Si Abraham—Usa ka Panig-ingnan sa Tanang Nagatinguha sa Pakighigala sa Diyos
“Siya wala maluya sa pagtuo, . . . kay bug-os nagtuo nga kon unsay gisaad [sa Diyos] siya makaarang sa pagtuman niini.”—ROMA 4:19-21.
1. Nganong si Satanas naningkamot sa pagdaot sa rekord bahin kang Abraham?
ANG balaang pulong nga gipadayag diha sa Kasulatan maoy “buhi ug gamhanan.” (Hebreohanon 4:12) Busa, ang asoy sa mga pakiglabot ni Jehova kang Abraham, bisag gisulat sa kapig 3,500 ka tuig kanhi, maoy tinubdan sa pagdasig sa tanan nga nagatinguha sa pakighigala sa Diyos. (Roma 15:4) Ang pangunang kaaway, si Satanas, nasayod niini ug nagagamit sa relihiyosong mga pangulo aron sulayan pagdaot ang maong rekord ingong tinumotumo.—2 Corinto 11:14, 15.
2. Unsay pag-isip sa mga tinun-an ni Jesus bahin kang Abraham?
2 Ingong bahin sa “tibuok nga Kasulatan . . . nga gidasig sa Diyos,” ang kasaysayan ni Abraham maoy tinuod ug “mapuslanon alang sa [Kristohanong] pagpanudlo.” (2 Timoteo 3:16; Juan 17:17) Tinong giila kini sa unang mga tinun-an ni Jesus, kay si Abraham gihisgotan sa 74 ka beses diha sa Kristohanon Gregong Kasulatan. Sa makapadasig-sa-pagtuong ika-11ng kapitulo sa mga Hebreohanon, gigahin ang dakong luna alang kaniya kay sa ubang una-Kristohanong alagad sa Diyos.
3. Sa unsang paagi si Abraham napasidunggan pag-ayo?
3 Si Abraham dili ordinaryong “propeta,” kay gigamit siya ni Jehova aron ipasundayag ang dakong “simbolikong drama” nga diha niana gipasidunggan pag-ayo ang patriarka sa pagsilbi nga matagnaong hulagway sa Diyos mismo. (Genesis 20:7; Galacia 4:21-26) Busa, si Jesus naghisgot sa “sabakan ni Abraham” sa dihang naghulagway sa inuyonan nga kahimtang uban sa Diyos.—Lucas 16:22.
Ang Iyang Unang Buhat sa Pagtuo
4. Sumala sa Bibliya, sa unsang paagi nagsugod ang mga pakiglabot sa Diyos uban kang Abram?
4 Si Abram, sumala sa unang pagtawag kaniya, nagdako sa “Ur sa mga Kaldeanhon.” Samtang siya nagpuyo didto, si Jehova mipakita kaniya ug miingon: “Pahawa ka gikan sa imong yuta ug gikan sa imong mga kaubanan ug gikan sa balay sa imong amahan ngadto sa yuta nga akong igapakita kanimo; ug akong pagabuhaton ang usa ka dakong nasod gikan kanimo ug ikaw akong pagapanalanginan ug pagapadakoon ko ang imong ngalan; ug mahimo ikaw nga usa ka panalangin. Ug pagapanalanginan ko ang magapanalangin kanimo, ug ang magapanghimaraot kanimo akong pagapanghimaraoton, ug ang tanang kabanayan sa yuta magapanalangin sa ilang kaugalingon pinaagi kanimo.”—Genesis 12:1-3; 15:7; Buhat 7:2, 3.
5. (a) Sa unsang paagi ang saad sa Diyos nakatandog sa kasingkasing ni Abram? (b) Unsay sanong ni Abram sa saad?
5 Mahagiton kaayong awhag! Alang kang Abram, ang pagsugot niadto nagkahulogan sa pagbiya sa nindot nga palibot ug iyang mga kaubanan aron mopuyo sa halayo diha sa langyawng yuta. Apan ang kasingkasing ni Abram natandog sa dulot sa mahigugmaong saad sa Diyos. Ingong tigulang nga walay anak uban sa asawa nga apuli, ang iyang ngalan daw destinado nga malimtan sa dili madugay. Ang saad sa Diyos nagpasalig sa kaatbang: Ang “usa ka dakong nasod” magagikan kaniya. Dugang pa, ang saad sa Diyos nag-apil sa kahibulongang pahayag sa maayong balita alang sa tibuok nga katawhan, nga nagpunting sa unahan sa usa ka panahon sa dihang ang tanang nasod mapanalanginan. (Galacia 3:8) Si Abram mituo sa saad ni Jehova ug mibiya sa usa ka sentro sa abanteng sibilisasyon. “Siya mipahawa,” ang Bibliya nagatug-an kanato, “bisan pag wala mahibalo kon asa siya paingon.”—Hebreohanon 11:8.
6. (a) Nganong ang Genesis 11:31 nagpasidungog kang Tera ingon nga maoy mihimo sa pagbalhin? (Buhat 7:2-4) (b) Sa unsang mga paagi si Sara usa ka panig-ingnan sa Kristohanong kababayen-an karong adlawa?
6 Ang pagtuo ni Abram nakatandog sa uban. Ang iyang panimalay, ingon man si Tera, ang iyang amahan, ug si Lot, ang iyang pag-umangkon, mibiya kauban niya. Bisan pa niana, kay si Tera mao ang patriarkang ulo sa pamilya, siya ang gipasidunggan sa pagbalhin. (Genesis 11:31) Angay pagamatikdan ang pagsuportar nga nadawat ni Abram gikan sa iyang asawa, si Sarai, nga sa ulahi gitawag Sara. Giantos niya ang ubos nga sukdanan sa pagkinabuhi sa nahibilin niyang kinabuhi. (Genesis 13:18; 24:67) Nan, hisabtan, sa iyang pagkamatay, “si Abraham miadto sa pagbalata tungod kang Sara ug sa paghilak tungod kaniya.” (Genesis 23:1, 2) Tungod sa iyang lig-ong pagtuo ug tibuok-kasingkasing pagpasakop ingong asawa, siya gipadayag nga usa ka panig-ingnan sa matuod espirituwal nga katahom alang sa Kristohanong kababayen-an.—Hebreohanon 11:11, 13-15; 1 Pedro 3:1-6.
7. Sa unsang mga paagi ang mga Kristohanon karong adlawa nagapasundayag sa pagtuo nga sama sa kang Abraham ug Sara?
7 Daghang Kristohanon karong adlawa ang nagpakitag susamang pagtuo pinaagi sa pagboluntaryo sa pagpakaylap sa mensahe sa Diyos sa mga dapit diin adunay dakong panginahanglan sa mga magwawali sa Gingharian ug sa pagtukod ug pagpaandar sa bag-ong mga pasilidad alang sa pag-imprenta ug pagpadalag mga basahon sa Bibliya. (Mateo 24:14) Kining mga Kristohanona nagapakig-ambit sa pagsugot sa sugo, “Panlakaw kamo . . . ug himoa ang mga tinun-an sa katawhan sa tanang nasod.” Sa pagbalhin ngadto sa wala-hisayring nasod, sagad kinahanglang sila mopahiuyon sa laing sukdanan sa pamuyo. Gihimo sa uban ang dagkong materyal nga mga sakripisyo aron sa paghimog mga tinun-an diha sa ilang kaugalingong dapit.—Mateo 28:19, 20.
Ubang mga Buhat sa Pagtuo
8. Unsay mitultol sa ikaduhang pagpakita ni Jehova kang Abram?
8 Si Abram mipuyo sa siyudad sa Haran hangtod sa pagkamatay sa iyang amahan, si Tera. (Genesis 11:31, 32) Unya ang iyang panimalay mitabok sa Subang Euprates ug mipadulong sa habagatan. Sa kadugayan sila nakaabot sa “dapit sa Shechem” sa taliwala sa yuta sa Canaan. Pagkanindot gayod kadto nga talan-awon! Ang Shechem nahiluna sa tabunok nga walog tali sa duha ka bukid nga ang tayuktok mao ang Bukid Ebal ug Bukid Gerizim. Gibatbat kadto nga “paraiso sa Balaang Yuta.” Sa kahaom, si Jehova mipakita na usab didto kang Abram ug miingon: “Igahatag ko sa imong binhi kining yutaa.”—Genesis 12:5-7.
9. (a) Sa unsang talagsaong paagi nga si Abram nagpadayon sa pagpasundayag sa pagtuo? (b) Unsang leksiyon ang atong matun-an gikan niini?
9 Mibalos si Abram pinaagi sa laing buhat sa pagtuo. Sumala sa ginaingon sa asoy: “Gitukod niya didto ang usa ka halaran alang kang Jehova.” (Genesis 12:7) Lagmit, kadto nag-apil sa paghalad sa hayop nga halad, kay ang Hebreohanong pulong alang sa “halaran” nagkahulogang “dapit sa halad.” Sa ulahi, gisubli ni Abram kining mga buhat sa pagtuo sa ubang bahin sa yuta. Dugang pa, siya ‘misangpit sa ngalan ni Jehova.’ (Genesis 12:8; 13:18; 21:33) Ang Hebreohanong pamulong “pagsangpit sa ngalan” nagkahulogan usab “pagpahayag (pagwali) sa ngalan.” Ang panimalay ni Abram ingon man mga Canaanhon nakadungog nga siya maisogong nagpahayag sa ngalan sa iyang Diyos, si Jehova. (Genesis 14:22-24) Sa susama, ang tanan nga nagatinguha sa pakighigala sa Diyos karong adlawa kinahanglang mosangpit sa iyang ngalan diha sa pagtuo. Kana mag-apil sa pagpakig-ambit sa publikong pagwali, “nga kanunay magatanyag ngadto sa Diyos sa usa ka halad sa pagdayeg, nga mao, ang bunga sa mga ngabil nga nagahimog katilingbanong pagpahayag sa iyang ngalan.”—Hebreohanon 13:15; Roma 10:10.
10. (a) Sa unsang ubang paagi nga si Abram nagpakitag pagtuo? (b) Unsang panig-ingnan ang iyang gihatag alang sa Kristohanong mga ulo sa pamilya? (1 Timoteo 3:12)
10 Ang pagtuo ni Abram kang Jehova gipadayag sa daghang laing paagi. Gihimo niya ang mga sakripisyo alang sa kalinaw ug gisagubang ang mga kalisdanan nga maisogon. (Genesis 13:7-11; 14:1-16) Bisan pag dato, siya dili materyalistiko. (Genesis 14:21-24) Hinunoa, siya maabiabihon ug mahinatagong nagsuportar sa pagsimba ni Jehova. (Genesis 14:18-20; 18:1-8) Labing hinungdanon, siya usa ka sulundang ulo sa pamilya ug nagsunod sa instruksiyon ni Jehova pinaagi sa pagmando sa iyang mga anak ug sa iyang panimalay sunod niya mao nga sila nagbantay sa “dalan ni Jehova aron sa pagbuhat sa pagkamatarong.” (Genesis 18:19) Niini, ang panimalay ni Abram misubay sa dalang sukwahi kaayo sa iya sa Canaanhong mga mahilayon sa sekso sa kasikbit nga Sodoma ug Gomora. Tinong dili itugot ni Abram kanang grabeng mga sala sa iyang panimalay. Nga siya nagdumala sa iyang panimalay sa maayong paagi gibanaag sa pagsundog kaniya sa mga sakop niana pinaagi sa pagsangpit sa ngalan ni Jehova diha sa pagtuo.—Genesis 16:5, 13; 24:26, 27; 25:21.
“Siya Wala Maluya”
11. Sa unsang paagi si Abram nakalahutay ingong “usa ka dumuloong . . . sa langyawng yuta” sulod sa usa ka gatos ka tuig?
11 Ang lig-ong pagtuo ni Abram mibulig niya sa pag-antos sa mga kalisod samtang nagpuyo siya sa usa ka gatos ka tuig taliwala sa katawhan nga nangangkong ilaha ang yuta. (Genesis 12:4; 23:4; 25:7) Ang Bibliya nagaingon: “Siya nagpuyo ingong dumuloong sa yuta sa saad sa usa ka langyawng yuta, ug nagpuyo sa mga balongbalong uban ni Isaac ug Jacob, ang mga manununod uban niya sa sama mismong saad. Kay siya nagpaabot sa siyudad [Gingharian sa Diyos] nga may matuod nga mga patukoranan, nga ang magtutukod ug magbubuhat sa maong siyudad mao ang Diyos. Ug bisan pa niana, kon [siya] kanunay pang naghinumdom nianang dapita nga [iyang] gigikanan, [siya] unta may higayon sa pagbalik.”—Hebreohanon 11:9, 10, 15; itandi ang Hebreohanon 12:22, 28.
12. Unsang sayong higayon sa pagbalik sa Ur ang nabatonan ni Abram, ug giunsa niya pagsagubang ang krisis?
12 Si Abram wala pa magdugay sa Canaan dihang ang dako kaayong gutom mihatag niyag “higayon sa pagbalik.” Ang Ur, kay gitagan-an sa daghang tubig sa Subang Euprates, wala magsalig sa direktang ulan. Apan, inay nga mobalik didto, si Abraham mituo kang Jehova ug mipadulong sa atbang nga direksiyon—ang Ehipto. Kadto peligroso. Kay may maanyag nga asawa, ang langyaw, si Abram, nagpameligro sa iyang kinabuhi niadtong langyawng yuta. Bisan pa niana, nanagana siya pinaagi sa paghangyo kang Sarai nga itago ang ilang pagkamagtiayon. Gipanalanginan ni Jehova si Abram tungod sa iyang pagtuo, ug sa wala madugay siya nakabalik sa Yutang Saad uban ang labi pang dakong bahandi kay sukad masukad.—Genesis 12:10–13:2; 20:12.
13. Unsay gilandongan sa pagkaapuli ni Sarai ug sa pagtago ni Abram nga siya iyang asawa?
13 Kadto usab maoy bahin sa matagnaong drama nga gipasundayag nga wala hisayri ni Abram aron sa pagtudlo kanato. Si Sarai, nga apuli pa, naghulagway sa langitnon samag-asawang organisasyon ni Jehova sa maunongong mga manulonda. Kining maanyag masambingayong asawa kinahanglang mohulat ug kapig 4,000 ka tuig una makatagana sa matuod nga binhi sa Labaw nga Abraham, si Jehova nga Diyos. Ang direktang paglutos sa matinumanong mga alagad sa Diyos nianang tanang katuigan sa pagpaabot usahay mipatim-aw nga samag si Jehova nagtago sa iyang bananhong relasyon uban niya.—Genesis 3:15; Isaias 54:1-8; Galacia 3:16, 27, 29; 4:26.
14. (a) Sa kataposan unsay sanong ni Sarai sa iyang pagkaapuli? (b) Unsay nahitabo sa ika-100 anyos ni Abram, ug ngano?
14 Human mag-antos ingong dumuloong sa napulo ka tuig, si Abram wala pa gihapon makabatog anak ingong manununod. Kay nawad-ag-paglaom, gihangyo siya ni Sarai nga magpatunghag anak gikan sa iyang ulipong babaye, si Agar. Si Abram miuyon ug natawo si Ismael. (Genesis 12:4; 16:1-4, 16) Apan ang gisaad nga binhi sa panalangin moabot pinaagi sa lain. Sa ika-100 anyos ni Abram, ang iyang ngalan giilisag Abraham tungod kay, sumala sa giingon sa Diyos, “ikaw pagahimoon ko nga amahan sa usa ka panon sa mga nasod.” Ang ngalan ni Sarai giilisag Sara uban ang saad nga siya manganak sa usa ka anak lalaki.—Genesis 17:1, 5, 15-19.
15. (a) Nganong si Abraham mikatawa sa ideya nga si Sara manganak? (b) Unsay dugang pamatuod ang gihatag ni Abraham sa iyang lig-ong pagtuo?
15 Si Abraham (ug sa ulahi si Sara) mikatawa sa ideya tungod kay ang iyang mga gahom sa pagsanay ug ang kang Sara mihunong na. (Genesis 17:17; 18:9-15) Apan kadto dili pagkatawa sa walay-pagtuo nga pagkadili makatuo. Sumala sa ginapatin-aw sa Bibliya: “Siya wala maluya sa pagtuo . . . Apan tungod sa saad sa Diyos siya . . . nahimong gamhanan tungod sa iyang pagtuo, nga naghatag sa Diyos sa himaya ug hingpit nagtuo nga kon unsay iyang gisaad siya makaarang usab sa pagtuman.” (Roma 4:18-21) Nianang adlawa mismo, si Abraham mihatag ug pamatuod sa iyang lig-ong pagtuo. Ingong ilhanan sa pakigtugon sa Diyos uban kaniya, gisugo ni Jehova si Abraham nga magpasirkunsisyon uban sa tanang lalaki sa iyang dakong panimalay. (Genesis 15:18-21; 17:7-12, 26) Unsay iyang sanong sa maong sakit nga sugo? “Gisirkunsidahan niya ang unod sa ilang mga panit sa maong adlaw mismo, sumala sa giingon kaniya sa Diyos.”—Genesis 17:22-27.
16. (a) Unsay nahitabo sa adlaw sa paglutas kang Isaac? (b) Unsay gihulagwayan sa pagpapahawa kang Agar ug Ismael?
16 Si Isaac, kansang ngalan nagkahulogang “Pagkatawa,” natawo kang Sara sa sunod nga tuig. (Genesis 21:5, 6) Sa wala madugay ang panahon miabot sa paglutas kaniya. Panahon sa kombira, ang nasinang si Ismael milutos kang Isaac. Niadtong panahona, si Sara kusog miawhag kang Abraham nga papahawaon ang ulipong babaye, si Agar, ug ang iyang anak lalaki gikan sa panimalay. Gipaluyohan ni Jehova nga Diyos ang hangyo ni Sara. Bisan pag naguol, si Abraham natukmod sa pagsunod. (Genesis 21:8-14) Sumala sa Galacia 4:21-30, kini naghulagway sa unsang paagi ang Labaw nga Abraham magbugto sa iyang relasyon uban sa nasod sa unodnong Israel. Sama sa uban pang katawhan, sila natawo ingong mga ulipon sa sala. (Roma 5:12) Apan sila wala usab motuo kang Jesu-Kristo, ang matuod nga binhi ni Abraham, nga miabot aron sa pagpahigawas kanila. (Juan 8:34-36; Galacia 3:16) Ug kay si Ismael naglutos kang Isaac, gilutos nila ang bag-ong napormang Kristohanong kongregasyon sa espirituwal nga Israel, nga maoy segundaryong bahin sa binhi ni Abraham.—Mateo 21:43; Lucas 3:7-9; Roma 2:28, 29; 8:14-17; 9:6-9; Galacia 3:29.
Iyang Kinadak-ang Pagsulay sa Pagtuo
17. Sa unsang paagi ang pagtuo ni Abraham sunod nga grabeng gisulayan?
17 Lagmit walay tawhanong amahan ang may labawng gugma sa iyang anak lalaki kay sa nabatonan sa tigulang nga Abraham alang kang Isaac. Nan, pagkadako ang kakurat sa dihang nadawat niya kining sugoa: “Palihog, dad-a ang imong anak, ang bugtong nimong anak nga pinalangga kaayo nimo, si Isaac, ug lakaw ngadto sa yuta sa Moria ug ihalad didto ingon nga halad-nga-sinunog sa usa sa kabukiran nga akong igatudlo kanimo.”—Genesis 22:1, 2.
18. Unsay sanong ni Abraham sa sugo ni Jehova nga ihalad si Isaac?
18 Nalisdan gayod si Abraham sa pagsabot sa hinungdan sa maong makaguol nga sugo. Apan gipasundayag niya ang iyang naandan dihadihang pagkamasinugtanon. (Genesis 22:3) Gidangtag tulo ka lisod nga adlaw aron siya makaabot sa gipiling bukid. Didto gitukod niya ang usa ka halaran ug gibutang ang kahoy nga igsusugnod sa ibabaw. Sa maong panahon, napatin-aw na gayod niya ang sugo sa Diyos ngadto kang Isaac, si kinsa dali untang makalayas. Hinunoa, gitugotan ni Isaac nga ang tigulang niyang amahan magagapos sa iyang mga batiis ug mga kamot ug gibutang siya ibabaw sa halaran. (Genesis 22:4-9) Unsay atong ikaingon nga hinungdan sa maong pagkamasinugtanon?
19. (a) Unsay ikaingon nato nga hinungdan sa maisogong pagpasakop ni Isaac? (b) Sa unsang paagi ang relasyon tali ni Abraham ug Isaac usa ka leksiyon alang sa Kristohanong mga pamilya karong adlawa?
19 Si Abraham matinumanong nagtuman sa iyang mga responsabilidad bahin kang Isaac, sumala sa gilaraw sa Genesis 18:19. Pihong gisilsil niya diha kang Isaac ang katuyoan ni Jehova nga banhawon ang mga patay. (Genesis 12:3; Hebreohanon 11:17-19) Si Isaac, sa iyang bahin, mao ang tumong sa lalom nga gugma ni Abraham ug buot niyang pahimut-an ang iyang amahan sa tanang butang, ilabina kon kini naglangkit sa pagbuhat sa kabubut-on sa Diyos. Pagkamaayo kining leksiyon alang sa Kristohanong mga pamilya karong adlawa!—Efeso 6:1, 4.
20. Sa unsang paagi si Abraham misugot, ug uban sa unsang ganti?
20 Karon miabot ang tayuktok sa pagsulay. Gikuptan ni Abraham ang punyal sa pagpatay. Apan sa dihang hapit na niyang patyon ang iyang anak, si Jehova mipugong kaniya ug miingon: “Karon naila ko na nga ikaw nahadlok sa Diyos sa pagkaagi nga wala ka maghikaw sa imong anak, ang imong bugtong nga anak, gikan kanako.” (Genesis 22:11, 12) Tugob kaayong gigantihan si Abraham pinaagi sa pagkabati sa pagpahayag mismo sa Diyos sa iyang pagkamatarong! Sa maong panahon gibati niyang nakab-ot na niya ang gikinahanglan sa Diyos gikan sa usa ka tawong dili hingpit. Labi pang hinungdanon, ang nangaging pagbanabana ni Jehova sa iyang pagtuo napamatud-an. (Genesis 15:5, 6) Human niadto, gihalad ni Abraham ang usa ka laking karnero nga milagrosong gitagana sa pagpuli kang Isaac. Unya iyang nadunggan nga gilig-on ni Jehova, pinaagi sa panumpa, ang mga saad sa pakigtugon. Sa ulahi, siya nailhang higala ni Jehova.—Genesis 22:13-18; Santiago 2:21-23.
21. Unsang matagnaong ilustrasyon ang gitagana dinhi, ug ginadasig kita niini sa pagtinguha sa unsa?
21 Ang halad ni Abraham “mahulagwayon.” (Hebreohanon 11:19) Kadto naghulagway sa masakit, mahal nga halad nga gihimo ni Jehova nga Diyos sa gipadala niya ang iyang minahal nga Anak sa yuta aron mamatay ingong “ang Kordero sa Diyos nga nagakuha sa sala sa kalibotan.” (Juan 1:29) Ug ang pagkaandam ni Isaac nga mamatay nagahulagway sa unsang paagi ang Labaw nga Isaac, si Jesu-Kristo, mahigugmaong nagpasakop sa pagbuhat sa kabubut-on sa iyang langitnong Amahan. (Lucas 22:41, 42; Juan 8:28, 29) Sa kataposan, maingon nga gidawat ni Abraham ang iyang anak nga buhi gikan sa halaran, gidawat ni Jehova pagbalik ang iyang minahal nga Anak gikan sa mga patay ingong mahimayaong espiritung linalang. (Juan 3:16; 1 Pedro 3:18) Makapadasig kaayo kining tanan sa mga matinguhaon sa pakighigala sa Diyos karong adlawa!
22. Sa unsang paagi ang piniling pundok sa mga tawo nakabatog kaayohan gikan sa dili-hitupngang gugma sa Diyos?
22 Pinaagi sa pagbutang ug pagtuo sa maong dili-hitupngang buhat sa gugma sa bahin sa Labaw nga Abraham, si Jehova nga Diyos, ang piniling grupo sa mga tawo gipahayag nga matarong ingong mga anak sa Diyos. (Roma 5:1; 8:15-17) Nga gikuha una gikan sa mga Hudiyo ug dayon gikan sa mga Hentil, kini sila gipanalanginan pinaagi sa Binhi ni Abraham, si Jesu-Kristo. (Buhat 3:25, 26; Galacia 3:8, 16) Sa baylo, sila nahimong segundaryong bahin sa binhi ni Abraham. (Galacia 3:29) Kana sila sa kataposan may gidaghanon nga 144,000 ug, sama kang Jesus, mabanhaw ngadto sa langitnong kinabuhi tapos sa pagpamatuod nga matinumanon hangtod sa kamatayon.—Roma 6:5; Pinadayag 2:10; 14:1-3.
23. (a) Sa unsang paagi ang minilyon gipanalanginan na pinaagi sa nahibilin sa binhi ni Abraham? (2 Corinto 5:20) (b) Unsang dugang mga panalangin ang anaa sa unahan alang sa “dakong panon”?
23 Kasamtangan, minilyon gikan sa tanang nasod ‘nagapanalangin sa ilang kaugalingon’ pinaagi sa ilang pagsanong sa mahigugmaong ministeryo sa gamayng nahibilin sa binhi ni Abraham. (Genesis 22:18) Sila nalipay sa pagkahibalo nga ang makasasalang mga tawo ikapahayag nga matarong ingong mga higala sa Diyos. Ingong sangpotanan, “ang usa ka dakong panon . . . gikan sa tanang kanasoran” nagapahimulos sa pag-uyon sa Diyos, kay “naglaba sa ilang tag-as nga mga biste ug nagpaputi kanila sa dugo sa Kordero.” Uban sa nahibilin nga nagapanguna, sila usab nagahatag sa Diyos sa “balaang pag-alagad sa adlaw ug gabii.” Gibutang sa atubangan niining dakong panon ang kahibulongang paglaom sa kinabuhing walay kataposan sa Paraiso ingong yutan-ong “mga anak sa Diyos.” (Pinadayag 7:9-17; 21:3-5; Roma 8:21; Salmo 37:29) Bisan pa niana, sa dili pa mamatuman ang maong mga panalangin, kinahanglang mahitabo ang mga hitabo nga labi pang hinungdanon, sumala sa atong masayran sa sunod nga artikulo.
Mga Pangutana Alang sa Pagsubli
◻ Sa unsang paagi gisulayan ang pagtuo ni Abraham ug sa iyang mga kaubanan?
◻ Sa unsang paagi ang mga Kristohanon karong adlawa nagpakita sa samang pagtuo?
◻ Sa unsang laing paagi si Abraham nagpakitag pagtuo?
◻ Sa unsang paagi si Abraham, Sara, ug Isaac mga panig-ingnan alang sa Kristohanong mga pamilya?
◻ Unsay gihulagwayan sa kinadak-ang buhat sa pagtuo ni Abraham?