Sundoga si Jesus ug Magmalinawon

1-2. Nganong nabalaka pag-ayo si Jesus?

SA IYANG kataposang adlaw dinhi sa yuta, nabalaka si Jesus. Hapit na niyang antoson ang sakit nga kamatayon sa kamot sa daotang mga tawo. Pero dili lang ang iyang nagsingabot nga kamatayon ang nakapabalaka niya. Nahigugma siya pag-ayo sa iyang Amahan ug gusto niya nga malipay Siya. Nahibalo si Jesus nga kon magmatinumanon siya niining lisod nga pagsulay, iyang mabindikar (o, madepensahan) ang ngalan ni Jehova. Nahigugma sab si Jesus sa mga tawo, ug nahibalo siya nga ang atong paglaom nga mabuhi sa walay kataposan magdepende sa iyang pagkamatinumanon dinhi sa yuta.

² Bisag nabalaka pag-ayo si Jesus, nagmalinawon siya. Iyang giingnan ang mga apostoles: “Ihatag ko kaninyo ang akong kalinaw.” (Juan 14:27) Nabatonan niya ang “kalinaw sa Diyos,” ang pagkakalmado ug pagkamalinawon nga bation niadtong dunay suod nga relasyon kang Jehova. Nakatabang nâ kang Jesus nga magmalinawon.—Filip. 4:6, 7.

 3. Unsay atong konsiderahon niining artikuloha?

³ Walay usa kanato ang makasinatig kalisdanan nga sama nianang kang Jesus, pero ang tanan niyang sumusunod makaatubang ug mga kalisdanan. (Mat. 16:24, 25; Juan 15:20) Ug sama kang Jesus, usahay mabalaka ta. Unsay atong himoon aron dili ta sobrang mabalaka ug mawad-ag kalinaw sa hunahuna? Atong konsiderahon ang tulo ka butang nga gihimo ni Jesus panahon sa iyang ministeryo sa yuta ug sayron kon sa unsang paagi nato siya masundog dihang makaatubag kalisdanan.

 4. Base sa 1 Tesalonica 5:17, paghatag ug mga pananglitan nga kadaghan nag-ampo si Jesus sa kataposang adlaw sa iyang kinabuhi dinhi sa yuta.

⁴ Basaha ang 1 Tesalonica 5:17. Kadaghan nag-ampo si Jesus sa iyang kataposang adlaw sa yuta. Dihang gipakita niya sa mga tinun-an kon unsaon paghandom ang iyang kamatayon, nag-ampo siya para sa tinapay ug bino. (1 Cor. 11:23-25) Una mobiya sa lugar diin sila nagsaulog sa Paskuwa, nag-ampo siya uban sa mga tinun-an. (Juan 17:1-26) Pag-abot nila sa Bukid sa mga Olibo niadtong gabhiona, kadaghan siyang nag-ampo. (Mat. 26:36-39, 42, 44) Ug ang iyang kataposang mga pulong una mamatay maoy pag-ampo. (Luc. 23:46) Giampo ni Jesus kang Jehova ang tanang importanteng panghitabo niadtong adlawa.

 5. Nganong naluya ang mga apostoles?

⁵ Ang usa sa mga rason nga nakalahutay si Jesus mao ang iyang pagsalig sa Amahan pinaagi sa pag-ampo. Sa laing bahin, ang mga apostoles wala magpadayon sa pag-ampo niadtong gabhiona. Ingong resulta, naluya sila dihang gisulayan. (Mat. 26:40, 41, 43, 45, 56) Dihang makaatubang tag kalisdanan, makapabilin lang tang matinumanon kon atong sundogon si Jesus ug “mag-ampo nga mapinadayonon.” Unsay atong iampo?

 6. Sa unsang paagi ang pagtuo makatabang nato nga magmalinawon?

⁶ Makaampo ta kang Jehova nga hatagan ta ug “dugang pa nga pagtuo.” (Luc. 17:5; Juan 14:1) Nagkinahanglan tag pagtuo kay sulayan ni Satanas ang tanang sumusunod ni Jesus. (Luc. 22:31) Sa unsang paagi ang pagtuo makatabang nato nga magmalinawon bisag makaatubang ug sunodsunod nga kalisdanan? Dihang mahimo na nato ang tanan sa pag-atubang sa kalisdanan, ang pagtuo magpalihok nato sa pagsalig kang Jehova. Kay masaligon ta nga mas nahibalo siya kon unsay angayng buhaton, magmalinawon ang atong hunahuna ug kasingkasing.—1 Ped. 5:6, 7.

 7. Unsay imong makat-onan sa giingon ni Robert?

⁷ Ang pag-ampo makatabang aron magmalinawon ang atong hunahuna bisag unsa pay atong kalisdanan. Tagda pananglitan si Robert, usa ka matinumanong ansiyano nga kapig 80 anyos. Siya miingon: “Ang tambag sa Filipos 4:6, 7 nakatabang nako nga masagubang ang daghang kalisdanan. Nagkaproblema ko sa pinansiyal. Ug temporaryong nawala ang akong pribilehiyo ingong ansiyano.” Unsay nakatabang kang Robert nga magmalinawon? “Dihang magsugod na gani kog kabalaka, mag-ampo dayon ko,” siya miingon. “Kon pirme ug sinsero kong mag-ampo, mas malinawon ko.”

 8. Sumala sa Juan 8:29, unsay laing rason nga nagmalinawon si Jesus?

⁸ Basaha ang Juan 8:29. Si Jesus nagmalinawon bisag gilutos kay nahibalo siya nga iyang napalipay ang iyang Amahan. Nagmatinumanon siya sa panahon nga lisod ang paghimo niana. Iyang gihigugma ang Amahan ug giuna ang pag-alagad kang Jehova. Sa wala pa siya moanhi sa yuta, siya ang “batid nga magbubuhat.” (Prov. 8:30) Ug samtang dinhi sa yuta, madasigon niyang gitudloan ang uban bahin sa iyang Amahan. (Mat. 6:9; Juan 5:17) Ang maong buluhaton nakapalipay pag-ayo kang Jesus.—Juan 4:34-36.

 9. Nganong ang pagkapuliki sa pagsangyaw makatabang nato nga magmalinawon?

⁹ Masundog nato si Jesus pinaagi sa pagsunod kang Jehova ug sa ‘pagkahimong puliki diha sa buluhaton sa Ginoo.’ (1 Cor. 15:58) Kon “okupado kaayo” ta sa pagsangyaw, makabaton tag positibong panglantaw sa atong mga problema. (Buh. 18:5) Pananglitan, ang mga tawo nga atong maestorya sa ministeryo kasagaran mas grabe pag problema. Pero dihang makakat-on sila sa paghigugma kang Jehova ug pagpadapat sa iyang tambag, mouswag ang ilang pagkinabuhi ug mahimo silang mas malipayon. Sa matag higayon nga makita nato kana, mas makasalig ta nga atimanon ta ni Jehova. Makatabang nâ nato nga magmalinawon. Usa ka sister nga may depresyon ug pirmeng mobating walay pulos miingon: “Dihang puliki ko sa ministeryo, mobati kong mas malinawon ug malipayon. Kay kon magsangyaw ko, mobati kong mas suod kang Jehova.”

10. Unsay imong makat-onan sa giingon ni Brenda?

¹⁰ Konsideraha usab ang eksperyensiya ni Brenda. Siya ug ang iyang anak nga babaye may sakit nga multiple sclerosis. Mag-wheelchair na lang si Brenda ug wala kaayo siyay kusog. Usahay makasangyaw siya uban sa grupo, pero sagad magsangyaw siya pinaagig sulat. Siya miingon: “Niadtong nadawat na nako nga dili na gyod ko maulian niining sistemaha, mas nakapokus ko sa ministeryo. Gani, ang pagsangyaw nakatabang nako nga dili mabalaka. Imbes maghunahuna sa akong sakit, nagpokus ko sa pagtabang sa akong nasangyawan. Ug pirme ning magpahinumdom nako sa paglaom sa umaabot.”

11-13. (a) Unsay gihimo sa mga apostoles ug ubang higala ni Jesus nga nagpamatuod nga sila tinuod nga mga higala? (b) Tungod sa gihimo sa iyang mga higala, unsay gibati ni Jesus?

¹¹ Sa tibuok ministeryo ni Jesus, ang matinumanong mga apostoles napamatud-ang tinuod nga mga higala. Sila ang buhing pananglitan sa giingon sa Proverbio 18:24: “Adunay higala nga mounong labaw pa kay sa usa ka igsoon.” Gipabilhan sila pag-ayo ni Jesus. Panahon sa iyang ministeryo, walay bisan usa sa iyang mga igsoon sa unod ang mituo kaniya. (Juan 7:3-5) Sa usa ka higayon, nagtuo pa gani ang iyang mga paryente nga nabuang na siya. (Mar. 3:21) Sa laing bahin, si Jesus miingon bahin sa iyang mga apostoles sa gabii una sa iyang kamatayon: “Kamo mao ang nagpabilin kanako diha sa akong mga pagsulay.”—Luc. 22:28.

¹² May mga higayon nga nadismayar si Jesus sa iyang mga apostoles, pero wala siya magpokus sa ilang kasaypanan ug nakita niya ang ilang pagsalig kaniya. (Mat. 26:40; Mar. 10:13, 14; Juan 6:66-69) Sa gabii una siya mamatay, giingnan ni Jesus kining matinumanong mga sumusunod: “Gitawag ko kamong mga higala, tungod kay ang tanang butang nga akong nadungog gikan sa akong Amahan gipahibalo ko kaninyo.” (Juan 15:15) Walay duhaduha, ang mga higala ni Jesus nakadasig gyod kaniya. Ang ilang natabang kang Jesus sa iyang ministeryo nakapalipay niya pag-ayo.—Luc. 10:17, 21.

¹³ Gawas sa mga apostoles, si Jesus may laing mga higala, mga lalaki ug babaye, nga mitabang niya sa pagsangyaw ug sa ubang praktikal nga paagi. Ang pipila nag-imbitar niya sa ilang balay aron mangaon. (Luc. 10:38-42; Juan 12:1, 2) Ang uban mikuyog niya ug nagpagamit sa ilang kabtangan. (Luc. 8:3) Si Jesus dunay maayong mga higala kay siya usa ka maayong higala nila. Mihimo siyag maayo para nila ug wala siya magdahom ug labaw kay sa ilang maarangan. Hingpit si Jesus, pero iyang giapresyar ang tabang sa iyang dili hingpit nga mga higala. Ug seguradong nakatabang sila niya nga magmalinawon.

14-15. Unsaon nato pagkakitag maayong mga higala, ug sa unsang paagi sila makatabang nato?

¹⁴ Ang maayong mga higala makatabang nato nga magmaunongon kang Jehova. Ug ang pinakamaayong paagi aron makakitag maayong higala mao ang pagkahimong maayong higala. (Mat. 7:12) Pananglitan, ang Bibliya nagdasig nga gamiton ang atong panahon ug kusog sa pagtabang sa uban, ilabina sa mga “nanginahanglan.” (Efe. 4:28) Duna ba kay puwedeng tabangan sa inyong kongregasyon? Puwede ka bang mamalit para sa usa ka igsoon nga dili makabiya sa balay tungod sa katigulangon o sakit? Puwede ba nimong hatagag pagkaon ang usa ka pamilya nga naglisod sa pinansiyal? Kon kabalo ka unsaon paggamit ang jw.org^® ug ang JW Library^® app, puwede ba nimong tabangan ang uban sa inyong kongregasyon sa paggamit niini? Kon pirme tang motabang sa uban, mas dakog posibilidad nga magmalipayon ta.—Buh. 20:35.

¹⁵ Ang atong mga higala makasuportar nato panahon sa kalisdanan ug makatabang nato nga magmalinawon. Sama nga naminaw si Elihu dihang naghisgot si Job sa iyang kalisdanan, ang atong mga higala makatabang nato pinaagi sa mapailobong pagpaminaw kanato. (Job 32:4) Dili ta magdahom nga silay modesisyon para nato, pero maalamon ta kon maminaw ta sa ilang tambag nga gikan sa Bibliya. (Prov. 15:22) Sama nga si Haring David mapainubsanong midawat sa tabang sa iyang mga higala, mapainubsanon sab natong dawaton ang tabang sa atong mga higala. (2 Sam. 17:27-29) Sa pagkatinuod, regalo gikan kang Jehova ang maayong mga higala.—Sant. 1:17.

16. Sumala sa Filipos 4:6, 7, unsa ang bugtong paagi nga magmalinawon ta? Ipatin-aw.

¹⁶ Basaha ang Filipos 4:6, 7. Nganong miingon si Jehova nga ihatag niya kanato ang kalinaw “pinaagi kang Kristo Jesus”? Kay magmalinawon lang ang atong hunahuna ug pagbati kon masabtan nato ang papel ni Jesus sa katuyoan ni Jehova ug motuo niini. Pananglitan, pinaagi sa halad lukat ni Jesus, ang tanan natong sala mahimong mapasaylo. (1 Juan 2:12) Makapahupay gyod nâ kanato! Ingong Hari sa Gingharian sa Diyos, wad-on ni Jesus ang tanang kadaot nga atong naeksperyensiyahan tungod kang Satanas ug sa iyang sistema. (Isa. 65:17; 1 Juan 3:8; Pin. 21:3, 4) Nindot gyod kana nga paglaom! Ug bisan pag gihatagan ta ni Jesus ug lisod nga buluhaton, siya nagauban kanato, nga motabang nato nga makalahutay niining kataposang mga adlaw. (Mat. 28:19, 20) Makapalig-on gyod kana! Ang kahupayan, paglaom, ug kaisog maoy pipila sa importanteng mga butang nga makatabang nato nga magmalinawon.

17. (a) Sa unsang paagi magmalinawon ang hunahuna sa usa ka Kristohanon? (b) Sumala sa gisaad sa Juan 16:33, unsay atong mahimo?

¹⁷ Busa, sa unsang paagi magmalinawon ang imong hunahuna bisag nag-atubang kag grabeng kalisdanan? Mahimo nimo kana pinaagi sa pagsundog kang Jesus. Una, pag-ampo ug padayon kining himoa bisag unsay mahitabo. Ikaduha, sunda si Jehova ug sangyaw nga madasigon bisag may mga panahon nga lisod ning buhaton. Ug ikatulo, pangayog tabang sa imong mga higala. Dayon ang kalinaw sa Diyos magbantay sa imong hunahuna ug kasingkasing. Ug sama kang Jesus, magmadaogon ka sa bisan unsang pagsulay.—Basaha ang Juan 16:33.