Kanus-a Moabot ang Kataposan? Ang Giingon ni Jesus

“Busa padayon sa pagbantay kay wala mo mahibalo sa adlaw o sa oras.”—MATEO 25:13.

“Padayon sa pagbantay, padayon sa pagtukaw, kay wala mo mahibalo sa gitakdang panahon.”—MARCOS 13:33.

Busa walay bisan kinsang tawo nga nahibalo kon kanus-a eksaktong matapos kini nga sistema sa mga butang. Pero ang Diyos dunay “gitakdang panahon”—eksaktong ‘adlaw ug oras’ nga moabot ang kataposan. (Mateo 24:36) Nagpasabot ba ni nga dili na gyod nato mahibaloan kon duol na ba ang kataposan? Wala. Gisultihan ni Jesus ang iyang mga tinun-an nga angay silang magmaalerto sa pipila ka hitabo nga magpaila nga duol na ang kataposan.

Kini nga mga hitabo maoy ilhanan “sa hinapos sa sistema sa mga butang.” Si Jesus miingon: “Ang nasod makiggubat batok sa nasod ug ang gingharian batok sa gingharian, ug duna unyay mga kanihit sa pagkaon ug mga linog sa lainlaing dapit.” (Mateo 24:3, 7) Miingon sab siya nga duna unyay mga “kamatay”—mga epidemya. (Lucas 21:11) Nakita na ba nimo ang mga hitabo nga gitagna ni Jesus?

Ang mga tawo karon nag-antos tungod sa mga gubat, kagutom, linog, ug lainlaing sakit. Pananglitan, niadtong 2004, ang kusog nga linog sa Indian Ocean nagpahinabog tsunami nga mipatay ug mga 225,000 ka tawo. Sulod sa tulo ka tuig, ang COVID-19 nga pandemic mipatay ug mga 6.9 million sa tibuok kalibotan. Si Jesus miingon nga ang mga hitabo nga sama niini magpaila nga duol na ang kataposan niini nga sistema sa mga butang.

Sa Bibliya, ang yugto sa panahon una pa ang kataposan gitawag ug “kataposang mga adlaw.” (2 Pedro 3:3, 4) Ang 2 Timoteo 3:1-5 nag-ingon nga sa kataposang mga adlaw, ang moralidad sa mga tawo mous-os pag-ayo. (Tan-awa ang kahon nga “Sa Dili pa ang Kataposan sa Kalibotan.”) Namatikdan ba nimo nga daghan karon ang kaugalingon ray gihunahuna, hakog, bayolente, ug dili mahigugmaon? Pamatuod sab ni nga duol na kaayo ang kataposan sa kalibotan.

Unsa ka dugay ang kataposang mga adlaw? Sumala sa Bibliya, kini maoy ‘mubo lang nga panahon.’ Dayon laglagon sa Diyos kadtong “nagadaot sa yuta.”—Pinadayag 11:15-18, footnote; 12:12.

Ang Diyos nagtakda nag adlaw ug oras kon kanus-a niya taposon kining presenteng daotang sistema sa mga butang. (Mateo 24:36) Pero duna pay maayong balita—‘dili gusto sa Diyos nga naay malaglag.’ (2 Pedro 3:9) Gihatagan niyag kahigayonan ang mga tawo nga mahibalo sa iyang kabubut-on ug mosunod sa iyang mga sukdanan. Ngano? Kay gusto niya nga maluwas ta sa kataposan niining kalibotana ug magpuyo sa iyang bag-ong kalibotan, dihang ang yuta mahimong paraiso.

Giseguro sa Diyos nga ang mga tawo sa tibuok kalibotan matudloan kon unsaon nga mahimong bahin sa bag-ong kalibotan ubos sa iyang Gingharian. Si Jesus miingon nga ang maayong balita bahin sa Gingharian sa Diyos isangyaw “sa tibuok yuta.” (Mateo 24:14) Ang mga Saksi ni Jehova sa tibuok kalibotan migugol ug bilyong oras sa pagsangyaw ug pagpanudlo bahin sa paglaom nga naa sa Bibliya. Si Jesus miingon nga kini nga pagsangyaw himoon sa tibuok yuta una moabot ang kataposan.

Ang pagmando sa tawo hapit na gyong taposon. Pero dunay maayong balita. Puwede kang maluwas sa kataposan sa kalibotan ug makapuyo sa paraisong yuta nga gisaad sa Diyos. Hisgotan sa mosunod nga artikulo kon sa unsang paagi ka makapuyo sa bag-ong kalibotan.