Tabang Alang sa Pamilya
1. Sa unsang paagi nakabenepisyo ang Israelinhong mga pamilya sa senemanang Igpapahulay?
1 Ang Igpapahulay maoy mahigugmaong tagana ni Jehova alang sa pamilya. Ang mga Israelinhon mopahulay sa pagtrabaho ug mamalandong sa pagkamaayo ni Jehova ug sa ilang relasyon kaniya. Pahimuslan sa mga ginikanan kini nga kahigayonan aron sa pagsilsil sa Balaod sa ilang mga anak. (Deut. 6:6, 7) Para sa katawhan ni Jehova, ang Igpapahulay maoy higayon sa pagsentro sa ilang pagtagad sa espirituwal nga mga butang matag semana.
2. Unsay gitudlo kanato sa Igpapahulay bahin kang Jehova?
2 Siyempre, wala na karon ipasaulog ni Jehova ang Igpapahulay. Apan ang maong sugo dunay gitudlo kanato bahin sa atong Diyos. Siya kanunayng interesado sa espirituwal nga kaayohan sa iyang katawhan. (Isa. 48:17, 18) Karon, ang usa ka paagi nga gipakita ni Jehova ang iyang interes maoy pinaagi sa gabii sa pamilyahanong pagsimba.
3. Unsay katuyoan sa gabii sa pamilyahanong pagsimba?
3 Unsay Katuyoan sa Gabii sa Pamilyahanong Pagsimba? Niadtong Enero 2009, ang Pagtuon sa Libro sa Kongregasyon gipahigayon na dungan sa Teokratikanhong Tunghaan sa Ministeryo ug Tigom sa Pag-alagad. Kini nga kausaban maoy aron ang mga pamilya makagahin ug usa ka gabii matag semana alang sa pamilyahanong pagsimba sa pagpalig-on sa ilang espirituwalidad. Ang matag pamilya giawhag nga kon mahimo, ipuli sa kanhing eskedyul sa pagtuon sa libro ang pagtuon sa pamilya. Dili angayng dalidalion ang pagtuon ug ipahaom kini sa panginahanglan sa pamilya.
4. Usa lang ba ka oras ang igahin alang sa Pamilyahanong Pagsimba? Ipatin-aw.
4 Aron makatambong sa Pagtuon sa Libro sa Kongregasyon, mogahin kitag panahon sa pag-ilis, pagbiyahe, ug uban pa. Para sa daghan, dili lang usa ka oras ang magugol aron makatambong. Tungod sa kausaban sa eskedyul, ato na karong gamiton ang maong gabii sa pagsimba kang Jehova ingong pamilya. Busa, dili nato limitahan ang Pamilyahanong Pagsimba sulod lang sa usa ka oras. Hinunoa, angay natong tagdon ang panginahanglan ug limitasyon sa atong pamilya ug ipasibo ang gitas-on sa pagtuon.
5. Angay bang gugolon ang tibuok panahon sa panaghisgot? Ipatin-aw.
5 Angay Bang Gugolon ang Tibuok Panahon sa Panaghisgot? Kon hisgotan sa mga magtiayon ug pamilya nga may mga anak ang mga ulohan sa Bibliya, ilang madasig ang usag usa. (Roma 1:12) Mas masuod ang pamilya. Busa ang Kasulatanhong panaghisgot maoy pangunang bahin sa Pamilyahanong Pagsimba. Apan ang matag membro makagahin usab ug panahon sa personal nga pagtuon. Pananglitan, human sa panaghisgot, ang pamilya mahimong mag-uban gihapon samtang ang matag usa personal nga magtuon, tingali humanon ang iyang pagpangandam sa tigom o pagbasag magasin. Ang ubang pamilya dili na motan-awg TV nianang gabhiona.
6. Unsaon pagdumala ang panaghisgot?
6 Unsaon Pagdumala ang Panaghisgot? Dili kini puro pangutanag tubag. Aron kini makalingaw ug makapainteres, daghang pamilya ang misundog sa programa sa tigom sa tungatungang semana. Ilang gibahinbahin ang panaghisgot ug gidumala kini sa lainlaing paagi. Pananglitan, mahimo silang magbasag Bibliya, mag-andam ug usa ka bahin sa tigom, ug magpraktis alang sa pagsangyaw. Dunay mga sugyot sa panid 6.
7. Unsang mga butang ang tinguhaon sa mga ginikanan panahon sa pagtuon?
7 Unsang mga Butang ang Tinguhaon sa mga Ginikanan Panahon sa Pagtuon? Ang pamilya ilabinang makapahimulos kon sila mobating relaks ug gidumala kini sa mahigugmaong paagi. Kon maayo ang panahon, mahimong magtuon sa gawas sa balay. Mahimong mo-break kon gikinahanglan. Ang ubang pamilya magmeryenda human sa pagtuon. Bisan tuod ang Pamilyahanong Pagsimba dili panahon sa pagpangasaba o pagdisiplina, angayng hisgotan sa mga ginikanan ang mga problemang mitungha. Apan labing maayong hisgotan sa pribado ang personal nga problema sa bata sa laing higayon aron dili siya maulawan sa iyang mga igsoon. Ang Pamilyahanong Pagsimba dili angayng makalaay ug seryoso kaayo kondili angayng magpabanaag sa atong malipayong Diyos.—1 Tim. 1:11.
8, 9. Unsaon pagpangandam sa mga ulo sa pamilya?
8 Sa Unsang Paagi Mangandam ang Ulo sa Pamilya? Makapahimulos pag-ayo ang pamilya kon ang ulo sa pamilya abanteng mangandam kon unsay hisgotan ug kon unsa ang labing maayong paagi sa paghisgot niini. (Prov. 21:5) Maayong konsultahon niya ang iyang asawa bahin niini. (Prov. 15:22) Maayo usab nga pangutan-on sa mga ulo sa pamilya ang ilang mga anak aron masayran kon unsay gusto ug panginahanglan sa ilang mga anak.
9 Kasagaran, ang ulo sa pamilya dili angayng mogugol ug dakong panahon sa pagpangandam. Tingali duna na silay naandang gibuhat kada semana, busa dili na angayng bag-ohon kini. Mas maayo nga siya mangandam human sa matag pagtuon samtang lab-as pa sa iyang hunahuna ang espirituwal nga panginahanglan sa pamilya. Ang uban maghimog mubong agenda ug ipaskil kini sa dapit nga daling makit-an, sama sa repridyeretor. Mobatig kahinam niini ang pamilya ug makapangandam sila.
10. Sa unsang paagi gamiton niadtong nag-inusara ang gabii sa pamilyahanong pagsimba?
10 Unsay Akong Himoon Kon Ako Rang Usa? Magamit niadtong nag-inusara ang gabii sa pamilyahanong pagsimba sa personal nga pagtuon. Mahimo niyang basahon ang Bibliya, mangandam sa tigom, ug mobasag Bantayanang Torre ug Pagmata! Ang uban mohimog dugang proyekto sa pagtuon. Mahimo usab nga modapit silag laing igsoon o pamilya sa pagduyog kanila.
11, 12. Unsay benepisyo kon regular ang Pamilyahanong Pagsimba?
11 Unsay Benepisyo Kon Regular ang Pamilyahanong Pagsimba? Kadtong tim-os sa matuod nga pagsimba mas masuod kang Jehova. Dugang pa, ang pamilya nga magkaubang magsimba mas molig-on. Usa ka magtiayon ang misulat bahin sa panalangin nga ilang naangkon: “Ingong mga payunir nga walay anak, mahinamon namong gipaabot ang gabii sa pamilyahanong pagsimba. Mas nasuod mi sa usag usa ug sa atong langitnong Amahan. Pagmata namo sa adlaw nga himoon ang pagtuon, kami makaingon: ‘Unyang gabii na ang atong Pamilyahanong Pagsimba!’”
12 Ang Pamilyahanong Pagsimba nakatabang usab sa puliking mga pamilya. Usa ka nag-inusarang inahan nga regular payunir ug dunay duha ka anak nga lalaki misulat: “Sa miagi, halos dili na mi makatuon ingong pamilya tungod sa akong kakapoy. Wala ko mahibalo kon unsay himoon. Busa ako nagsulat aron pasalamatan kamo tungod sa Pamilyahanong Pagsimba. Duna na mi regular nga pagtuon sa pamilya ug nakabenepisyo niana.”
13. Unsay magtino aron bug-os makabenepisyo ang inyong pamilya niini nga kahikayan?
13 Sama sa Igpapahulay, ang gabii sa pamilyahanong pagsimba maoy gasa gikan sa atong langitnong Amahan alang sa pamilya. (Sant. 1:17) Kon pahimuslan pag-ayo sa Israelinhong mga pamilya ang Igpapahulay, molig-on ang ilang espirituwalidad. Sa susama, kon bug-os natong gamiton ang gabii sa pamilyahanong pagsimba, makabenepisyo pag-ayo ang atong pamilya. (2 Cor. 9:6; Gal. 6:7, 8; Col. 3:23, 24) Kon sundon kini nga kahikayan, ang inyong pamilya makaingon sama sa gipamulong sa salmista: “Apan bahin kanako, ang pagduol sa Diyos maayo alang kanako. Ang Soberanong Ginoong Jehova gihimo ko nga akong dalangpanan.”—Sal. 73:28.
[Blurb sa panid 5]
Ang Pamilyahanong Pagsimba dili angayng makalaay ug seryoso kaayo kondili angayng magpabanaag sa atong malipayong Diyos
[Kahon sa panid 6]
TIPIGI
Mga Sugyot Para sa Pamilyahanong Pagsimba
Bibliya:
• Basaha ang usa ka bahin sa senemanang pagbasa sa Bibliya. Kon haom ang materyal, ang usa maoy mobasa sa asoy samtang ang uban mobasa sa gipamulong sa mga karakter.
• Dramahon ang usa ka bahin sa pagbasa sa Bibliya.
• Iasayn sa matag membro nga abanteng basahon ang gipiling mga kapitulo ug mag-andam ug usa o duha ka pangutana bahin sa materyal. Dayon ang tanan manukiduki niini.
• Kada semana mag-andam ug flash card nga dunay teksto dayon sag-ulohon ug ipatin-aw kini. Tigoma ang mga kard, ug repasoha kada semana kon pila ka teksto ang imong mahinumdoman.
• Mamati ug audio recording sa Bibliya ug sundan kini diha sa Bibliya.
Tigom:
• Mag-andam ug usa ka bahin sa tigom.
• Praktison ang mga awitonon nianang semanaha.
• Kon ang usa dunay bahin sa Teokratikanhong Tunghaan sa Ministeryo o pasundayag sa Tigom sa Pag-alagad, hisgoti kon unsaon kini pagpresentar o ensayohon kini atubangan sa pamilya.
Panginahanglan sa Pamilya:
• Hisgoti ang materyal gikan sa mga librong Gisukna sa mga Batan-on o Pagkakat-on Gikan sa Dakong Magtutudlo.
• Praktison kon unsaon pag-atubang ang mga situwasyon nga mahimong motungha sa eskuylahan.
• Magbayloay ug papel ang mga ginikanan ug mga anak. Ang mga anak ang manukiduki ug mosaysay niini ngadto sa ginikanan.
Ministeryo:
• Mag-ensayog mga presentasyon para sa hinapos sa semana.
• Maghisgot ug praktikal nga mga tumong sa pagpauswag sa pagpakigbahin sa ministeryo panahon sa Memoryal o bakasyon.
• Maggahin ug pipila ka minuto aron ang matag membro makapanukiduki kon unsaon pagtubag ang mga pangutana nga lagmit motungha sa ministeryo, ug dayon praktison kini.
Dugang Sugyot:
• Magbasag usa ka artikulo sa bag-ong magasin.
• Abanteng ipabasa sa matag membro ang usa ka artikulo sa bag-ong magasin nga nakapainteres kaniya, ug ipareport kana.
• Mahimong modapit ug usa ka igsoon o magtiayon sa inyong Pamilyahanong Pagsimba ug tingali interbiyohon sila.
• Motan-awg usa sa atong mga video ug hisgotan kini.
• Hisgoti ang “Mga Batan-on Nangutana” o “Repaso Alang sa Pamilya” diha sa Pagmata!
• Hisgoti ang “Tudloi ang Inyong mga Anak” o “Alang sa mga Batan-on” diha sa Bantayanang Torre.
• Basaha ug hisgoti ang usa ka bahin sa bag-ong Tinuig nga Basahon o ang bag-ong giluwatan sa miaging kombensiyon.
• Human motambong ug kombensiyon o asembliya, repasoha ang pangunang mga punto.
• Maniid sa kalalangan ni Jehova ug hisgotan kon unsay gitudlo niini bahin kang Jehova.
• Maghimog mga proyekto sama sa modelo sa usa ka butang, mapa, o tsart.