Ang Bibliya Makabag-o sa Kinabuhi

UNSAY nagtukmod sa usa ka lalaki sa pagbalik sa relihiyon nga iyang gitalikdan? Sa unsang paagi ang usa ka batan-ong lalaki nakakaplag sa matang sa amahan nga dugay na niyang gipangandoy? Basaha ang ilang asoy.

“Kinahanglan Kong Mobalik Kang Jehova.”—ELIE KHALIL

NATAWO: 1976

NASOD: CYPRUS

KANIADTO: BADLONGANON

KAAGI: Ako natawo sa Cyprus apan nagdako sa Australia. Ang akong ginikanan mga Saksi ni Jehova, ug gihimo nila ang tanan aron masilsil kanako ang gugma kang Jehova ug sa iyang Pulong, ang Bibliya. Apan, sa tin-edyer pa ko misugod ko pagrebelde. Moeskapo ko sa balay magabii aron makigkita sa ubang batan-on. Mangawat mig awto ug mohimog daghan pang binuang.

Sa sinugdan, sekreto nako kadtong gihimo kay nahadlok kong masuko ang akong ginikanan. Apan inanayng nawala ang maong kahadlok. Nakigbarkada kog mga magulang kaayo nako nga wala mahigugma kang Jehova, ug dili sila maayog impluwensiya nako. Sa kataposan, akong giingnan ang akong ginikanan nga dili na ko gustong mag-apil-apil sa ilang relihiyon. Mapailobon silang naningkamot sa pagtabang nako, apan ako kanang gibalewala. Naguol kaayo ang akong ginikanan.

Pagbiya nako sa balay, misugod ko pagdroga, nga nananom ug namaligya pa ganig daghan kaayong marijuana. Imoral kog kinabuhi ug pirme kong naa sa naytklab. Putong na sad kaayo ko. Kon may makasulti o makabuhat ug butang nga dili nako gusto, mosilaob dayon ko sa kasuko ug sagad akong singgitan ug sumbagon ang maong tawo. Sa laktod, akong gibuhat ang tanan nga gitudlo kanako nga dili angayng buhaton sa usa ka Kristohanon.

GIBAG-O SA BIBLIYA ANG AKONG KINABUHI: Nasuod nako ang usa sab ka tigdroga kansang amahan namatay sa bata pa siya. Sagad magpulaw mig estorya. May mga gabii nga mosulti siya nga gimingaw kaayo siya sa iyang amahan. Kay nagdako ko nga nahibalo sa paglaom sa pagkabanhaw, ako siyang giestoryahan bahin kang Jesus—nga siya nagbanhaw ug mga patay ug nagsaad nga iya kanang buhaton pag-usab sa umaabot. (Juan 5:28, 29) “Tiaw mo na, makita nimo pag-usab ang imong Papa,” ako siyang ingnan. “Kitang tanan mahimong mabuhi sa walay kataposan sa Paraiso sa yuta.” Kadto nakatandog gayod kaniya.

Sa laing mga higayon, ang akong higala maghisgot bahin sa kataposang mga adlaw o sa doktrina sa Trinidad. Akong gamiton ang iyang Bibliya ug ipakita kaniya ang mga teksto nga nagpadayag sa kamatuoran bahin kang Jehova nga Diyos, kang Jesus, ug sa kataposang mga adlaw. (Juan 14:28; 2 Timoteo 3:1-5) Sa sige nakog estorya sa akong higala bahin kang Jehova, mas nagsige kog hunahuna bahin Kaniya.

Sa hinayhinay, ang binhi sa kamatuoran nga gipaningkamotan sa akong ginikanan nga matisok sa akong kasingkasing misugod pagtubo. Pananglitan, may mga panahon nga kon naa ko sa parti ug nagdroga kauban sa akong mga barkada, kalit lang nakong mahunahunaan si Jehova. Daghan kanila ang nag-angkong nahigugma sa Diyos, apan wala kana makita sa ilang panggawi. Kay dili gustong mahisama nila, akong naamgohan kon unsay angay nakong buhaton. Kinahanglan kong mobalik kang Jehova.

Siyempre, sayon ra ang pagsulti kon unsay buhaton, apan lisod ang pagbuhat niana. Ang pipila ka kausaban dali rang himoon sama sa pagbiya sa droga. Wala na sab ko makig-uban sa akong mga barkada, ug nagsugod ko pagtuon sa Bibliya uban sa usa ka Kristohanong ansiyano.

Apan mas lisod ang ubang kausaban. Nalisdan ko pagkontrolar sa akong kasuko. Usahay makapugong ko, apan may mga panahon nga dili. Mahasol ko human niana, nga maghunahunang pakyas ko. Kay naluya, giduol nako ang ansiyano nga nagtuon nako sa Bibliya. Ang ansiyano mapailobon ug maluloton kaayo, ug siya nakadasig gayod kanako. Dihay higayon nga gipabasa ko niya sa usa ka artikulo sa Bantayanang Torre bahin sa kahinungdanon sa dili gayod pagsurender.a Among gihisgotan kon unsay angay nakong buhaton sa dihang masuko ko. Sa tabang sa maong artikulo ug sa kanunayng pag-ampo kang Jehova, inanay nakong nakontrolar ang akong pagkamasuk-anon. Sa kataposan, sa Abril 2000, ako nabawtismohan ingong Saksi ni Jehova. Siyempre, nalipay kaayo ang akong ginikanan.

MGA KAAYOHAN NGA AKONG NABATONAN: Karon, duna na koy kalinaw sa hunahuna ug hinlong konsensiya, kay nahibalo ko nga wala na nako hugawi ang akong lawas pinaagig droga o imoralidad. Bisag unsay akong buhaton, nagtrabaho man, nagtambong ug Kristohanong tigom, o naglingawlingaw, ako mas malipayon. Positibo na kog panglantaw sa kinabuhi.

Nagpasalamat ko kang Jehova tungod sa akong ginikanan, kinsa wala gyod mohunong sa pagtabang nako. Naghunahuna sab ko sa giingon ni Jesus sa Juan 6:44: “Walay tawo nga makaari kanako gawas kon ang Amahan, kinsa nagpadala kanako, magkabig kaniya.” Natandog ko sa paghunahuna nga nakabalik ko kang Jehova tungod kay iya kong gikabig.

“Nangandoy Kog Amahan.”—MARCO ANTONIO ALVAREZ SOTO

NATAWO: 1977

NASOD: CHILE

KANIADTO: MEMBRO SA DEATH-METAL NGA BANDA

KAAGI: Gipadako ko sa akong inahan sa Punta Arenas, usa ka nindot nga siyudad nga nahimutang sa Strait of Magellan duol sa habagatang tumoy sa South America. Nagbulag ang akong ginikanan sa 5 anyos pa ko ug tungod niana mibati kong giabandonar. Nangandoy kog amahan.

Si Mama nagtuon ug Bibliya uban sa mga Saksi ni Jehova, ug iuban ko niya sa Kristohanong mga tigom sa Kingdom Hall. Apan, dili ko ganahang motambong, ug sagad sapoton ko inigpaingon didto. Pag-edad nakog 13, mihunong na gyod kog tambong.

Nianang panahona, nahilig ko sa musika, ug akong naamgohan nga naa diay koy abilidad niini. Pag-edad nakog 15, ako motugtog ug mga musikang heavy-metal ug death-metal sa mga pista, bar, ug mga salosalo. Kay nakig-uban ko sa batid nga mga musikero, nainteres ko sa klasikal nga musika. Misugod ko pagtuon ug musika diha sa usa ka conservatory sa among dapit. Pagka-20 anyos nako, mibalhin ko sa kaulohan, ang Santiago, aron ipadayon ang akong pagtuon. Nagpadayon sab ko pagtugtog diha sa heavy-metal ug death-metal nga mga banda.

Nianang panahona, gibati nako ang kahaw-ang. Sa paningkamot nga malingaw, ako maghuboghubog ug magdroga uban sa akong mga kauban sa banda, kinsa akong giisip nga pamilya. Rebelyoso kog tinamdan, nga dayag kaayo sa akong panagway. Nagsul-ob kog itom, nagpabungot, ug nagpataas sa akong buhok halos hangtod sa hawak.

Kadaghan kong makakitag away ug madakpan sa polis. Kas-a nakainom ko ug akong giatake ang usa ka grupo sa mga tigbaligyag droga nga nagsamoksamok nako ug sa akong mga barkada. Gikulata ko pag-ayo sa grupo maong nalugti ang akong apapangig.

Apan, ang nakapasakit gyod nako mao ang mga suod nako. Usa ka adlaw niana, akong nadiskobrehan nga ang akong trato may relasyon diay sa akong suod nga higala, ug gitago ni sa tanan nakong barkada. Nahugno kaayo ko.

Mibalik kog puyo sa Punta Arenas, diin nagsugod ko pagtudlog musika ug pagtrabaho ingong tigtugtog ug cello. Nagpadayon sab ko sa pagtugtog ug pagrekord ug musika uban sa heavy-metal ug death-metal nga mga banda. Nahimamat nako ang usa ka guwapang babaye nga ginganlag Sussan, ug nag-ipon mi. Sa ulahi, nasayran ni Sussan nga ang iyang inahan nagtuo sa Trinidad apan ako wala. “Busa, unsa man gyoy tinuod?” siya nangutana. Ako mitubag nga nahibalo ko nga bakak ang doktrina sa Trinidad apan dili lang nako kini mapamatud-an sa Bibliya. Apan, nasayod ko kon kinsay makahimo niana. Ako siyang giingnan nga ang mga Saksi ni Jehova makapakita kaniya sa kamatuoran gikan sa Bibliya. Dayon gihimo nako ang usa ka butang nga wala nako mahimo sulod sa daghang tuig—ako miampo sa Diyos ug nangayog tabang kaniya.

Pipila ka adlaw sa ulahi, nakakita kog lalaki nga morag pamilyar, ug ako siyang gipangutana kon Saksi ni Jehova ba siya. Bisag klaro kaayo nga nahadlok siya sa akong hitsura, siya malulotong mitubag sa akong pangutana bahin sa mga tigom sa Kingdom Hall. Kombinsido ko nga kini maoy tubag sa akong pag-ampo. Ako miadto sa Kingdom Hall ug milingkod sa likod aron walay makamatikod nako. Apan, daghan ang nakahinumdom nako sa dihang nagtambongan ko sa bata pa ko. Ila kong giabiabi ug gihalog mao nga gibati nako ang tumang kamalinawon. Mora kog nakabalik sa among panimalay. Sa dihang akong nakita ang nagtuon nako sa Bibliya sa bata pa ko, ako siyang gihangyo nga tun-an ko niyag balik.

GIBAG-O SA BIBLIYA ANG AKONG KINABUHI: Usa ka adlaw niana, akong gibasa ang Proverbio 27:11, nga nag-ingon: “Magmaalamon, anak ko, ug lipaya ang akong kasingkasing.” Natandog ko nga ang usa ka ubos nga tawo makapalipay sa Maglalalang sa uniberso. Akong naamgohan nga si Jehova mao ang matang sa Amahan nga akong gipangita sa tibuok kong kinabuhi!

Buot nakong pahimut-an ang akong langitnong Amahan ug buhaton ang iyang kabubut-on, apan naulipon ko sa droga ug sa alkohol sulod sa daghang katuigan. Akong nasabtan ang gitudlo ni Jesus sa Mateo 6:24 nga nag-ingong “walay usa nga mahimong ulipon sa duha ka agalon.” Samtang nanglimbasog ko sa paghimog mga kausaban, ang prinsipyo sa 1 Corinto 15:33 nakaapektar gayod kanako: “Ang daotang pakig-uban makadaot sa mapuslanong pamatasan.” Akong naamgohan nga dili gyod ko makahunong sa akong bisyo kon mag-adtoan gihapon ko sa mao rang mga lugar ug makig-uban sa samang mga tawo. Tin-aw ang tambag sa Bibliya: Kinahanglan kong mohimog dagkong kausaban aron makabiya sa mga butang nga nakababag nako.—Mateo 5:30.

Tungod sa akong hilig sa musika, nalisdan kaayo ko pagbiya sa heavy-metal. Apan sa tabang sa akong mga higala sa kongregasyon, nakabiya ra ko. Mihunong na ko sa paghuboghubog ug sa pagdroga. Nagpatupi na sad ko, namalbas, ug dili na pirmeng magsul-ob ug itom. Sa dihang giingnan nako si Sussan nga gusto kong magpatupi, nahibulong kaayo siya. Miingon siya, “Mouban ko nimo aron makita nako kon unsay naa sa Kingdom Hall!” Giganahan siya sa iyang nakita, ug sa wala madugay nagtuon na sab siya sa Bibliya. Sa ngadtongadto, nagpakasal mi ni Sussan. Pagka-2008 kami gibawtismohan ingong mga Saksi ni Jehova. Nalipay ming magkauban na mi ni Mama sa pag-alagad kang Jehova.

MGA KAAYOHAN NGA AKONG NABATONAN: Nakalingkawas ko sa kalibotan sa mini nga kalipay ug maluibong mga kauban. Ganahan gihapon kog musika, apan pilion na nako kini. Akong gamiton ang akong mga eksperyensiya sa pagtabang sa mga pamilya ug sa uban, ilabina sa mga batan-on. Gusto nakong tabangan silang masabtan nga kadaghanan sa gitanyag sa kalibotan daw makadani, apan sa kataposan kini maoy “mga basura” lamang.—Filipos 3:8.

Nakakaplag kog maunongong mga higala diha sa Kristohanong kongregasyon, diin naghari ang gugma ug kalinaw. Labaw sa tanan, pinaagi sa pagpakigsuod kang Jehova, nakaplagan ra gyod nako ang akong Amahan.

[Footnote]

[Blurb sa panid 13]

“Nakabalik ko kang Jehova tungod kay iya kong gikabig”