Ato Bang Mahimo Kana Pag-usab?—Laing Agda Alang sa Oksilyare nga mga Payunir
1 Ato bang mahimo pag-usab ang unsa? Makaoksilyare payunir ba kita sulod sa panahon sa Memoryal? Ang pasukip sa Pebrero 1997 nga Atong Ministeryo sa Gingharian nakadani sa atong pagtagad uban ang tataw nga ulohan: “Gikinahanglan—20,000 ka Oksilyare Payunir.” Kami masaligon nga imong tagdong seryoso ang maong pangagda. Sa dihang gitipon ang taho sa pag-alagad sa Abril 1997, kita nalipay sa pagkahibalo nga 22,410 ang nagpalista sa pag-alagad nga oksilyare payunir! Kon atong idugang sa maong gidaghanon ang 14,869 ka regular payunir ug ang 456 ka espesyal payunir nga nagtaho sa maong bulan, atong makita nga 30 porsiyento sa tanang magmamantala ang anaa sa payunir nga pag-alagad. Mahimo ba nato kana pag-usab niining panahon sa Memoryal?
2 Mainiton namong gidayeg ang tanan nga naghimog ekstrang paningkamot sa pagpauswag sa ilang buluhaton sa pag-alagad sa kanataran sa miaging tuig. Tin-aw, kamong tanan napasibot sa dili hinakog nga gugma alang kang Jehova nga Diyos ug sa inyong silingan. (Luc. 10:27; 2 Ped. 1:5-8) Ang mga magmamantala sa nagkalainlaing mga kahimtang sa kinabuhi mihatag ug luna sa oksilyare nga pagpayunir. Sa usa ka kongregasyon, 51 ka magmamantala ang duyog nga nagpayunir sa samang bulan, lakip ang kadaghanan sa mga ansiyano, usa ka inahan nga may 15-bulan-edad nga anak babaye, usa ka sister nga mibiya sa iyang trabaho ug nakakaplag ug di-bug-os-panahong trabaho nga nakapaarang kaniya sa pagpayunir, ug ang usa ka tigulang nga sister kinsa wala pa sukad makapayunir. Ang magtatan-aw sa sirkito misulat: “Ginahimo ang dakong paningkamot sa buluhaton sa pagsangyaw. . . . Dili lamang kini nakaapektar ug dako diha sa teritoryo apan ang mga kongregasyon nagsugwak sa kadasig. Nalipay ang mga igsoon nga mas pang nagkailhanay sa usag usa maingon man sa pagkakita sa maayong mga resulta diha sa ministeryo.”
3 Ang mga batan-on wala magpabiya sa miaging tuig. Usa ka 13-anyos-edad nga di-bawtismadong magmamantala (babaye) nagpaabot ug panahon sa dihang siya makapasimbolo sa iyang dedikasyon kang Jehova. Human mabawtismohi sa Pebrero, siya misulat bahin sa iyang tinguha sa pag-oksilyare payunir sa Marso: “Kay wala nay makapugong kanako karon, dihadiha akong gitunol ang akong aplikasyon. . . . Ang daghang kahibulongang kasinatian nga among gitagamtam wala gayod unta matinuod kon dili pa tungod sa inyong mahigugmaong pagdapit sa pagpayunir. Ako mapasalamaton kang Jehova nga nakabaton niining pribilehiyoa nga nalakip niadtong . . . kinsa misanong.” Nagpahiluna siyag tumong sa pagbuhat niana pag-usab.
4 Tingali usa ikaw sa 22,410 nga misalga sa buluhaton sa pag-oksilyare payunir sa miaging Abril, o sa 13,690 sa Marso, o sa 14,332 sa Mayo. Himoon mo ba kana pag-usab niining tuiga? Kon wala ka makapayunir sa miaging tuig, imo bang mahimo kana niining tuiga? Malabwan ba nato ang 22,410 niining Abril? Mao kana ang kinadaghanang mga oksilyare payunir sa bisan unsang usa ka bulan sa sanga sa Pilipinas.
5 Isentro ang Pagtagab sa Abril ug Mayo: Niining tuiga, ang Memoryal matunong sa Sabado, Abril 11, nga maghimo sa Abril nga ekselenteng bulan sa napauswag nga kalihokan sa ministeryo. (2 Cor. 5:14, 15) Sulod sa unang 11 ka adlaw sa bulan, atong hatagag pagtagad ang pagdapit sa daghang interesado kutob sa maarangan sa pagtambong sa Memoryal. Kon nagaplano ka sa pag-oksilyare payunir, palihog ihatag ang imong aplikasyon nga abante pa gayod sa petsa nga ikaw buot magsugod.—1 Cor. 14:40.
6 Sanglit ang Mayo adunay lima ka bug-os hinapos nga mga semana, ang mga magmamantala nga bug-os-panahong nanginabuhi hayan makakaplag nga mas sayon ang pag-oksilyare payunir sa maong bulan. Pinaagig pag-eskedyul ug napulo ka oras sa pag-alagad sa kanataran sa matag usa sa lima ka hinapos nga mga semana, imong gikinahanglan nga maggahin lamang ug dugang napulo ka oras sa bulan sa pagkab-ot sa gikinahanglang 60 oras.
7 Sulod sa Abril ug Mayo, atong itanyag ang mga suskrisyon ug indibiduwal nga mga kopya sa Ang Bantayanang Torre ug Pagmata! ingong tanyag nga literatura. Kini angayng magdasig kanato nga mas pa sa pagpangab-ot ug magpayunir. Nganong makasulti kita niana? Ang mga magasin sayon nga itanyag ug makapalipay ang paggamit niana diha sa ministeryo. Dali kining ikapahiuyon nga magamit sa tanang bahin sa pag-alagad—sa balay-balay ug sa mga tindahan nga buluhaton, maingon man sa dihang kita moduol sa mga tawo diha sa dalan, sa mga paradahan, ug sa mga parke. Labing hinungdanon, Ang Bantayanang Torre ug Pagmata! nagalaban sa mga kamatuoran sa Gingharian. Kini nagapatagad ngadto sa katumanan sa tagna sa Bibliya, nga nagapamatuod nga ang Gingharian sa Diyos nagamando. Nagatandog usab kini sa mga kinabuhi sa mga magbabasa pinaagig pagsabot sa tinuod nga mga panginahanglan sa mga tawo. Kon atong hunahunaon kon sa unsang paagi ang atong kinabuhi naapektohan niining hinungdanong mga mantalaan, kita madasig sa pagpakig-ambit sa paghatag niinig posibleng kinadak-ang pagpang-apod-apod sa Abril ug Mayo.
8 Agig pagpangandam niining gipadakong kalihokan sa pagmagasin, ikaw makabenepisyo gikan sa pagsubli niining mga artikuloha: “Ang Bantayanang Torre ug Pagmata!—Tukma-sa-Panahong mga Mantalaan sa Kamatuoran” (Enero 1, 1994, Bantayanang Torre), “Himoa ang Labing Maayong Paggamit sa Atong mga Magasin” (Enero 1996 Atong Ministeryo sa Gingharian), ug “Andama ang Imong Kaugalingong Presentasyon sa Magasin” (Oktubre 1996 Atong Ministeryo sa Gingharian).
9 Mga Ansiyano Manguna: Aron maatiman ang daghang magmamantala nga nagpayunir sa miaging tuig, ang mga ansiyano sa usa ka kongregasyon nagpasiugda ug usa ka Sabado sa bulan ingong espesyal nga adlaw sa kalihokan sa pag-alagad alang sa tibuok kongregasyon. Ang mga kahikayan gihimo aron magtagbo sa daghang nagkalainlaing oras sulod sa maong adlaw, nga naghatag sa tanan diha sa kongregasyon ug kahigayonan sa pagpakig-ambit sa nagkalainlaing porma sa pagsangyaw. Naglakip kini sa pagkobre sa mga negosyohanan, pagsangyaw diha sa dalan, pamalaybalay, mga pagbalikduaw, paghimog mga sulat, ug pagsangyaw pinaagig telepono. Talagsaon ang pagsanong, nga may 117 ka magmamantala nga nagpakig-ambit sa pag-alagad sa kanataran nianang adlawa. Mitotal silag 521 oras nga gigugol sa ministeryo ug 617 ang napahilunang mga magasin, mga brosyur, ug mga libro! Ang kadasig sa maong Sabado nagpadayon hangtod sa Dominggo, nga may kinadaghanang nagatambong sa Pakigpulong Publiko ug sa Pagtuon sa Bantayanang Torre.
10 Sa matag Tigom sa Pag-alagad sa Abril ug Mayo, ang kongregasyon angayng pahinumdoman kon kanus-a ug asa himoa ang mga tigom sa dayon na nga pagsangyaw sulod sa umaabot nga semana, ilabina kon gihimo ang pipila ka dugang nga mga kahikayan gawas pa nianang naandang gieskedyul. Ang mga regular payunir maingon man ang mga magmamantala nga dili mga oksilyare payunir gidasig sa pagpaluyo niining mga kahikayan sa grupo segun sa itugot sa ilang mga kahimtang.
11 Ang magtatan-aw sa pag-alagad kinahanglang makigtagbo uban sa igsoong lalaki nga nagatudlog mga teritoryo aron sa paghimog mga kahikayan sa pagkobre nianang dili kanunay makobrehan. Hayan hatagag dugang pagtagad ang mga wala sa balay ug pagsangyaw sa kadalanan ug sa katindahanan. Ikapasiugda ang pagsangyaw sa magabii. Ang igong mga suplay sa mga magasin kinahanglang orderon para sa Abril ug Mayo sa pagpaabot sa napadakong kalihokan.
12 Daghang Magmamantala ang Mahimong Kuwalipikabo: Ang unang tudlingpulong sa aplikasyon sa oksilyare payunir nag-ingon: “Tungod sa akong gugma kang Jehova ug sa akong tinguha sa pagtabang sa uban sa pagkat-on bahin kaniya ug sa iyang mahigugmaong mga katuyoan, buot nakong pauswagon ang akong pakig-ambit sa pag-alagad sa kanataran pinaagig pagpatala ingong oksilyare payunir.” Ang paghigugma kang Jehova ug ang tinguha sa pagtabang sa uban sa espirituwal maoy pasukaranan sa atong dedikasyon. (1 Tim. 4:8, 10) Aron mahimong kuwalipikado sa pag-oksilyare payunir, ang usa kinahanglang bawtismado, maayog dungog sa moral, ug anaa sa kahimtang nga makagahin ug 60 oras sa ministeryo sulod sa usa ka bulan. Samtang kitang tanan magtagad sa atong mga kahimtang, ang pipila ba kanato kinsa wala pa gayod makapayunir kanhi makahimo niana niining tuiga sa Abril o Mayo?
13 Hayan maamgohan sa daghan diha sa kongregasyon nga sila usab makapayunir sa dihang ilang makita ang ubang magpalista nga may mga kahimtang nga susama sa ilaha. Ang mga batang nagtungha, mga tigulang, bug-os-panahong sekular nga mga trabahante, lakip ang mga ansiyano ug ministeryal nga mga alagad, ug ang uban malamposong nakaoksilyare payunir. Usa ka ginang sa panimalay ug inahan sa duha ka bata nga may bug-os-panahong trabaho nakakab-ot ug 60 oras, nakapahilunag 108 ka magasin, ug nakasugod ug 3 ka pagtuon sa Bibliya sa usa ka bulan sa pag-oksilyare payunir. Giunsa niya kadto paghimo? Iyang gigamit ang iyang oras sa tingpaniudto didto sa trabaho sa pagsangyaw sa duol nga teritoryo, nagsangyaw siya pinaagi sa pagsulat, ug siya nakig-ambit sa pagsangyaw sa paradahan ug sa kadalanan. Iyang gipahimuslan usab paggamit ang iyang adlaw nga walay trabaho sa matag semana pinaagig pagpakig-ambit duyog sa kongregasyon sa pag-alagad sa kanataran. Bisan tuod siya naghunahuna sa sinugdan nga ang pag-oksilyare payunir maoy dili makab-ot nga tumong, duyog ang pagdasig gikan sa uban ug ang usa ka praktikal nga eskedyul, nabuntog ang mga kababagan.
14 Gipasaligan ni Jesus ang iyang mga tinun-an: “Maluloton ang akong yugo ug gaan ang akong luwan.” (Mat. 11:30) Mao kana ang ulohan sa makapadasig nga artikulo sa Agosto 15, 1995, nga Bantayanang Torre. Naghisgot kini bahin sa usa ka sister nga may makapatensiyon-kaayo, bug-os-panahong sekular nga trabaho. Naghunahuna ba siya nga ang pag-oksilyare payunir dili na gayod alang kaniya? Wala. Sa pagkatinuod, nakaarang siya sa pag-oksilyare payunir sa matag bulan. Ngano? Tungod kay iyang gibati nga ang pagpayunir sa aktuwal nakatabang pa kaniya sa paghupot sa iyang katimbang. Ang pagtabang sa mga tawo samtang ilang nakat-onan ang kamatuoran sa Bibliya ug sa pagkakita kanilang nag-usab sa ilang mga kinabuhi aron makabaton sa pag-uyon sa Diyos mao ang labing dakong tinubdan sa kalipay diha sa iyang puliking kinabuhi.—Prov. 10:22.
15 Ang bisan unsang mga pagsakripisyo ug mga pagpasibo nga kinahanglang himoon sa usa aron makapayunir gigantihan pag-ayo pinaagig gipahimuslang mga panalangin. Usa ka sister misulat sa iyang kasinatian sa pag-oksilyare payunir: “Nakatabang kini kanako nga dili maghunahuna lamang sa akong kaugalingon ug sa dugang pa magsentro sa pagtagad sa pagtabang sa uban. . . . Akong irekomendar kana alang niadtong makahimo niana.”
16 Nanginahanglan Kinig Maayong Eskebyul: Sa kataposang panid niini nga pasukip, among gipatik pag-usab ang sampol sa mga eskedyul nga mitungha sa Pebrero 1997 nga Atong Ministeryo sa Gingharian. Tingali usa niini mohaom sa imong mga kahimtang. Samtang imong sublion kini, tagda ang imong normal nga rutina sa binulang kalihokan. Unsang mga proyektoha palibot sa panimalay ang mahimo nga abante sa imong pagpayunir o temporaryong ihiklin una hangtod sa ulahi? Mahimo bang walaon ang pipila ka panahon nga imong magahin sa lingawlingaw, lulinghayaw, o ubang mga porma sa pahayahay? Inay hunahunaon ang total nga 60 oras nga gikinahanglan, planoha ang imong eskedyul sa inadlaw o senemanang paagi. Aron makaoksilyare payunir 2 lamang ka oras sa matag adlaw o 15 ka oras matag semana ang gikinahanglan. Lantawa ang sampol nga mga eskedyul, ug paggunit ug lapis, tan-awa kon unsay imong mahimo maylabot sa personal nga eskedyul sa pag-alagad nga ilabinang mohaom kanimo ug sa imong pamilya.
17 Ang maayong sanong ug ekstrang pagpaluyo nga gipakita sa kongregasyon alang sa ministeryo sa miaging tuig nagdasig sa usa ka regular payunir sa pagsulat: “Daghang salamat sa inyong mahigugmaong pagdasig sa paghatag ug ekstrang paningkamot sa pagpaluyo sa oksilyare nga pagpayunir. . . . Ang inyong gisugyot nga mga eskedyul nakatabang sa daghang wala pa gayod makapayunir kaniadto sa pag-ila nga sila makahimo niana. . . . Malipayon kaayo ako nga nahimong bahin sa organisasyon ni Jehova ug sa pagsunod sa malipayon mahigugmaong pagpanguna sa matinumanon ug maalamong ulipon.”
18 Ang Proverbio 21:5 nagapasalig kanato: “Ang mga plano sa usa ka kugihan motultol gayod sa kaayohan.” Ang Proverbio 16:3 nagadasig kanato: “Itugyan ang imong mga buluhaton kang Jehova mismo ug ang imong mga plano mamalig-on.” Oo, pinaagig mainampoong paglakip kang Jehova sa atong desisyon ug kusganong mosalig kaniya sa pagtabang kanatong molampos, mahimong positibo kita bahin sa atong mga plano sa pag-oksilyare payunir. Tingali human nga atong makitang misaler ang atong eskedyul sulod sa usa o duha ka bulan sa pag-oksilyare payunir, ato nang kakudlitan ang kahon sa aplikasyon sa oksilyare nga pagpayunir nga mabasa: “Kudliti dinhi kon buot kang magpadayon sa pag-alagad ingong oksilyare payunir hangtod sa dugang pahibalo.” Kon unsa ugaling, kita makalantaw sa unahan sa pag-oksilyare payunir pag-usab sa Agosto, nga adunay bug-os lima ka hinapos sa semana. Samtang atong taposon ang tuig sa pag-alagad sa Agosto, ang hiniusang paningkamot himoon sa matag usa aron makaambit kutob sa maarangan diha sa ministeryo.
19 Si Jesus mitagna: “Siya nga nagapasundayag ug pagtuo kanako, kana siya usab mohimo sa mga buhat nga akong ginahimo; ug siya mohimog mga buhat nga labaw pa niini.” (Juan 14:12) Maoy atong malipayong pribilehiyo ang pag-alagad ingong mga isigkamagbubuhat sa Diyos sa dihang kining tagnaa makabaton sa dakong katumanan niini. Karon na ang panahon sa pagsangyaw sa maayong balita uban ang labing dakong gikusgon sukad masukad, nga magpalit sa hinungdanong panahon sa pagbuhat niining buluhatona. (1 Cor. 3:9; Col. 4:5) Ang pagpakig-ambit kutob sa mahimo sa pag-alagad nga oksilyare payunir maoy ekselenteng paagi sa pagbuhat sa atong bahin ingong mga magwawali sa Gingharian. Mahinangpon natong gipaabot ang pagtan-aw kon unsa ka dako ang mahimong awit sa pagdayeg niining panahona sa Memoryal gikan sa mga oksilyare payunir. (Sal. 27:6) Sa paghunahuna sa mga resulta sa miaging tingpamulak, kita makapangutana, ‘Ato bang mahimo kana pag-usab?’ Kita masaligon nga mahimo nato kana!
[Kahon sa panid 3]
Makaoksilyare Payunir Ka Ba?
“Unsa ang imong personal nga mga sirkumstansiya, kon ikaw bawtismado, maayo ang dungog sa moral, makahikay sa pagkab-ot sa kinahanglanong 60 oras sa usa ka bulan nga gugolon sa ministeryo sa kanataran ug nagatuo nga ikaw makaalagad sa usa o dugang mga bulan ingong oksilyare payunir, ang mga ansiano sa kongregasyon mahimuot gayod sa pagtagad sa imong aplikasyon alang ning pribilehiyoa sa pag-alagad.”—Organisado sa Pagtuman sa Atong Ministeryo, panid 114.
[Kahon sa panid 6]
Mga Eskedyul sa Oksilyare Payunir
Sampol nga mga Paagi sa Pag-eskedyul ug 15 Oras nga Pag-alagad sa Kanataran Matag Semana
Mga Buntag—Lunes Hangtod Sabado
Ang Dominggo mahimong pulihan bisan unsang adlawa
Adlaw Yugto Mga Oras
Lunes Buntag 2 1⁄2
Martes Buntag 2 1⁄2
Miyerkoles Buntag 2 1⁄2
Huwebes Buntag 2 1⁄2
Biyernes Buntag 2 1⁄2
Sabado Buntag 2 1⁄2
Total nga Oras: 15
Duha ka Tibuok Adlaw
Bisan hain sa duha ka adlaw sa semana mahimong pilion
Adlaw Yugto Mga Oras
Miyerkoles Tibuok Adlaw 7 1⁄2
Sabado Tibuok Adlaw 7 1⁄2
Total nga Oras: 15
Duha ka Gabii ug ang Hinapos sa Semana
Bisan hain sa duha ka gabii sa semana mahimong pilion
Adlaw Yugto Mga Oras
Lunes Gabii 1 1⁄2
Miyerkoles Gabii 1 1⁄2
Sabado Tibuok Adlaw 8
Dominggo Medya Diya 4
Total nga Oras: 15
Mga Hapon sa Semana ug Sabado
Ang Dominggo mahimong pulihan bisan unsang adlawa
Adlaw Yugto Mga Oras
Lunes Hapon 2
Martes Hapon 2
Miyerkoles Hapon 2
Huwebes Hapon 2
Biyernes Hapon 2
Sabado Tibuok Adlaw 5
Total nga Oras: 15
Akong Personal nga Eskedyul sa Pag-alagad
Hukmi ang gidaghanon sa oras alang sa matag yugto
Adlaw Yugto Mga Oras
Lunes
Martes
Miyerkoles
Huwebes
Biyernes
Sabado
Dominggo
Total nga Oras: 15