Ang Umaabot nga Kataposan sa “Basahon sa mga Gubat ni Jehova”

“Giingon kini diha sa basahon sa mga Gubat ni Jehova.”​—NUMEROS 21:14.

 1, 2. Sa unsang karaang okasyon nga gipasundayag ni Jehova ngadto sa mga Ehiptohanon nga siya usa ka manggugubat nga Diyos, ug giunsa niya kadto paghimo?

WALA kaayo mapabilhi sa mga tawo karong adlawa nga ang Diyos sa Bibliya, si Jehova, maoy usa ka manggugubat, usa ka tawo sa gubat. Kining kamatuorana gipasiugda sa giluwas niya ang iyang katawhan sa karaang panahon gikan sa pagdaugdaog sa Ehipto. Si Paraon gihulhogan sa dili-makitang kaaway sa maong katawhan, si Satanas nga Yawa, sa pagsulay sa pagpatrabaho nila hangtod sila mangamatay. Karon, sa pagkaamgo kon unsay mawala niya sa pagpagula sa mga Israelinhon, sila gigukod ni Paraon ug sa iyang kasundalohan.

² Hinuon, wala hisabti ni Paraon nga ang Diyos sa mga Israelinhon mamahimong usa ka manggugubat nga Diyos aron sa pagluwas sa Iyang katawhan. Samtang kadtong Ehiptohanong kasundalohan nagdali sa paglatas sa namad-ang salog sa Pulang Dagat sa mapanimalosnong paggukod, ang Diyos sa nameligrong mga Israelinhon milihok ug gilumsan ang mga nagsakay sa karro ug mga magkakabayo, nga gitugotang ang natumping katubigan mahugno diha sa dalan sa kaikyasan nga milagrosong gibuksan alang sa mga Israelinhon.​—Exodo 14:14, 24-28.

 3. Sa ilang awit sa kadaogan, gipaila sa mga Israelinhon si Jehova ingong unsang matang sa Diyos, apan unsang kamatuoran ang wala tagda sa kanasoran karong adlawa?

³ Kay luwas na sa silangang pangpang sa Pulang Dagat, ang masadyaong mga Israelinhon miawit sa usa ka awit sa kadaogan, nga nagdayeg sa ilang langitnong Manluluwas: “Paawita ako alang kang Jehova, kay siya nahimong binayaw kaayo. Ang kabayo ug ang magkakabayo niini gilabay niya sa dagat. Akong kusog ug akong gahom si Jah, sanglit siya nahimong akong kaluwasan. Kini mao ang akong Diyos, ug ako siyang pagadayegon; ang Diyos sa akong amahan, ug ako siyang bayawon sa kahitas-an. Si Jehova maoy usa ka tawo sa gubat. Si Jehova mao ang iyang ngalan. Ang mga karro ni Paraon ug iyang kasundalohan iyang ginudnod sa dagat, ug ang pinili niyang mga maggugubat nalunod sa Pulang Dagat.” (Exodo 15:1-4) Didto sa Pulang Dagat, si Jehova mipasundayag sa iyang kaugalingon nga usa ka manggugubat nga takos sa talagsaong mga buhat. Kining kamatuorana wala tagda sa kalibotanong mga nasod.

 4, 5. Kadtong masadyaong 12 ka tribo sa Israel naggikan sa unsang usa ka katigulangan, ug kansang higala siya nahimo tungod sa unsang hiyas?

⁴ Ang propetang si Moises, kinsa nanguna sa pag-awit nianang dinasig nga awit, namulong bahin kang Jehova ingong “Diyos sa akong amahan.” Ang Hebreohanong si Abraham maoy talagsaong katigulangan sa nasod sa Israel. Gikan kaniya, pinaagi kang Isaac ug Jacob ug sa 12 ka anak ni Jacob, mitungha ang 12 ka banay sa Israel. Si Abraham nagpamatuod nga siya sulundang magsisimba ni Jehova nga Diyos. Siya usa ka tawong may lig-on kaayong pagtuo nga sa gitawag siya ni Jehova sa pagpahawa sa iyang pinuy-anan sa Ur sa mga Kal­deanhon, sa walay pagpanuko migikan siya aron moadto sa yuta nga ipakita ni Jehova kaniya, masaligon nga tumanon sa Diyos ang Iyang saad nga kana ihatag kaniya ug sa iyang mga kaliwat.

⁵ Tungod sa talagsaon kaayong pagtuo ni Abraham, misaad si Jehova nga hatagag “binhi” o kaliwat si Abraham, nga pinaagi niana ang tanang pamilya sa yuta, apil ang mga pamilya karong adlawa, magapanalangin sa ilang kaugalingon. (Genesis 12:2, 3; 22:17, 18) Si Abraham nahidangat sa maong suod nga relasyon uban sa iyang Diyos nga siya nailhan nga “higala ni Jehova,” nga gitawag mismo sa Diyos ang matinumanong patriarka “akong higala.”​—Santiago 2:23; Isaias 41:8.

 6. Bisan pag usa ka malinawong laag sa Yutang Saad, giunsa pagpamatuod ni Abraham nga siya usa ka mag-aaway nga nagsalig kang Jehova?

⁶ Bisan tuod naglibotlibot samag estranghero sa Yutang Saad, gipamatud-an ni Abraham nga siya makaalagad nga usa ka mag-aaway, usa ka manggugubat. Sa usa ka okasyon gisulong sa upat ka hari gikan sa gawas ang Yutang Saad ug gidagit ang pag-umangkon ni Abraham nga si Lot ug ang pamilya ni Lot. Si Abraham, kay natandog tungod sa lig-ong pamilyahanong relasyon, nga sinangkapan sa iyang 318 ka lalaking mga sulugoon, ug kauban sa mga hinabang gikan sa tulo sa lokal niyang mga alyado, si Aner, Eshcol, ug Mamre, migukod sa mga manunulong. Sa kalit nga pag-atake sa gabii, si Abraham ug ang iyang pundok nagparot sa mga manunulong, bisan pag sila labi pang superyor nga puwersa. Nahitabo ang “pagpatay sa mga hari.” (Hebreohanon 7:1; Genesis 14:13-17) Giluwas ni Abraham si Lot ug ang iyang pamilya ug nakuha pagbalik ang tanan nga gikawat.

 7-9. (a) Kinsang saserdoteha ang giduaw ni Abraham, ug unsang panalangin ang iyang nabatonan? (b) Giunsa pagpakita ni Abraham nga buot niyang mahimong dato pinaagi lamang sa Diyos nga Hataas Uyamot? (c) Sumala sa gipamatud-an ni Melkisedek, kinsay mihatag kang Abraham sa militaryong kadaogan?

⁷ Naila ni Abraham nga ang iyang militaryong kahimoan milampos lamang uban sa tabang ni Jehova nga Diyos, ug sa iyang madaogong panaw sa pagpauli, nakapahayag siya sa katilingbanong pag-ila sa maong kamatuoran. Nahibalo siya nga ang inuyonan nga saserdote sa iyang Diyos makaplagan diha sa siyudad sa Salem. Busa siya mipadulong nianang siyudara. Ang ulahing bahin sa Genesis kapitulo 14 nagpahibalo kanato kon unsay nahitabo niadto:

⁸ “Ug si Melkisedek nga hari sa Salem nagpagawas sa tinapay ug bino, ug siya maoy saserdote sa Diyos nga Hataas Uyamot. Unya siya mipanalangin kaniya ug miingon: ‘Bulahan si Abram sa Diyos nga Hataas Uyamot, Magbubuhat sa langit ug sa yuta; ug bulahan ang Diyos nga Hataas Uyamot, kinsa nagtugyan sa imong mga tigdaugdaog nganha sa imong kamot!’ Ug niana si Abram mihatag kaniya ug ikapulo sa tanang butang. Human niana ang hari sa Sodoma miingon kang Abram: ‘Ihatag kanako ang mga kalag, apan kuhaa ang mga manggad alang sa imong kaugalingon.’ Niana si Abram miingon ngadto sa hari sa Sodoma: ‘Igapataas ko ang akong kamot sa usa ka panumpa kang Jehova ang Diyos nga Hataas Uyamot, Magbubuhat sa langit ug sa yuta, nga, gikan sa usa ka lanot sa liston sa sandalyas, dili, ako dili mokuha sa bisan unsa gikan sa imoha, aron dili sila moingon, ‘Ako mao ang nagpadato kang Abram.’ Walay alang kanako! Ang nakaon lamang sa mga batan-ong lalaki, ug ang bahin sa mga tawo nga mikuyog kanako, si Aner, si Eshcol ug si Mamre—ipakuha nila ang ilang bahin.’”​—Genesis 14:18-24.

⁹ Sumala sa gipakita sa maong mga bersikulo, si Melkisedek, ang harianong saserdote sa siyudad sa Salem, naglig-on sa pagtuo ni Abraham nga ang Diyos nga Hataas Uyamot mao ang nakig-away alang kaniya ug sa iyang kasundalohan ug naghatag kaniya sa kadaogan. Ang Hari-Saserdoteng si Melkisedek wala magkuha gikan sa bahin ni Jehova sa maong butang.

Ang Basahon sa mga Gubat ni Jehova

10. Unsa ang unang paghisgot sa pakiggubat diha sa Bibliya, ug nganong kini sinugdanan lamang sa madaogong mga gubat ni Jehova?

¹⁰ Ang kabatbatan sa Genesis 14 mahitungod sa pagsulong sa Yutang Saad ug pagparot ni Abraham sa armadong mga manunulong mao ang unang paghisgot sa panaggubat diha sa Balaang Kasulatan. Busa, kapin sa upat ka siglo una pa sa iyang talagsaong nahimo sa Pulang Dagat, gipasundayag ni Jehova nga siya usa ka manggugubat, “usa ka tawo sa gubat.” Bisan pa niana, kadto sinugdanan lamang. Ang dako pa ug mas malanogong mga kadaogan mosunod, apil ang kataposang kadaogan niining “konklusyon sa sistema sa mga butang.”​—Mateo 24:3.

11. Unsa “ang basahon sa mga Gubat ni Jehova,” apan diin pa ang may dagayang mga asoy sa iyang militaryong mga kalamposan?

¹¹ Sumala sa giingon sa Numeors 21:14, ang usa ka “basahon sa mga Gubat ni Jehova” gisulat. Kining kasaligang talaan, o kasaysayan, sa mga gubat sa Diyos alang sa iyang katawhan, tingali nagsugod sa maong pakigbugno alang sa matinumanong si Abraham. Nasayran ni Moises kining basahona apan walay gihatag kanatong dugang detalye. Busa, kita wala pahibaloa sa tanang paagi nga si Jehova nagpasundayag sa iyang kaugalingon nga usa ka manggugubat sulod sa yugto sa panahong gihisgotan sa maong basahon sa mga Gubat ni Jehova. Hinuon, sukad sa paghisgot sa maong basahon ang dakong bahin sa Balaang Bibliya nahisulat na, ug kini nagahatag kanatog daghang asoy sa militaryong mga kahimoan ni Jehova.

Ang Labaw nga Melkisedek​—Usa ka Manggugubat

12. Si Melkisedek naghulagway sa unsang labaw nga Opisyal sa Diyos nga Hataas Uyamot, ug unsang salmo nga gikomposo ni David ang gitumong kaniya ingong saserdote ug manggugubat?

¹² Tapos maparot ni Abraham si Chedorlaomer ug ang iyang naghiusang mga hari, gipanalanginan siya ni Melkisedek. Ang Hari-Saserdoteng si Melkisedek matagnang naghulagway sa Usa nga mahimong Hataas nga Saserdote sa Diyos nga Hataas Uyamot ug usa usab ka gamhanang manggugubat nga gipaluyohan sa Supremong Diyos. Ang Salmo 110, nga gikomposo ubos sa inspirasyon sa manggugubat-hari nga si David, gitumong ngadto niining Usa nga labaw kay kang Melkisedek sa Salem sa dihang kini nagaingon: “Ang barras sa imong kusog ipadala ni Jehova gikan sa Sion, nga magaingon: ‘Magmando ka sa taliwala sa imong mga kaaway.’ Si Jehova nanumpa (ug dili siya magbasol): ‘Ikaw usa ka saserdote sa panahong walay katinoan sumala sa matang ni Melkisedek!’ Si Jehova mismo diha sa imong tuong kamot magadugmok sa mga hari sa adlaw sa iyang kasuko.”​—Salmo 110:2, 4, 5.

13. Sa Hebreohanon kapitulo 7 ug 8, ang Usang labaw kay kang Melkisedek sa kakaraanan gipaila ingong si kinsa, ug ngadto sa unsang hataas nga dapit nga kini Siya misulod ug uban sa unsang matang sa halad?

¹³ Ang dinasig nga magsusulat sa basahong mga Hebreohanon nagpadayag sa ilhanan sa Usa nga kaniya gitumong ang maong mga pulong sa miingon siya: “Ang mag-uuna misulod alang kanato, si Jesus, kinsa nahimong usa ka hataas nga saserdote sumala sa matang ni Melkisedek sa walay kataposan.” (Hebreohanon 6:20) Sa mosunod nga kapitulo sa Hebreohanon, ang kadako ni Melkisedek sa kakaraanan gipatin-aw. Bisan pa niana, ang iyang saserdotehanong pagkadako gilupig sa Usa nga iyang gilandongan, ang nabanhaw, hinimayang si Jesu-Kristo, kinsa misulod sa balaang presensiya ni Jehova nga Diyos mismo uban sa bili sa halad nga labi pang dako kay sa bisan unsang gitanyag sukad sa Hari-Saserdote si Melkisedek sa Salem.​—Hebreohanon 7:1–8:2.

14. Ang Labaw nga Melkisedek nag-awtorisar ba sa klero sa Kakristiyanohan sa pagpakig-ambit sa militaryong mga kahikayan sa gitawag Kristohanong mga nasod?

¹⁴ Ang harianong saserdote si Melkisedek nagpanalangin sa usa ka manggugubat, ang madaogong si Abraham. Apan komosta ang Labaw nga Melkisedek, ang Magtutukod sa matuod nga Kristiyanidad? Ang klero sa Kakristiyanohan nagaangkong nagahawas kang Jesu-Kristo sa pagpanalangin sa kasundalohan sa gitawag Kristohanong mga nasod ug pag-ampo alang kanila. Apan gipaluyohan ba sa Hataas nga Saserdote ni Jehova ang mga klerigo sa Kakristiyanohan niini? Sa ingon gidawat ba niya ang responsabilidad sa tanang pag-ulag dugo nga nagapadayon sulod sa gitawag Kristohanong Panahon, apil ang dugong giula panahon sa Gubat sa Kalibotan I ug II? Bug-os nga wala! Sa bisan unsang panahon siya wala gayod mag-awtorisar sa iyang tinuod nga mga tinun-an sa paghimo sa ilang kaugalingon nga bahin niining kalibotana ug pagduyog sa iyang nagaulag-dugo nga militarismo.

Ang Manggugubat nga Diyos Nagahimog Matahom nga Ngalan Alang sa Iyang Kaugalingon

15, 16. Unsay gihimo ni Jehova alang sa iyang kaugalingon sa dihang nakig-away siya alang sa iyang katawhan aron luwason sila gikan sa Ehipto?

¹⁵ Ang Nehemias 9:10 nagatumong sa pagluwas ni Jehova sa 12 ka tribo sa Israel gikan sa Ehipto, nga miingon: “Unya imong gihatag ang mga ilhanan ug mga milagro batok kang Paraon ug sa tanan niyang alagad ug sa tanan nga katawhan sa iyang yuta, kay ikaw nahibalo nga sila milihok nga mapangahason batok kanila [ang mga Israelinhon]; ug ikaw mihimo sa usa ka ngalan alang sa imong kaugalingon hangtod niining adlawa.”​—Itandi ang Exodo 14:18.

¹⁶ Ang propetang si Isaias nagtumong sa kalidad sa maong ngalan sa naghisgot siya bahin kang Jehova ingong “ang Usa nga nagpauban sa Iyang matahom nga bukton sa tuong kamot ni Moises; ang Usa nga nagpaiway sa katubigan gikan sa ilang atubangan aron sa paghimo sa usa ka malungtarong ngalan alang sa iyang kaugalingon.” Ug sa pagpakigsulti kang Jehova, siya miingon: “Sa ingon imong gitultolan ang imong katawhan aron sa paghimo sa usa ka matahom nga ngalan alang sa imong kaugalingon.” (Isaias 63:12-14) Sa paghangyo kang Jehova nga molihok pag-usab alang sa iyang katawhan, si Daniel nagtumong kaniya ingong “ikaw nagpagawas sa imong katawhan gikan sa yuta sa Ehipto pinaagi sa usa ka kusgang kamot ug naghimo sa usa ka ngalan alang sa imong kaugalingon sama niining adlawa.”​—Daniel 9:15; Jeremias 32:20.

17. Kinsay ipadala ni Jehova aron makig-away diha sa iyang ngalan, ug sa ingon unsay iyang ipakita sa tanang nasod karong adlawa?

¹⁷ Sa nahaigong panahon, ipadala ni Jehova nga Diyos si Jesu-Kristo, ang Labaw nga Melkisedek, ingong usa ka gamhanang manggugubat. Pinaagi kaniya, si Jehova mohimo sa usa ka ngalan alang sa iyang kaugalingon nga molupig sa bisan unsa sa nangagi sumala sa gibatbat diha sa basahon sa mga Gubat ni Jehova o diha sa Hebreohanong Kasulatan sa Balaang Bibliya. Sa kataposang kapitulo sa ikaduha-sa-kataposang basahon sa Hebreohanong Kasulatan, ang tibuok-yutang pag-atake batok sa Jerusalem gitagna. Unya, sumala sa Zacarias 14:3, “Si Jehova moasdang ug makig-away batok niadtong mga nasod sama sa adlaw sa iyang pagpakiggubat, sa adlaw sa away.” Niining paagiha ang Diyos sa Bibliya mopakita sa tanang modernong kanasoran nga siya sa gihapon mao ang manggugubat nga Diyos ingon nga siya mao sa mga adlaw sa karaang Israel.

18, 19. Haing Jerusalem ang mahimong tumong sa tamantaman nga pag-atake sa kanasoran?

¹⁸ Kini usa ka kalaoman nga anaa pa sa atong unahan. Apan unsang Jerusalema ang makaagom sa tamantaman nga pag-atake? Ang tagna wala matuman sa Jerusalem sa adlaw ni Zacarias. Kanang siyudara gilaglag sa kasundalohan sa Roma sa 70 K.P. Hinuon, ang Jerusalem natukod pag-usab, ug karong adlawa giisip nga sagrado sa Kakristiyanohan ingon man sa unodnong nasod sa Israel. Sa unom-ka-adlaw nga gubat sa 1967, ang unodnong Israel nakasakop sa tanang natukod pag-usab yutan-ong Jerusalem. Bisan pa niana, walay usa ka lugas nga ebidensiya nga si Jehova nga Diyos nakigbahin sa away niadto. Ang iyang naentronong Hari, si Jesu-Kristo, wala magmando sa yutan-ong Jerusalem, ug kini dili na “ang siyudad sa dakong Hari,” nga mao, kang Jehova.​—Mateo 5:35.

¹⁹ Dili, kining opisyal kaulohang siyudad sa Hudiyonhong membro sa Hiniusang Kanasoran dili mao ang Jerusalem nga gihisgotan sa tagna sa Zacarias. Hinunoa, si Zacarias nagatumong sa Jerusalem nga atong mabasahan diha sa basahong Hebreohanon. Dinha, si Pablo nakigsulti sa dinihogang mga Kristohanon ug miingon: “Kamo miduol sa usa ka Bukid Sion ug usa ka siyudad sa buhing Diyos, ang langitnong Jerusalem, ug sa napulo ka libo ka napulo ka libong mga manulonda.” (Hebreohanon 12:22) Kining langitnong Jerusalem walay lain kondili mao ang Mesiyanikong Gingharian sa Diyos, nga gihawasan sa yuta karong adlawa sa usa ka gamayng pundok sa dinihogang mga Kristohanon nga nagahambin sa paglaom nga mahimong kaubang mga magmamando ni Jesu-Kristo sa maong Gingharian. Kini sila mao unya ang tumong sa gitagnang pag-atake.

20. Unsang mga pulong ang gisulti ni Haring Ezekias ngadto sa iyang nameligrong katawhan aron sa pagpalig-on kanila, ug pinasukad sa mga pulong sa unsang Hari nga labaw kay kang Ezekias nga ang mga Saksi ni Jehova karong adlawa makapalig-on sa ilang kaugalingon?

²⁰ Bisan pa niana, kini sila o ang dakong panon sa mga Kristohanon nga may yutan-ong paglaom nga nanggula sa tanang nasod aron mokuyog kanila sa maputling pagsimba dili kinahanglang mahadlok sa sangpotanan sa maong pag-atake. Sa dihang ang makahahadlok nga kasundalohan ni Senakerib, ang hari sa Asirya, misulong sa Jerusalem panahon sa pagmando ni Haring Ezekias, ang nameligrong mga Israelinhon gihatagan sa makapakalmang talan-awon sa kahimtang sa giingnan sila ni Haring Ezekias: “Uban kaniya anaa ang usa ka bukton nga unod, apan uban kanato mao si Jehova nga atong Diyos aron sa pagtabang ug sa pagpakig-away sa atong mga gubat.” Ang sangpotanan mao nga “ang katawhan nalig-on sa mga pulong ni Ezekias ang hari sa Juda.” (2 Cronicas 32:8) Ang mga Saksi ni Jehova karong adlawa, sa dihang mameligro sa nasodnong mga kasundalohan niining sistema sa kalibotan, makalig-on sa ilang kaugalingon tungod sa susamang mga pulong gikan sa usa ka hari nga labaw kang Ezekias, si Jesu-Kristo.

21. (a) Nganong ang mga pulong ni Jahaziel mahinumdoman panahon sa umaabot nga pag-atake sa langitnong Jerusalem? (b) Unsa unya ang sangpotanan sa gubat nga pagabugnoon?

²¹ Niadtong panahona, ang nagadasig-sa-pagtuo nga mga pulong ni Jahaziel ang Levihanon mahinumdoman: “Dili kinahanglang makig-away ka niining higayona. Magpahimutang ka, bumarog nga malig-on ug tan-awa ang pagluwas ni Jehova alang kanimo. O Juda ug Jerusalem, ayaw kahadlok o kalisang. Ug asdang batok kanila, ug si Jehova magauban kanimo.” (2 Cronicas 20:17) Oo, nianang bug-os peligrosong panahon, si Jehova magauban sa iyang katawhan. Ang ilang pagkalayo sa kapeligrohan ug kaluwasan magaagad sa iyang pagpakig-away alang kanila. Ug siya makig-away, pinaagi sa iyang manggugubat nga Hari, si Jesu-Kristo! Ang sangpotanan? Ang bug-os nga pagkalaglag sa makitang organisasyon sa Yawa sa yuta.​—Pinadayag 19:11-21.

22. (a) Unsa unya ang madaogong konklusyon sa basahon sa mga Gubat ni Jehova, ug pinaagi niana unsay himoon ni Jehova alang sa iyang kaugalingon? (b) Ang mga mahigugmaon sa ngalan ni Jehova matukmod sa pagbuhat sa unsa tungod sa iyang kadaogan?

²² Pagkatahom nga ngalan ang himoon sa Diyos alang sa iyang kaugalingon pinaagi sa iyang makalilisang nga kadaogan niining “gubat sa dakong adlaw sa Diyos nga Makagagahom sa Tanan” sa Har–​Magedon! (Pinadayag 16:14, 16) Ang usa ka bag-ong kapitulo, ingnon ta, igadugang sa basahon sa mga Gubat ni Jehova. Kini mao unyay madaogong konklusyon, dakong kataposan kon bahin niining sistema sa mga butang. Ang tibuok nga basahon magpadayag nga ang Diyos nga Makagagahom sa Tanan wala gayod maparot sa usa ka gubat. Pagkamasadyaon nga pagadayegon unya siya sa mga mahigugmaon sa ngalan ni Jehova! Unya, sa pagkamatuod, ang kataposang bersikulo sa basahon sa mga Salmo sa kahalangdon pagatumanon: “Ang tanang buhing butang​—papagdayega kang Jah. Dayega si Jah, kamong katawhan!”​—Salmo 150:6.

Mga Pangutana sa Pagsubli

◻ Unsay wala pabilhi sa mga tawo karong adlawa mahitungod sa Diyos sa Bibliya, si Jehova?

◻ Unsang gubat ang giaway ni Abraham, ug kinsay mihatag kaniya sa kadaogan?

◻ Unsa “ang basahon sa mga Gubat ni Jehova”?

◻ Unsa unya ang kataposan sa “basahon sa mga Gubat ni Jehova,” ug sa unsa kini mosangpot?