Unsay Ipasabot sa Pagkahimong Balaan?

Ang pagkabalaan nagpasabot sa pagkawala-mahugawi. Ang Hebreohanong pulong nga gihubad ug “balaan” naggikan sa termino nga nagkahulogang “pagbulag” o “paglain.” Busa, ang pagkabalaan nagpasabot ug pagkalinain, pagkasagrado, pagkahinlo, ug pagkaputli.

Ang Diyos lang ang naghupot ug kinalabwang sukod sa pagkabalaan. Ang Bibliya nag-ingon: “Walay lain nga balaan sama kang Jehova.”a (1 Samuel 2:2) Busa ang Diyos lang ang magtakdag sukdanan sa pagkabalaan.

Ang pulong “balaan” mapadapat sa bisan unsang butang nga may direktang koneksiyon sa Diyos, ilabina ang mga butang nga gilain aron gamiton sa pagsimba. Pananglitan, ang Bibliya naghisgot bahin sa:

• Balaang mga dapit: Ang Diyos nakigsulti kang Moises duol sa nagdilaab nga tunokong tanom: “Ang dapit nga imong gitindogan maoy balaan nga yuta.”​—Exodo 3:2-5.

• Balaang mga kalihokan: Ang karaang Israel nagsimba kang Jehova pinaagig regular nga mga kapistahan nga gitawag ug “balaang mga panagkatigom.”​—Levitico 23:37.

• Balaang mga butang: Ang mga butang nga gigamit sa pagsimba sa Diyos didto sa karaang templo sa Jerusalem gitawag ug ‘balaan nga mga galamiton.’ (1 Hari 8:4) Kinahanglang tahoron ang maong balaang mga butang, pero kini dili angayng simbahon.b

Oo. Ang Diyos nagsugo sa mga Kristohanon: “Kinahanglan kamong magmabalaan, tungod kay ako balaan.” (1 Pedro 1:16) Siyempre, walay tawong makakab-ot sa hingpit nga sukdanan sa Diyos maylabot sa pagkabalaan. Pero ang tawo nga mosunod sa matarong nga mga balaod sa Diyos pagaisipong ‘balaan ug dalawaton sa Diyos.’ (Roma 12:1) Makita sa sinultihan ug binuhatan sa usa ka tawo nga siya naningkamot nga mahimong balaan. Pananglitan, iyang gisunod ang tambag sa Bibliya nga ‘magmabalaan ug ayran ang pakighilawas’ ug ‘magmabalaan sa tanang panggawi.’​—1 Tesalonica 4:3; 1 Pedro 1:15.

Oo. Kon ang tawo walay pagpakabana sa mga sukdanan sa Diyos bahin sa panggawi, ang maong tawo dili na isipon sa Diyos ingong balaan. Pananglitan, bisag ang basahon sa Hebreohanon naghisgot ug “mga igsoong balaan,” kini nagpasidaan usab nga posibleng maugmad nila “ang daotang kasingkasing nga walay pagtuo pinaagi sa pagpahilayo sa buhi nga Diyos.”​—Hebreohanon 3:1, 12.

Sayop nga pagtuo: Ang tawo mahimong mas balaan pinaagig selibasiya o pagpanaad nga dili magminyo.

Ang tinuod: Bisag personal nga desisyon sa usa ka Kristohanon nga dili magminyo, ang selibasiya mismo dili makahatag ug balaang baroganan uban sa Diyos. Tinuod, kadtong wala magminyo mas makapokus sa pagsimba sa Diyos. (1 Corinto 7:32-34) Pero gipakita sa Bibliya nga ang mga minyo mahimo usab nga balaan. Gani, usa sa mga apostoles ni Jesus​—si Pedro—​ang minyo.​—Mateo 8:14; 1 Corinto 9:5.