‘Adtoa ang mga Tawo ug Tudloi Sila Aron Mahimong mga Tinun-an’

1-2. Unsay gisulti sa anghel ngadto sa mga babaye diha sa lubnganan ni Jesus, ug unsang instruksiyon ang gihatag mismo ni Jesus kanila?

BUNTAG sayo kadto sa Nisan 16, 33 C.E. Ang usa ka grupo sa magul-anong mga babaye nga may kahadlok sa Diyos nangadto sa lubnganan diin kapig 36 na ka oras nga gilubong ang lawas ni Ginoong Jesu-Kristo. Nangadto sila aron pahirag mga yerba ug humot nga lana ang lawas ni Jesus, pero natingala kaayo sila kay walay sulod ang lubnganan! Unya may anghel nga miingon kanila nga si Jesus nabanhaw na. Ang anghel miingon sab: “Siya mag-una kaninyo sa Galilea ug makita ninyo siya didto.”​—Mat. 28:1-7; Luc. 23:56; 24:10.

² Dihang ang mga babaye nakabiya na sa lubnganan, giduol sila ni Jesus ug giingnan: “Lakaw, sultihi ang akong mga igsoon aron sila mangadto sa Galilea, ug didto ko nila makita.” (Mat. 28:10) Segurado nga si Jesus may importante kaayong instruksiyon para sa iyang mga tinun-an, kay ang una niyang gihimo human siya mabanhaw mao ang paghikay niini nga tigom.

3-4. Nganong makaingon ta nga ang sugo diha sa Mateo 28:19, 20 dili lang para sa mga apostoles? (Tan-awa ang hulagway sa atubangan sa magasin.)

³ Basaha ang Mateo 28:16-20. Sa tigom nga gihikay ni Jesus, gihisgotan niya sa iyang mga tinun-an ang importanteng buluhaton nga ilang himoon niadtong panahona​—ang buluhaton nga ato pong ginahimo karon. Si Jesus miingon: “Adtoa ninyo ang mga tawo sa tanang kanasoran ug tudloi sila aron mahimong akong mga tinun-an. . . . Tudloi ninyo sila sa pagtuman sa tanan nakong gisugo kaninyo.”

⁴ Gusto ni Jesus nga ang tanan niyang sumusunod mosangyaw. Dili lang ang 11 ka matinumanong apostoles ang iyang gisugo niini. Nganong segurado ta niana? Aw, dihang gihatag ang sugo didto sa bukid sa Galilea, mga apostoles lang ba ang presente? Hinumdomi nga giingnan sa anghel ang mga babaye: “Makita ninyo siya [sa Galilea].” Busa posible nga dihay matinumanong mga babaye nga presente niana nga tigom. Pero dili kay kana ra. Gipadayag ni apostol Pablo nga si Jesus “nagpakita sa kapin sa 500 ka igsoon sa usa ka higayon.” (1 Cor. 15:6) Diin man?

 5. Unsay atong makat-onan sa 1 Corinto 15:6?

⁵ Naa tay mga basehanan sa paghunahuna nga ang gitumong ni Pablo sa 1 Corinto 15:6 mao ang tigom sa Galilea nga gihisgotan sa Mateo 28. Unsa nga mga basehanan? Una, taga-Galilea ang kadaghanan sa mga tinun-an ni Jesus. Busa mas sayon nga tigomon ang daghang tawo sa bukid sa Galilea imbes sa usa ka balay sa Jerusalem. Ikaduha, human mabanhaw si Jesus, siya nakigkita na sa iyang 11 ka apostoles sa usa ka balay sa Jerusalem. Kon para lang sa mga apostoles ang sugo nga magsangyaw ug maghimog tinun-an, gisulti na unta to niya sa Jerusalem imbes paadtoon pa sa Galilea ang mga apostoles, ang mga babaye, ug ang uban pa.​—Luc. 24:33, 36.

 6. Giunsa pagpakita sa Mateo 28:20 nga ang sugo sa paghimog mga tinun-an mapadapat sab karon, ug sa unsang paagi kana ginatuman sa atong panahon?

⁶ Matikdi ang ikatulong importanteng rason. Ang sugo ni Jesus nga maghimog mga tinun-an dili lang para sa mga Kristohanon sa unang siglo. Giunsa nato pagkahibalo? Gitapos ni Jesus ang iyang mga instruksiyon sa iyang mga sumusunod niining mga pulonga: “Ako magauban kaninyo sa tanang adlaw hangtod sa hinapos sa sistema sa mga butang.” (Mat. 28:20) Sumala sa giingon ni Jesus, daghan karon ang nagtudlo sa mga tawo aron mahimong mga tinun-an. Hunahunaa ra, kada tuig halos 300,000 ang mabawtismohan ingong mga Saksi ni Jehova ug mahimong mga tinun-an ni Jesu-Kristo!

 7. Unsay atong hisgotan, ug ngano?

⁷ Daghang Bible study ang miuswag ug nagpabawtismo. Pero ang uban nga regular nga gina-Bible study lagmit nagduhaduha nga mahimong tinun-an. Ganahan silang mag-study, pero wala silay pag-uswag. Kon naa kay Bible study, seguradong gusto nimo siyang tabangan nga mapadapat ang iyang nakat-onan ug mahimong tinun-an sa Kristo. Hisgotan niining artikuloha kon sa unsang paagi maabot nato ang kasingkasing sa Bible study ug kon unsaon nato siya pagtabang nga mouswag sa espirituwal. Nganong kinahanglan nato ning hisgotan? Kay basin kinahanglan unya tang modesisyon kon ipadayon ba ang pagtuon o dili.

 8. Nganong lisod usahay ang pagtabang sa atong mga Bible study nga mahigugma kang Jehova?

⁸ Gusto ni Jehova nga alagaron siya sa mga tawo tungod sa ilang gugma kaniya. Busa tumong nato nga masabtan sa atong mga Bible study nga gimahal sila pag-ayo ni Jehova ingong indibiduwal. Gusto nato silang tabangan nga makita si Jehova ingong ‘amahan sa mga wala nay amahan ug tigpanalipod sa mga babayeng balo.’ (Sal. 68:5) Dihang masabtan nila nga gimahal sila pag-ayo sa Diyos, lagmit matandog sila ug mahigugma kaniya. Ang uban lagmit malisdan sa pag-isip kang Jehova ingong mahigugmaong Amahan kay wala sila pakitaig pagmahal sa ilang kaugalingong amahan. (2 Tim. 3:1, 3) Maong dihang mag-study, ipasiugda ang nindot nga mga hiyas ni Jehova. Tabangi silang makasabot nga gusto sa atong mahigugmaong Diyos nga makabaton silag kinabuhing walay kataposan, ug andam siyang motabang kanila nga makab-ot kana. Unsa pay atong mahimo?

9-10. Unsang mga publikasyon ang angay natong gamiton sa pagdumalag Bible study, ug nganong kini man ang atong gamiton?

⁹ Gamita ang mga librong “Unsay Gitudlo Kanato sa Bibliya?” ug “Magpabilin sa Gugma sa Diyos.” Kini nga mga publikasyon gidisenyo aron tabangan tang maabot ang kasingkasing sa atong mga Bible study. Pananglitan, ang kapitulo 1 sa librong Gitudlo Kanato nagtubag niining mga pangutanaha: Ang Diyos ba naghunahuna sa atong kaayohan o gipaantos ta niya?, Unsay bation sa Diyos dihang mag-antos ang mga tawo?, ug Puwede ba kang mahimong higala ni Jehova? Sa laing bahin, ang librong Magpabilin sa Gugma motabang sa Bible study nga masabtan kon sa unsang paagi ang pagpadapat sa mga prinsipyo sa Bibliya makapauswag sa iyang kinabuhi ug makapasuod niya kang Jehova. Bisag gitun-an na nimo kini nga mga libro sa imong pag-Bible study sa uban, pangandam gihapon sa matag study, ug hunahunaa kon unsay espesipikong gikinahanglan sa imong Bible study aron mouswag.

¹⁰ Pero ibutang ta nga ang imong Bible study interesado sa usa ka topiko sa publikasyon nga wala sa atong Teaching Toolbox. Tingali puwede nimo siyang dasigon nga basahon niya ang maong publikasyon aron makapadayon mo sa pagtuon sa usa sa girekomendar nga mga libro nga gihisgotan sa miaging parapo.

11. Kanus-a angayng sugdan ang pag-ampo dihang mag-Bible study, ug unsaon nato pagpasabot sa Bible study nga importante kini?

¹¹ Sugdi ang pagtuon pinaagig pag-ampo. Ang pag-ampo una ug human magtuon mas maayong sugdan dayon, sagad mga pipila ka semana human sugdi ang regular nga pag-Bible study. Kinahanglang tabangan nato ang Bible study nga makaamgo nga masabtan lang nato ang Pulong sa Diyos pinaagi sa tabang sa espiritu sa Diyos. Aron ipasabot nga importante ang pag-ampo, basahon sa pipila ka magmamantala ang Santiago 1:5 nga nag-ingon: “Kon duna kaninyoy nakulangan ug kaalam, padayon siyang mangayo sa Diyos.” Dayon pangutan-on sa nagdumala ang Bible study, “Unsaon nato pagpangayo sa Diyos ug kaalam?” Lagmit mouyon ang Bible study nga angay tang mag-ampo sa Diyos.

12. Unsaon nimo paggamit ang Salmo 139:2-4 sa pagtabang sa Bible study nga mouswag ang iyang pag-ampo?

¹² Tudloi ang imong Bible study kon unsaon pag-ampo. Pasaligi siya nga gustong madungog ni Jehova ang iyang kinasingkasing nga mga pag-ampo. Ipatin-aw kaniya nga sa atong personal nga mga pag-ampo, puwede natong isulti kang Jehova kon unsa gyoy atong gibati​—mga butang nga dili tingali nato kayang isulti sa uban. Ang tinuod, si Jehova nahibalo na niana. (Basaha ang Salmo 139:2-4.) Puwede pod nato siyang dasigon nga mangayog tabang sa Diyos sa pagtul-id sa sayop nga mga panghunahuna ug sa paghunong sa dili maayong binuhatan. Pananglitan, ang usa tingali dugaydugay nang nagtuon pero nagsaulog gihapog paganong selebrasyon. Nahibalo siya nga sayop kini, pero ganahan gihapon siya sa pipila ka bahin niini. Dasiga siya sa pagsulti kang Jehova kon unsa gyoy iyang gibati ug sa paghangyo Kaniya nga tabangan siyang higugmaon kon unsa ray gihigugma sa Diyos.​—Sal. 97:10.

13. (a) Nganong angay natong imbitahon dayon sa tigom ang atong mga Bible study? (b) Unsay atong mahimo aron ang Bible study mobating mas komportable sa Kingdom Hall?

¹³ Imbitaha dayon ang imong Bible study sa tigom. Ang madungog ug maobserbahan sa Bible study diha sa tigom posibleng makatandog sa iyang kasingkasing ug makatabang niya nga mouswag. Ipakita ang video nga Unsay Ginahimo Diha sa Kingdom Hall? ug kinasingkasing siyang imbitaha nga mouban nimo sa tigom. Kon posible, ingna siya nga kuhaon nimo siya. Sa inyong pagtuon, maayong magkuyog kag lainlaing igsoon. Nianang paagiha, mailhan sa imong Bible study ang ubang igsoon, ug lagmit mas mobati siyang komportable dihang motambong sa tigom.

14. Unsay makapalihok sa Bible study nga mouswag sa espirituwal?

¹⁴ Gusto natong tabangan ang atong Bible study nga mouswag sa espirituwal. (Efe. 4:13) Dihang ang usa mosugot nga magpa-Bible study, tingali naghunahuna lang siya kon sa unsang paagi kana makatabang kaniya. Pero samtang magkalawom ang iyang gugma kang Jehova, lagmit maghunahuna na siya kon unsaon niya pagtabang sa uban, apil niadtong sakop sa kongregasyon. (Mat. 22:37-39) Kon haom na sa panahon, ayaw pagduhaduha sa pagsulti kaniya bahin sa pribilehiyo sa paghatag ug donasyon para sa buluhaton sa Gingharian.

15. Unsaon nato pagtudlo sa atong Bible study kon unsay maayong himoon dihang motungha ang mga problema?

¹⁵ Tudloi ang imong Bible study kon unsay himoon dihang motungha ang mga problema. Ibutang ta nga ang imong Bible study, nga usa na ka di bawtismadong magmamantala, miingon nga dunay nakapasilo niya sa kongregasyon. Imbes modapig, mahimo nimong ipatin-aw kon unsay giingon sa Bibliya nga angay niyang himoon. Mahimo niyang pasayloon ang igsoon, o kon dili niya kayang palabyon ang nahitabo, mahimo niyang duolon ang maong igsoon sa mahigugmaong paagi sa tuyo nga ‘makabig ang igsoon.’ (Itandi ang Mateo 18:15.) Tabangi siya sa pag-andam kon unsay isulti. Tudloi siya kon unsaon paggamit ang app nga JW Library^®, ang Giya sa Pagpanukiduki Para sa mga Saksi ni Jehova, ug ang jw.org^® aron mahibalo siya kon unsaon pagsulbad sa problema. Kon makakat-on siya kon unsaon pagsulbad sa mga panagbingkil samtang dili pa bawtismado, posible nga maayo siyang makiglabot sa mga igsoon dihang bawtismado na siya.

16. Unsay mga kaayohan kon mangimbitar kag igsoon nga mouban nimo sa pag-Bible study?

¹⁶ Imbitaha ang mga igsoon​—ug ang tigdumala sa sirkito panahon sa duaw—​nga mouban nimo sa pag-Bible study. Ngano? Gawas pa sa gihisgotan sa miaging mga parapo, ang ubang igsoon basin dunay ikatabang sa imong Bible study nga tingali dili nimo matagana. Pananglitan, kadaghan na tingaling misulay ang imong Bible study sa pag-undang sa pagpanigarilyo, pero wala siya molampos. Iuban sa inyong pagtuon ang usa ka igsoon nga milampos sa pag-undang sa maong bisyo bisag kadaghan siyang napakyas. Ang maong igsoon lagmit makahatag ug praktikal nga tambag nga gikinahanglan sa imong Bible study. Kon maulaw kang modumala sa pagtuon kay kauban nimo ang usa ka eksperyensiyadong igsoon, puwede nimo siyang hangyoon sa pagdumala. Dihang mangimbitar kag igsoon nga mouban nimo sa pag-Bible study, ang imong Bible study makakat-on sa iyang eksperyensiya. Hinumdomi nga tumong natong matabangan ang Bible study nga mouswag sa espirituwal.

17-18. Unsay angay nimong konsiderahon dihang modesisyon kon undangon ba ang pag-study?

¹⁷ Kon ang imong Bible study walay ginahimong mga kausaban, tingali moabot ang panahon nga kinahanglang pangutan-on nimo ang imong kaugalingon, ‘Angay ba nakong undangon ang pag-study?’ Sa dili pa ka modesisyon, hunahunaa ang iyang kapasidad. Ang ubang Bible study mas dugay mouswag kay sa uban. Pangutan-a ang kaugalingon: ‘Duna ba siyay pag-uswag nga haom sa iyang kahimtang?’ ‘Nagsugod na ba siya “sa pagtuman,” o pagpadapat, sa iyang nakat-onan?’ (Mat. 28:20) Bisag dili dayon mahimong alagad ang usa ka Bible study, importante nga anam-anam siyang maghimog kausaban.

¹⁸ Pero komosta man kon dugaydugay na mong nag-study pero wala nimo makita nga gipabilhan niya ang pagtuon? Konsideraha ni nga kahimtang: Ang imong Bible study nakahuman na sa librong Gitudlo Kanato ug tingali nakasugod na sa librong Magpabilin sa Gugma, pero wala gyod siya makatambong ug tigom bisag kas-a​—bisan sa Memoryal! Ug kadaghan siyang mibalibad sa pagtuon tungod sa dili importanteng mga rason. Kon ingon ani ang imong study, maayo kon prangka nimo siyang estoryahon.b

19. Unsay puwede nimong ipangutana sa imong Bible study kon morag wala siyay pagpabili sa iyang pagtuon, ug unsay angay nimong konsiderahon?

¹⁹ Puwede kang magsugod pinaagi sa pagpangutana, ‘Unsay nakapalisod nimo nga mahimong Saksi ni Jehova?’ Tingali motubag siya, ‘Ganahan man ko mag-Bible study, pero dili gyod ko mag-Saksi!’ Kon kanay iyang hunahuna bisag dugaydugay na siyang nag-study, maayo pa bang ipadayon ang pagtuon? Sa laing bahin, lagmit mosulti siya sa unang higayon kon unsa gyoy nakapugong niya. Pananglitan, mibati seguro siya nga dili gyod niya kayang mosangyaw. Karon nga nahibalo na ka sa iyang gibati, mas makamao na ka kon unsaon siya pagtabang.

20. Sa unsang paagi ang Buhat 13:48 makatabang nato sa pagdesisyon kon angay pa bang ipadayon ang pag-Bible study?

²⁰ Makapaguol, ang ubang Bible study parehas sa mga Israelinhon sa panahon ni Ezequiel. Bahin kanila, si Jehova miingon kang Ezequiel: “Tan-awa! Alang kanila nahisama kag awit sa gugma, nga giawit sa usa nga nindot ug tingog ug maayong pagkaduyog sa dekuwerdas nga instrumento. Sila mamati sa imong mga pulong, apan walay usa nga mobuhat niini.” (Ezeq. 33:32) Maglisod tingali tag ingon sa atong Bible study nga undangon na nato ang pagtuon. Pero “ang panahong nabilin mubo na.” (1 Cor. 7:29) Imbes gamiton ang atong panahon sa pag-study niadtong walay pag-uswag, kinahanglan natong pangitaon kadtong nagpakitag ebidensiya nga sila “nakiling sa pagdawat sa kamatuoran nga motultol sa kinabuhing walay kataposan.”​—Basaha ang Buhat 13:48.

21. Unsa ang atong tinuig nga teksto sa 2020, ug sa unsang paagi matabangan ta niini?

²¹ Ang atong tinuig nga teksto sa 2020 motabang nato nga maningkamot nga mouswag sa paghimog tinun-an. Usa ni sa mga gisulti ni Jesus panahon sa importante kaayong tigom didto sa bukid sa Galilea: ‘Adtoa ninyo ang mga tawo ug tudloi sila aron mahimong akong mga tinun-an. Bawtismohi sila.’​—Mat. 28:19.