Magmasiboton sa Kon Unsay Maayo!
1 Samtang mosulod kita sa 2003 nga panahon sa Memoryal, aduna kitay daghang katarongan nga “magmasiboton sa kon unsay maayo.” (1 Ped. 3:13) Ang pangunang katarongan mao ang halad lukat ni Jesu-Kristo. (Mat. 20:28; Juan 3:16) Maylabot niini, si apostol Pedro misulat: “Dili pinaagi sa madunot nga mga butang, sa plata o sa bulawan, nga kamo gipahigawas gikan sa inyong walay-pulos nga matang sa panggawi. . . . Apan kini maoy pinaagi sa bililhong dugo, sama nianang sa walay lama ug sa walay buling nga nating karnero, kang Kristo mismo.” (1 Ped. 1:18, 19) Ang pagkamapasalamaton tungod niining talagsaong kapahayagan sa gugma magtukmod kanato nga magmapuliki sa pagbuhat ug maayo, nga nag-ila nga si Jesus “mihatag sa iyang kaugalingon alang kanato aron sa pagluwas kanato gikan sa tanang matang sa pagkamalapason ug sa paghinlo alang sa iyang kaugalingon ug usa ka katawhan nga iyaha lamang gayod, nga masiboton sa maayong mga buhat.”—Tito 2:14; 2 Cor. 5:14, 15.
2 Sa dihang buhaton nato kon unsay makapahimuot sa mga mata sa Diyos, atong matagamtam ang maayong relasyon uban kaniya ug maanaa sa iyang mahigugmaong pag-atiman. Si Pedro dugang nag-ingon: “Siya nga buot mahigugma sa kinabuhi ug makakitag maayong mga adlaw, . . . pabiyai kaniya ang daotan ug ipabuhat ang maayo; ipapangita kaniya ang pakigdait ug sundon kini. Kay ang mga mata ni Jehova anaa sa mga matarong, ug ang iyang mga igdulungog gikiling sa ilang pangamuyo.” (1 Ped. 3:10-12) Niining makuyaw nga mga panahon, pagkabulahan ang pagkahibalo nga si Jehova nagabantay kanato ug andam sa paglihok alang kanato, “aron panalipdan [kita] ingon sa tawotawo sa iyang mata.”—Deut. 32:10; 2 Cron. 16:9.
3 Bisag nag-atubang ug mga pagsulay, ang unang mga Kristohanon nga gisulatan ni Pedro may nagdilaab nga kasibot nga dili mapalong, ug gimantala nila pag-ayo ang maayong balita kutob sa maarangan. (1 Ped. 1:6; 4:12) Ingon usab niana ang katawhan sa Diyos karong adlawa. Bisag nagkinabuhi kita niining “makuyaw nga mga panahong lisod sagubangon,” ang pagpabili sa pagkamaayo ni Jehova magtukmod kanato sa pagbuhat sa kabubut-on sa Diyos nga masiboton. (2 Tim. 3:1; Sal. 145:7) Atong tagdon ang pipila sa maayong mga buhat nga niana magmapuliki kita panahon sa Memoryal.
4 Dapita ang Uban Ngadto sa Memoryal: Usa ka paagi nga atong ikapakita ang atong pagpabili sa talagsaong gasa sa lukat mao ang pagtambong sa tinuig nga kasaulogan sa kamatayon ni Jesus, nga pagasaulogon niining tuiga sa Miyerkoles, Abril 16, human sa pagsalop sa adlaw. (Luc. 22:19, 20) Sa miaging tuig, sa 94,600 ka kongregasyon nga nagtaho sa tibuok kalibotan, kita may katibuk-ang gidaghanon sa nanambong nga 15,597,746! Kana maoy kapin sa 220,000 nga labaw kay sa nanambong sa tuig 2001.
5 Pila kahay motambong niining tuiga? Nag-agad kanag dako sa atong makugihong mga paningkamot sa pagdasig sa uban sa pagduyog kanato. Pagsugod pinaagi sa paglista sa tanang gusto nimong dapiton. Angayng mag-una sa listahan ang imong suod nga mga membro sa pamilya. Kon ikaw may di-magtutuong kapikas, ipadayag ang imong kinasingkasing nga tinguha nga siya makatambong unta uban kanimo. Usa ka di-magtutuong bana miingon nga mitambong siya sa Memoryal sa miaging tuig tungod kay iyang nasabtan nga hinungdanon kaayo alang sa iyang asawa nga siya makatambong niana. Sunod nga imong ilista mahimong ang mga paryente, silingan, kauban sa trabaho, o mga kaeskuyla. Paneguroang madapit ang imong mga ginatun-an sa Bibliya.
6 Human mahimo ang imong listahan, pag-eskedyul ug panahon nga sa personal dapiton ang matag usa. Gamita ang pinatik nga mga imbitasyon sa Memoryal. Aron matabangan ang mga tawo sa paghinumdom kon kanus-a ug asa himoon ang kasaulogan, makenilyaha o ayoha pagsulat ang oras ug dapit sa Memoryal sa ubos sa imbitasyon. Samtang nagakaduol na ang Abril 16, pahinumdomi kadtong anaa sa imong listahan, mahimong sa personal o pinaagig telepono. Atong tabangan ang daghan kutob sa maarangan nga makatambong niining labing balaan nga okasyon.
7 Tabangi Kadtong Motambong sa Memoryal: Ang gabii sa Memoryal kanunayng kulbahinam nga okasyon. Kita may kahigayonan sa pag-abiabi sa mga tawo nga sagad dili tigtambongan sa atong mga tigom. Paghimog mga kahikayan nga moabot ug sayo ug dugayng mopauli, segun sa itugot sa lokal nga mga kahimtang. Himoa ang unang lakang sa pag-ilaila sa mga bag-ohang nanambong. Magmainiton ug magmaabiabihon.—Roma 12:13.
8 Matabangan kaha ang pipila nga mitambong sa Memoryal nga makahimog mas dakong espirituwal nga pag-uswag pinaagig pagtuon sa Bibliya sa balay? Paningkamoting makuha ang mga ngalan ug adres sa mga bisita nga wala pa maduaw aron padayon nimo silang matabangan. Uban sa mahigugmaong tabang, ang pipila kanila mahimong mouswag hangtod sa punto nga mahimong takos ingong di-bawtismadong mga magmamantala sa dili pa ang Memoryal sa sunod tuig. Sa dihang mohimog mga balikduaw sa mga nanambong sa Memoryal, dapita nga motambong sa espesyal nga pakigpulong nga ihatag sa Abril 27.
9 Makaoksilyare Payunir Ka ba Karong Ting-init? Matag tuig ang atong kasibot alang kang Jehova magtukmod kanato nga manlimbasog sa bug-os diha sa ministeryo sulod sa mga bulan sa linaing teokratikanhong kalihokan. Dinhi sa Pilipinas sa miaging tuig, 9,515 ang nag-oksilyare payunir sa Marso, 15,458 sa Abril, ug 12,652 sa Mayo. Sulod niining tulo ka bulan, nakagugol sila ug total nga 1,528,501 ka oras diha sa ministeryo ug nakadumalag aberids nga 13,836 ka pagtuon sa Bibliya. Ang hiniusang mga panikaysikay sa tibuok kongregasyon sa pagsangyaw sa maayong balita nga masiboton panahon sa Memoryal makapatunghag maayong mga resulta.
10 Usa ka kongregasyon nga may 107 ka magmamantala ug 9 ka regular payunir nagtaho nga sila may “talagsaon kaayong bulan” sa miaging Abril, uban sa 53 nga nag-alagad ingong mga oksilyare payunir, lakip ang tanang ansiyano ug ministeryal nga mga alagad. Sa unsang paagi napauswag niining maong mga ansiyano ang kadasig nga mag-oksilyare payunir sa maong bulan? Nagsugod sila ug sayo, nga nagdasig sa daghan kutob sa maarangan sa pagpayunir una pa sa Marso ug Abril. Ginahimo ang mga tigom sa dayon nang pagsangyaw sa nagkalainlaing higayon sulod sa maong adlaw aron makapailin-ilin ang tanan diha sa kongregasyon. Gihatagag linaing pasiugda ang pagsangyaw pinaagig telepono, ilabina alang sa mga baldado.
11 Usa ka 86-anyos nga sister, kinsa dili na makalakaw tungod sa suliran sa panglawas, miaplay sa pag-oksilyare payunir. Sugod sa buntag, mosangyaw siyag duha ka oras pinaagig telepono samtang naglingkod sa lamesa sa kosina, mopahulayg kadiyot, ug unya mobalik ug mosangyaw na usab pinaagig telepono. Usa ka tawo nga iyang nakontak namatyan ug bana ug duha ka tin-edyer nga mga anak lalaki sulod sa miaging duha ka tuig ug wala makasabot kon nganong gitugotan sa Diyos ang maong daotang mga butang nga mahitabo. Usa ka bug-os nga pamatuod ang nahatag, ug nasugdan ang usa ka pagtuon sa Bibliya. Ang pagsangyaw pinaagig telepono sa magabii ug sa ubang mga panahon maoy usa ka epektibong paagi sa pagkontak sa mga tawo nga nagpuyo diha sa mga balay o mga dapit nga dili maabot. Magpaarang usab kini sa mga magmamantala sa pagkontak sa mga tawo nga wala sa balay sa maadlaw.
12 Ang mga ansiyano mihinapos sa ilang taho pinaagi sa pag-ingon: “Nalipay kami ug mapasalamaton sa mga pribilehiyo ug mga panalangin nga gipaposible ni Jehova alang sa matag usa kanamo.” Uban sa hustong pagplano, ang inyong kongregasyon makatagamtam usab sa maong mga panalangin.
13 Paningkamoti ang 100-Porsiyentong Pagpakig-ambit Diha sa Ministeryo: Ang atong gugma alang sa Diyos ug sa silingan magtukmod kanato sa pagpalit sa panahon matag bulan aron ipaambit ang maayong balita ngadto sa uban. (Mat. 22:37-39) Ang mga magtatan-aw sa Pagtuon sa Libro sa Kongregasyon ug ang ilang mga katabang angayng maningkamot sa pagtabang niadtong anaa sa ilang grupo sa pagpakig-ambit diha sa ministeryo matag bulan. Usa ka maayong paagi sa paghimo niana maoy pinaagi sa paghimo daan ug mga kahikayan nga makig-uban sa tinong mga indibiduwal diha sa grupo. Inay maghulat hangtod sa kataposan sa bulan sa paghimo niana, pagsugod ug sayo. Kini mohatag kanimog dugang mga kahigayonan sa pagtaganag mahigugmaong tabang.
14 Aduna bay baldado nga mga magmamantala diha sa imong grupo sa pagtuon sa libro kinsa nalisdan gayod sa pagpakig-ambit diha sa ministeryo? Kon ang uban anaa sa mga balayng amomahanan o anaa lang sa ilang mga balay, masabot nga limitado lamang ang ilang mga kahigayonan sa pagsangyaw. Apan pinaagi sa pagpahimulos sa ilang limitadong mga kahigayonan sa pagpalamdag sa ilang kahayag, mahimo nilang mapalihok kadtong makakita sa ilang maayong mga buhat nga magbaton ug tinuod nga interes sa kamatuoran. (Mat. 5:16) Angayng tinoon sa mga magtatan-aw sa pagtuon sa libro nga ang maong mga igsoon nahibalo nga sila makataho sa ilang pag-alagad sa kanataran nga tag-15 minutos. Ang pagtaho sa panahon nga ilang nagugol sa pagsangyaw makadasig niining matinumanong mga magmamantala, ug makahatag kanila ug malipayong katagbawan. Kini makatabang usab sa pagseguro nga tukma ang tibuok-kalibotang taho sa mga kalihokan sa katawhan sa Diyos.
15 Mga Batan-on nga Puliki sa Pagbuhat Kon Unsay Maayo! Pagkamakapalagsik ang pagkakita sa Kristohanong mga batan-on nga naggamit sa ilang kusog diha sa pag-alagad kang Jehova! (Prov. 20:29) Kon ikaw batan-on, sa unsang paagi imong ikapasundayag ang imong kasibot alang kang Jehova sulod niining linaing mga bulan sa kalihokan?
16 Kon ikaw dili pa di-bawtismadong magmamantala sa kongregasyon, makapangab-ot ka ba sa maong pribilehiyo? Pangutan-a ang imong kaugalingon sa mosunod nga mga pangutana: ‘Aduna ba akoy paninugdang kahibalo sa kamatuoran sa Bibliya? Gusto ba nakong makig-ambit sa pag-alagad sa Gingharian? Sulondan ba ako sa akong panggawi? Makaarang ba ako sa pagpahayag sa akong kaugalingong pagtuo pinaagi sa pagpakigsulti sa uban bahin sa maayong balita? Gitukmod ba ako sa akong kasingkasing sa paghimo niana?’ Kon makatubag kag oo sa maong mga pangutana, nan pakigsulti sa imong mga ginikanan bahin sa imong tinguha nga mahimong usa ka magmamantala. Ang imong mga ginikanan makaduol sa usa sa mga ansiyano sa komite sa pag-alagad.
17 Kon ikaw usa na ka magmamantala sa maayong balita, makapahimulos ka ba sa panahon sa bakasyon sa eskuylahan aron imong mapauswag ang imong pagpakig-ambit diha sa ministeryo? Uban sa usa ka maayong eskedyul ug tabang gikan sa mga ginikanan ug sa uban, daghang bawtismadong mga batan-on ang nakaarang sa pag-oksilyare payunir sa panahon sa tingbakasyon sa ting-init. Kon kana dili posible, nan magmadeterminado sa pagpauswag sa imong pagpakig-ambit diha sa pag-alagad sa kanataran. Paghimog tumong alang sa imong kaugalingon. Dugang pa sa tumong nga oras sa pagsangyaw, paghimog laing tumong nga nalangkit sa kalidad sa imong ministeryo. Tingali makahimo ka sa pagpaambit ug usa ka teksto sa matag pultahan, pagpauswag sa kalidad sa imong mga balikduaw, pagsugod ug pagtuon sa Bibliya, o pagpauswag sa imong ministeryo nga maglakip sa pagpamatuod pinaagig telepono o ubang bahin sa pag-alagad. Komosta ang tumong nga may silingan, kaeskuyla, o paryente nga imong iuban sa Memoryal niining tuiga? Ang bug-os nga pagpakig-ambit diha sa teokratikanhong mga kalihokan mahimong magantihon ug seguradong makadasig sa uban diha sa kongregasyon.—1 Tes. 5:11.
18 Tabangi ang mga Bag-ohan nga Mouswag: Sulod sa miaging tuig sa pag-alagad, usa ka aberids nga 97,456 ka pagtuon sa Bibliya ang gidumala matag bulan dinhi sa Pilipinas. Sa ngadtongadto, daghan niining maong mga ginatun-an ang mouswag hangtod sa pahinungod ug bawtismo. Apan, sa dili pa nila makab-ot ang maong tumong, kinahanglang tabangan nato sila nga mahimong takos ingong mga magmamantala sa maayong balita. Kini maoy hinungdanong lakang sa pagtudlo sa mga bag-ohan aron mahimong mga sumusunod ni Jesu-Kristo. (Mat. 9:9; Luc. 6:40) Aduna ka bay ginatun-an sa Bibliya nga andam mohimo sa maong lakang?
19 Kon ikaw dili makatino sa pag-uswag sa imong ginatun-an, pagpatabang sa imong magtatan-aw sa pagtuon sa libro o sa magtatan-aw sa pag-alagad. Tingali imong madapit siya nga mouban sa pagtuon. Kining mga igsoona may bililhong kasinatian nga magamit aron matino ang espirituwal nga pag-uswag sa ginatun-an. Sila mahimong may mga sugyot nga makatabang sa ginatun-an sa pagpadayon sa paghimog espirituwal nga pag-uswag.
20 Kon ang imong ginatun-an gusto nang mahimong di-bawtismadong magmamantala ug gibati nimong siya kuwalipikado, pakigsulti sa nagadumalang magtatan-aw. Hikayon niya nga may duha ka ansiyano nga makigkita kanimo ug sa ginatun-an aron konsiderahon kon siya ba kuwalipikado, ginamit ang impormasyon diha sa mga panid 98-9 sa librong Atong Ministeryo. (Tan-awa Ang Bantayanang Torre, Nobyembre 15, 1988, panid 17.) Kon ang ginatun-an uyonan nga mahimong magmamantala, angay nimong sugdan dayon ang pagbansay kaniya. Sa dihang mohatag na siyag taho sa pag-alagad sa kanataran, pahibaloon ang kongregasyon nga ang ginatun-an usa na ka di-bawtismadong magmamantala. Atong gipanghinaot nga linibo ka bag-ong magmamantala, mga bata ug tigulang, makakab-ot niining hinungdanong yugto sa ilang espirituwal nga pag-uswag sulod niining linaing mga bulan sa kalihokan.
21 Ang Pagplano Makatabang sa Pagpalampos sa Labing Maayo: Ang abanteng pagplano makaamot sa kalamposan sa atong teokratikanhong mga kalihokan sa panahon sa Memoryal. (Prov. 21:5) Adunay daghang butang nga angayng hatagag pagtagad sa mga ansiyano.
22 Aron matabangan ang kongregasyon sa pagpalampos sa kinamaayohan diha sa ministeryo sa kanataran, ang mga ansiyano angayng mohimog praktikal nga mga kahikayan alang sa pag-alagad sa kanataran sa tibuok semana ug sa hinapos sa semana. Ang magtatan-aw sa pag-alagad angayng manguna sa paghimo niining maong mga kahikayan. Mahikay ba ang dugang nga mga tigom sa dayon nang pagsangyaw alang sa sayong buntag, sa hapon, o sa sayong gabii? Ang kongregasyon angayng pahibaloon sa maong mga kahikayan. Makatabang tingali kon ang eskedyul ibutang diha sa information board.
23 Angayng paneguroon sa mga ansiyano nga ang mga kahikayan alang sa Memoryal mahimo na sa dili pa gayod ang Abril 16. Kini naglakip sa pag-organisar sa paggamit sa Kingdom Hall duyog sa ubang mga kongregasyon nga mahimong magtigom didto, paghinlo sa Kingdom Hall, pagpili sa mga atendant ug tigsilbi, ug pagbaton sa mga emblema. Angayng pahibaloon ang kongregasyon sa oras ug dapit sa Memoryal ug ang bisan unsang mga pagpasibo sa tigom nga gieskedyul sa maong semana. Ang makugihong pag-atiman niining mga butanga magtugot sa kasaulogan “nga may kahapsay ug pinaagig kahikayan.”—1 Cor. 14:40.
24 Tingali gustong gamiton sa mga ulo sa pamilya ang bahin sa ilang pagtuon sa pamilya sa paghisgot kon sa unsang paagi makapakig-ambit ang pamilya sa dugang nga kalihokan sa panahon sa Memoryal. Makaoksilyare payunir ba ang imong tibuok pamilya? O mapaluyohan ba sa pamilya ang usa o kapin pang mga membro nga magpayunir? Kon kana dili posible, paghikay ug espesipikong mga tumong ingong pamilya sa paggahin ug dugang panahon diha sa ministeryo. Aduna bay mas bata nga membro sa pamilya nga, uban sa diyutayng pagdasig ug tabang, mahimong takos ingong di-bawtismadong magmamantala? Pilay madapit sa imong pamilya nga makatambong sa Memoryal niining tuiga? Ang maayong pagplano magdalag dagayang mga panalangin ug kalipay sa imong pamilya.
25 Pahimusli Gayod ang Nahibiling Panahon: Sa pagsulat sa unang-siglong mga Kristohanon, gipahinumdoman sila ni apostol Pedro sa pagkadinalian sa panahon tungod kay ang kataposan sa Hudiyohanong sistema sa mga butang haduol na. (1 Ped. 4:7) Karong adlawa ang tanang pamatuod nagpaila nga ang kataposan sa presenteng tibuok-yutang sistema sa mga butang haduol na. Matag adlaw, ang atong sumbanan sa kinabuhi angayng magbanaag sa maong pagtuo. Ingong masibotong mga alagad ni Jehova, kita angayng magsentro sa atong pagtagad nganha sa dinaliang buluhaton sa pagmantala sa maayong balita.—Tito 2:13, 14.
26 Karon na ang panahon alang sa kasibot ug paglihok! Pamalandonga ang nahimo ni Jehova alang kanimo, sa imong pamilya, ug sa kongregasyon. Bisan tuod dili nato siya mabayran tungod sa kadaghan sa mga paagi nga kita iyang gipanalanginan, atong ikahatag kang Jehova ang atong tibuok-kalag nga pagsimba. (Sal. 116:12-14) Ang atong makugihong mga panikaysikay gantihan ug mga panalangin gikan sa kahitas-an. (Prov. 10:22) Hinaot kitang tanan “magmasiboton sa kon unsay maayo” sulod niining linaing panahon sa dugang nga kalihokan, “aron nga sa tanang butang ang Diyos pagahimayaon pinaagi ni Jesu-Kristo.”—1 Ped. 3:13; 4:11.
[Kahon sa panid 3]
Nanambong sa Memoryal sa Tibuok Kalibotan
1999 14,088,751
2000 14,872,086
2001 15,374,986
2002 15,597,746
[Kahon sa panid 4]
Kinsay Imong Dapiton sa Memoryal?
□ Suod nga mga membro sa pamilya ug mga paryente
□ Mga silingan ug mga kaila
□ Mga kauban sa trabaho ug mga kaeskuyla
□ Mga balikduaw ug mga ginatun-an sa Bibliya
[Kahon sa panid 5]
Tabangi Kadtong Motambong sa Memoryal
□ Abiabiha pag-ayo
□ Paghimog mga pagbalikduaw
□ Tanyagi silag pagtuon sa Bibliya
□ Dapita sila sa espesyal nga pakigpulong
[Kahon sa panid 6]
Unsay Imong mga Tumong sa Panahon sa Memoryal?
□ Ang usa nga imong gidapit makatambong sa Memoryal
□ Mahimong takos ingong magmamantala sa maayong balita
□ Makagahin ug tinong gidaghanon sa oras diha sa ministeryo
□ Makapauswag sa pipila ka bahin sa ministeryo
□ Makaalagad ingong oksilyare payunir