Tinuod nga Hustisya—Posible pa Kaha?

Kaylap kaayo ang inhustisya bisag asa. Tagda ang duha ka pananglitan niini:

• Niadtong Enero 2018, usa ka huwes sa United States ang midesisyon nga buhian ang usa ka lalaki nga halos 38 ka tuig nang napriso. Napamatud-an siyang inosente tungod sa resulta sa DNA test.

• Niadtong Septiyembre 1994, tulo ka batan-ong lalaki sa Africa ang napriso kay dili sila magsundalo tungod sa ilang konsensiya. Niadtong Septiyembre 2020, sila 26 ka tuig nang napriso bisag walay pormal nga kasong gipasaka batok kanila ug wala sab sila gihusay sa korte.

Kon biktima ka sa inhustisya, lagmit parehas mog gibati ni Job sa kapanahonan sa Bibliya, kinsa miingon: “Nagsige kog pangayog tabang, apan walay hustisya.” (Job 19:7) Pero bisan pag ang tinuod nga hustisya morag imposibleng mahitabo, ang Bibliya nagsaad nga moabot ang panahon nga matapos ang inhustisya. Dugang pa, ang kaalam diha sa Bibliya makatabang nimo sa pagsagubang sa inhustisya karon.

Ang inhustisya mitungha tungod sa pagsalikway sa mga tawo sa giya sa Diyos. Gipakita sa Bibliya nga ang Diyos ray makahatag ug tinuod nga hustisya. (Isaias 51:4) Sa Bibliya, ang mga pulong nga gihubad ug “hustisya” ug “pagkamatarong” konektado kaayo. (Salmo 33:5) Ang mga buhat nga matarong, o husto sumala sa mga sukdanan sa Diyos, magpatunghag hustisya. Sa laing bahin, ang inhustisya maoy resulta sa sala, nga maoy paglapas sa matarong nga mga sukdanan sa Diyos. Konsideraha ang mosunod nga mga pananglitan:

• Kahakog. Ang hakog nga tinguha ug sala konektado kaayo. (Santiago 1:14, 15) Aron makuha ang ilang gusto, daghan ang nagpahimulos sa ubang tawo ug nagtratar kanila nga dili patas. Pero gusto sa Diyos nga unahon nato ang kaayohan sa uban.​—1 Corinto 10:24.

• Kawalay-alamag. Naay mga tawo nga wala makaamgo nga dili patas ang ilang pagtratar sa uban, pero sa panglantaw sa Diyos nakahimo gihapon silag sala. (Roma 10:3) Gani, ang kawalay-alamag miresulta sa kinagrabehang inhustisya nga nahitabo sukad—ang pagpatay kang Jesu-Kristo.—Buhat 3:15, 17.

• Pakyas nga mga organisasyon sa tawo. Ang sistema sa politika, komersiyo, ug relihiyon miingon nga ilang ginapasiugda ang patas nga pagtratar ug hustisya. Pero ang tinuod, kini nga mga organisasyon ang sagad nga hinungdan sa mga problema, korapsiyon, pagpihigpihig, kahakog, dili patas nga kahimtang sa pinansiyal, ug pagkapanatiko—kining tanan mahimong moresultag inhustisya. Ang uban niini nga organisasyon gisuportahan sa mga tawo nga maayog intensiyon. Pero bisag unsa pay paningkamot sa tawo, kon ilang isalikway ang giya sa Diyos, dili gyod sila molampos.​—Ecclesiastes 8:9; Jeremias 10:23.

Gidumtan sa Diyos ang inhustisya ug ang mga kinaiya ug buhat nga moresultag inhustisya. (Proverbio 6:16-18) Gigiyahan sa Diyos si propetang Isaias sa pagsulat: “Ako, si Jehova,a nahigugma sa hustisya; gidumtan nako ang pagpanulis ug pagkadili-matarong.”​—Isaias 61:8.

Ang Balaod nga gihatag sa Diyos sa karaang Israel nagpakita nga gusto niya nga ang iyang katawhan kanunayng magpakitag hustisya. Gisugo niya ang mga maghuhukom sa Israel nga dili modawat ug hiphip ug likayan ang bisan unsang buhat nga makatuis sa hustisya. (Deuteronomio 16:18-20) Wala siya malipay sa mga Israelinhon nga misupak niya pinaagi sa pagdaogdaog sa mga pobre ug makaluluoy, ug sa ulahi iyang gisalikway sila kay wala sila mosunod sa iyang mga sukdanan.​—Isaias 10:1-3.

Oo. Pinaagi ni Jesu-Kristo, wad-on sa Diyos ang sala nga maoy pangunang hinungdan sa inhustisya, ug iyang ibalik sa pagkahingpit ang mga tawo. (Juan 1:29; Roma 6:23) Nagtukod sab siyag Gingharian nga magpatunghag matarong nga bag-ong kalibotan ug magtaganag hustisya alang sa tanan. (Isaias 32:1; 2 Pedro 3:13) Aron makakat-og dugang bahin niini nga Gingharian sa langit, tan-awa ang video nga Unsa ang Gingharian sa Diyos?

Dihang duna nay hustisya sa tibuok yuta, ang tanan makabaton nag kalinaw ug kasegurohan. (Isaias 32:16-18) Gipabilhan sa Diyos ang kinabuhi sa matag tawo, busa ang tanan makasinatig patas nga pagtratar. Ang kaguol, pagtiyabaw, ug kasakit nga resulta sa inhustisya mawala na hangtod sa hangtod, ug bisan ang grabeng inhustisya nga imong naeksperyensiyahan anam-anam na nimong malimtan. (Isaias 65:17; Pinadayag 21:3, 4) Para sa dugang detalye, tan-awa ang artikulong “Unsay Himoon sa Gingharian sa Diyos?”

Oo. Daghang tagna sa Bibliya ang napamatud-ang natuman na. Dugang pa, ang Bibliya tukma sab kon bahin sa kasaysayan ug siyensiya ug ang tanang bahin niini wala magkasumpaki. Busa makasalig ka sa mga saad sa Bibliya. Ang mosunod nga mga artikulo naghatag ug dugang impormasyon:

• Nganong Makaseguro Kita nga ang Bibliya Pulong Gayod sa Diyos? (video)

• “Mga Tagna nga Natuman”

• “Mga Tagna Niini—Kanunayng Matuman”

• “Mga Katarongan Kon Nganong Kasaligan ang Bibliya”

Sa panahon sa Bibliya, dunay maayong mga tawo nga mihimog paagi dihang nakasinatig inhustisya. Pananglitan, si apostol Pablo nag-atubang ug dili patas nga paghusay nga posibleng moresulta sa iyang kamatayon. Imbes nga dawaton lang ang maong inhustisya, gigamit niya ang iyang legal nga mga katungod ug miapelar sa Cesar.​—Buhat 25:8-12.

Pero ang paningkamot sa mga tawo nga sulbaron ang tanang inhustisya sa kalibotan dili gyod molampos. (Ecclesiastes 1:15) Bisan pa niana, daghan ang natabangan nga makabaton ug kalinaw sa hunahuna bisag nag-atubang ug mga inhustisya tungod sa ilang pagtuo sa saad sa Diyos sa usa ka matarong nga bag-ong kalibotan.