Kon Unsaon Pagtubag ni Jehova ang Atong mga Pag-ampo

1-2. Unsa tingali atong ikapangutana kon bahin sa atong mga pag-ampo?

NAA bay higayon nga nakapangutana ka kon gitubag ba ni Jehova ang imong mga pag-ampo? Kon oo, dili lang ikaw ang nakapangutana ana. Daghang igsoon ang mibati niana, ilabina dihang naa sila sa lisod nga kahimtang. Kon kita ang nag-antos, malisdan pod tingali ta nga makita kon giunsa pagtubag ni Jehova ang atong mga pag-ampo.

² Karon, atong susihon kon nganong makasalig ta nga tubagon ni Jehova ang pag-ampo sa iyang mga alagad. (1 Juan 5:15) Hisgotan pod nato ni nga mga pangutana: Nganong usahay morag wala tubaga ni Jehova ang atong mga pag-ampo? Sa unsang paagi tubagon ni Jehova ang mga pag-ampo karon?

 3. Nganong gusto ni Jehova nga moampo ta kaniya?

³ Gipasaligan ta sa Bibliya nga gimahal kaayo ta ni Jehova ug importante ta kaniya. (Hag. 2:7; 1 Juan 4:10) Kanay rason nga gusto ni Jehova nga mangayo tag tabang niya pinaagi sa pag-ampo. (1 Ped. 5:6, 7) Gusto ta niyang tabangan nga magpabiling suod kaniya ug molampos sa pag-atubang sa atong mga problema.

 4. Nganong nahibalo ta nga tubagon ni Jehova ang pag-ampo sa iyang mga alagad? (Tan-awa sab ang hulagway.)

⁴ Sa Bibliya, pirme natong mabasa nga gitubag ni Jehova ang pag-ampo sa iyang mga alagad. Naa ba kay mahunahunaang pananglitan? Ang usa kanila mao si Haring David. Sa tibuok niyang kinabuhi, daghan siyag naatubang nga mga kaaway, ug kanunay siyang nangayog tabang kang Jehova pinaagi sa pag-ampo. Naay higayon nga siya mihangyo: “Oh Jehova, dungga ang akong pag-ampo; pamatia ang akong hangyo alang sa tabang. Tubaga ko sumala sa imong pagkamatinumanon ug pagkamatarong.” (Sal. 143:1) Gitubag ni Jehova ang pag-ampo ni David nga luwason siya. (1 Sam. 19:10, 18-20; 2 Sam. 5:17-25) Busa si David nakaingon gyod: “Si Jehova duol sa tanang nagatawag kaniya.” Makasalig pod ta ana!—Sal. 145:18.

 5. Ang tubag ba ni Jehova sa pag-ampo sa iyang mga alagad kaniadto pirmeng parehas sa ilang gidahom? Paghatag ug pananglitan. (Tan-awa sab ang hulagway.)

⁵ Ang tubag ni Jehova sa atong mga pag-ampo lahi tingali sa atong gidahom. Kanay nahitabo kang apostol Pablo. Mihangyo siya sa Diyos nga tangtangon ang iyang “tunok sa unod.” Tulo ka beses nga espesipikong giampo ni Pablo kining lisod nga problema. Gitubag ba ni Jehova ang iyang mga pag-ampo? Oo, pero dili sa paagi nga gidahom ni Pablo. Imbes wad-on ang problema, gihatagan siya ni Jehova ug kusog aron makapadayon siya sa pag-alagad nga matinumanon.—2 Cor. 12:7-10.

 6. Usahay, nganong morag wala tubaga ni Jehova ang atong mga pag-ampo?

⁶ Sama kang Pablo, usahay ang tubag sa atong mga pag-ampo lahi sa atong gidahom. Pero makasalig ta nga nahibalo gyod si Jehova kon unsa ang pinakamaayong paagi sa pagtabang nato. Gani, siya “makahimo gayod ug labaw pa kay sa atong gipangayo o gihunahuna.” (Efe. 3:20) Tungod ana, lahi tingali ang tubag ni Jehova sa atong mga pag-ampo o kaha moabot na sa panahon nga wala nato damha.

 7. Nganong kinahanglan tingali natong usbon kon unsay atong ginaampo? Paghatag ug pananglitan.

⁷ Kinahanglan tingali natong usbon kon unsay atong ginaampo dihang mas masabtan nato ang kabubut-on ni Jehova. Konsideraha ang pananglitan ni Martin Poetzinger. Wala madugay human siya maminyo, si Brader Poetzinger napriso sa kampo konsentrasyon sa Nazi. Sa primero, mihangyo siya kang Jehova nga makagawas unta siya sa prisohan aron maatiman niya ang iyang asawa ug makabalik sa pagsangyaw. Pero human sa duha ka semana, wala siyay nakitang ilhanan nga itugot ni Jehova nga makagawas siya sa prisohan, maong nag-ampo siya: “Jehova, palihog ipakita kanako kon unsay gusto nimo nga akong himoon.” Dayon, gihunahuna niya kon unsa poy giatubang sa ubang igsoon didto sa prisohan. Daghan nila ang nabalaka pag-ayo sa ilang asawa ug mga anak. Busa si Brader Poetzinger miampo: “Jehova, salamat sa akong bag-ong asaynment. Tabangi ko sa pagpalig-on ug pagdasig sa mga igsoon.” Ug mao gyod nay iyang gihimo sulod sa siyam ka tuig sa prisohan!

 8. Unsang importanteng butang ang angay natong hinumdoman kon bahin sa pag-ampo?

⁸ Angay natong hinumdoman nga naay katuyoan si Jehova, ug iya nang tumanon sa iyang gitakdang panahon. Apil niana nga katuyoan ang bug-os nga pagwagtang sa tanang problema nga maoy hinungdan sa daghang pag-antos karon, sama sa kalamidad, sakit, ug kamatayon. Tumanon ni Jehova ang iyang katuyoan pinaagi sa iyang Gingharian. (Dan. 2:44; Pin. 21:3, 4) Pero sa pagkakaron, gitugotan ni Jehova si Satanas nga mandoan ang kalibotan.b (Juan 12:31; Pin. 12:9) Kon sulbaron ni Jehova ang problema sa mga tawo karon, morag iyang gitabangan si Satanas nga molampos sa pagmando. Busa kinahanglan tang magpaabot nga tumanon ni Jehova ang iyang mga saad, pero wala na magpasabot nga pasagdan na lang ta niya. Atong hisgotan ang pipila ka paagi nga si Jehova motabang nato.

 9. Unsaon ta pagtabang ni Jehova dihang kinahanglan tang mohimog mga desisyon? Paghatag ug pananglitan.

⁹ Hatagan ta niyag kaalam. Si Jehova nagsaad nga hatagan ta niyag kaalam aron makahimo tag maayong mga desisyon. Nagkinahanglan tag kaalam sa Diyos ilabina dihang mohimo tag mga desisyon nga makaapektar sa atong tibuok kinabuhi, sama pananglitan kon magpabilin ba tang tagsaanon o magminyo. (Sant. 1:5) Konsideraha ang eksperyensiya sa tagsaanong sister nga si Maria.c Malipayon siyang nag-alagad ingong regular payunir dihang naa siyay nailaila nga brader. Siya miingon: “Samtang nagkasuod mi, na-develop pod ang among pagbati sa usag usa. Nahibalo ko nga kinahanglan kong modesisyon. Ako gyod ning giampog maayo kang Jehova. Kinahanglan nako ang giya ni Jehova, pero kabalo pod ko nga dili siya ang modesisyon para nako.” Gibati ni Maria nga gitubag ni Jehova ang iyang pag-ampo nga hatagan siyag kaalam. Sa unsang paagi? Samtang nag-research siya sa atong mga publikasyon, nakakita siyag espesipikong mga artikulo nga nakatabang nga matubag ang iyang mga pangutana. Naminaw pod siya sa maalamong tambag sa iyang mama, nga usa ka matinumanong alagad ni Jehova. Ang maong tambag nakatabang kang Maria nga masusi ang iyang pagbati. Busa, nakahimo siyag maalamong desisyon.

10. Sumala sa Filipos 4:13, unsaon pagtabang ni Jehova ang iyang mga alagad? Paghatag ug pananglitan. (Tan-awa sab ang hulagway.)

¹⁰ Hatagan ta niyag kusog aron makalahutay. Sama sa gihimo ni Jehova kang apostol Pablo, hatagan pod ta niyag kusog aron malahutay nato ang mga pagsulay. (Basaha ang Filipos 4:13.) Matikdi kon giunsa pagtabang ni Jehova ang brader nga si Benjamin nga makalahutay sa lisod nga mga kahimtang. Sa batan-on pa si Benjamin, siya ug ang iyang pamilya nagpuyo sa mga refugee camp sa Africa. Si Benjamin miingon: “Pirme kong mag-ampo kang Jehova, nga mangayo niyag kusog aron mahimo nako kon unsay makapalipay niya. Gitubag ni Jehova ang akong mga pag-ampo kay gihatagan ko niyag malinawong hunahuna, kaisog aron makapadayon sa pagsangyaw, ug mga publikasyon aron makapabiling lig-on sa espirituwal.” Miingon pod siya: “Dihang magbasa kog mga eksperyensiya sa mga igsoon, makita nako kon giunsa sila pagtabang ni Jehova. Tungod ana, mas milig-on ang akong determinasyon nga magpabiling matinumanon.”

11-12. Sa unsang paagi gamiton ni Jehova ang mga igsoon sa pagtubag sa atong mga pag-ampo? (Tan-awa sab ang hulagway.)

¹¹ Gamiton niya ang mga igsoon. Sa gabii una ihalad ni Jesus ang iyang kinabuhi, kinasingkasing siyang nag-ampo. Gihangyo niya si Jehova nga dili unta Niya itugot nga mahukman siya ingong tigpasipala, nga way pagtahod sa Diyos. Pero dili kana ang gihimo ni Jehova. Hinuon, gitabangan Niya si Jesus pinaagi sa pagpadalag anghel aron palig-onon siya. (Luc. 22:42, 43) Puwede pod tang tabangan ni Jehova pinaagi sa makapadasig nga tawag sa mga igsoon o dihang ila tang bisitahon. Ang matag usa nato puwedeng mangitag mga kahigayonan nga makahatag ug “maayong pulong” sa pagdasig sa mga igsoon.—Prov. 12:25.

¹² Konsideraha ang eksperyensiya sa sister nga si Miriam. Pipila ka semana human mamatay ang iyang bana, si Miriam nag-inusara sa balay, nga naguol pag-ayo ug na-depress. Grabe niyang hilak adtong higayona ug nagkinahanglan siyag kaestorya. Siya miingon: “Wala koy kusog nga motawag sa uban, maong miampo ko kang Jehova. Samtang naghilak pa ko ug nag-ampo, mitingog ang akong cellphone. Mitawag ang usa ka ansiyano nga amigo kaayo nako.” Si Miriam gihupay sa ansiyano ug sa iyang asawa. Kombinsido siya nga si Jehova ang nagpalihok sa brader nga motawag.

13. Unsaon tingali paggamit ni Jehova kadtong wala mag-alagad niya aron matubag ang atong mga pag-ampo? Paghatag ug pananglitan.

¹³ Iya tingaling gamiton kadtong wala mag-alagad niya. (Prov. 21:1) Aron matubag ang pag-ampo sa iyang mga alagad, usahay palihokon ni Jehova ang mga dili magtutuo sa pagtabang kanila. Pananglitan, gipalihok niya si Haring Artajerjes nga tugotan si Nehemias nga mobalik sa Jerusalem aron motabang sa pagtukod pag-usab sa siyudad. (Neh. 2:3-6) Karon sab, puwedeng palihokon ni Jehova bisan ang mga dili magtutuo aron tabangan ta.

14. Nganong nadasig ka sa eksperyensiya ni Soo Hing? (Tan-awa sab ang hulagway.)

¹⁴ Gibati sa sister nga si Soo Hing nga gitabangan siya ni Jehova pinaagi sa iyang doktor. Ang iyang anak naay pipila ka mental nga sakit ug sa ulahi grabeng naaksidente. Busa siya ug ang iyang bana miresayn sa trabaho aron atimanon ang ilang anak. Tungod ana, naglisod sila sa pinansiyal. Kasurenderon na kaayo si Soo Hing, ug gibati niya nga mora siyag lastiko nga hapit nang mabugto. Gibubo niya ang iyang kasingkasing kang Jehova ug nangayog tabang Niya. Ang ilang doktor nangitag paagi nga matabangan sila. Tungod ana, nakadawat silag tabang sa gobyerno ug nakakitag baratong balay nga kapuy-an. Sa ulahi, si Soo Hing miingon: “Nakita namo kon giunsa mi pagtabang ni Jehova. Siya gyod ang ‘Tigpatalinghog sa pag-ampo.’”—Sal. 65:2.

15. Unsay nakatabang sa usa ka sister nga makita nga gitubag diay ang iyang mga pag-ampo?

¹⁵ Sagad, simple lang ang paagi ni Jehova sa pagtubag sa atong mga pag-ampo. Pero ang mga tubag nga atong madawat mao gyod ang atong gikinahanglan aron makapabiling maunongon sa atong langitnong Amahan. Busa matikdi pag-ayo kon giunsa pagtubag ni Jehova ang imong mga pag-ampo. Gibati sa sister nga si Yoko nga wala tubaga ni Jehova ang iyang mga pag-ampo, maong naghimo siyag listahan sa iyang mga hangyo kang Jehova. Paglabayg pipila ka panahon, gibalikan niya ang iyang notebook, ug nakita niya nga gitubag diay ni Jehova ang kadaghanan sa iyang mga pag-ampo, bisan kadtong nalimtan na niya. Busa kinahanglang mogahin gyod tag panahon nga mamalandong kon giunsa pagtubag ni Jehova ang atong mga pag-ampo.—Sal. 66:19, 20.

16. Unsaon nato pagpakitag pagtuo kon bahin sa atong mga pag-ampo? (Hebreohanon 11:6)

¹⁶ Makapakita tag pagtuo kon moampo ta kang Jehova ug kon atong dawaton ang iyang tubag, bisag unsa pa na. (Basaha ang Hebreohanon 11:6.) Konsideraha ang pananglitan ni Mike ug sa iyang asawa, si Chrissy. Gusto nilang mag-alagad sa Bethel. Si Mike miingon: “Daghang tuig ming nag-aplay ingong magtiayon, ug balikbalik namo ning giampo kang Jehova. Pero wala gyod mi matawag.” Kombinsido si Mike ug Chrissy nga nahibalo gyod si Jehova kon unsaon sila paggamit sa pag-alagad kaniya. Padayon nilang gihimo ang ilang maarangan, nga nag-alagad ingong mga regular payunir sa lugar nga mas dakog panginahanglan ug mitabang sa mga proyekto sa pagpanukod. Karon, naa sila sa sirkitong buluhaton. Si Mike miingon: “Usahay ang tubag ni Jehova sa among mga pag-ampo lahi sa among gidahom. Pero iya gyod ning gitubag, ug sa mga paagi nga mas labaw pa kay sa among gidahom.”

17-18. Sumala sa Salmo 86:6, 7, sa unsa ta makasalig?

¹⁷ Basaha ang Salmo 86:6, 7. Si salmistang David kombinsido nga gipaminawan ug gitubag ni Jehova ang iyang mga pag-ampo. Makasalig pod ka ana. Ang mga pananglitan nga gihisgotan niining artikuloha nagpasalig nato nga hatagan ta ni Jehova ug kaalam ug kusog aron makalahutay. Tingali gamiton niya ang mga igsoon o bisan kadtong wala mag-alagad niya aron tabangan ta.

¹⁸ Bisag dili kanunayng tubagon ni Jehova ang atong mga pag-ampo sa paagi nga atong gidahom, makasalig ta nga iya gyod nang tubagon. Ihatag niya kon unsa gyoy atong gikinahanglan sa hustong panahon. Busa padayon sa pag-ampo kaniya uban ang pagtuo, ug salig nga atimanon ka ni Jehova karon ug nga iyang “tagbawon ang tinguha sa tanang buhing linalang” sa bag-ong kalibotan.—Sal. 145:16.