Pagpokus “sa mga Butang nga Dili Makita”

1-2. Nganong ang mga Kristohanon sa unang siglo kinahanglang magpokus sa “mga butang nga dili makita”? (2 Corinto 4:18)

POSIBLE ba nga makatutok ang usa ka tawo sa usa ka butang nga dili niya makita? Morag imposible gyod. Pero mao nay gidasig ni apostol Pablo nga himoon sa mga Kristohanon sa unang siglo. (Basaha ang 2 Corinto 4:18.) Unsay iyang gipasabot adto?

² Ang mga Kristohanon sa unang siglo daghag giatubang nga kalisdanan. Si Pablo miingon nga sila “ginapiit pag-ayo,” “nangalibog,” ug “ginalutos” pa gani. (2 Cor. 4:​8, 9) Bisan pa ana, giingnan niya sila nga magpokus sa ilang paglaom, o sa “mga butang nga dili makita,” imbes nga magpokus sa ilang mga pagsulay, o sa “mga butang nga makita.” Ang mga Kristohanon nga mosunod ani nga tambag makabenepisyo sa duha ka paagi. Una, mas makalahutay sila sa ilang mga kalisdanan. Ikaduha, mas makahimo silag maalamong mga desisyon nga magpakita nga naa silay pagtuo sa ilang paglaom.—Heb. 11:1.

3. Nganong kinahanglan tang magpokus sa bag-ong kalibotan nga gisaad sa Diyos?

³ Ang atong kahimtang karon susama sa giatubang sa mga Kristohanon sa unang siglo. Niining lisod nga mga panahon, dali ra tang maapektohan sa atong mga kalisdanan kay halos kada adlaw makaatubang gyod tag mga problema. Maong kinahanglan tang magpokus sa butang nga sa pagkakaron dili pa nato makita—ang bag-ong kalibotan nga gisaad sa Diyos. (Sal. 37:​10, 11) Kon ato nang himoon, mapahinumdoman ta nga temporaryo lang ang atong kalisdanan karon, bisag unsa pa ni ka lisod.—2 Cor. 4:17.

4. Kon naa tay pagtuo sa mga saad ni Jehova, unsay epekto niini sa atong kinabuhi? Iilustrar.

⁴ Ang pagpokus sa atong paglaom dili lang basta makatabang nato nga makabaton ug balanseng panglantaw sa atong mga kalisdanan, kondili makatabang pod ni nato sa paghimog maayong mga desisyon karon. (Jud. 21) Hunahunaa ni nga ilustrasyon: Ang usa ka mabdos nga babaye naglaom nga manganak siyag himsog nga bata. Kada adlaw, mag-imagine siya kon unsa unya ang iyang kinabuhi ingong inahan. Pero dili kay kana ray iyang himoon; kinahanglan pod siyang mohimog mga desisyon karon nga makatabang niyang maampingan ang iyang kaugalingon ug ang iyang umaabot nga anak. Sa samang paagi, naglaom ta nga mabuhi hangtod sa hangtod sa Paraisong Yuta. Pero dili kay kutob lang tang mag-imagine nga tua ta didto. Ang atong lig-ong pagtuo sa mga saad ni Jehova sa umaabot magpalihok nato sa paghimog maalamong mga desisyon karon. Hisgotan nato ang pipila ka ehemplo sa mga karakter sa Bibliya nga nagpokus sa katumanan sa mga saad sa Diyos ug mihimog maayong mga desisyon nga nagpakita sa ilang lig-ong pagtuo. Dayon konsiderahon nato kon sa unsang paagi ang atong pagtuo makatabang nato nga makalahutay sa atong mga kalisdanan ug makahimog maalamong mga desisyon.

ANG PAGTUO NI ABRAHAM NAKATABANG NIYA SA PAGSUNOD KANG JEHOVA

5-6. (a) Unsay gisaad ni Jehova kang Abraham? (b) Unsay gihimo ni Abraham ug Sara tungod sa ilang pagtuo sa maong saad? (Genesis 17:​1, 2, 6) (Tan-awa sab ang hulagway.)

⁵ Si Abraham nakadawat ug saad nga makapausab gyod sa iyang kinabuhi. Giingnan siya ni Jehova: “Himoon ka nako nga dakong nasod.” (Gen. 12:2) Bisan pag si Abraham ug ang iyang asawa nga si Sara tigulang na ug walay anak, naa silay pagtuo nga tumanon ni Jehova ang iyang saad. Gipakita nila ang ilang pagtuo pinaagi sa pagtuman sa sugo ni Jehova: “Biya sa imong yuta ug sa imong mga paryente . . . ug adto sa yuta nga akong ipakita kanimo.”—Gen. 12:1.

⁶ Para kang Abraham ug Sara, nagpasabot to nga kinahanglan nilang biyaan ang ilang hayahay nga kinabuhi ug magbalhinbalhig puyo diha sa mga tolda. (Heb. 11:​8, 9) Unsay nakatabang nila sa paghimo adto nga sakripisyo? Nagpokus sila sa saad nga wala pa nila makita—usa ka anak nga lalaki nga mahimo unyang dako nga nasod. (Basaha ang Genesis 17:​1, 2, 6; Heb. 11:11) Tinuod kaayo to nga paglaom para kang Abraham ug Sara, nga samag nakita na to nila bisag wala pa to mahitabo. Sa ngadtongadto, nagsugod ug katuman ang saad ni Jehova dihang natawo ang ilang anak nga lalaki nga si Isaac.

7-8. Nganong andam motuman si Abraham sa sugo ni Jehova nga ihalad si Isaac?

⁷ Paglabay sa daghang tuig, gisugo ni Jehova si Abraham sa paghalad kang Isaac, nga adtong panahona mga 25 ang edad. Nganong andam motuman si Abraham sa maong sugo? Kay nagpokus siya sa butang nga wala pa niya makita—ang katumanan sa saad ni Jehova kaniya. Giingnan ni Jehova si Abraham: “Ang kaliwat nga akong gisaad kanimo maggikan kang Isaac.” (Gen. 21:12) Bisag wala pay mga anak si Isaac niadtong panahona, si Abraham “nahibalo . . . nga ang Diyos makahimo sa pagbanhaw” kang Isaac. (Heb. 11:19) Dili bastabasta ang pagtuo ni Abraham sa gahom sa Diyos sa pagbanhaw sa iyang anak kay adtong panahona, wala pa gyoy rekord nga diha nay gibanhaw. Lig-on kaayog pagtuo si Abraham sa saad ni Jehova nga samag nakita na niya ang umaabot nga mga kaliwat ni Isaac.

⁸ Gipugngan ni Jehova si Abraham sa paghalad sa iyang anak. (Gen. 22:​11, 12) Bisan pa ana, ang Bibliya nag-ingon nga si Abraham, “samag naghalad na kang Isaac.” (Heb. 11:​17, 18) Ang gihimo ni Abraham nagpamatuod nga nagpokus siya sa butang nga dili makita—ang katumanan sa saad ni Jehova.

ANG PAGTUO NI MOISES NAKATABANG NIYA SA PAGHIMOG MAAYONG MGA DESISYON

9. (a) Unsay kahimtang sa mga Israelinhon samtang nagdako si Moises? (b) Unsay kahimtang ni Moises samtang nagdako siya?

⁹ Posibleng gitudloan si Moises sa iyang mga ginikanan bahin sa mga saad ni Jehova kang Abraham. Apil adto ang saad nga mapanag-iya sa katawhan sa Diyos ang yuta sa Canaan “hangtod sa panahong walay tino.” (Gen. 13:15) Pero unsaon na pagkahitabo? Ang mga Israelinhon naulipon sa Ehipto. Si Moises wala makasinati sa pag-antos nga naeksperyensiyahan sa iyang mga kaliwat kay sukad pagkabata, gisagop na siya sa anak nga babaye sa Paraon, ug samtang nagdako, siya “natudloan sa tanang kaalam sa mga Ehiptohanon.” (Buh. 7:22) Bisan pa ana, si Moises wala magpokus sa iyang hayahay nga kinabuhi didto sa Ehipto.

10. Pag-edad ni Moises ug 40, unsa nga desisyon ang iyang gihimo, ug ngano? (Hebreohanon 11:​24-26) (Tan-awa sab ang hulagway.)

¹⁰ Basaha ang Hebreohanon 11:​24-26. Pag-edad ni Moises ug 40, mihimo siyag importanteng desisyon—“mas gipalabi niyang daogdaogon uban sa katawhan sa Diyos.” Ngano? Ang Bibliya nag-ingon: “Kay siya mitutok sa pagdawat sa ganti.” Si Moises nagpokus sa butang nga wala pa makita—ang katumanan sa saad ni Jehova nga mapanag-iya sa mga Israelinhon ang yuta sa Canaan. Mas importante para kang Moises nga mahimong bahin sa katumanan adto nga saad kay sa tanang bahandi ug kadungganan nga posible niyang nabatonan didto sa Ehipto. Sa ngadtongadto, giingnan ni Jehova si Moises: “Pagawsa sa Ehipto ang akong katawhan, ang mga Israelinhon.”—Ex. 3:10.

11. Giunsa pagpakita sa ubang alagad ni Jehova kaniadto nga tinuod para nila ang mga saad sa Diyos? (Hebreohanon 11:​39, 40)

¹¹ Sa Bibliya, daghan pa tag mabasa nga ehemplo sa mga alagad ni Jehova nga nagpakitag pagtuo sa saad sa Diyos. (Heb. 11:​31, 32) Tinuod kaayo para nila ang mga saad ni Jehova nga samag ila na ning nakita bisag wala pa ni matuman. Pero ayha pa nila maeksperyensiyahan ang bug-os nga katumanan niini nga mga saad dihang mabanhaw na sila sa bag-ong kalibotan. (Basaha ang Hebreohanon 11:​39, 40.) Sa pagkakaron, madasig ta dihang pamalandongon nato kon sa unsang paagi ang ilang pagkamatinumanon nagsuportar sa katuyoan ni Jehova. Sa unsang paagi ang atong pagtuo makatabang nato nga makalahutay sa mga kalisdanan ug makahimog maalamong mga desisyon?

ANG ATONG PAGTUO MAKATABANG NATO SA PAGLAHUTAY

12. Sa unsang paagi ang atong pagtuo sa mga saad ni Jehova makatabang nato nga makalahutay sa atong mga kalisdanan karon?

¹² Naay gisaad si Jehova kanato nga dili pa nato makita sa pagkakaron—ang bag-ong kalibotan diin magpuyo ta nga malipayon hangtod sa hangtod. (2 Ped. 3:13) Ang atong lig-ong pagtuo ana nga saad makatabang nato sa paglahutay sa atong mga kalisdanan. Pananglitan, maguol tingali kaayo ta dihang mahibaloan nato nga naa tay grabeng sakit. Pero sa ngadtongadto, dili na kaayo ta mabalaka ug mahimo na tang positibo. Ngano? Kay naa tay pagtuo sa saad sa Diyos nga sa bag-ong kalibotan, “walay residente nga moingon: ‘Masakiton ko.’” (Isa. 33:24) Sama kang Abraham, Sara, Moises, ug uban pa, klaro natong ‘makita’ ang mga saad ni Jehova nga samag natuman na gyod ni.

13. (a) Nganong makatabang ang pag-imagine nga tua na ta sa Paraiso? (b) Unsaon nato pagseguro nga lig-on ang basehanan sa atong pagtuo sa mga saad sa Diyos?

¹³ Ang usa ka paagi nga mapalig-on nimo ang imong pagtuo sa mga saad ni Jehova mao ang pag-imagine nga tua na ka didto sa Paraiso. Unsa kahay imong bation kon dili na ka masakit, wala nay kagubot, ug makita na nimong mabanhaw ang imong mga minahal? Ang mga hulagway sa atong mga publikasyon ug ang atong mga video makatabang nimo sa pagpamalandong kon unsa unyay imong kinabuhi sa bag-ong kalibotan. Pero dili igo nga basta mag-imagine lang ka sa imong paglaom sa umaabot. Kinahanglang lig-on ug basehanan ang imong pagtuo. Busa pangutan-a ang imong kaugalingon, ‘Unsa nga tagna o asoy sa Bibliya ang nakapalig-on sa akong pagtuo sa mga saad sa Diyos? Unsa nga mga teksto ang nakapalig-on sa akong pagsalig nga matuman gyod ang katuyoan ni Jehova?’ Kon imo nang pamalandongon, mahimong lig-on ang basehanan sa imong pagtuo sa mga saad sa Diyos.—Heb. 6:​17, 18.

ANG ATONG PAGTUO MAKATABANG NATO SA PAGHIMOG MAAYONG MGA DESISYON

14. Sa unsang paagi ang atong pagtuo sa mga saad sa Diyos makaapektar sa atong pagpilig kalingawan?

¹⁴ Ang atong pagtuo sa mga saad sa Diyos makatabang nato sa paghimog maalamong mga desisyon—pananglitan diha sa pagpilig kalingawan. Ang mga pelikula, musika, ug mga salida sa TV nga nagpasiugdag kapintasan, seksuwal nga imoralidad, ug espiritismo dili na unya maglungtad sa bag-ong kalibotan sa Diyos. Nahibalo ta ana kay gidumtan ni Jehova ang maong mga binuhatan. (Sal. 11:5; Pin. 21:8) Busa nganong motan-aw ug maminaw pa man ta ani nga wala na man ni sa bag-ong kalibotan? Ug kon malingaw ta aning mga butanga, makaingon ba ta nga nagpokus gyod ta sa mga saad ni Jehova?

15. Giunsa paggamit sa uban ang ilang panahon sa paglingawlingaw aron mapalig-on ang ilang pagtuo sa mga saad sa Diyos? (Tan-awa sab ang hulagway.)

¹⁵ Ang matag Kristohanon kinahanglang mohimog personal nga desisyon bahin sa paggamit nila sa ilang panahon sa paglingawlingaw. Aron matabangan sa ubang ginikanan ang ilang mga anak nga makabaton ug lig-ong pagtuo sa mga saad ni Jehova, midesisyon sila nga dihang maglingawlingaw iapil nila ang mga kalihokan nga makapalalom sa ilang apresasyon kang Jehova ug sa iyang organisasyon. Pananglitan, ang usa ka magtiayon nga naay tulo ka anak nga babaye miingon: “Dihang mobakasyon mi, mobisita mig mga Kingdom Hall o mga sangang buhatan aron mas makita namo ang panaghiusa sa atong mga igsoon sa tibuok kalibotan.” Ang laing magtiayon nga naa poy mga anak miingon: “Malingaw ming magkat-on bahin sa kalalangan. Hagaron namo ang ubang pamilya nga mouban namo dihang manuroy mi sa mga museum ug mga zoo nga naay dagko nga mga aquarium.” Kini nga mga pamilya naggamit sa ilang panahon sa paglingawlingaw aron mas molalom ang ilang apresasyon sa mga kalalangan ni Jehova ug sa atong panag-igsoonay. Nakatabang ni sa ilang mga anak nga mahimong mas tinuod para nila ang kinabuhi sa bag-ong kalibotan.

16. Kon lig-on tag pagtuo sa mga saad sa Diyos, sa unsang paagi ni makaapektar sa atong mga prayoridad sa kinabuhi? (1 Corinto 7:​29-31) (Tan-awa sab ang hulagway.)

¹⁶ Basaha ang 1 Corinto 7:​29-31. Ang atong pagtuo sa mga saad sa Diyos makatabang pod nato sa paghimog maalamong mga desisyon bahin sa materyal nga mga butang. Siyempre, gikinahanglan nato ni aron matagan-an ang atong kaugalingon. Pero dili nato prayoridad ang pagtigom ug daghang materyal nga mga butang. Ngano? Kay ang Bibliya nag-ingon: “Ang kalibotan nagakahanaw ug ang mga tinguha niini, apan siya nga nagabuhat sa kabubut-on sa Diyos magpabilin hangtod sa hangtod.” (1 Juan 2:17) Ang atong mga desisyon magpakita nga nagtuo ta sa giingon ani nga teksto. Kay nagpokus man ta sa mga saad sa Diyos, wala nato bug-os pahimusli ang mga butang niining kalibotana. Hinuon, giuna nato sa atong kinabuhi ang Gingharian sa Diyos.—Mat. 6:33.

17. Unsa nga mga desisyon ang gihimo sa uban tungod sa ilang pagtuo sa mga saad sa Diyos? (Tan-awa sab ang hulagway.)

¹⁷ Ang atong pagtuo sa mga saad sa Diyos makaapektar pod sa mga desisyon nga atong himoon para sa umaabot. Pananglitan, samtang magkahamtong ang mga batan-on, maghunahuna tingali sila: ‘Unsa kahay akong pilion nga trabaho? Magminyo ba ko? Ganahan ba kong magpamilya?’ Personal ni nga mga desisyon, ug naa ni mga kaayohan ug kalisdanan. (1 Cor. 7:​28, 37, 38) Ang pangutana, Ang imo bang mga desisyon nagpakita nga lig-on kag pagtuo nga temporaryo ra ning kalibotana ug nga hapit na natong matagamtam ang tinuod nga kinabuhi? (1 Tim. 6:19) Gipakita sa daghang batan-on nga naa silay lig-ong pagtuo pinaagi sa pagsulod sa bug-os panahong pag-alagad. Ug wala gyod sila magmahay. Hinuon, naeksperyensiyahan nila nga “naay dakong kaayohan kon ang usa dunay debosyon sa Diyos ug kontento.”—1 Tim. 6:6.

18. Unsa nga mga panalangin ang atong madawat karon kon lig-on tag pagtuo sa mga saad ni Jehova?

¹⁸ Sa ato nang nakat-onan, ang atong pagtuo sa mga saad ni Jehova para sa umaabot makahatag natog daghang panalangin bisan karon. Kon naa tay lig-ong pagtuo sa gisaad nga bag-ong kalibotan, makatabang ni nato sa paglahutay sa atong giatubang nga mga kalisdanan. Makatabang pod ni nato sa paghimog maalamong mga desisyon bahin sa paggamit sa atong panahon ug kon unsay atong prayoridad sa kinabuhi. Naghinamhinam gyod ta nga matuman na ang tanang gisaad ni Jehova sa umaabot. Sa pagkakaron, hinaot nga padayon natong ipokus ang atong mga mata “sa mga butang nga dili makita.”