Mga Ansiyano—Sundoga ang Ehemplo ni Gideon

 1. Sumala sa 1 Pedro 5:2, unsang pribilehiyo ang gihatag sa mga ansiyano?

ANG Kristohanong mga ansiyano gihatagag responsibilidad sa pag-atiman sa bililhong katawhan ni Jehova. Gipabilhan niining kugihang mga lalaki ang ilang pribilehiyo nga mag-alagad sa mga igsoon, ug naningkamot sila sa ‘pagbantay gayod kanila.’ (Jer. 23:4; basaha ang 1 Pedro 5:2.) Mapasalamaton kaayo ta nga naay mga ansiyano sa atong kongregasyon!

 2. Unsang mga situwasyon nga malisdan tingali ang ubang ansiyano?

² Sa paghimo sa ilang mga responsibilidad, ang mga ansiyano makaatubang ug daghang lisod nga kahimtang. Ang usa ka rason kay daghan silag kinahanglang himoon aron maatiman ang kongregasyon. Si Tony, ansiyano sa United States, nakakat-on nga mahimong mas makasaranganon kon bahin sa gidaghanon sa asaynment nga iyang dawaton. Siya miingon: “Pagsugod sa COVID-19 nga pandemic, daghan kaayo kog gihimong trabaho aron maorganisar ang mga tigom ug ministeryo. Pero bisag daghan na kaayo kog nahimo, daghan pa gihapog himoonon. Tungod ana, wala na kaayo koy panahon sa pagbasag Bibliya, personal nga pagtuon, ug pag-ampo.” Si Ilir, ansiyano sa Kosovo, nakaatubang ug laing pagsulay. Dihang didto siya sa lugar nga naay giyera, nalisdan siya sa pagsunod sa direksiyon gikan sa organisasyon. Siya miingon: “Nasulayan ang akong pagtuo dihang nakadawat kog asaynment gikan sa sangang buhatan nga tabangan ang mga igsoon nga naa sa delikadong lugar. Nahadlok ko, ug morag dili praktikal ang direksiyon.” Si Tim, misyonaryo sa Asia, nalisdan sa kadaghan sa iyang mga himoonon kada adlaw. Siya miingon: “Usahay, mobati kog grabeng kakapoy nga maglisod na kog atiman sa mga igsoon.” Unsay makatabang sa mga ansiyano nga nag-atubang ug susamang mga kalisdanan?

 3. Sa unsang paagi makabenepisyo ta sa ehemplo ni Maghuhukom Gideon?

³ Ang mga ansiyano makakat-on sa ehemplo ni Maghuhukom Gideon. (Heb. 6:12; 11:32) Iyang gipanalipdan ug giatiman ang katawhan sa Diyos. (Maghu. 2:16; 1 Cron. 17:6) Sama kang Gideon, ang mga ansiyano gitudlo sa pag-atiman sa katawhan sa Diyos niining lisod kaayo nga panahon. (Buh. 20:28; 2 Tim. 3:1) Makakat-on ta sa iyang pagkamakasaranganon, pagpaubos, ug pagsunod sa mga instruksiyon. Makakat-on sab ta sa iyang pagkamalahutayon samtang gihimo niya ang iyang mga asaynment. Ansiyano man ta o dili, makakat-on ta nga mas apresyahon ang atong mga ansiyano. Atong suportahan kining espirituwal nga mga lalaki nga nagkugi para nato.—Heb. 13:17.

 4. Sa unsang paagi si Gideon nagpakitag pagkamakasaranganon ug pagkamapainubsanon?

⁴ Si Gideon makasaranganon ug mapainubsanon nga tawo.b Dihang giingnan sa anghel ni Jehova si Gideon nga siyay gipili sa pagluwas sa Israel gikan sa gamhanang kasundalohan sa Midian, siya mapainubsanong mitubag: “Ang akong banay maoy kinagamyan sa Manases, ug ako ang kinaubsan sa panimalay sa akong amahan.” (Maghu. 6:15) Gibati niya nga dili siya kuwalipikado sa maong asaynment, pero nahibalo si Jehova nga iya nang mahimo. Sa tabang ni Jehova, milampos si Gideon sa iyang asaynment.

 5. Unsang mga situwasyon nga malisdan tingali ang usa ka ansiyano nga magmakasaranganon ug magpaubos?

⁵ Ang mga ansiyano naningkamot pag-ayo nga magmakasaranganon ug magmapainubsanon sa tanang butang. (Miq. 6:8; Buh. 20:18, 19) Dili sila maghunahuna nga kaya nilang himoon tanan ug dili sila manghambog sa ilang mga nalampos. Dili pod nila basolon pag-ayo ang ilang kaugalingon tungod sa ilang mga sayop o kakulangan. Pero usahay malisdan tingali ang usa ka ansiyano nga magmakasaranganon ug magpaubos. Pananglitan, modawat tingali siyag daghang asaynment, pero dili diay niya kayang himoon tanan. O tingali sawayon o dayegon siya sa iyang pagdumala sa iyang asaynment. Unsay makat-onan sa mga ansiyano kang Gideon nga makatabang nila sa maong mga situwasyon?

 6. Unsay makat-onan sa mga ansiyano kang Gideon bahin sa pagkamakasaranganon? (Tan-awa sab ang hulagway.)

⁶ Pangayog tabang. Ang makasaranganon nga tawo nahibalo sa iyang mga limitasyon. Si Gideon makasaranganon kay nangayo siyag tabang sa uban. (Maghu. 6:27, 35; 7:24) Mao pod nay himoon sa maalamong mga ansiyano. Si Tony, nga gihisgotan ganina, miingon: “Tungod sa paagi sa pagpadako kanako, modawat kog daghang trabaho bisag maglisod na ko sa pagbuhat ana. Busa giapil nako sa among family worship ang bahin sa pagkamakasaranganon ug gipangutana nako ang akong asawa kon unsay iyang naobserbahan bahin nako. Gitan-aw pod nakog balik sa jw.org ang video nga Bansaya, Saligi, ug Hatagig Responsabilidad ang Uban, Sama sa Gihimo ni Jesus.” Si Tony nakakat-on nga mangayog tabang sa paghimo sa iyang mga buluhaton. Unsay resulta? Si Tony miingon: “Naatiman ang mga buluhaton sa kongregasyon, ug mas daghan na kog panahon sa pagpalig-on sa akong espirituwalidad.”

 7. Kon sawayon o kuwestiyonon, unsaon pagsundog sa mga ansiyano si Gideon? (Santiago 3:13)

⁷ Pabiling kalmado kon naay manaway o mokuwestiyon nimo. Masulayan pod ang mga ansiyano kon naay manaway o mokuwestiyon nila. Niana nga kahimtang, makatabang gihapon ang ehemplo ni Gideon. Nahibalo si Gideon nga dili siya hingpit, maong kalmado siyang mitubag sa mga lalaki sa Epraim nga mikuwestiyon niya. (Maghu. 8:1-3) Wala masuko si Gideon. Nagpaubos siya pinaagi sa pagpaminaw sa ilang mga reklamo ug buotang nakig-estorya nila, maong mikalma ang situwasyon. Masundog sa maalamong mga ansiyano si Gideon kon maminaw sila pag-ayo ug kalmadong motubag kon naay mokuwestiyon o mosaway nila. (Basaha ang Santiago 3:13.) Nianang paagiha, makaamot sila sa kalinaw sa kongregasyon.

 8. Unsay angayng reaksiyon sa mga ansiyano kon dayegon sila sa uban? Paghatag ug pananglitan.

⁸ Ihatag ang pagdayeg kang Jehova. Dihang gidayeg si Gideon kay nakadaog sila sa Midian, iyang gipokus ang atensiyon ngadto kang Jehova. (Maghu. 8:22, 23) Unsaon kaha pagsundog sa mga ansiyano si Gideon? Angay nilang dayegon si Jehova sa ilang mga nalampos. (1 Cor. 4:6, 7) Pananglitan, kon ang usa ka ansiyano komendahan sa iyang paagi sa pagpanudlo, iyang ipokus ang atensiyon ngadto sa tinubdan sa maong instruksiyon, ang Pulong sa Diyos, o sa pagbansay nga iyang nadawat gikan sa organisasyon ni Jehova. Usahay, maayong pamalandongon sa mga ansiyano ang ilang paagi sa pagpanudlo, kay basin sa ilaha na nakapokus ang atensiyon sa uban. Matikdi ang eksperyensiya ni Timothy. Dihang bag-o siyang natudlo ingong ansiyano, si Timothy ganahan kaayong mohatag ug pakigpulong. Siya miingon: “Mogamit kog talagsaon kaayong mga introduksiyon ug ilustrasyon. Tungod ani, pirme kong dayegon sa uban. Pero ang atensiyon napokus na hinuon sa akoa imbes sa Bibliya o kang Jehova.” Sa ngadtongadto, nakita ni Timothy nga kinahanglan niyang usbon ang iyang paagi sa pagpanudlo aron dili sobrang mapokus sa iya ang atensiyon. (Prov. 27:21) Unsay resulta? Siya miingon: “Sultihan ko sa lainlaing igsoon nga ang akong pakigpulong nakatabang nila nga masagubang ang ilang problema, makalahutay sa pagsulay, o mas masuod kang Jehova. Mas nalipay ko sa maong mga komento kay sa pagdayeg nga akong nadawat kaniadto.”

 9. Sa unsang paagi nasulayan ang pagkamasinundanon ug kaisog ni Gideon? (Tan-awa ang hulagway sa atubangan sa magasin.)

⁹ Human matudlo si Gideon ingong maghuhukom, nasulayan ang iyang pagkamasinundanon ug kaisog. Nakadawat siyag delikado nga asaynment—iyang tumpagon ang halaran nga gigamit sa iyang amahan sa pagsimba kang Baal. (Maghu. 6:25, 26) Sa laing higayon, human matigom ni Gideon ang kasundalohan, kaduha siya gisugo nga menosan ang gidaghanon niini. (Maghu. 7:2-7) Dayon, gisugo siya nga atakehon ang kampo sa mga kaaway sa mga tungang gabii.—Maghu. 7:9-11.

10. Unsa nga mga situwasyon nga malisdan tingali ang ansiyano sa pagsunod?

¹⁰ Ang mga ansiyano kinahanglang “andam mosunod.” (Sant. 3:17) Mapakita ni sa ansiyano kon sundon dayon niya ang giingon sa Kasulatan ug ang direksiyon gikan sa organisasyon sa Diyos. Nianang paagiha, makapakita siyag maayong ehemplo sa uban. Pero usahay, malisdan tingali siya sa pagsunod. Pananglitan, basin dili dayon siya maka-adjust sa bag-ong mga direksiyon. Sa ubang mga kahimtang, maghunahuna tingali siya kon praktikal o maalamon ba gyod ang maong direksiyon. O kaha makadawat siyag asaynment nga posibleng moresulta sa pagkapriso. Niana nga mga situwasyon, unsaon pagsundog sa mga ansiyano ang pagkamasinundanon ni Gideon?

11. Unsay makatabang sa mga ansiyano sa pagsunod sa mga direksiyon?

¹¹ Paminawa pag-ayo ang direksiyon ug sunda kini. Giingnan sa Diyos si Gideon kon unsaon pagtumpag ang halaran sa iyang amahan, kon asa magtukod ug bag-ong halaran para kang Jehova, ug kon unsang hayop ang ihalad. Wala kuwestiyona ni Gideon ang maong direksiyon—iya kining gisunod. Karon ang mga ansiyano makadawat ug mga instruksiyon gikan sa organisasyon ni Jehova pinaagig mga sulat, pahibalo, ug mga guideline aron maproteksiyonan ta sa pisikal ug espirituwal. Gimahal nato ang atong mga ansiyano kay gisunod gyod nila ang mga direksiyon nga ilang nadawat. Ang tibuok kongregasyon nakabenepisyo.—Sal. 119:112.

12. Sa unsang paagi mapadapat sa mga ansiyano ang Hebreohanon 13:17 kon naay mga kausaban sa direksiyon sa organisasyon?

¹² Ipakita nga andam kang mo-adjust. Hinumdomi nga giingnan ni Jehova si Gideon nga menosan ug kapig 99 porsiyento ang gidaghanon sa iyang mga sundalo. (Maghu. 7:8) Tingali naghunahuna siya: ‘Kinahanglan ba gyod ning himoon? Modaog kaha mi kon gamay na lang mi?’ Pero misunod gihapon si Gideon. Karon, masundog sa mga ansiyano si Gideon kon sundon nila ang mga kausaban nga ipahimo sa organisasyon. (Basaha ang Hebreohanon 13:17.) Pananglitan, niadtong 2014, ang Nagamandong Lawas naghatag ug bag-ong direksiyon kon unsaon pagsuportar ang galastohan sa pagpanukod ug mga Kingdom Hall ug Assembly Hall. (2 Cor. 8:12-14) Ang mga kongregasyon dili na kinahanglang mag-loan. Hinuon, gamiton sa organisasyon ang mga donasyon gikan sa tanang kongregasyon sa tibuok kalibotan aron makatukod ug mga Kingdom Hall ug Assembly Hall bisan asa nga gikinahanglan, bisan pag ang kongregasyon walay igong pondo nga ikaamot para sa pagtukod. Pagkadungog ni José niini nga kausaban, nagduhaduha siya kon molampos ba ni. Naghunahuna siya: ‘Aw, wala gyoy bisag usa ka Kingdom Hall nga matukod. Di man na mosaler dinhi sa among lugar.’ Unsay nakatabang kang José nga mosunod sa direksiyon? Siya miingon: “Napahinumdoman ko sa Proverbio 3:5, 6 nga mosalig kang Jehova. Ug maayo kaayo ang resulta! Tungod sa bag-ong paagi sa paggamit sa atong mga donasyon, nakatukod tag mas daghang Kingdom Hall ug nakatabang sa mga igsoon sa tibuok kalibotan.”

13. (a) Sa unsa kombinsido si Gideon? (b) Sa unsang paagi masundog sa mga ansiyano si Gideon? (Tan-awa sab ang hulagway.)

¹³ Magmaisogon sa pagbuhat sa kabubut-on ni Jehova. Gisunod ni Gideon si Jehova bisag nahadlok siya ug delikado ang iyang asaynment. (Maghu. 9:17) Human siya pasaligi ni Jehova, kombinsido si Gideon nga tabangan gyod siya sa Diyos sa pagpanalipod sa Iyang katawhan. Ang mga ansiyano nga nagpuyo sa mga lugar nga gidili ang atong buluhaton nagsundog kang Gideon. Maisogon silang nanguna sa mga tigom ug sa ministeryo bisag posible silang dakpon, sukitsukiton, mawad-ag trabaho, o kulatahon.c Panahon sa dakong kasakitan, ang mga ansiyano nagkinahanglag kaisog sa pagsunod sa mga instruksiyon nga ilang madawat, bisan pag peligroso ang pagsunod niana. Pananglitan, makadawat tingali silag instruksiyon kon unsaon pagsangyaw ang bug-at nga mensahe sa paghukom ug kon unsaon nga makalahutay ta dihang moatake na ang Gog sa Magog.—Ezeq. 38:18; Pin. 16:21.

14. Sa unsang paagi nasulayan ang pagkamalahutayon ni Gideon?

¹⁴ Dili lalim ang asaynment ni Gideon ingong maghuhukom kay hago kaayo to sa pisikal. Dihang ang mga Midianhon nangikyas panahon sa gabii nga gubat, gigukod sila ni Gideon gikan sa Walog sa Jezreel paingon sa Suba sa Jordan, nga posibleng napalibotan ug baga kaayong mga sagbot ug kahoy. (Maghu. 7:22) Mihunong ba si Gideon sa Jordan? Wala! Bisag gikapoy siya ug ang iyang 300 ka sundalo, mitabok sila sa suba ug mipadayon sa paggukod. Sa ulahi, ilang naapsan ang mga Midianhon ug gipildi kini.—Maghu. 8:4-12.

15. Unsang mga kahimtang nga malisdan tingali ang mga ansiyano sa paglahutay?

¹⁵ Usahay ang mga ansiyano mobatig kakapoy sa pisikal, mental, o emosyonal tungod sa pag-atiman sa kongregasyon ug sa ilang pamilya. Niana nga mga kahimtang, unsaon nila pagsundog si Gideon?

16-17. Unsay nakatabang kang Gideon nga molahutay, ug sa unsa makasalig ang mga ansiyano? (Isaias 40:28-31) (Tan-awa sab ang hulagway.)

¹⁶ Salig nga palig-onon ka ni Jehova. Si Gideon misalig nga hatagan siya ni Jehova ug kusog, ug mao gyod nay gihimo ni Jehova. (Maghu. 6:14, 34) Kas-a, gigukod ni Gideon ug sa iyang mga sundalo ang duha ka Midianhong hari nga tingali nagsakay ug mga kamelyo samtang sila nagdagan lang. (Maghu. 8:12, 21) Pero sa tabang sa Diyos, naapsan sa mga Israelinhon ang mga kaaway ug nakadaog sila sa gubat. Ang mga ansiyano makasalig pod sa tabang ni Jehova, kinsa “dili kapoyon o maluya.” Hatagan niya silag kusog nga ilang gikinahanglan.—Basaha ang Isaias 40:28-31.

¹⁷ Konsideraha ang eksperyensiya ni Matthew, membro sa Hospital Liaison Committee. Unsay nakatabang niya nga molahutay? Si Matthew miingon: “Tinuod gyod ang giingon sa Filipos 4:13. Daghang higayon nga kapoy na gyod kaayo ko, maong grabe gyod nakong ampo sa Diyos nga hatagan kog pisikal ug mental nga kusog aron padayon nakong matabangan ang mga igsoon. Niadtong mga panahona, gibati gyod nako nga gihatagan ko ni Jehova ug kusog, maong nakalahutay ko.” Sama kang Gideon, ang atong kugihang mga ansiyano makaatubang tingalig mga kalisdanan samtang naningkamot sa pag-atiman sa panon sa Diyos. Siyempre, kinahanglan nilang ilhon ang ilang pisikal ug emosyonal nga mga limitasyon ug himoon kon unsa ray ilang makaya. Pero makasalig sila nga dunggon ni Jehova ang ilang mga hangyo para sa tabang ug hatagan silag kusog aron makalahutay.—Sal. 116:1; Filip. 2:13.

18. Sa pag-review, sa unsang paagi masundog sa mga ansiyano si Gideon?

¹⁸ Daghag makat-onang leksiyon ang mga ansiyano kang Gideon nga praktikal ug haom sa panahon. Ang mga ansiyano angayng magmakasaranganon ug magmapainubsanon sa gidaghanon sa asaynment nga ilang dawaton ug sa ilang reaksiyon dihang sawayon o dayegon sila. Kinahanglan pod silang magmasinundanon ug magpakitag kaisog ilabina kay nagkaduol na ang kataposan niining sistemaha. Ug kinahanglan silang mosalig nga bisag unsa pang kalisdanan ang ilang maatubang, palig-onon sila sa Diyos. Busa, mapasalamaton gyod ta sa atong kugihang mga magbalantay ug ‘padayong mahalon’ kini nga mga igsoon.—Filip. 2:29.