Mga Batan-on​—Sukli ang Yawa

1, 2. (a) Nganong nagmadaogon ang Kristohanong mga batan-on batok sa daotang mga espiritu? (Tan-awa ang hulagway sa sinugdan sa artikulo.) (b) Unsay atong susihon?

ANG atong kinabuhi ingong Kristohanon gipakasama ni apostol Pablo sa mga sundalo nga manomanong nakiggubat. Siyempre, espirituwal ang atong pagpakiggubat, dili literal. Bisan pa niana, tinuod ang atong mga kaaway. Si Satanas ug ang mga demonyo maoy hanas ug eksperyensiyadong mga manggugubat. Busa, morag mapildi gyod ta. Ang Kristohanong mga batan-on morag huyang tan-awon. Sa unsang paagi sila modaog batok nianang puwersado kaayo nga daotang mga espiritu? Sa pagkatinuod, ang mga batan-on posibleng modaog, ug nagmadaogon gyod sila! Ngano? Tungod kay sila ‘nagpadayon sa pagbaton ug gahom diha sa Ginoo.’ Gawas pa sa gahom nga gihatag sa Diyos, andam pod sila sa pagpakiggubat. Samag maayong pagkabansay nga mga sundalo, ilang ‘gisul-ob ang kompletong armadura gikan sa Diyos.’​—Basaha ang Efeso 6:10-12.

² Dihang gigamit ni Pablo kining ilustrasyona, lagmit naghunahuna siya bahin sa armadura sa mga sundalo sa Roma. (Buh. 28:16) Susihon nato kon nganong haom ang maong ilustrasyon. Matikdi sab kon unsay gisulti sa pipila ka batan-on bahin sa mga kalisdanan ug kaayohan sa pagsul-ob sa kompletong armadura.

3, 4. Nganong ang kamatuoran sa Bibliya susama sa bakos sa Romanong sundalo?

³ Basaha ang Efeso 6:14. Ang bakos sa Romanong sundalo may mga metal nga manalipod sa iyang hawak. Gidisenyo kini aron dili kaayo mabug-atan ang sundalo sa iyang proteksiyon sa dughan. Ang pipila ka bakos may lig-ong mga klip nga kasab-itan sa espada ug punyal (dagger). Kon hugot ang iyang bakos, may kompiyansa siyang makiggubat.

⁴ Sa susama, ang kamatuoran gikan sa Pulong sa Diyos manalipod nato batok sa bakak nga mga pagtulon-an. (Juan 8:31, 32; 1 Juan 4:1) Kon pabilhan nato ang kamatuoran gikan sa Diyos, dili kaayo ta mabug-atan sa atong “panagang sa dughan,” o malisdan sa pagkinabuhi subay sa matarong nga mga sukdanan sa Diyos. (Sal. 111:7, 8; 1 Juan 5:3) Dugang pa, kon masabtan nato ang kamatuoran gikan sa Pulong sa Diyos, may kompiyansa ta ug makadepensa niana batok sa mga magsusupak.​—1 Ped. 3:15.

 5. Nganong kinahanglan tang mosulti sa tinuod?

⁵ Kon hugot natong pagkabakos ang kamatuoran sa Bibliya, mapalihok ta sa pagkinabuhi uyon niini ug sa pagsulti sa kamatuoran sa tanang panahon. Nganong dili ta mamakak? Tungod kay ang bakak maoy usa sa epektibo kaayong armas ni Satanas. Ang bakak parehong makadaot sa nagsulti ug sa mituo niana. (Juan 8:44) Busa, bisag dili ta hingpit, maningkamot ta nga dili mamakak. (Efe. 4:25) Pero usahay lisod nang buhaton. Ang 18 anyos nga si Abigail miingon: “Usahay, dili maayong mosulti sa tinuod, ilabina kon ang pagpamakak motabang nimo nga makalingkawas sa lisod nga situwasyon.” Busa, nganong maningkamot man siya sa pagsulti sa tinuod? “Kon mosulti ko sa tinuod,” matod niya, “hinlo ang akong konsensiya atubangan kang Jehova. Ug nahibalo ang akong ginikanan ug mga higala nga makasalig sila nako.” Si Victoria, nga 23 anyos, miingon: “Kon mosulti ka sa tinuod ug mobarog sa imong tinuohan, posibleng i-bully ka. Pero maayo gyod ang resulta ana: May kompiyansa ka sa kaugalingon, masuod ka kang Jehova, ug tahoron ka sa imong mga minahal.” Busa, importante gyod ‘nga baksan ninyo ang inyong hawak sa kamatuoran’ sa tanang panahon.

6, 7. Nganong ang pagkamatarong gipakasamag panagang sa dughan?

⁶ Ang usa ka matang sa panagang sa dughan nga gigamit sa Romanong sundalo dunay mga piraso sa nagsapaw nga puthaw. Kini nga mga puthaw gibawog aron mohaom sa dughan ug may mga higot nga gama sa panit nga gitaod sa metal nga mga kaw-it ug bilya (buckle). Ingon sab niana ang proteksiyon sa abaga sa sundalo. Tungod niini nga panagang, malimitahan ang paglihoklihok sa sundalo ug kinahanglan niyang tan-awon pirme kon sakto ba ang pagkataod sa matag piraso. Pero makasagang ni sa espada o sa pana ug maproteksiyonan ang iyang kasingkasing ug ang ubang importanteng parte sa dughan.

⁷ Haom gayod kana nga ilustrasyon kon sa unsang paagi ang matarong nga mga sukdanan ni Jehova manalipod sa atong simbolikong kasingkasing! (Prov. 4:23) Dili gyod mosugot ang sundalo nga ang iyang puthaw nga panagang pulihag ubos ug kalidad nga metal. Sa susama, dili pod nato gusto nga ang matarong nga sukdanan ni Jehova pulihan sa atoang sukdanan. Ang atong kaalam dili igo aron maproteksiyonan ta. (Prov. 3:5, 6) Busa, angay natong susihon pirme kon ang atong panagang sa dughan nanalipod pa ba sa atong kasingkasing.

 8. Nganong angayng sundon ang mga sukdanan ni Jehova?

⁸ Mobati ka ba usahay nga nabug-atan o nalimitahan ang imong kagawasan tungod sa matarong nga mga sukdanan ni Jehova? Si Daniel, nga nag-edad ug 21, miingon: “Bugalbugalan ko sa akong mga titser ug eskolmet kay nagsunod ko sa mga sukdanan sa Bibliya. May higayon nga nawad-an kog kompiyansa ug na-depress.” Unsay nakatabang niya? Siya miingon: “Sa ngadtongadto, nakita nako ang benepisyo sa pagsunod sa mga sukdanan ni Jehova. Ang pipila sa ako kunohayng mga amigo nagdroga; ang uban miundang ug eskuyla. Naguol ko nga naingon ana ang ilang kinabuhi. Proteksiyonan gyod ta ni Jehova.” Si Madison, nga 15 anyos, miingon: “Nalisdan ko sa pagsunod sa mga sukdanan ni Jehova ug lisod sab nga dili magpadala sa gihunahuna sa akong mga amiga nga maayo o makalingaw.” Unsay nakatabang niya? Siya miingon: “Akong hinumdoman nga dala nako ang ngalan ni Jehova ug ang maong tentasyon maoy paagi ni Satanas aron atakehon ko. Kon dili ko madala sa tentasyon, malipay ko.”

9-11. (a) Unsa ang simbolikong sandalyas sa mga Kristohanon? (b) Unsay makatabang nato aron mas komportable tang mosangyaw?

⁹ Basaha ang Efeso 6:15. Ang Romanong sundalo nga wala magsandalyas dili andam moadto sa panggubatan. Ang iyang sandalyas may tulo ka sapaw sa panit, busa lig-on kaayo ni. Ug kini komportable sab maong ang sundalo makalakaw nga may kompiyansa ug dili maeslayd.

¹⁰ Samtang ang literal nga sandalyas sa mga sundalo makatabang nila sa pagpakiggubat, ang simbolikong sandalyas sa mga Kristohanon makatabang nila sa pagdala sa mensahe sa kalinaw. (Isa. 52:7; Roma 10:15) Bisan pa niana, nagkinahanglag kaisog ang pagsangyaw. “Mahadlok kong mosangyaw sa akong mga klasmet,” matod sa 20 anyos nga si Bo. “Morag maulaw ko. Ambot nganong gibati to nako. Karon, ganahan na kong mosangyaw sa akong mga kaedad.”

¹¹ Daghang batan-on ang nag-ingon nga kon andam silang mosangyaw, mas komportable silang buhaton kana. Unsaon nimo pagpangandam? “Pirme kong magdalag basahon sa eskuylahan,” matod ni Julia nga 16 anyos, “ug maminaw ko sa opinyon ug gituohan sa akong mga klasmet. Base ana, makahunahuna ko kon unsay makatabang nila. Kon andam ko, makasulti ko kon unsa gyoy makaayo nila.” Si Makenzie, nga 23 anyos, miingon: “Kon buotan ka ug maminaw nila, mahibalo ka kon unsay ilang mga problema. Basahon gyod nako ang tanang materyal para sa mga batan-on. Pinaagi ana, ikapakita nako nila ang giingon sa Bibliya o ang materyal diha sa jw.org nga makatabang nila.” Ang ilang gisulti nagpakita nga kon pirme kang andam mosangyaw, sama rag nagsul-ob ka kanunay ug haom nga “sandalyas.”

12, 13. Unsay apil sa “nagdilaab nga mga udyong” ni Satanas?

¹² Basaha ang Efeso 6:16. Ang “dakong taming” nga ginadala sa Romanong sundalo pormag rectangle ug makapanalipod sa iyang abaga hangtod sa tuhod. Makasagang ni sa espada, bangkaw, ug pana.

¹³ Apil sa “nagdilaab nga mga udyong” nga ipuntirya ni Satanas nimo mao ang mga bakak bahin kang Jehova​—nga wala ka Niya mahala ug walay nagmahal nimo. Ang 19 anyos nga si Ida mibating way pulos. Siya miingon: “Pirme kong mobati nga dili ko suod kang Jehova ug dili niya gustong makigsuod nako.” Unsay iyang gibuhat? “Nakapalig-on gyod sa akong pagtuo ang mga tigom,” matod ni Ida. “Sa una, igo lang kong motambong ug dili gyod mokomento kay naghunahuna kong way ganahang maminaw sa akong isulti. Pero karon, mangandam na ko para sa tigom ug maningkamot nga makakomentog kaduha o katulo. Lisod ni, pero moarang-arang ang akong pamati kon buhaton nako ni. Ug makapadasig kaayo ang mga igsoon. Kada uli nako human sa tigom, bation nako nga gimahal ko ni Jehova.”

14. Unsay gipakita sa eksperyensiya ni Ida?

¹⁴ Gipakita sa eksperyensiya ni Ida ang importanteng kamatuoran: Ang gidak-on sa literal nga taming dili mausab, pero ang taming sa atong pagtuo mahimong mogamay o modako. Nagdepende ra nâ nato. (Mat. 14:31; 2 Tes. 1:3) Busa, importante kaayo nga palig-onon nato ang atong pagtuo!

15, 16. Nganong samag helmet ang atong paglaom?

¹⁵ Basaha ang Efeso 6:17. Ang helmet sa Romanong sundalo gidisenyo aron maproteksiyonan ang ulo, liog, ug nawong. Ang ubang helmet may gunitanan aron mabitbit kini sa sundalo.

¹⁶ Maingon nga ang helmet manalipod sa utok, ang “paglaom sa kaluwasan” manalipod sa atong hunahuna. (1 Tes. 5:8; Prov. 3:21) Ang paglaom makatabang nato sa pagpokus sa mga saad sa Diyos ug sa pagpabiling positibo bisan pa sa mga problema. (Sal. 27:1, 14; Buh. 24:15) Pero aron mahimong epektibo ang atong “helmet,” kinahanglang isul-ob nato ni, dili bitbiton.

17, 18. (a) Unsay posibleng buhaton ni Satanas aron huboon nato ang atong helmet? (b) Unsaon nato pagpakita nga wala ta malimbongi ni Satanas?

¹⁷ Unsay posibleng buhaton ni Satanas aron huboon nato ang atong helmet? Tagda ang gibuhat niya kang Jesus. Seguradong nahibalo si Satanas nga si Jesus mahimong magmamando sa katawhan. Pero kinahanglang maghulat si Jesus sa panahon nga gitakda ni Jehova. Ug sa dili pa nâ mahitabo, kinahanglan siyang mag-antos ug mamatay. Busa gitanyagan ni Satanas si Jesus ug kahigayonan nga matuman dayon ang maong paglaom. Gisaaran niya si Jesus nga kon mohimo kinig usa ka buhat sa pagsimba, si Jesus mahimo dayong magmamando sa kalibotan. (Luc. 4:5-7) Sa susama, nahibalo si Satanas nga gitanyagan ta ni Jehova ug materyal nga mga kaayohan sa bag-ong sistema. Pero kinahanglan tang maghulat ug tingali mag-antos pa gani. Busa nagtanyag si Satanas ug makapadaning kahigayonan nga matagamtam ang maong kinabuhi karon. Gusto niyang unahon nato ang materyal nga kaayohan, nga magkinabuhi nang komportable karon, ug ikaduha na lang ang Gingharian.​—Mat. 6:31-33.

¹⁸ Sama sa daghang Kristohanong batan-on, ang 20 anyos nga si Kiana wala malimbongi niini. Siya miingon: “Kabalo ko nga ang Gingharian sa Diyos lang ang makasulbad sa tanang problema.” Sa unsang paagi ang maong paglaom nakaapektar sa iyang panghunahuna ug binuhatan karon? Ang paglaom nga mabuhi sa Paraiso nagpahinumdom niya nga temporaryo lang ang mga butang niining kalibotana. Imbes hutdon ang iyang panahon ug kusog sa pagkab-ot ug sekular nga karera, gigamit niya kini sa pag-alagad kang Jehova.

19, 20. Sa unsang paagi mahimo tang hanas sa paggamit sa Pulong sa Diyos?

¹⁹ Ang espada nga gigamit sa Romanong mga sundalo sa panahon ni Pablo may gitas-ong 50 sentimetros ug gidisenyo para sa manomanong pagpakig-away. Hanas kaayo ang maong mga sundalo kay magpraktis sila kada adlaw.

²⁰ Gipakasama ni Pablo ang Pulong sa Diyos sa espada nga gihatag ni Jehova kanato. Pero kinahanglang mahimo tang hanas sa paggamit niana aron sa pagdepensa sa atong pagtuo​—o sa pag-adyas sa atong panghunahuna. (2 Cor. 10:4, 5; 2 Tim. 2:15) Sa unsang paagi mahimo kang hanas? Si Sebastian, nga 21 anyos, miingon: “Magsulat kog usa ka bersikulo gikan sa matag kapitulo nga akong basahon. Naghimo kog listahan sa akong paboritong mga teksto. Pinaagi ana, mas masabtan nako ang panghunahuna ni Jehova.” Si Daniel, nga gihisgotan ganina, miingon: “Samtang magbasa ko sa Bibliya, mopili kog teksto nga gibati nakong makatabang sa mga tawo sa teritoryo. Namatikdan nako nga maminaw ang mga tawo kon ilang makita nga kombinsido ka sa Bibliya ug naningkamot ka sa pagtabang nila.”

21. Nganong dili ta angayng mahadlok kang Satanas ug sa mga demonyo?

²¹ Sama sa gipakita sa mga batan-on nga gihisgotan niining artikuloha, dili ta angayng mahadlok kang Satanas ug sa mga demonyo. Gamhanan sila, pero puwedeng mapildi. Ug sila may kamatayon. Sa dili madugay, sulod sa Usa ka Libo ka Tuig nga Pagmando ni Kristo, sila bilanggoon ug dili na makahimog kadaot sa katawhan. Human niana, sila pagalaglagon. (Pin. 20:1-3, 7-10) Nakaila ta sa atong kaaway, iyang mga taktika, ug tuyo. Sa tabang ni Jehova, makasukol ta sa atong kaaway!