Kalisdanan nga Nagpabanaag ug Paglaom

“Sa kataposang mga adlaw moabot ang makuyaw nga mga panahong lisod sagubangon.”—2 TIMOTEO 3:1.

NADUNGGAN o nasaksihan mo na ba kining makasubong mga panghitabo?

● Usa ka makamatayng sakit mikalas ug daghang kinabuhi.

● Ginatos ang namatay sa gutom.

● Tungod sa linog linibo ang namatay ug daghan ang nawad-ag panimalay.

Sa sunod nga mga panid, imong mabasa ang makapahinuklog nga kamatuoran sa mga panghitabong sama niini. Makita sab nimo nga gitagna sa Bibliya nga kini mahitabo sulod sa yugto sa panahon nga gitawag ug “kataposang mga adlaw.”a

Apan, dili katuyoan niini nga mga artikulo ang pagkombinsir kanimo nga nagkinabuhi ta sa usa ka gubot nga kalibotan. Tingali imo na mismo kining nakita. Hinunoa, kini gidisenyo aron makabaton kag paglaom. Ipakita niini nga ang katumanan niining unom ka tagna nagpasabot nga ang “kataposang mga adlaw” hapit nang matapos. Hisgotan usab niini nga serye ang pipila ka komon nga pagtutol sa mga ebidensiya ug kini magpalig-on sa imong pagsalig nga may sanag nga kaugmaon sa unahan.

[Footnote]

Tagna 1. Mga Linog

“Aduna unyay dagkong mga linog.”—LUCAS 21:11.

● Si Winnie, nga usa ka tuig ug tunga ang edad, naluwas sa kagun-oban sa Haiti. Nadunggan sa usa ka grupo sa mga reporter sa TV ang iyang hinayng hilak. Siya naluwas sa linog, apan ang iyang mga ginikanan wala.

UNSAY GIPAKITA NIINI? Sa dihang ang Haiti gitay-og sa linog nga may gikusgong 7.0 niadtong Enero 2010, kapin sa 300,000 ka tawo ang nangamatay. May lain pang 1.3 ka milyon ang kalit lang nga nawad-ag pinuy-anan. Bisag kadto grabe kaayo, ang linog sa Haiti maoy usa lamang sa 18 ka dagkong linog nga nahitabo sa tibuok kalibotan tali sa Abril 2009 ug Abril 2010.

UNSAY KOMON NGA PAGTUTOL? Dili mas daghang linog ang atong nasinatian karon; tungod sa modernong teknolohiya, mas dali lang kitang makabantay karon kay sa mga tawo kaniadto.

MAKATARONGANON BA KINI? Tagda kini nga kamatuoran: Wala ipasiugda sa Bibliya ang gidaghanon sa linog nga mahitabo sa kataposang mga adlaw. Hinunoa, kini nag-ingon nga ang “dagkong mga linog” mahitabo “sa nagkalainlaing mga dapit,” nga maoy usa sa talagsaong mga ilhanan niining hinungdanong yugto sa kasaysayan.—Marcos 13:8; Lucas 21:11.

UNSAY IMONG HUNAHUNA? Nasinatian na ba nato ang dagkong linog, sama sa gitagna sa Bibliya?

Ang mga linog dili lamang mao ang ebidensiya aron atong ikaingong nagkinabuhi na ta sa kataposang mga adlaw. Apan, kini maoy usa lamang sa mga tagna nga natuman. Tagda ang ikaduha.

[Blurb sa panid 4]

“Kami [mga geophysicist] nagtawag niini nga dagkong linog. Ang tanan nagtawag niini nga makalilisang.”—KEN HUDNUT, U.S. GEOLOGICAL SURVEY.

[Picture Credit Line sa panid 4]

© William Daniels/Panos Pictures

Tagna 2. Gutom

“Aduna unyay mga kanihit sa pagkaon.”—MARCOS 13:8.

● Usa ka lalaki ang midangop sa baryo sa Quaratadji, Niger. Nangabot usab ang iyang mga paryente ug mga igsoon gikan sa ilaya aron makalingkawas sa gutom. Apan, ang lalaki nag-inusarang naghigda sa banig. Nganong siya nag-inusara? “Dili siya makapakaon [sa iyang pamilya] ug dili siya makaako sa pagtan-aw kanilang nagutman,” miingon si Sidi, ang pangulo sa baryo.

UNSAY GIPAKITA NIINI? Sa tibuok kalibotan, halos 1 sa 7 ka tawo ang walay igong makaon kada adlaw. Mas grabe sa sub-Saharan Africa, diin 1 sa 3 ka tawo ang dugay nang walay igong makaon. Aron masabtan ang maong kahimtang, handurawa ang usa ka pamilya nga may usa ka amahan, inahan, ug usa ka bata. Kon ang pagkaon igo lamang sa duha, kinsay dili makakaon? Ang amahan? ang inahan? ang bata? Mao kini ang hagit nga kinahanglan nilang atubangon matag adlaw.

UNSAY KOMON NGA PAGTUTOL? Ang yuta dunay dagayang pagkaon alang sa tanan. Kinahanglan lang nga ayohon pagdumala ang mga kahinguhaan sa yuta.

MAKATARONGANON BA KINI? Tinuod, ang mga mag-uuma makapatungha ug makapadalag mas daghang pagkaon karon. Gani, ang gobyerno makahimo man unta sa pagdumala sa mga abot sa yuta aron masulbad ang gutom. Apan, bisan pa sa ilang mga paningkamot sa daghang katuigan, sila wala makahimo niana.

UNSAY IMONG HUNAHUNA? Natuman ba ang Marcos 13:8? Bisan pa sa pag-uswag sa teknolohiya, ang kakulang ba sa pagkaon nakaapekto sa mga tawo sa tibuok kalibotan?

Sagad nga human sa mga linog ug gutom motungha ang lain pang mga problema nga maoy laing bahin sa ilhanan sa kataposang mga adlaw.

[Blurb sa panid 5]

“Maluwas unta ang kapin sa un-tersiya sa kabataan nga namatay tungod sa pulmonya, kalibang ug uban pang mga sakit kon dili pa sila kulag pagkaon.”—ANN M. VENEMAN, KANHING EXECUTIVE DIRECTOR SA UN CHILDREN’S FUND.

[Picture Credit Line sa panid 5]

© Paul Lowe/Panos Pictures

Tagna 3. Sakit

“Ang mga tawo . . . mag-antos sa mangilngig nga mga sakit.”—LUCAS 21:11, Contemporary English Version.

● Si Bonzali, usa ka opisyal sa public health sa usa ka nasod sa Aprika nga gigusbat sa gubat, naningkamot sa pagtambal sa mga minero sa iyang lungsod nga himalatyon na sa virus nga Marburg.a Wala dayon matagad ang iyang gihangyong tabang gikan sa mga opisyales sa dakong siyudad. Miabot ra ang tabang upat ka bulan sa ulahi, apan patay na si Bonzali. Natakdan siya sa mga minero.

UNSAY GIPAKITA NIINI? Ang mga impeksiyon sa respiratoryo (sama sa pulmonya), kalibang, HIV/AIDS, TB, ug malarya maoy lakip sa pangunang makamatay nga sakit nga mihampak sa tawo. Sa di pa dugayng tuig, gibanabana nga mga 10.7 ka milyon ang namatay gumikan niining lima ka matang sa sakit. Sa laing pagkasulti, mga usa ka tawo ang mamatay kada tulo ka segundo, sulod sa usa ka tuig.

UNSAY KOMON NGA PAGTUTOL? Ang populasyon sa kalibotan padayong nag-uswag, busa, natural lang nga mas daghan ang masakit ug mas daghan pod ang matakdan.

MAKATARONGANON BA KINI? Ang populasyon sa kalibotan kusog nga miuswag, ingon man usab ang katakos sa tawo sa pag-ila, pagkontrolar, ug pagtambal sa sakit. Nan, dili ba angay untang mamenosan ang sakit ug ang epekto niini diha sa tawo? Apan, sukwahi kaayo ang nagakahitabo.

UNSAY IMONG HUNAHUNA? Ang mga tawo nag-antos ba sa mangilngig nga mga sakit ingon sa gitagna sa Bibliya?

Ang mga linog, gutom, ug sakit naghatag ug kadaot sa minilyon nga katawhan. Minilyon pa ang nag-antos sa kamot sa isigkatawo—daghan ang nabiktima sa mga tawo nga angay untang manalipod kanila. Matikdi kon unsay gitagna sa Bibliya nga mahitabo.

[Footnote]

[Blurb sa panid 6]

“Makalilisang nga kan-on ka sa leyon o sa uban pang mananap, apan labaw pa gayong makalilisang nga inanay kang ut-oton sa mangilngig nga sakit ug masaksihan mong mao kanay nagakahitabo sa imong palibot.”—EPIDEMIOLOGIST MICHAEL OSTERHOLM.

[Picture Credit Line sa panid 6]

© William Daniels/Panos Pictures

Tagna 4. Walay Kinaiyanhong Gugma

“Ang mga tawo . . . walay kinaiyanhong pagbati sa ilang mga pamilya.”—2 TIMOTEO 3:1-3, God’s Word Bible

● Si Chris nga nagtrabaho sa usa ka grupo nga nagtabang sa mga dinagmalan sa panimalay didto sa North Wales miingon: “Nahinumdom ko sa usa ka babayeng midangop kanamo. Siya gibun-og pag-ayo, gani wala na ko halos makaila niya sukad sa una namong pagkita.” Siya midugang: “Nahugno pag-ayo ang pagbati sa ubang mga babaye nga gani sila halos dili makatan-aw kanimo.”

UNSAY GIPAKITA NIINI? Sa usa ka nasod sa Aprika, mga 1 sa matag 3 ka babaye ang giabusohan samtang bata pa. Ang usa ka surbi nga gihimo diha niini nagpakita nga kapin sa untersiya sa mga lalaki ang miingon nga okey ra nga dagmalan nila ang ilang asawa. Apan, dili lamang mga babaye ang dinagmalan sa panimalay. Pananglitan, sa Canada, halos 3 sa 10 ka lalaki ang gidagmalan o giabusohan sa ilang mga kaipon.

UNSAY KOMON NGA PAGTUTOL? Dugay nang nahitabo ang kapintasan sulod sa panimalay. Mas gihatagan lang kini ug pagtagad karon kay kaniadto.

MAKATARONGANON BA KINI? Sa miaging mga dekada, gipauswag ang kampanya batok sa kapintasan sulod sa panimalay. Apan kini ba nakapakunhod sa maong kapintasan? Wala. Mas mikaylap pa hinuon ang kawalay kinaiyanhong pagbati karon.

UNSAY IMONG HUNAHUNA? Natuman ba ang 2 Timoteo 3:1-3? Daghan ba ang nawad-ag kinaiyanhong pagbati sa ilang pamilya?

Ang ikalimang tagna nga natuman karon maoy bahin sa atong yuta nga gipuy-an. Tagda kon unsay giingon sa Bibliya mahitungod niini.

[Blurb sa panid 7]

“Ang kapintasan sulod sa panimalay maoy usa sa mga krimen nga sagad wala itaho sa katilingban. Sa aberids, 35 ka beses bun-ogon ang usa ka babaye una pa kini mosumbong sa polis.”—USA KA BABAYENG TIGPAMABA SA WALES DOMESTIC ABUSE HELPLINE.

Tagna 5. Paglaglag sa Yuta

‘[Ang Diyos] magalaglag sa mga nagalaglag sa yuta.’—PINADAYAG 11:18.

● Si Mr. Pirri maoy usa ka manananggot sa palma sa Kpor, Nigeria. Ang iyang pangita nadaot tungod sa pag-agas sa daghang aseite diha sa Niger Delta. “Nangamatay ang mga isda, nadaot ang among mga panit ug ang among mga sapa,” siya miingon. “Wala na koy panginabuhian.”

UNSAY GIPAKITA NIINI? Sumala sa mga eksperto, 6.5 ka milyong tonelada sa basura ang gitambak sa dagat kada tuig. Mga 50 porsiyento sa maong basura maoy mga plastik nga gatosan pa ka tuig una madugta. Gawas pa sa pagdaot sa yuta, gititi usab sa mga tawo ang mga kahinguhaan niini. Gipakita sa mga pagtuon nga kinahanglang palabyon una ang usa ka tuig ug lima ka bulan aron ikapasig-uli sa yuta ang nakonsumo sa mga tawo sa usa ka tuig. “Kon ang presenteng pag-uswag sa populasyon ug konsumo magpadayon, magkinahanglan tag katumbas sa duha ka planetang Yuta sa 2035,” matod sa Sydney Morning Herald nga mantalaan sa Australia.

UNSAY KOMON NGA PAGTUTOL? Maayo kaayong mangitag paagi ang mga tawo. Masulbad nato kining mga problemaha ug maluwas ang yuta.

MAKATARONGANON BA KINI? Daghang tawo ug grupo ang makugihong nangampanya bahin sa mga problema sa kalikopan. Apan kaylap gihapon ang paghugaw sa yuta.

UNSAY IMONG HUNAHUNA? Kinahanglan bang mangilabot ang Diyos ug luwason ang atong planeta gikan sa kadaot—sumala sa iyang gisaad?

Gawas pa sa lima ka tagna nga bag-o lang natong gihisgotan, ang Bibliya nagtagna usab ug positibong mga panghitabo sa kataposang mga adlaw. Tagda ang usa ka pananglitan diha sa ikaunom nga tagna.

[Blurb sa panid 8]

“Ang kanhi kong gipuy-an nga samag paraiso nahimo nang tambakanag makahilong mga basura.”—ERIN TAMBER, USA KA MOLUPYO SA GULF COAST, UNITED STATES, BAHIN SA KADAOT SA PAG-AGAS SA ASEITE NIADTONG 2010 SA GULF OF MEXICO.

[Kahon sa panid 8]

Ang Diyos ba Maoy Mabasol?

Kay gitagna man sa Bibliya ang daotang mga panghitabo nga atong nasaksihan karon, nagpasabot ba kana nga ang Diyos maoy mabasol niana? Siya ba gayod ang hinungdan sa atong pag-antos? Imong makaplagan ang makapatagbawng tubag niining mga pangutanaha sa kapitulo 11 sa librong Unsay Tinuod nga Gitudlo sa Bibliya? nga gipatik sa mga Saksi ni Jehova.

[Picture Credit Line sa panid 8]

U.S. Coast Guard photo

Tagna 6. Tibuok-Yutang Pagsangyaw

“Kining maayong balita sa gingharian igawali sa tibuok gipuy-ang yuta.”—MATEO 24:14.

● Si Vaiatea nagpuyo sa usa ka hilit nga isla sa Pasipiko sa Tuamotu Archipelago. Bisan tuod ang Tuamotu gilangkoban sa duolag 80 ka gagmayng pulo nga nagkatag diha sa luna nga kapin sa 802,900 ka kilometro kuwadrado, mga 16,000 lamang ang namuyo niini. Apan, si Vaiatea ug ang iyang mga silingan nakontak gihapon sa mga Saksi ni Jehova. Ngano? Tungod kay ang mga Saksi buot mopaambit sa maayong balita sa Gingharian sa Diyos sa tanang tawo, bisan diin sila nagpuyo.

UNSAY GIPAKITA NIINI? Ang mensahe sa Gingharian miabot sa tanang suok sa yuta. Sa tuig 2010 lamang, ang mga Saksi ni Jehova migugol ug kapin sa 1.6 ka bilyong oras sa pagsangyaw sa maayong balita sa 236 ka kayutaan. Sa aberids, ang matag Saksi misangyaw ug 30 minutos kada adlaw. Sa miaging dekada, sila nakahimo ug nakapanagtag ug kapin sa 20 ka bilyong publikasyon nga binase sa Bibliya.

UNSAY KOMON NGA PAGTUTOL? Ang mensahe sa Bibliya gisangyaw na sukad pa sa karaang panahon.

MAKATARONGANON BA KINI? Tinuod, daghan ang nagsangyaw sa mensahe sa Bibliya. Apan, ang kadaghanan naghimo niana sulod lamang sa mubong panahon ug sa limitadong dapit. Sa kasukwahi, ang mga Saksi ni Jehova naghimog organisado, tibuok-kalibotan nga pagsangyaw nga nakaabot sa gatosan ka milyong tawo. Sila milahutay sa pagsangyaw taliwala sa grabeng pagsupak sa pipila ka gamhanan kaayo ug bangis nga mga organisasyon sa tawo sukad kaniadto.a (Marcos 13:13) Dugang pa, ang mga Saksi ni Jehova wala suweldohi aron mosangyaw. Hinunoa, sila kinabubut-ong migugol sa ilang panahon, ug nagtanyag sa ilang mga literatura nga walay bayad. Ang ilang buluhaton gipaluyohan pinaagig boluntaryong mga donasyon.

UNSAY IMONG HUNAHUNA? Ang “maayong balita sa gingharian” ginasangyaw ba sa tibuok kalibotan? Ang katumanan ba niini nga tagna nagpasabot nga ang usa ka sanag nga kaugmaon haduol na?

[Footnote]

[Blurb sa panid 9]

“Samtang gitugot pa ni Jehova, padayon kitang magmasiboton sa pagsangyaw sa maayong balita, nga himoon ang tanang paagi aron masangyawan ang mga tawo.”—2010 TINUIG NGA BASAHON SA MGA SAKSI NI JEHOVA.

Sanag nga Kaugmaon Haduol Na!

“Sa dili na madugay, ug ang daotan mawala na . . . Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.”—SALMO 37:10, 11.

BUOT ba nimong makita ang katumanan sa maong tagna? Siyempre, oo ang imong tubag. Adunay lig-ong katarongan sa pagtuo nga hapit na kining matuman.

Ang nag-unang mga artikulo naghisgot sa pipila lang ka tagna sa Bibliya nga tin-awng nagpaila nga kita nagkinabuhi na sa “kataposang mga adlaw.” (2 Timoteo 3:1-5) Giinspirar sa Diyos ang mga magsusulat sa Bibliya sa pagtagna sa maong mga panghitabo aron kita makabaton ug paglaom. (Roma 15:4) Ang pagkatuman sa maong mga tagna nagpasabot nga ang mga kalisdanang atong nasinatian karon hapit nang matapos.

Unsay mahitabo human sa kataposang mga adlaw? Ang Gingharian sa Diyos magamando sa tanang katawhan. (Mateo 6:9) Tagda kon giunsa paghubit sa Bibliya ang kahimtang sa yuta nianang panahona:

● Ang gutom mawala na. “Aduna unyay dagayang lugas sa ibabaw sa yuta; sa tumoy sa kabukiran adunay pagsugwak.”—Salmo 72:16.

● Ang sakit mahanaw na. “Walay pumoluyo nga moingon: ‘Ako masakiton.’”—Isaias 33:24.

● Ipasig-uli ang katahom sa yuta. “Ang kamingawan ug ang walay-tubig nga rehiyon magsadya, ug ang desyertong kapatagan magakalipay ug mamulak sama sa safron.”—Isaias 35:1.

Pipila lamang kini sa makapadasig nga mga tagna sa Bibliya nga hapit nang matuman. Mahimo kang mangutana sa mga Saksi ni Jehova kon nganong masaligon kaayo sila nga ang usa ka sanag nga kaugmaon haduol na.