Ipakita ang Pagkamapasalamaton sa Umaabot nga Memoryal

 1. Unsay atong talagsaong kahigayonan panahon sa Memoryal?

¹ Ang Memoryal sa Abril 14 maoy talagsaong kahigayonan sa pag-ugmad ug pagpakitag pagkamapasalamaton sa kaayo ni Jehova. Gipakita sa Lucas 17:11-18 nga hinungdanon kang Jehova ug Jesus ang pagkamapasalamaton. Sa napulo ka sanlahon nga giayo, ikasubo nga usa lang ang nagpasalamat. Sa umaabot, pinaagi sa lukat, ayohon ang tanang sakit ug maangkon na ang kinabuhing walay kataposan! Seguradong pasalamatan nato si Jehova kada adlaw tungod niana. Apan sa unsang paagi nato ikapakita ang atong pagkamapasalamaton sa umaabot nga mga semana?

 2. Sa unsang paagi atong maugmad ang pagkamapasalamaton sa lukat?

² Ugmara ang Pagkamapasalamaton: Aron mas maugmad nato ang pagkamapasalamaton sa lukat, dunay eskedyul sa espesyal nga pagbasa sa Bibliya sa Memoryal. Makita kini sa apendise B12 sa rebisadong New World Translation, sa kalendaryo, ug sa Pagsusi sa Kasulatan sa Adlaw-Adlaw. Maayo nga hisgotan kini sa inyong pamilya. Kon ato ning himoon, mas mapabilhan nato ang lukat. Ug may maayo kining epekto sa atong panggawi.—2 Cor. 5:14, 15; 1 Juan 4:11.

 3. Unsaon nato pagpakita sa atong pagkamapasalamaton panahon sa Memoryal?

³ Ipakita ang Pagkamapasalamaton: Ang pagkamapasalamaton mapamatud-an sa buhat. (Col. 3:15) Gipangita gyod sa mapasalamatong sanlahon si Jesus ug gipasalamatan siya. Seguradong gipanugilon niya sa uban ang iyang milagrosong pagkaayo. (Luc. 6:45) Ang ato bang pagkamapasalamaton sa lukat magdasig kanato nga masibotong mangimbitar para sa Memoryal? Ang pag-oksilyare payunir o paggugol ug daghang oras sa pagsangyaw panahon sa Memoryal maoy laing paagi sa pagpakita niana. Ug sa gabii sa Memoryal, malipay kita sa pag-abiabi sa mga bisita ug sa pagtubag sa ilang mga pangutana.

 4. Unsay atong himoon aron dili kita magmahay human sa Memoryal?

⁴ Kini na ba ang atong kataposang Memoryal? (1 Cor. 11:26) Wala ta masayod. Pero nahibalo kita nga dihang molabay na kini, molabay na usab ang talagsaong kahigayonan sa pagpakitag pagkamapasalamaton. Pahimuslan ba nimo kini? Hinaot ang atong pagpamalandong sa lukat ug ang atong masibotong pagpakigbahin sa pagsangyaw makapahimuot kang Jehova, ang mahigugmaong Magtatagana sa halad lukat.—Sal. 19:14.