Pagtanyag sa Librong Kahibalo nga Motultol sa Kinabuhing Walay Kataposan
1 Kita nalipay sa dihang ang bag-ong libro, Kahibalo nga Motultol sa Kinabuhing Walay Kataposan, giluwatan! Kana gidesinyo sa pagtabang sa mga tawo nga daling makakuha sa tukmang kahibalo sa kamatuoran. Sa Marso kita makabaton sa unang higayon nga ikatanyag kining libroha sa atong teritoryo. Unsay atong isulti sa pagpukaw sa interes?
2 Hayan imong magamit ang usa ka presentasyon nga nagapatugbaw sa Bibliya ingong usa ka praktikal nga tinubdan sa giya, pinaagig pag-ingon:
▪ “Among ginahisgotan sa among mga silingan kon diin makaplagan ang usa ka praktikal nga tinubdan sa giya alang sa pagsulbad sa mga problema sa kinabuhi. Imo bang gibati nga ang Bibliya usa ka praktikal nga giya karong adlawa? [Tugoting motubag, unya basahang 2 Timoteo 3:16, 17.] Ang mga prinsipyo sa Bibliya mapadapat kaayo karon sama ra gayod kaniadto sa dihang gidasig sa Diyos ang pagsulat niana.” Paklia sa panid 16 sa librong Kahibalo, ug sa mubo komentohi ang praktikal nga giya nga makaplagan sa Wali ni Jesus sa Bukid. Basaha ang pangutlo sa parapo 11 o ang usa diha sa parapo 13, unya itanyag ang libro ug hikaya mga mobalik sa pagtubag sa pangutana, Sa unsang paagi kita sa personal makabenepisyo gikan sa kahibalo nga anaa sa Bibliya?
3 Kon imong mahibalag ang usa ka ginikanan, hayan ikaw makapunting sa pamilya:
▪ “Kasagarang mga ginikanan mouyon nga adunay daghang problema sa pagsulay sa pagmentinar ug usa ka malipayon panimalaynong kinabuhi. Unsa ang imong napanid-ang seryosong mga kababagan? [Tugoting motubag.] Ang Bibliya nagahatag ug ekselenteng tambag nga makatabang kanato. [Basahang mga bahin sa Colosas 3:12, 18-21.] Ang maayong tambag gihatag sa kapitulo 15 niining libroha, nga nag-ulohang ‘Pagtukod ug Pamilya nga Nagpasidungog sa Diyos.’ Kini nagapakita kon sa unsang paagi mapagaan ang kabug-at sa panagtiayon ug masulbad ang mga problemang ginaatubang sa atong kabataan. Mapaneguro kong malipay ka sa pagbasa niana.”
4 Buot ba nimong sulayan ang diretsong paagi sa pagsugod ug usa ka pagtuon? Ania ang usa nga hayan molampos para kanimo:
▪ “Kami nagatanyag ug usa ka libreng pagtuon sa Bibliya sa balay. Nasulayan na ba nimo ang pagkuhag usa ka kurso sa Bibliya kanhi? [Tugoting motubag.] Tugoti kong ipakita nimo ang giya sa pagtuon nga among ginagamit.” Ipakita ang librong Kahibalo, paklia sa panid 3 aron makita sa tagbalay ang listahan sa mga kaundan, ug mangutana, “Nahibulong ka ba kon unsay ikasulti sa Bibliya niining mga ulohana?” Paklia sa kapitulo nga hayan makapainteres sa tagbalay, ug basaha ang mga sub-titulo. Isaysay nga buot nimong ipasundayag sa mubo kon sa unsang paagi ginatagad nato kining impormasyona diha sa atong kurso sa pagtuon. Masugdan man o dili ang usa ka pagtuon, itanyag ang libro ngadto sa tawo.
5 Karong adlawa daghan gayong tawo ang nagasanong sa tukmang kahibalo sa matuod nga Diyos. (Isa. 2:2-4) Maoy atong pribilehiyo ang pagtabang sa daghan pang tawo nga maarangan sa pagkat-on bahin kang Jehova ug matultolan sa kinabuhi.—1 Tim. 2:4.