Gitugotan ba Nimo si Jehova nga Mangutana Kanimo?

ANG Bibliya adunay daghang pangutana nga makatabang sa usa sa pagsusi sa iyang kasingkasing. Gani, si Jehova nga Diyos mismo migamit ug mga pangutana aron sa pagtudlog hinungdanong mga kamatuoran. Pananglitan, migamit siyag ubay-ubayng pangutana sa dihang gipasidan-an niya si Cain sa pagtul-id sa iyang daotang tinamdan. (Gen. 4:6, 7) Usahay, ang usa ka pangutana gikan ni Jehova igo nang magpalihok sa usa ka tawo sa paghimog positibong aksiyon. Sa dihang nadungog niya si Jehova nga nangutana: “Kinsa ang akong ipadala, ug kinsa ang moadto alang kanamo?” ang manalagnang si Isaias mitubag: “Ania ako! Ipadala ako.”—Isa. 6:8.

Si Jesus, ang Dakong Magtutudlo, migamit usab ug mga pangutana sa epektibong paagi. Nasulat diha sa mga Ebanghelyo ang kapin sa 280 sa mga pangutana ni Jesus. Bisan tuod usahay migamit siyag mga pangutana sa pagpahilom sa iyang mga magsusupak, sagad ang iyang tuyo mao ang pag-abot sa kasingkasing sa iyang mamiminaw, nga magpalihok kanila sa paghunahuna bahin sa ilang espirituwal nga kahimtang. (Mat. 22:41-46; Juan 14:9, 10) Sa susama, si apostol Pablo, kinsa misulat ug 14 sa mga basahon sa Kristohanon Gregong Kasulatan, migamit ug mga pangutana sa makapakombinsir nga paagi. (Roma 10:13-15) Pananglitan, sa iyang sulat sa mga taga-Roma siya migamit ug daghang pangutana. Ang mga pangutana ni Pablo nagpalihok sa iyang mga magbabasa sa pagpabili sa “pagkalawom sa bahandi ug sa kaalam ug sa kahibalo sa Diyos.”—Roma 11:33.

Bisan tuod ang pipila ka pangutana nagkinahanglag tubag, ang uban gigamit aron sa pag-aghat sa usa sa pagpamalandong. Diha sa mga Ebanghelyo makadaghang gigamit ni Jesus kining matanga sa pangutana. Sa usa ka higayon, gipasidan-an ni Jesus ang iyang mga tinun-an: “Pagbantay sa lebadura sa mga Pariseo ug sa lebadura ni Herodes,” nga nagtumong sa ilang pagkasalingkapaw ug bakak nga mga pagtulon-an. (Mar. 8:15; Mat. 16:12) Ang mga tinun-an ni Jesus wala makasabot sa punto ug naglalis tungod kay nakalimot sila sa pagdalag tinapay. Matikdi ang paggamit ni Jesus ug mga pangutana sa misunod nga mubong kabildohay. “Siya miingon kanila: ‘Nganong gilalisan ninyo ang inyong pagkawalay-tinapay? Wala pa ba kamo makasabot ug makakuha sa kahulogan? Nahabol ba sa pagsabot ang inyong mga kasingkasing? “Bisag adunay mga mata, dili ba kamo makakita; ug bisag adunay mga dalunggan, dili ba kamo makabati?” . . . Wala pa ba kamo makakuha sa kahulogan?’” Ang mga pangutana ni Jesus gigamit aron maaghat ang iyang mga tinun-an sa paghunahuna, nga magpalihok kanila sa pagpamalandong sa tinuod nga kahulogan sa iyang gisulti.—Mar. 8:16-21.

“Pasuknaa Ako Kanimo”

Si Jehova nga Diyos migamit ug mga pangutana aron tul-iron ang panghunahuna sa iyang alagad nga si Job. Pinaagi sa daghang pangutana, gipakita ni Jehova kang Job ang iyang pagkagamay kon itandi sa iyang Magbubuhat. (Job, kap. 38-41) Nagdahom ba si Jehova nga tubagon ang tanan niyang pangutana? Lagmit wala gayod. Ang mga pangutana sama sa “Diin ka man sa pagtukod ko sa kalibotan?” dayag nga gigamit aron sa pagpukaw sa hunahuna ug pagbati ni Job. Bisan human sa pipila ka makapahinuklog nga mga pangutana, si Job halos walay ikatubag. Miingon lamang siya: “Unsay akong ikatubag kanimo? Gitapion ko ang akong kamot sa akong baba.” (Job 38:4; 40:4) Si Job nakasabot sa punto ug nagpaubos sa iyang kaugalingon. Apan, si Jehova wala lamang magtudlo kang Job sa pagpaubos. Gitul-id usab niya ang panghunahuna ni Job. Sa unsang paagi?

Bisan tuod si Job maoy “usa ka tawo nga walay-ikasaway ug matul-id,” usahay ang iyang gipamulong nagpadayag ug sayop nga panglantaw, nga namatikdan ni Elihu sa dihang iyang gibadlong si Job tungod sa “pagpahayag sa iyang kalag nga matarong inay sa Diyos.” (Job 1:8; 32:2; 33:8-12) Busa, ang mga pangutana ni Jehova nagtul-id usab sa pagsabot ni Job. Ang Diyos misulti kang Job gikan sa unos: “Kinsa ba kining naglubog sa tambag pinaagi sa mga pulong sa pagkawalay-kahibalo? Baksi ang imong hawak, palihog, ingon sa usa ka tawo nga lig-on ug lawas, ug pasuknaa ako kanimo, ug suginli ako.” (Job 38:1-3) Pinaagi sa mga pangutana, gipunting ni Jehova ang pagtagad ni Job ngadto sa iyang walay-kinutobang kaalam ug gahom nga makita diha sa iyang kahibulongang mga buhat. Nakatabang kini kang Job sa pagpalig-on sa iyang pagsalig sa paghukom ni Jehova ug sa Iyang paagi sa pagbuhat sa mga butang. Makapahingangha gayod kini nga kasinatian para kang Job—nga pangutan-on sa Labing Gamhanang Diyos mismo!

Kon sa Unsang Paagi Tugotan Nato si Jehova nga Mangutana Kanato

Komosta sa atong bahin? Makabenepisyo ba usab kita sa mga pangutana nga nasulat diha sa Bibliya? Oo! Kon tugotan nato kana nga mag-aghat kanato sa pagpamalandong, madawat nato ang dagayang mga panalangin. Ang matugkarong mga pangutana nakadugang sa pagkaepektibo sa Pulong sa Diyos. Sa pagkatinuod, “ang pulong sa Diyos . . . gamhanan . . . ug makatugkad sa mga hunahuna ug mga tuyo sa kasingkasing.” (Heb. 4:12) Apan, aron makabenepisyo pag-ayo kinahanglang isukna nato kini sa atong kaugalingon, nga daw si Jehova mismo ang nangutana kanato. (Roma 15:4) Atong hisgotan ang pipila niini.

“Dili ba mobuhat ang Maghuhukom sa tibuok yuta sa kon unsay matarong?” (Gen. 18:25) Gipangutana kini ni Abraham sa dihang gihukman sa Diyos ang Sodoma ug Gomora. Giisip ni Abraham nga imposible gayod nga si Jehova molihok nga dili makataronganon—nga laglagon ang matarong uban sa daotan. Ang pangutana ni Abraham nagpakita sa iyang hugot nga pagtuo sa pagkamatarong ni Jehova.

Karong adlawa, ang pipila makiling tingali sa pagpanaghap bahin sa umaabot nga mga paghukom ni Jehova, sama sa kon kinsa gayoy makalabang-buhi sa Armagedon o kon kinsay banhawon. Inay tugotan kana nga makatugaw kanato, atong hinumdoman ang pangutana ni Abraham. Tungod kay sama kang Abraham nasayod man kita nga si Jehova usa ka maluloton nga langitnong Amahan ug bug-os kitang nagsalig sa iyang hustisya ug kaluoy, dili na kita mag-usik ug panahon ug kusog alang sa dili-angayng pagkabalaka, makapaluyang pagduhaduha, ug walay-kapuslanang mga debate.

“Kinsa ba kaninyoy makadugang ug usa ka maniko sa gitas-on sa iyang kinabuhi pinaagi sa pagkabalaka?” (Mat. 6:27) Sa pagpakigsulti sa dakong panon sa katawhan nga naglakip sa iyang mga tinun-an, si Jesus misukna niini aron sa pagpasiugda nga kinahanglan nilang itugyan ang ilang kaugalingon sa mahigugmaong kamot ni Jehova. Niining kataposang mga adlaw sa daotang sistema sa mga butang daghan kaayo ang mga kabalaka, apan kon atong isentro ang atong pagtagad niana, dili malugwayan ang atong kinabuhi o mapauswag ang kalidad niana.

Kon kita mabalaka bahin sa atong kaugalingon o sa atong mga minahal, ang paghinumdom sa pangutana ni Jesus makatabang kanato sa pagbaton ug hustong panglantaw sa mga butang nga atong gikabalak-an. Makatabang kana kanato nga dili na magmabalak-on ug maghunahunag negatibong mga butang nga makapaluya kanato sa mental, emosyonal, ug pisikal. Sama sa gipasalig ni Jesus kanato, ang atong langitnong Amahan, kinsa nagpakaon sa mga langgam sa langit ug nagbesti sa mga tanom sa kapatagan, nasayod gayod kon unsay atong gikinahanglan.—Mat. 6:26-34.

“Makapundok ba ang usa ka tawo ug kalayo sa iyang sabakan ug dili masunog ang iyang mga besti?” (Prov. 6:27) Ang unang siyam ka kapitulo sa Proverbio naglakip ug mugbong mga pamulong sa usa ka amahan nga nagpaambit ug praktikal nga kaalam sa iyang anak. Ang pangutana nga gikutlo nagtumong sa mapait nga sangpotanan sa pagpanapaw. (Prov. 6:29) Kon atong namatikdan nga kita nagbirigbirig o dunay sayop nga pangibog, kining pangutanaha magsilbing pasidaan kanato. Mahimo usab kining isukna sa dihang ang usa gitental sa paggawi nga dili maalamon. Tin-aw gayod nga gipasiugda niana ang praktikal nga prinsipyo sa Bibliya: ‘Imong anihon kon unsay imong gipugas’!—Gal. 6:7.

“Kinsa man ikaw nga mohukom sa sulugoon sa balay nga iya sa lain?” (Roma 14:4) Sa iyang sulat sa mga taga-Roma, gihisgotan ni Pablo ang mga problema nga mitungha sa unang-siglong kongregasyon. Tungod sa lainlain nilang kultura, ang pipila ka Kristohanon lagmit mihukom dayon sa desisyon ug ginahimo sa ilang isigkamagtutuo. Ang pangutana ni Pablo nagpahinumdom kanila nga angay nilang dawaton ang usag usa ug itugyan kang Jehova ang pagpanghukom.

Karong adlawa usab, ang katawhan ni Jehova lainlaig kagikan ug kahimtang sa kinabuhi. Bisan pa niana, gihiusa kita ni Jehova. Nakaamot ba kita sa maong panaghiusa? Kon makiling kita sa paghukom dayon sa gihimo sa usa ka igsoon, maalamon gayod nga isukna nato sa atong kaugalingon ang pangutana ni Pablo!

Mga Pangutana nga Mas Makapasuod Nato Kang Jehova

Kining pipila ka pananglitan nagpakita kon sa unsang paagi ang mga pangutana diha sa Pulong sa Diyos magpalihok sa usa ka tawo sa pagsusi sa iyang kaugalingon. Kon atong susihon ang konteksto sa matag pangutana, matabangan kita sa paghimog praktikal nga kapadapatan niana sa atong kahimtang. Ug samtang atong basahon ang Bibliya, makakaplag pa kitag ubang mapuslanong mga pangutana.—Tan-awa ang kahon sa panid 14.

Kon tugotan nato nga matandog kita sa matugkarong mga pangutana diha sa Pulong sa Diyos, matabangan kita sa pagpahiuyon sa atong hunahuna ug kasingkasing sa matarong nga mga dalan ni Jehova. Human siya pangutan-a ni Jehova, si Job miingon: “Sa hulungihong nakadungog ako bahin kanimo, apan karon ang akong mata nakakita kanimo.” (Job 42:5) Oo, si Jehova nahimong mas tinuod alang kang Job, nga daw nakita niya Siya. Ang tinun-ang si Santiago sa ulahi miingon: “Duol sa Diyos, ug siya moduol kaninyo.” (Sant. 4:8) Hinaot nga tugotan nato ang tanang bahin sa Pulong sa Diyos, lakip na ang mga pangutana, nga motabang kanato nga mouswag sa espirituwal ug mas tin-awng ‘makita’ si Jehova.

[Kahon sa panid 14]

Sa unsang paagi ang pagsukna niining mga pangutanaha sa imong kaugalingon makatabang nimo sa pagbaton sa panglantaw ni Jehova?

▪ “May dako bang kalipay si Jehova sa mga halad-nga-sinunog ug sa mga halad sama sa pagsunod sa tingog ni Jehova?”—1 Sam. 15:22.

▪ “Ang Usa nga nagaumol sa mata, dili ba siya makakita?”—Sal. 94:9.

▪ “Ang pagpangita sa mga tawo sa kaugalingon nilang himaya, himaya ba kana?”—Prov. 25:27.

▪ “Angay ka ba nga manginit sa kasuko?”—Jon. 4:4.

▪ “Unsay kapuslanan alang sa usa ka tawo kon maangkon niya ang tibuok kalibotan apan mawad-an sa iyang kalag?”—Mat. 16:26.

▪ “Kinsa ang magabulag kanato gikan sa gugma ni Kristo?”—Roma 8:35.

▪ “Unsay anaa kanimo nga wala nimo madawat?”—1 Cor. 4:7.

▪ “Aduna bay pakig-ambitay ang kahayag uban sa kangitngit?”—2 Cor. 6:14.

[Hulagway sa panid 15]

Unsay nakat-onan ni Job sa mga pangutana ni Jehova?