Unsa ka Maayo ang Batasan Mo sa Pagkaon sa Espirituwal nga Paagi?
1 Gikaingon nga ‘madayag diha kanato kon unsay atong gikaon.’ Sa pagkatinuod, ang atong pisikal nga kalig-on ug kahimsog apektado sa atong mga batasan sa pagkaon. Sanglit si Jesus miingon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova,” ang atong espirituwal nga mga batasan sa pagkaon sa susama mag-apektar kanato alang sa ikaayo o ikadaot. (Mat. 4:4) Busa, unsa ka maayo ang pagkaon mo sa espirituwal nga paagi? Ikaw ba pilian mokaon? Ikaw ba mokaon nga magdalidali? O ikaw ba malipay sa paggugol ug panahon aron pahimuslan ang regular, timbang, ug sustansiyadong mga pagkaong espirituwal?
2 Susiha ang Imong Diyeta: Si Jehova nagtagana ug “pagkaon sa hustong panahon” ug “bangkete sa bino nga pinalugdang,” pinaagi sa “matinumanon ug maalamong ulipon.” (Mat. 24:45; Isa. 25:6) Aron bug-os nga makabatog kaayohan gikan niining mahigugmaong mga tagana, kinahanglan kitang maningkamot gayod sa pagkaon ug maayo sa espirituwal nga paagi.
3 Mahimo nimong suknaon ang imong kaugalingon: ‘Ako ba nagabasa sa teksto sa adlaw ug mga komento sa matag adlaw? Ako ba nagabasa ug namalandong sa Bibliya sa adlaw-adlaw? Ako ba nangandam sa mga tigom sa kongregasyon pinaagi sa abanteng pagtuon sa materyal? Ako na bang nabasa sa bug-os ang atong kinaulahiang mga publikasyon, lakip ang Tagna ni Isaias—Kahayag Alang sa Tibuok Katawhan?’
4 Si Jesus misaad: “Malipayon kadtong mahunahunaon sa ilang espirituwal nga panginahanglan . . . Malipayon kadtong gigutom ug giuhaw sa pagkamatarong, sanglit sila pagabusgon.” (Mat. 5:3, 6) Busa kaog maayo sa espirituwal nga paagi pinaagi sa pagpuno sa imong hunahuna ug kasingkasing sa kahibalo sa Diyos.