat nga donasyon. Busa, ang organisasyon nangitag mga paagi sa pagpamenos sa galastohan ug pagpasimple sa buluhaton aron magamit pag-ayo ang imong mga donasyon.

14-16. (a) Unsa ang ubang butang nga nahimo tungod sa imong donasyon? (b) Sa unsang paagi nakabenepisyo ka niini nga mga tagana?

¹⁴ Daghan sa dugay nang mga alagad ni Jehova ang nakaingon nga karon daghan na kaayong espirituwal nga tagana. Hunahunaa ra! Di pa dugay, gisugdan ang jw.org ug JW Broadcasting. Ang New World Translation of the Holy Scriptures gihubad sa mas daghang pinulongan. Niadtong 2014/2015, gipahigayon ang tulo ka adlawng “Pangitaa Pag-una ang Gingharian sa Diyos!” Internasyonal nga Kombensiyon diha sa pipila sa kinadagkoang estadyum sa 14 ka siyudad sa tibuok kalibotan. Nalipay ang tanang nakatambong.

¹⁵ Daghan ang mapasalamaton sa nindot kaayong mga benepisyo nga ilang nadawat gikan sa organisasyon ni Jehova. Pananglitan, bahin sa JW Broadcasting, usa ka magtiayon nga nag-alagad sa usa ka nasod sa Asia misulat: “Naasayn mi sa usa ka gamayng siyudad. Tungod niana, mobati mi usahay nga kamikami ra, ug dali ra namong malimtan ang gidak-on sa buluhaton ni Jehova. Pero dihang manan-aw mi sa lainlaing programa sa JW Broadcasting, mahinumdoman namo nga bahin mi sa tibuok kalibotang panag-igsoonay. Ang atong minahal nga mga igsoon dinhi eksayted kaayo sa JW Broadcasting. Human mi makatan-aw sa binulang programa, sagad moingon sila nga mas nasuod sila sa mga membro sa Nagamandong Lawas. Karon, mas mapasigarbohon sila nga nahimong bahin sa organisasyon ni Jehova.”

¹⁶ Sa tibuok kalibotan, halos 2,500 ka Kingdom Hall ang ginatukod o ginaayo. Dihang gigamit na nila ang ilang bag-ong Kingdom Hall, ang mga membro sa usa ka kongregasyon sa Honduras misulat: “Malipayon kaayo mi nga nahimong bahin sa pamilya ni Jehova sa tibuok uniberso ug nasinati ang atong nindot nga tibuok kalibotang panag-igsoonay. Nakatabang nâ nga matuman ang among pangandoy nga makabatog Kingdom Hall sa among lugar.” Daghan ang nagpahayag ug samang apresasyon human makadawat sa Bibliya ug sa ubang publikasyon nga gihubad sa ilang pinulongan, makadawat ug hinabang, o makakita sa resulta sa metropolitan ug publikong pagsangyaw sa ilang lugar.

17. Giunsa nato pagkahibalo nga gipaluyohan ni Jehova ang organisasyon?

¹⁷ Dili masabtan sa daghang dili Saksi kon sa unsang paagi nahimo nato kining tanan pinaagi lang sa kinabubut-ong mga amot. Human maka-tour sa usa sa atong mga imprentahan, usa ka executive sa dakong kompaniya ang nahingangha nga ang tanang buluhaton gihimo pinaagig mga boluntaryo ug kinabubut-ong amot, ug milampos bisag wala ta mamaligya o mag-organisar ug mga kalihokan aron makapatunghag pondo. Para niya, imposible ang atong ginahimo. Mouyon ta anâ! Nahibalo ta nga naposible lang kini tungod kay gipaluyohan ni Jehova ang buluhaton.​—Job 42:2.

18. (a) Unsang mga panalangin ang atong madawat kon mohatag ta para sa Gingharian? (b) Unsaon nato pagbansay ang atong mga anak ug ang mga bag-ohan sa paghatag kang Jehova?

¹⁸ Gipasidunggan ta ni Jehova pinaagi sa paghatag natog kahigayonan nga makasuportar sa dakong buluhaton karon. Mipasalig siya nga panalanginan ta niya kon mohatag ta para sa Gingharian. (Mal. 3:10) Si Jehova misaad nga mouswag ang usa nga mahinatagon. (Basaha ang Proverbio 11:24, 25.) Ang paghatag makapalipay sab nato, kay “adunay labaw nga kalipay sa paghatag kay sa pagdawat.” (Buh. 20:35) Pinaagig pulong ug buhat, mabansay nato ang atong mga anak ug ang mga bag-ohan kon sa unsang paagi sila makahatag, ug sa ingon, makatagamtam ug daghang panalangin.

19. Sa unsang paagi nadasig ka niining artikuloha?

¹⁹ Ang tanan natong nabatonan naggikan kang Jehova. Ang atong paghatag kaniya nagpakita nga gimahal nato siya ug mapasalamaton ta sa tanan niyang gihimo para kanato. (1 Cron. 29:17) Dihang miamot para sa pagtukod sa templo, “ang katawhan nagmaya tungod sa ilang gihimong kinabubut-ong mga halad, tungod kay uban sa bug-os nga kasingkasing nga sila mihimog kinabubut-ong mga halad ngadto kang Jehova.” (1 Cron. 29:9) Hinaot padayon sab tang magmalipayon sa paghatag kang Jehova pinaagi sa gihatag niya kanato.