BEER-LAHAI-ROI

[Atabay sa Usa nga Buhi nga Nakakita Kanako].

Si Agar, ang Ehiptohanong sulugoong babaye ni Sarai, sa dihang mikalagiw tungod sa kasuko sa iyang agalong babaye, misubay “sa dalan paingon sa Sur,” latas sa Negeb hangtod sa Ehipto. Apan, sa paghiabot sa usa ka tuboran (Heb., ʽaʹyin), siya gipasaligan sa usa ka manulonda, gisugo sa pagbalik ngadto sa iyang agalong babaye, ug gisultihan bahin sa pagkatawo ug sa kaugmaon ni Ismael (kansang ngalan nagkahulogang “Ang Diyos Namati (Nagpatalinghog)”). Busa, ang atabay didto gitawag nga “Beer-lahai-roi,” sanglit si Agar nag-ingon kang Jehova, “Ikaw usa ka Diyos sa panan-aw.”​—Gen 16:7-14.

Sa ulahi, si Isaac nagsingabot gikan “sa dalan nga paingon sa Beer-lahai-roi” sa Negeb sa dihang iyang nalantawan ang nagapanawng panon sa mga kamelyo nga nagdala sa iyang umaabot nga pangasaw-onon nga si Rebeca. (Gen 24:​62, 63) Human sa kamatayon ni Abraham, si Isaac nanimuyo “duol sa Beer-lahai-roi.”​—Gen 25:11.

Ang Beer-lahai-roi giingon nga nahimutang sa “taliwala sa Kades ug sa Bered.” (Gen 16:14) Sumala sa usa ka tradisyon sa mga Bedouin, kini nahimutang sa ʽAin Muweilih, mga 19 km (12 mi) sa AK sa ʽAin Qedeis (ang posibleng dapit sa Kades-barnea). Apan tungod kay walay tinong impormasyon nga makuha bahin sa nahimutangan sa Bered, dili matino kon diin nahimutang ang Beer-lahai-roi.