Tagbawa ang Imong Espirituwal nga Panginahanglan
1 Si Jesus miingon: “Malipayon kadtong mahunahunaon sa ilang espirituwal nga panginahanglan.” (Mat. 5:3) Nganong importante kaayo nga magmahunahunaon sa atong espirituwal nga panginahanglan? Sa unsang paagi atong ikapakita nga kita mahunahunaon niana?
2 Ang usa ka tawo dili padayong makasalikway sa iyang lawasnong mga panginahanglan ug modahom nga sa kada adlaw maayo kaayo ang iyang trabaho. Ang samang prinsipyo mapadapat kon atong isalindot ang pagpakaon sa atong kaugalingon sa espirituwal nga paagi.—Mat. 4:4; Juan 17:3.
MGA TIGOM MOTABANG SA PAGTAGBAW SA MGA PANGINAHANGLAN
3 Diha sa atong mga tigom, “ang matinumanon ug maalamong ulipon” nagataganag maayo kaayong espirituwal nga pagkaon sa pagtagbaw sa atong panginahanglan. (Mat. 24:45-47) Ang kada miting mosilbig tino nga katuyoan, ug wala gayoy isalikway.
4 Sa mubo atong tagdon ang tulo lang sa atong lima ka tigom. Ang prinsipal nga miting nga gidesinyo sa padayon natong pagnunot sa nagauswag nga kamatuoran mao ang pagtuon sa Bantayanang Torre. Ang Teokratikanhong Ministeryong Tunghaan makabulig usab kanato sa pagkahimong hanas ingong mga ministro. Ang Pagtuon sa Basahon sa Kongregasyon nagataganag mabinantayong pagtuon sa lainlaing mga ulohan sa Bibliya.
5 Ikaw ba nagaandam alang sa mga tigom? Ang pipila mopahapaw lang sa pagbasa sa materyal, nga dalidaling nagalinya sa mga tubag sa mga pangutana, pero wala tan-awa ang gisitar nga mga teksto. Daw sila andam sa pagkomento, apan ila ba gayong natuhog ang kinabug-osang espirituwal nga katambok nga anaa niana?
PAHIMUSLI ANG PANAHON
6 Sa dihang mogahin ka ug panahon sa pag-andam alang sa mga miting, ayawg tugoti ang telebisyon o ubang dili importanteng kalihokan sa pagbalda. Ang mga ulo sa pamilya, ilabina, kinahanglang motabang sa ilang mga pamilya sa pagsunod sa regular nga programa sa pagtuon sa Bibliya, pag-andam sa mga miting, ug pakig-ambit diha sa ministeryo sa kanataran. Ang tanan kinahanglang ‘mopahimulos sa angayng panahon’ pinaagig pag-una gayod sa ilang espirituwal nga mga panginahanglan.—Efe. 5:15-17.