Disiplina​—Pamatuod sa Gugma sa Diyos

 1. Sa unsang paagi sagad hisgotan sa Bibliya ang disiplina?

KON maghisgot ug “disiplina,” unsay mosantop sa imong hunahuna? Tingali maghunahuna dayon kag silot, pero dili kay kana ra. Sa Bibliya, sagad positibo ang paghisgot sa disiplina, nga usahay hisgotan uban sa kahibalo, kaalam, gugma, ug kinabuhi. (Prov. 1:2-7; 4:11-13) Tungod kana kay ang disiplina sa Diyos nagpakita sa iyang gugma kanato ug sa iyang tinguha nga mabuhi ta sa walay kataposan. (Heb. 12:6) Bisag apil sa iyang disiplina ang pagsilot, kini dili gyod makadaot. Gani, ang kahulogan sa “disiplina” konektado sa edukasyon, sama anang pagpadako sa pinanggang anak.

2, 3. Sa unsang paagi apil sa pagdisiplina ang pagtudlo ug pagsilot? (Tan-awa ang hulagway sa sinugdan sa artikulo.)

² Hunahunaa kini: Ang batang si Johnny nagdulag bola sulod sa balay. Giingnan siya sa iyang mama: “Johnny, di ba giingnan kang dili magdulag bola sulod sa balay? Basin makabuak ka!” Pero wala niya paminawa ang iyang mama maong aksidente niyang nabuak ang vase. Unsaon siya pagdisiplina sa iyang mama? Disiplinahon tingali siya pinaagig pagtudlo ug pagsilot. Aron tudloan si Johnny, ipasabot sa mama kon nganong sayop ang iyang gibuhat. Sultihan sab siya sa kaimportante sa pagsunod sa ginikanan, nga magpatin-aw kon nganong importante ug rasonable ang ilang mga sugo. Aron makakat-on si Johnny, pahamtangan tingali siyag haom nga silot. Pananglitan, kuhaon tingali sa mama ang bola ug dili usâ siya padulaon niini. Pinaagi niana, iyang masabtan nga dili maayo ang resulta kon magmasinupakon.

³ Ingong membro sa kongregasyon, bahin ta sa panimalay sa Diyos. (1 Tim. 3:15) Busa, gitahod nato ang katungod ni Jehova sa paghimog mga sugo ug sa paghatag ug mahigugmaong disiplina kon dili nato nâ sundon. Dugang pa, kon may dili maayong resulta ang atong gibuhat, ang iyang disiplina magpahinumdom nato nga importante gyod ang pagsunod sa atong langitnong Amahan. (Gal. 6:7) Gimahal ta pag-ayo sa Diyos ug dili niya gustong masakitan ta.​—1 Ped. 5:6, 7.

 4. (a) Unsa nga pagbansay ang panalanginan ni Jehova? (b) Unsay atong hisgotan niining artikuloha?

⁴ Pinaagi sa disiplina gikan sa Bibliya, matabangan nato ang atong anak o Bible study sa pagkab-ot sa tumong nga mahimong sumusunod ni Kristo. Ang Pulong sa Diyos, nga atong pangunang galamiton sa pagbansay, motabang nato sa “pagdisiplina diha sa pagkamatarong.” Sa ingon, matabangan nato ang atong anak o Bible study nga makasabot ug ‘motuman sa tanang butang nga gisugo ni Jesus.’ (2 Tim. 3:16; Mat. 28:19, 20) Panalanginan ni Jehova ang maong pagbansay, ug kini magpalihok sa mga Bible study sa pagtabang sa uban nga mahimong tinun-an ni Kristo. (Basaha ang Tito 2:11-14.) Atong hisgotan karon ang tubag niining tulo ka importanteng pangutana: (1) Sa unsang paagi ang gugma sa Diyos makita sa iyang paagi sa pagdisiplina? (2) Unsay atong makat-onan sa mga tawong gidisiplina sa Diyos kaniadto? (3) Unsaon nato pagsundog si Jehova ug ang iyang Anak dihang magdisiplina?

 5. Sa unsang mga paagi ang gugma ni Jehova makita sa iyang pagdisiplina kanato?

⁵ Tungod sa gugma, si Jehova nagabadlong, nagatudlo, ug nagabansay nato aron magpabilin ta sa iyang gugma ug sa dalan sa kinabuhi. (1 Juan 4:16) Wala ta niya pakamenosa o insultoha, nga makapabati natong walay pulos. (Prov. 12:18) Hinunoa, gihatagan ta ni Jehova ug dignidad, nga nagpokus sa pagkamaayo sa atong kasingkasing ug nagtahod sa atong kagawasan. Ingon ba niana ang imong panglantaw sa disiplina sa Diyos, gikan man kini sa iyang Pulong, sa atong mga publikasyon, sa mga ginikanan, o sa mga ansiyano? Oo, usahay makahimo tag “sayop nga lakang,” nga tingali wala nato tuyoa. Kon tambagan ta sa mga ansiyano sa kalmado ug mahigugmaong paagi, ilang gipakita nga gihigugma ta ni Jehova.​—Gal. 6:1.

 6. Sa unsang paagi ang pagdisiplina nga may restriksiyon nagpakita sa gugma sa Diyos?

⁶ Pero usahay, dili lang tambag o pagbadlong ang apil sa pagdisiplina. Kon ang usa nakahimog seryosong sala, mahimong mawad-an siyag mga pribilehiyo sa kongregasyon. Bisag mahitabo nâ, ang maong disiplina nagpakita nga gihigugma ta sa Diyos. Pananglitan, ang pagkawala sa pribilehiyo makatabang sa usa nga masabtan ang kaimportante sa pagpokus sa personal nga pagtuon sa Bibliya, pagpamalandong, ug pag-ampo. Sa pagbuhat niana, molig-on siya sa espirituwal. (Sal. 19:7) Ngadtongadto, mahimong mahibalik ang iyang mga pribilehiyo. Bisan ang pag-disfellowship nagpakita sa gugma sa Diyos kay maproteksiyonan niini ang kongregasyon batok sa daotang impluwensiya. (1 Cor. 5:6, 7, 11) Kay husto pirme ang disiplina sa Diyos, masabtan sa na-disfellowship ang kaseryoso sa iyang sala ug kini magpalihok niya sa paghinulsol.​—Buh. 3:19.

 7. Kinsa si Sebna, ug unsa ang iyang dili maayong kinaiya?

⁷ Aron atong masabtan ang kaimportante sa disiplina, atong hisgotan ang duha ka tawong gidisiplina ni Jehova: Si Sebna, nga nabuhi sa panahon ni Haring Ezequias, ug si Graham, usa ka brader sa atong panahon. Ingong “nagdumala sa balay”​—nga tingali kang Ezequias—​si Sebna may dakong awtoridad. (Isa. 22:15) Pero makapaguol, nahimo siyang garboso, nga naningkamot nga mahimong prominente. Nagpahimo pa gani siyag nindot kaayong lubnganan, ug nagsakay sa ‘karo sa himaya’!​—Isa. 22:16-18.

 8. Giunsa pagdisiplina ni Jehova si Sebna, ug unsay resulta?

⁸ Kay naningkamot si Sebna nga mahimong prominente, siya gitangtang sa Diyos sa iyang katungdanan ug gipuli kaniya si Eliakim. (Isa. 22:19-21) Nahitabo kini dihang gustong atakehon sa hari sa Asirya nga si Senakerib ang Jerusalem. Sa ulahi, ang maong hari nagpadalag hataas nga mga opisyales ngadto sa Jerusalem uban ang dakong kasundalohan aron hadlokon ang mga Hudiyo ug pasurenderon si Ezequias. (2 Hari 18:17-25) Si Eliakim ang gipadala aron makig-estorya nila, pero wala siya mag-inusara. Giubanan siyag duha ka tawo, ang usa mao si Sebna, nga nag-alagad na ingong sekretaryo. Nagpakita kaha ni nga imbes mahiubos ug masuko, si Sebna mapainubsanong midawat sa iyang ubos nga responsibilidad? Kon mao, unsay atong makat-onan niini? Maghisgot tag tulo ka leksiyon.

9-11. (a) Unsang importanteng mga leksiyon ang atong makat-onan sa eksperyensiya ni Sebna? (b) Sa unsang paagi nadasig ka sa pagtratar ni Jehova kang Sebna?

⁹ Una, gitangtang si Sebna sa iyang posisyon. Ang iyang eksperyensiya magpahinumdom nga “ang garbo nagauna sa pagkahagsa, ug ang mapahitas-ong espiritu nagauna sa pagkapukan.” (Prov. 16:18) Kon may pribilehiyo ka sa kongregasyon, ug tingali prominente ka, maningkamot ka bang magpaubos? Bisag unsay imong abilidad o kalamposan, ihatag ba nimo kang Jehova ang pagdayeg? (1 Cor. 4:7) Si apostol Pablo misulat: “Ako magasulti sa tanan dinha sa inyong taliwala nga dili maghunahuna ug labaw bahin sa iyang kaugalingon kay sa angay nga hunahunaon; kondili maghunahuna sa paagi nga makabaton sa maayong panghunahuna.”​—Roma 12:3.

¹⁰ Ikaduha, pinaagi sa grabeng pagdisiplina kang Sebna, lagmit gipakita ni Jehova nga naghunahuna siya nga posibleng magbag-o si Sebna. (Prov. 3:11, 12) Nindot kaayo ni nga leksiyon para niadtong natangtangan ug pribilehiyo sa kongregasyon karon! Imbes mahiubos ug masuko, hinaot padayon silang moalagad sa Diyos ug buhaton ang ilang kinamaayohan sa ilang bag-ong situwasyon, nga mag-isip sa disiplina ingong pamatuod sa gugma ni Jehova. Hinumdomi, kon magpaubos ta, ang atong Amahan dili maghunahuna nga wala na tay paglaom. (Basaha ang 1 Pedro 5:6, 7.) Ang mahigugmaong disiplina maoy paagi sa Diyos aron umolon ta, busa padayon tang magpaumol kaniya.

¹¹ Ikatulo, ang pagtratar ni Jehova kang Sebna nagtudlog importanteng leksiyon niadtong may awtoridad nga mohatag ug disiplina, sama sa mga ginikanan ug tigdumala. Unsa nga leksiyon? Ang disiplina ni Jehova wala lang magpakita nga gidumtan niya ang sala, nagpakita sab ni nga gimahal niya ang nakasala. Kon ikaw ginikanan o tigdumala nga kinahanglang mohatag ug disiplina, sundogon ba nimo si Jehova, nga dumtan ang sayop ug magtan-aw sa maayong hiyas sa imong anak o igsoon sa pagtuo?​—Jud. 22, 23.

12-14. (a) Unsa ang reaksiyon sa uban dihang disiplinahon ni Jehova? (b) Sa unsang paagi ang Pulong sa Diyos nakatabang nga mabag-o sa usa ka brader ang iyang kinaiya, ug unsay resulta?

¹² Makapaguol nga dihang gidisiplina, ang pipila nasakitan pag-ayo ug nagpalayo pa gani sa Diyos ug sa iyang katawhan. (Heb. 3:12, 13) Pero nagpasabot ba nâ nga dili na sila matabangan? Konsideraha si Graham, kinsa na-disfellowship, napasig-uli, ug dayon nahimong dili aktibo. Paglabay sa pipila ka tuig, gihangyo niya ang usa ka ansiyanong nakig-amigo niya nga estadihan siya.

¹³ Ang ansiyano nahinumdom: “Problema ni Graham ang garbo. Hinawayon siya sa mga ansiyano nga nag-disfellow niya. Busa sa sunod nga mga pagtuon, among gihisgotan ang mga teksto bahin sa garbo ug sa mga epekto niini. Klarong nakita ni Graham ang iyang kaugalingon sa samin sa Pulong sa Diyos, ug wala siya ganahi sa iyang nakita! Nindot kaayo ang epekto! Human niya makita nga nabutaan siya sa ‘salagunting’ sa garbo ug nga problema niya ang iyang pagkahinawayon, nagbag-o dayon siya. Regular na siyang motambong sa tigom, seryosong magtuon sa Pulong sa Diyos, ug adlaw-adlawng mag-ampo. Gidawat pod niya ang iyang espirituwal nga responsibilidad ingong ulo sa pamilya, nga nakapalipay pag-ayo sa iyang asawa ug mga anak.”​—Luc. 6:41, 42; Sant. 1:23-25.

¹⁴ Ang ansiyano nagpadayon: “Usa ka adlaw niana, may giingon si Graham nga nakatandog sa akong kasingkasing. ‘Dugay na kong nahibalo sa kamatuoran,’ matod niya, ‘ug nagpayunir pa gani ko. Pero karon lang gyod ko makaingon nga gihigugma nako si Jehova.’ Wala madugay, nahimo siyang tigtunol sa microphone sa Kingdom Hall​—pribilehiyong giapresyar niya pag-ayo. Ang iyang ehemplo nagtudlo nako nga kon ang usa magpaubos sa Diyos pinaagi sa pagdawat sa disiplina, siya dagayang panalanginan!”

15. Unsay atong himoon aron mahimong epektibo ang atong pagdisiplina?

¹⁵ Aron mahimong maayong magtutudlo, kinahanglang mahimo unâ tang maayong estudyante. (1 Tim. 4:15, 16) Sa susama, kadtong gihatagan ni Jehova ug awtoridad sa pagdisiplina kinahanglang andam ug padayong magpagiya kaniya. Kon magpaubos, sila tahoron ug may kagawasan sa pagsulti dihang magbansay o magbadlong sa uban. Konsideraha ang ehemplo ni Jesus.

16. Unsay atong makat-onan kang Jesus bahin sa haom nga disiplina ug epektibong pagpanudlo?

¹⁶ Si Jesus nagmatinumanon sa iyang Amahan, bisan dihang lisod kaayo ang pagbuhat niana. (Mat. 26:39) Ug giila niya nga ang iyang gitudlo ug kaalam gikan sa iyang Amahan. (Juan 5:19, 30) Ang pagkamapainubsanon ug pagkamatinumanon ni Jesus nakapasuod sa matinud-anong mga tawo kaniya ug nakatabang nga mahimo siyang mabination ug buotang magtutudlo. (Basaha ang Mateo 11:29.) Ang iyang maayong mga pulong nakapadasig niadtong mga tawo nga samag nabun-og nga tangbo o pabilong hapit nang mapalong. (Mat. 12:20) Bisan dihang gisulayan ang iyang pailob, si Jesus nagpakitag kaayo ug gugma. Makita ni dihang gibadlong niya ang iyang mga apostoles tungod sa ilang hakog, ambisyosong espiritu.​—Mar. 9:33-37; Luc. 22:24-27.

17. Unsang nindot nga mga hiyas ang makatabang sa mga ansiyano aron epektibong maatiman ang panon sa Diyos?

¹⁷ Ang tanan nga gihatagag awtoridad sa pagdisiplina base sa Bibliya mahimong maalamon kon ilang sundogon si Kristo. Oo, kon ila nang himoon, gipakita nila nga gusto nilang magpaumol sa Diyos ug sa iyang Anak. Si apostol Pedro misulat: “Bantayi ninyo ang panon sa Diyos nga ubos sa inyong pag-atiman, dili nga pinugos, kondili kinabubut-on; ni tungod sa gugma sa kinitaan pinaagig limbong, apan maikagon; ni mahariharion ibabaw niadtong panulondon sa Diyos, apan mahimong mga panig-ingnan alang sa panon.” (1 Ped. 5:2-4) Kon ang mga tigdumala malipayong magpasakop sa Diyos ug kang Kristo, ang ulo sa kongregasyon, sila makabenepisyo ingon man ang tanan nilang giatiman.​—Isa. 32:1, 2, 17, 18.

18. (a) Unsay gidahom ni Jehova nga buhaton sa mga ginikanan? (b) Giunsa pagtabang sa Diyos ang mga ginikanan sa pagtuman sa ilang responsibilidad?

¹⁸ Mapadapat sab nâ diha sa pamilya. Ang mga ulo sa pamilya giingnan: “Ayaw palagota ang inyong mga anak, kondili magpadayon sa pagmatuto kanila sa disiplina ug sa pagdumala-sa-kaisipan [o, giya] ni Jehova.” (Efe. 6:4) Unsa ni ka seryoso? Ang Bibliya nag-ingon: “Pantona [o, disiplinaha] ang imong anak samtang duna pay higayon kay basig ikay basolon sa iyang kamatayon.” (Panultihon [Proverbio] 19:18, Biblia sa Kristohanong Katilingban) Oo, ang ginikanan manubag kang Jehova kon dili nila madisiplina ang ilang anak! (1 Sam. 3:12-14) Pero, hatagan ni Jehova ang ginikanan ug kaalam ug kusog dihang mapaubsanon silang moampo para niini ug dihang magpagiya sila sa iyang Pulong ug balaang espiritu.​—Basaha ang Santiago 1:5.

19, 20. (a) Unsay mga panalangin kon dawaton ang disiplina sa Diyos? (b) Unsay atong hisgotan sa sunod nga artikulo?

¹⁹ Dili nato maihap ang tanang panalangin dihang dawaton nato ang disiplina ug sundogon ang paagi sa pagdisiplina ni Jehova ug Jesus. Usa niana mao ang kalinaw sa pamilya ug kongregasyon. Bation sab sa usa nga tinuod siyang gihigugma, gipabilhan, ug may kasegurohan​—nga pasiuna sa mas daghang panalangin sa umaabot. (Sal. 72:7) Oo, tinuod gyod nga ang disiplina ni Jehova nagtudlo nato nga mabuhi hangtod sa hangtod ingong malinawon ug nagkahiusang pamilya ubos sa iyang pag-atiman ingong Amahan. (Basaha ang Isaias 11:9.) Kon kanay atong panglantaw sa disiplina gikan sa Diyos, maapresyar nato ang tinuod nga kahulogan niini: Talagsaong pamatuod nga gihigugma gyod ta sa Diyos.

²⁰ Sa sunod nga artikulo, hisgotan pa natog dugang ang disiplina diha sa pamilya ug kongregasyon. Konsiderahon sab nato ang pagdisiplina sa kaugalingon ug kon unsay mas sakit pa kay sa temporaryong kasakit nga epekto sa disiplina.