Kon Unsaon Pagsugod ug Panag-estorya Gamit ang mga Tract

Sukad niadtong Enero 2018, ang hapin sa Workbook sa Tigom nga Kinabuhi ug Ministeryo naay mga sampol nga pagpakig-estorya. Gidasig ta nga magpokus sa pagpakig-estorya sa mga tawo imbes motanyag lang ug mga literatura kanila. Aron tabangan ang mga magmamantala sa pag-adjust sa ilang paagi sa pagsangyaw, ang mga video sa sampol nga pagpakig-estorya nagpakita kon unsaon pagsugod ug panag-estorya gamit lang ang Bibliya. Nagpasabot ba ni nga dili na ta mogamit ug mga literatura dihang magsangyaw sa balay ug balay? Wala. Pananglitan, epektibong paagi sa pagsugod ug panag-estorya ang paggamit ug mga tract. Puwede natong gamiton ang mosunod nga paagi sa pagtanyag ug mga tract:

1. Isukna ang pangutana sa atubangan nga may tulo ka kapiliang tubag.

2. Ipakita ang tubag sa Bibliya nga naa sa ibabaw sa ikaduhang panid. Kon itugot sa kahimtang, basaha ug hisgoti ang pipila ka impormasyon diha sa tract.

3. Ihatag ang tract sa tagbalay, ug dasiga siya nga basahon kini sa iyang kombenyenteng panahon.

4. Sa dili pa ka mobiya, ipakita ang pangutana sa “Hunahunaa Kini” ug pakigsabot nga mobalik ka aron hisgotan ang tubag sa Bibliya.

Sa imong pagbalik, hisgoti ang tubag ug pagbilig laing pangutana nga tubagon sa sunod. Puwede kang mopilig pangutana gikan sa atong website o sa publikasyon nga gipakita sa likod sa tract. Sa hustong panahon, ipaila ang brosyur nga Maayong Balita Gikan sa Diyos! o laing publikasyon nga para sa pagtuon sa Bibliya diha sa Teaching Toolbox.