Magmatibuok-Kalag!

¹ Daghan ang atong katarongan nga magmapasalamaton kang Jehova. Kini nagalakip sa mga butang nga iyang nahimo kanhi, ginahimo sa pagkakaron, ug pagahimoon pa para kanato sa umaabot. Ang atong pagkamapasalamaton magtukmod gayod nato sa pagbuhat sa unsa? Si David nagatubag: “Pagadayegon ko si Jehova sa tanang mga panahon; ang pagdayeg kaniya magakanunay sa akong baba.”​—Sal. 34:1.

² Sa dihang nagpahinungod kita kang Jehova, atong gidumilian ang pag-angkon sa atong mga kaugalingon ug nag-alsa sa atong sakitanang estaka ingong mga tinun-an ni Jesus. (Mat. 16:24) Unsay ipasabot niana? Ang usa ka tawo kinsa nagdumili sa pag-angkon sa iyang kaugalingon nagahimo sa pagbuhat sa kabubut-on sa Diyos ingong ang labing hinungdanong pangagpas sa kinabuhi. Maoy kabubut-on ni Jehova nga ang iyang ngalan kinahanglang mailhan sa tibuok yuta.​—Sal. 83:18.

³ Ang Bibliya tin-awng nagapakita nga kita gisugo sa pagwali. Kini maoy usa ka buluhaton nga atong ginahimong “tibuok-kalag ingon nga alang kang Jehova.” (Col. 3:23) Unsa ka dako ang atong pagbuhat diha sa ministeryo kon kita tinuod nga tibuok-kalag? Sa dihang tagdon ta ang gugma ni Jehova alang kanato, palihokon gayod kita sa atong mga kasingkasing sa pagbaton ug bug-os nga pakig-ambit sa pagsulti sa uban bahin kaniya ug sa iyang mga katuyoan!

⁴ Ang usa ka tawo kinsa tibuok-kalag buot nga ipunting ang iyang pagtagad sa sagradong pag-alagad. Ang salmista mipahayag: “Makapito sa usa ka adlaw ginadayeg ko ikaw.” (Sal. 119:164) Silang nagaduyog sa mga pagbati sa salmista nagapahimulos sa tanang kahigayonan sa pagdayeg kang Jehova.

⁵ Kita Gilibotan sa mga Kahigayonan sa Pagdayeg Kang Jehova: Dili na ta angayng maghulat pa hangtod kita nagapakig-ambit sa buluhatong pamalaybalay aron isangyaw ang maayong balita. Ang atong mga kauban sa trabaho, mga eskulmet, mga paryente, ug mga kaila tanan kinahanglang makadungog sa mensahe sa Gingharian. Sa dihang nagabiyahe, kita makasugod ug mga panaghisgot sa kaubang mga pasahero, mga trabahante sa restawran, mga nagaatiman sa estasyon sa gasolina, o mga drayber sa taksi. Samtang anaa sa balay, kita tingali makapanaksi sa mga silingan o mga tawong-tighatod. Kon kita naospital, aduna ing mga nars, mga doktor, ug ubang mga pasyente nga mahimong atong masangyawan sa di-pormal nga paagi.

⁶ Di-pormal nga Pagsangyaw Magpatunghag mga Resulta: Duha ka Saksi ang naglakaw sa usa ka parke usa ka adlaw ug misugod ug panaghisgot sa usa ka batan-ong lalaki kinsa nagapaseyo uban sa iyang bata. Sa kapulihay, siya ug ang iyang asawa nakadangop sa kamatuoran. Ang batan-ong lalaki mipadayag sa ulahi nga kadiyot lamang nga panahon antes niya unang mahibalag ang duha ka Saksi, siya miampo na ngadto sa Diyos, nagahangyo nga, ‘Kon ikaw nagalungtad, palihog tugoting makaila ako nimo.’ Iyang giisip ang panagtagbo diha sa parke ingong tubag ni Jehova sa iyang pag-ampo.

⁷ Silang tibuok-kalag nagatagamtam sa labing dakong kalipay. Sila nahibalo nga ang pag-alagad “uban ang usa ka hingpit nga kasingkasing” nagapahimuot kang Jehova.​—1 Cron. 28:9.