Himoa ang Labing Maayong Paggamit sa Atong mga Magasin

¹ Sa dihang moduol ka sa usa ka baligyaanan ug pamantalaan, unsa ang imong makita? Mga magasin. Diha sa usa ka tindahan sa kilid, unsay makadani sa imong mata? Mga magasin. Busa, unsa may ginabasa sa daghang katawhan? Mga magasin. Ang mga surbi nagpakita nga 9 sa 10 ka tawo nagabasa sa labing menos usa ka magasin matag bulan. Ang kalibotan maoy mahunahunaon ug magasin.

² Ato bang mahimo nga ang mabuot-kasingkasing nga mga tawo magmahunahunaon sa Bantayanang Torre ug Pagmata!? Oo, kon KITA mahunahunaon sa Bantayanang Torre ug Pagmata! Unsay makatabang kanato? Tagda kining mga sugyota:

◼ Basaha ang mga Magasin: Usa ka nagapanawng magtatan-aw nagtaho nga, sa aberids, 1 lamang ka magmamantala sa 3 diha sa iyang sirkito ang nagabasa sa matag isyu sa Ang Bantayanang Torre ug Pagmata! gikan sa atubangang hapin niini hangtod sa kataposan. Nagahimo ka ba sa ingon? Samtang ginabasa nimo ang matag artikulo, pangutan-a ang imong kaugalingon, ‘Kinsa kaha ang magpabili niining impormasyona​—usa ka inahan, usa ka negosyante, usa ka batan-on?’ Unya hunahuna kon sa unsang paagi ikaw makapukaw ug interes sa maong ulohan sa usa o duha lamang ka tudlingpulong.

◼ Maghimog Tinong Pedido sa Magasin: Magpedido sa igsoong lalaki nga nagadumala sa mga magasin alang sa tinong gidaghanon sa mga kopya sa matag isyu. Niining paagiha, ikaw ug ang imong pamilya makabatog regular nga suplay sa mga magasin.

◼ Mag-eskedyul ug Regular nga Adlaw sa Magasin: Makasuportar ka ba sa Adlaw sa Magasin sa kongregasyon? Kon dili, sulayi sa paggahin ug pipila ka panahon aron personal nga managtag ug mga magasin, diha sa pagsangyaw sa kadalanan o sa pagpamalaybalay ug diha sa mga rota sa magasin.

◼ Magmahunahunaon sa “Bantayanang Torre” ug “Pagmata!”: Magdala ka ug mga kopya sa mga magasin sa dihang magabiyahe o magapamalit. Itanyag kana sa dihang makigsulti ka sa mga kauban sa trabaho, mga silingan, mga eskulmet, o mga magtutudlo. Usa ka magtiayon kinsa kanunayng nagabiyahe pinaagig ayroplano naggamit ug usa ka puntos sa usa sa bag-ong mga magasin sa pagsugod ug usa ka panaghisgot uban sa pasahero nga naglingkod tupad kanila. Ilang napahimuslan ang daghang makalilipay nga mga kasinatian. Ang pipila ka batan-on makanunayong nagadala sa eskuylahan ug mga artikulo nga ilang gibating makapainteres sa ilang mga magtutudlo o kaubang mga estudyante. Magdalag mga kopya sa dihang ikaw magapamalit, ug itanyag kana sa mga nagabaligya sa dihang human ka na sa imong katuyoan. Daghan kanato kanunayng nagapalit ug gasolina; nganong dili itanyag ang mga magasin ngadto sa nagabantay sa gasolinahan? Magmaandam niana sa dihang mobisita ang mga paryente, sa dihang maggamit sa publikong sakyanan, o sa dihang nagahulat ka alang sa usa ka kasabotan. Makahunahuna ka ba ug uban pang tukmang mga okasyon?

◼ Andama ang Mubo nga Presentasyon sa Magasin: Planoha nga diyutay ra ang isulti, apan isulti kana nga maayo. Magmadasigon. Tandoga ang kasingkasing. Magmaespisipiko. Kuhaa ang usa ka ideya gikan sa usa ka artikulo, ipahayag kana sa pipila ka pulong, ug itanyag ang mga magasin. Ang labing maayong paagi mao ang pagpatunghag usa ka pangutana sa ulohang makapainteres ug dayon ipunting ngadto sa artikulo nga nagahatag ug Kasulatanhong tubag. Tagda ang pipila ka pananglitan kon sa unsang paagi kini mahimo:

³ Kon ikaw nagapasiugda ug artikulo maylabot sa pag-uswag sa krimen, ikaw makapangutana:

◼ “Unsa ang gikinahanglan aron mahimong posible alang kanato nga makatulog sa gabii nga walay kahadlok sa krimen?” Ang tagbalay tingali magmanegatibo nga mahimong maarang-arang pa ang mga butang. Ikaw makatubag nga daghang tawo nagabati sa samang paagi ug modugang nga aduna kay impormasyon nga imong gituohang makapainteres kaniya. Unya ipunting ngadto sa tukmang puntos diha sa artikulo.

⁴ Sa dihang magatanyag ug artikulo bahin sa pamilyahanong kinabuhi, ikaw hayan makaingon:

◼ “Daghang tawo nakakaplag nga usa ka tinuod nga hagit ang pagpangitag panginabuhian ug pag-atiman sa pamilya karong mga adlawa. Aduna ba kitay mapadulngan aron mabatonan ang kasaligang giya?” Unya ipunting ngadto sa espisipikong komento diha sa magasin nga nagapasundayag sa kaalam nga makaplagan sa Bibliya.

⁵ Hayan imong sundon kining paagiha sa dihang magpasiugda ug artikulo maylabot sa sosyal nga problema:

◼ “Kadaghanan sa katawhan nailalom sa pagpit-os karong adlawa. Ang Diyos wala gayod magtuyo alang kanato nga magkinabuhi niining paagiha.” Unya ipakita kon sa unsang paagi ang materyal diha sa artikulo makatabang kanato sa pagsagubang sa mga problema sa kinabuhi karon ug magtaganag tinuod nga paglaom sa umaabot.

⁶ Ang Pagpanaksi sa Kadalanan Maoy Epektibo: Kadto maoy sa Enero 1940 nga isyu sa Informant (Atong Ministeryo sa Gingharian) nga ang mga magmamantala gidasig sa unang higayon nga mag-eskedyul ug usa ka linaing adlaw matag semana alang sa pagpanaksi sa kadalanan ginamit ang mga magasin. Ikaw ba nagabuhat sa pagpanaksi sa kadalanan ngadtongadto? Kon ikaw nagahimo niana, ang imo bang metodo nga gigamit tinuod nga epektibo? Ang pipila ka magmamantala namatikdang nagatindog sa usa ka puliki nga kilid sa dalan, nga nagaestoryahay sa usag usa samtang daghang tawo ang nanglabay nga wala namatikdi. Inay kay magtindog nga dug-ol sa usag usa nga nagahupot sa mga magasin, mas epektibong magbulag ug duolon ang mga tawo. Ang mga estranghero hayan mohunong ug maminaw sa makadiyut kon sila duolon sa usa lamang ka tawo, apan pipila ang moduol sa usa ka grupo nga nalinga sa panag-estoryahay. Sanglit kita makadani ug dakong pagtagad diha sa dalan, adunay linaing panginahanglan nga batonan ang maayong pamostura ug magsinina nga kasarangan nga angay sa mga ministro sa Diyos.​—1 Tim. 2:9, 10.

⁷ Mga Rota sa Magasin: Kadtong adunay rota sa magasin makapahimutang ug daghang magasin bisan pa kon ang mga teritoryo kanunay nang makobrehan. Ang mga rota sa magasin maoy ekselenteng tinubdan sa malaomang mga pagtuon sa Bibliya.

⁸ Sa dihang himoon mo ang regular nga mga balikduaw sa paghatod sa mga magasin, imong makaplagan nga ang pagkamahigalaon tali nimo ug sa tagbalay magatubo. Ang mas pa gayod ninyong pagkasinatiay, mas sayon man ang paghisgot bahin sa mga ulohan sa Kasulatan. Kini mahimong motultol sa pagsugod ug pagtuon sa Bibliya. Ug hinumdomi, matag higayon nga makontak mo ang tagbalay ikaw makatahog usa ka balikduaw.

⁹ Usa ka igsoong babaye regular nga mihatod ug mga magasin sa usa ka babaye kinsa kanunay nga midawat niana apan miingon: “Dili ko motuo sa imong ginasulti kanako.” Sa ulahing pagduaw, ang igsoong babaye nakakaplag sa bana sa balay. Human sa usa ka hinigalang panagsultihanay, ang mga kahikayan gihimo sa pagsugod ug usa ka pagtuon sa Bibliya. Ang igsoong babaye nakighigala sa tulo ka anak nga lalaki kinsa mianha aron moduyog sa pagtuon. Sa kataposan, ang inahan ug ang tulo niya ka anak nga lalaki nagpahinungod sa ilang kinabuhi kang Jehova ug nabawtismohan. Sa pagkakaron, 35 ka membro sa maong pamilya ang midawat sa kamatuoran. Kining tanan tungod kay ang igsoong babaye padayong mibalik sa iyang rota sa magasin!

¹⁰ Adunay daghang paagi sa pagsugod ug rota sa magasin. Yanong hupti ang usa ka talaan sa imong mga napahimutang ug hikaya nga mobalik matag duha ka semana uban ang kinabag-ohang mga isyu. Usa ka paagi mao ang paggamit sa impormasyon ilalom sa ulohang “Sa Sunod Namong Gula.” Sa dihang ikaw mobalik, sultihi ang tagbalay nga dala mo ang artikulo nga inyong nahisgotan sa miagi. O, sa dihang moduaw pag-usab, ikaw makaingon: “Sa dihang gibasa ko kining artikuloha, akong nahunahunaan nga kini hayan makapainteres kanimo . . . ” Sa dihang mahuman na nimo ang maong duaw, itala ang lima ka yanong mga puntos sa imong house-to-house record: (1) ngalan sa tagbalay, (2) adres, (3) petsa sa duaw, (4) mga isyu nga napahimutang, ug (5) gihisgotang ar­tikulo. Ang ubang mga magmamantala nakatigom sa gidaghanong 40 o kapin pa ka tawo sa ilang rota sa magasin!

¹¹ Teritoryo sa Negosyohanan: Daghang magasin ang napahimutang sa mga magmamantala kinsa nagakobre sa teritoryo sa negosyohanan. Imo bang nasulayan ang pagsangyaw sa katindahanan? Sa sinugdanan, ang pipila nagapanuko sa pagduaw sa mga negosyante, apan human nila masulayi kini sa pipila ka higayon, ilang nakaplagan kana nga makapainteres ug magantihon. Nganong dili hangyoon ang usa ka batid nga magmamantala o payunir sa pagtabang kanimo nga makasugod niana?

¹² Adunay ubay-ubay nga mga bentaha sa pagkobre sa katindahanan. Pipila ra ang mga wala sa balay, labing menos sa mga oras sa patigayon! Ang mga negosyante kasagaran matinahoron, bisan kon sila tingali dili sa tino interesado sa Bibliya. Magsugod nga sayo sa maong adlaw; ikaw lagmit tagdon nga mas pa. Human ikapailaila ang imong kaugalingon, ikaw hayan makaingon nga panagsa ra kaayo nimo makaplagan ang mga negosyante nga anaa sa balay, busa ikaw nagaduaw sa makadiyut lamang sa ilang dapit trabahoanan sa pagtanyag sa kinaulahiang mga gula sa Ang Bantayanang Torre ug Pagmata! Ipunting nga daghang negosyante ang nagapabili sa atong mga magasin tungod kay sila kinahanglang makanunot-panahon sa mga panghitabo sa kalibotan apan diyutay lamang ug panahon sa pagbasa. Ang usa ka rota sa magasin mahimong maugmad uban sa interesadong mga tawo nga makaplagan sa teritoryo sa negosyohanan.

¹³ Pangandam Ingong Usa ka Pamilya: Ang pipila ka panahon mahimong igahin atol sa inyong pagtuon sa pamilya sa paghisgot kon unsang mga artikuloha diha sa kinabag-ohang mga magasin ang mahimong haom nga gamiton sa inyong teritoryo. Ang mga membro sa pamilya​—lakip ang mga kabataan​—makapulipulig praktis sa ilang mga presentasyon ug sa pagbuntog sa kasagarang mga pagsupak nga ipatungha, sama sa: “Ako puliki,” “Aduna kamiy kaugalingong relihiyon,” o “Dili ako interesado.” Kini magpaposible alang sa tibuok pamilya nga makabatog regular nga pakig-ambit sa pagpanagtag sa magasin.

¹⁴ Mga Nagadumala sa Pagtuon sa Libro Makatabang: Sa dihang posible, ieskedyul ang mga tigom sa dayon na ang pagsangyaw maylabot sa Adlaw sa Magasin didto sa nahimutangan sa pagtuon sa libro inay kay magtigom ang entirong kongregasyon diha sa Kingdom Hall. Kadtong nagapanguna kinahanglang andam kaayo uban ang tinong mga sugyot alang sa grupo. Ang mga tigom sa dayon na ang pagsangyaw​—lakip na ang pag-organisar sa grupo​—kinahanglang mubo, nga molungtad lamang gikan sa 10 ngadto sa 15 minutos. Ang mga nagadumala sa pagtuon kinahanglang magseguro nga adunay igong teritoryo aron nga ang grupo padayong mapuliki alang sa entirong panahon sa pag-alagad sa kanataran.

¹⁵ Ipakita ang Pagpabili Alang sa mga Magasin: Ang artikulong “Paggamit ug Maayo sa Ang Bantayanang Torre ug Pagmata!” nga gipatik sa Agosto 1993 nga isyu sa Atong Ministeryo sa Gingharian naghimo niining hinungdanong puntos: “Ang Bantayanang Torre ug Pagmata! dili mawad-an ug bili, bisan kon kini dili ikapahimutang tanan sulod sa usa o duha ka bulan sa petsa sa paggula niini. Ang impormasyon nga nasulod niini dili mahimong momenos ang kahinungdanon sa paglabay sa panahon . . . Ang pagtugot sa daandaang mga magasin nga magtipun-og ug dili gayod maggamit niini magapakitag kakulang sa apresasyon alang niining bililhong mga instrumento. . . . Inay nga ihiklin ang daandaang mga isyu ug hikalimtan ang may kalabotan niini, dili ba mas maayo nga maghimog espesyal nga panikaysikay sa pagpahiluna niini diha sa mga kamot sa interesadong katawhan?”

¹⁶ Karong adlawa adunay daghang mabuot-kasingkasing nga katawhan kinsa nagapangita sa kamatuoran. Ang impormasyon nga nasulod sa usa ka magasin mahimong mao gayod ang ilang gikinahanglan sa pagtultol kanila sa kamatuoran! Ikaw ba mas mahunahunaon sa pagpanagtag sa magasin sa umaabot? Imo bang ipadapat ang pipila niining mga sugyota niini gayong hinapos sa semana? Ikaw dagayang mapanalanginan kon imong himoon kana.

Praktikal nga mga Sugyot:

◼ Basaha ang mga magasin nga abante, ug sinatia ang mga artikulo.

◼ Pilia ang usa ka artikulo maylabot sa butang nga sa katibuk-an makapainteres sa inyong komunidad.

◼ Andama ang usa ka presentasyon nga haom sa lainlaing matang sa mga tawo, sama sa mga lalaki, mga babaye, o mga batan-on. Ipakita kon sa unsang paagi ang magasin nagalangkit sa tagbalay ug kon sa unsang paagi ang tibuok pamilya makapahimulos niana.

◼ Planoha nga himoon ang imong pag-alagad sa kanataran sa dihang ang kadaghanan sa katawhan anaa sa balay. Ang pipila ka kongregasyon nagahikay ug pagsangyaw sa gabii uban ang mga magasin.

◼ Hupti ang imong presentasyon nga mubo ug diretso sa puntos.

◼ Ayawg sulti nga paspas kaayo. Kon ang imong mamiminaw walay interes, ang mas tuling pagsulti dili makatabang. Sulayi nga mahimong relaks, ug hatagi ang tagbalay sa kahigayonan sa pagsanong.

Pagtanyag ug mga Magasin sa Balaybalay:

◼ Batoni ang mahigalaong pahiyom ug ang malumo nga tono sa tingog.

◼ Magmadasigon bahin sa mga magasin.

◼ Magsulti nga hinay ug klaro.

◼ Hisgoti ang usa lamang ka ulohan; sa mubo pukawa ang interes, ug ipakita ang bili niana sa tagbalay.

◼ Ipasiugda ang usa lamang ka artikulo.

◼ Ipatugbaw ang usa lamang ka magasin, nga nagatanyag sa ikaduha ingong kauban.

◼ Itunol ang mga magasin ngadto sa tagbalay.

◼ Ipahibalo sa tagbalay nga nagaplano kang mobalik.

◼ Batoni ang mahigalaon, positibong paniklop kon balibaran ang mga magasin.

◼ Maghimog pagnota sa house-to-house record sa tanang interes ug mga napahimutang.

Mga Kahigayonan sa Pagpahimutang ug mga Magasin:

◼ Pagsangyaw nga pamalaybalay

◼ Pagsangyaw sa kadalanan

◼ Pagsangyaw sa katindahanan

◼ Mga balikduaw sa rota sa magasin

◼ Pagsangyaw sa magabii

◼ Sa dihang maghimog mga balikduaw

◼ Pagbisita sa kanhing mga estudyante sa Bibliya

◼ Sa dihang magbiyahe, mamalit

◼ Sa dihang makigsulti sa mga paryente, mga kauban sa trabaho, mga silingan, mga eskulmet, mga magtu­tudlo

◼ Sa publikong sakyanan, sa mga lawak hulatanan