Si Jehova Angay nga Maoy Atong Pagsalig

“Si Jehova mismo mahimong imong pagsalig.”​—PROVERBIO 3:26.

 1. Bisan tuod daghan ang nangangkon nga may pagsalig sa Diyos, unsay nagsugyot nga dili sa tanang panahon nga sila may pagsalig?

ANG panultihong “In God We Trust” makita diha sa salapi sa Tinipong Bansa sa Amerika. Apan ang tanan ba niadtong nagagamit niining kuwartaha, nianang yutaa o sa ubang dapit, tinuod nga nagsalig sa Diyos? O mas nagsalig ba hinuon sila sa salapi mismo? Ang maong pagsalig sa salapi nianang yutaa o sa bisan unsang ubang nasod dili harmonya sa pagsalig sa usa ka labing makagagahom nga Diyos sa gugma, kinsa dili gayod magaabuso sa iyang gahom ug dili sa bisan unsang paagi hakog. Sa pagkamatuod, iyang gihukman ang kahakog sa tin-aw kaayong mga pulong.​—Efeso 5:5.

 2. Unsang tinamdan ang angay huptan sa tinuod nga mga Kristohanon bahin sa gahom sa mga bahandi?

² Ang tinuod nga mga Kristohanon nagbutang sa ilang pagsalig sa Diyos, dili sa mga bahandi, uban sa “malimbongong gahom” niini. (Mateo 13:22) Sila nahibalo nga ang gahom sa salapi sa paghatag ug kalipay ug pagtipig sa kinabuhi limitado kaayo. Dili kini tinuod labot sa gahom sa Labing Makagagahom nga Diyos. (Sofonias 1:18) Busa, pagkamaalamon sa tambag: “Himoa ang inyong paagi sa pagkinabuhi nga mahigawas sa gugma sa salapi, samtang kamo magmakontento sa mga butang nga anaa karon. Kay siya nag-ingon: ‘Dili ko gayod ikaw pagabiyaan ni sa bisan unsa mang paagi magatalikod kanimo’”!​—Hebreohanon 13:5.

 3. Sa unsang paagi ang konteksto sa Deuteronomio 31:​6 naghatag ug kahayag sa pagkutlo ni Pablo sa bersikulo?

³ Sa dihang nagsulat sa ibabaw nga mga pulong ngadto sa Hebreohanong mga Kristohanon, gikutlo ni apostol Pablo ang mga instruksiyon nga gihatag ni Moises ngadto sa mga Israelinhon wala magdugay una pa siya namatay: “Magmaisogon ug magmalig-on. Ayaw kahadlok o kalisang atubangan kanila, tungod kay si Jehova nga inyong Diyos mao ang usa nga magmartsa uban kaninyo. Dili niya kamo pasagdan ni pagabiyaan kamo sa bug-os.” (Deuteronomio 31:6) Ang konteksto nagpakita nga si Moises nag-awhag ug pagsalig diha kang Jehova nga siya misulti ug labaw pa kay sa pagsalig kaniya sa pagtagana kanila ug materyal nga mga panginahanglan. Sa unsang paagi?

 4. Sa unsang paagi gipamatud-an sa Diyos ngadto sa mga Israelinhon nga siya kasaligan?

⁴ Sulod sa 40 ka tuig nga naglaaglaag ang Israel sa kamingawan, matinumanon ang Diyos sa pagtagana kanila ug mga kinahanglanon sa kinabuhi. (Deuteronomio 2:​7; 29:5) Siya nagtagana usab ug pagpangulo. Ang usa ka pasundayag niini mao ang panganod sa maadlaw ug kalayo magabii, nga nagtultol sa mga Israelinhon ngadto sa “usa ka yuta nga nagaagay ang gatas ug dugos.” (Exodo 3:​8; 40:​36-38) Sa dihang miabot na ang panahon sa aktuwal nga pagsulod sa Yutang Saad, gipili ni Jehova si Josue nga mahimong manununod ni Moises. Ang mga molupyo sa yuta madahom nga mosukol. Apan si Jehova nakamartsa uban sa iyang katawhan sa daghan nang dekada, busa dili na kinahanglang mahadlok. Ang mga Israelinhon adunay tinuod nga katarongan sa pagkaila kang Jehova ingong usa ka Diyos nga kasaligan!

 5. Sa unsang paagi ang kahimtang sa mga Kristohanon karon kaamgid niadtong sa mga Israelinhon sa wala pa mosulod sa Yutang Saad?

⁵ Ang mga Kristohanon karon nagmartsa diha sa kamingawan sa presenteng daotang kalibotan sa ilang pagpaingon sa bag-ong kalibotan sa Diyos. Ang uban kanila nagsubay niining dalana nga sobra na sa 40 ka tuig. Karon sila nagtindog sa utlanan sa bag-ong kalibotan sa Diyos. Bisan pa niana, ang mga kaaway nagbabag gihapon sa dalan, nga nagtinguha sa pagbabag sa tanang gustong mosulod sa kon unsay mahimong sama sa usa ka Yutang Saad, nga mas mahimayaon kay sa karaang Yutang Saad nga nagaagay sa gatas ug dugos. Busa alang sa mga Kristohanon karong adlawa, pagkatukma sa mga pulong ni Moises, nga gisubli ni Pablo: “Dili ko gayod ikaw pagabiyaan ni talikdan sa bisan unsang paagi”! Ang tanang nagpabiling malig-on ug maisogon, puno sa pagtuo, nga nagbutang sa pagsalig diha kang Jehova, seguradong makadawat ug ganti.

Pagsalig Pinasukad sa Kahibalo ug Panaghigala

6, 7. (a) Sa unsang paagi nasulayan ang pagsalig ni Abraham kang Jehova? (b) Unsa kahay gibati ni Abraham samtang nagpanaw ngadto sa dapit nga iyang ihalad si Isaac?

⁶ Sa usa ka higayon ang katigulangan sa mga Israelinhon nga si Abraham gisugo sa paghalad sa iyang anak nga si Isaac ingong halad nga sinunog. (Genesis 22:2) Unsay nagtukmod niining mahigugmaong amahan sa pagbaton ug ingon nianang malig-ong pagsalig kang Jehova nga siya misugot man dayon? Ang Hebreohanon 11:​17-19 nagtubag: “Tungod sa pagtuo si Abraham, sa dihang siya gisulayan, sama sa nakatanyag na kang Isaac, ug ang tawo nga masayahong midawat sa mga saad misulay sa pagtanyag sa iyang bugtong anak nga lalaki, bisan tuod gikaingon na kaniya: ‘Ang tawgon nga “imong binhi” maoy pinaagi kang Isaac.’ Apan iyang giisip nga ang Diyos makahimo sa pagbangon kaniya bisan gikan sa mga patay; ug gikan niana siya midawat usab kaniya sa masambingayong paagi.”

⁷ Hunahunaa nga mikabat ug tulo ka adlaw alang kang Abraham ug Isaac sa pag-abot sa lugar nga himoan sa paghalad. (Genesis 22:4) Dihay daghang panahon si Abraham sa pagpalandong pag-usab sa gihangyo kaniya nga pagahimoon. Mahanduraw ba nato ang iyang mga pagbati, ang iyang mga emosyon? Ang pagkatawo ni Isaac maoy usa ka wala dahomang hinungdan sa pagkalipay. Ang pamatuod sa pagpangilabot sa Diyos nagpalalom pa sa pagbati ni Abraham ug sa iyang kanhi dili-makapanganak nga asawa, si Sara, sa Diyos. Sila dayag nga nagkinabuhi human niadto nga naghulat kon unsay anaa sa umaabot ni Isaac ug sa iyang mga kaliwat. Ang ila bang mga damgo kalit lang nga matapos, nga daw maoy mahitabo tungod sa gihangyo karon sa Diyos?

 8. Sa unsang paagi ang pagsalig ni Abraham sa Diyos misaylo pa kay sa pagtuo lamang nga Siya makabanhaw kang Isaac?

⁸ Bisan pa niana, si Abraham may pagsalig sumala sa personal nga kahibalo sa suod nga mga higala sa usag usa. Ingong “higala ni Jehova,” si Abraham “nagbutang ug pagtuo kang Jehova, ug kadto giisip kaniya ingong pagkamatarong.” (Santiago 2:23) Ang pagsalig ni Abraham kang Jehova misaylo pa kay sa pagtuo lamang nga ang Diyos makabanhaw kang Isaac. Si Abraham kombinsido usab nga ang gihangyo ni Jehova kaniya nga iyang pagabuhaton matarong, bisan pag wala mahibalo si Abraham sa tanang kamatuoran. Siya walay katarongan sa pagduhaduha nga matarong si Jehova sa paghangyo niini. Dayon, ang pagsalig ni Abraham nalig-on pa sa dihang ang manulonda ni Jehova nangilabot sa pagpugong sa aktuwal nga pagpatay kang Isaac diha sa halad.​—Genesis 22:​9-14.

9, 10. (a) Kanus-a unang nakapasundayag si Abraham sa pagsalig kang Jehova? (b) Unsang hinungdanong leksiyon ang atong makat-onan gikan kang Abraham?

⁹ Si Abraham nagpasundayag ug samang matang sa pagsalig sa pagkamatarong ni Jehova duolan sa 25 ka tuig kanhi. Napasidan-an nga ang Sodoma ug Gomora pagalaglagon, siya natural nga nabalaka sa kaayohan sa tanang tawong matarong nga nagpuyo didto, lakip sa iyang pag-umangkong si Lot. Si Abraham mihangyo sa Diyos pinaagi sa mga pulong: “Halayo kanimo ang pagbuhat ug ingon niana nga patyon mo ang tawong matarong uban sa tawong daotan ug nga sa ingon niana ang dangatan sa tawong matarong mahisama sa daotan! Kana halayo kanimo. Dili ba ang Maghuhukom sa tibuok nga yuta magabuhat sa matarong?”​—Genesis 18:25.

¹⁰ Ang patriarkang si Abraham kombinsido nga si Jehova dili gayod mobuhat ug bisan unsa nga daotan. Ang salmista sa ulahi miawit: “Si Jehova matarong sa tanan niyang mga dalan ug maunongon sa tanan niyang mga buhat.” (Salmo 145:17) Maayong atong pangutan-on ang atong kaugalingon: ‘Modawat ba ako kon unsay itugot ni Jehova kanako nga ipaagom nga dili magduhaduha sa iyang pagkamatarong? Kombinsido ba ako nga ang tanan niyang itugot mosangpot alang sa akong kaayohan ug alang sa kaayohan usab sa uban?’ Kon kita makatubag ug oo, kita nakakat-on ug usa ka hinungdanong leksiyon gikan kang Abraham.

Pagpasundayag ug Pagsalig sa mga Pagpili ni Jehova

11, 12. (a) Unsang bahin sa pagsalig ang gikinahanglan alang sa mga alagad sa Diyos? (b) Unsay atong suliran usahay?

¹¹ Kadtong naglantaw kang Jehova ingong ilang pagsalig nagpakita usab ug pagsalig sa mga tawo nga gipili ni Jehova sa katumanan sa iyang mga katuyoan. Alang sa mga Israelinhon, kini nagkahulogag pagpakitag pagsalig kang Moises ug sa ulahi sa iyang manununod, si Josue. Alang sa unang mga Kristohanon, kini nagkahulogag pagpakitag pagsalig sa mga apostoles ug sa tigulang nga mga lalaki sa kongregasyon sa Jerusalem. Alang kanato karong adlawa, kini nagkahulogag pagbaton ug pagsalig sa ‘matinumanon ug maalamong ulipon’ nga gitudlo sa paghatag kanato ug espirituwal nga “pagkaon sa hustong panahon,” maingon man taliwala niadtong naglangkob sa Nagamandong Lawas.​—Mateo 24:45.

¹² Sa pagkatinuod, ang pagbutang sa atong pagsalig niadtong nagapanguna sa Kristohanong kongregasyon maoy alang sa atong kaayohan. Kita gisultihan: “Magmasinugtanon kamo kanilang nagapanguna taliwala kaninyo ug magmapinasakopon, kay sila padayong nagabantay sa inyong mga kalag ingon nga sila maoy maghatag ug husay; aron buhaton nila kini uban ang kangaya ug dili uban ang pagpanghupaw, kay kini makadaot kaninyo.”​—Hebreohanon 13:17.

Ayawg Pagdudahi ang mga Gipili ni Jehova

13. Unsay atong katarongan sa pagsalig niadtong gitudlo sa pagpanguna?

¹³ Ang Bibliya nagtabang kanato nga magmatimbang sa pagpakitag pagsalig niadtong nagapanguna taliwala sa katawhan ni Jehova. Maayong atong pangutan-on ang atong kaugalingon: ‘Si Moises nasayop ba sukad? Ang mga apostoles ba kanunayng nagpakitag samag-Kristo nga tinamdan nga maoy gitinguha ni Jesus nga ilang batonan?’ Dayag ang mga tubag. Si Jehova nagpili sa paggamit ug maunongon ug debotadong mga lalaki sa paggiya sa iyang katawhan, bisan tuod sila maoy mga lalaki nga dili-hingpit. Busa, samtang ang mga ansiyano karon dili-hingpit, angay gihapon nato silang ilhon ingong ‘[gitudlo sa] balaang espiritu nga [mahimong] mga magtatan-aw, aron magbantay sa kongregasyon sa Diyos.’ Sila takos sa atong pagpaluyo ug pagtahod.​—Buhat 20:28.

14. Unsa ang talagsaon labot sa pagpili ni Jehova kang Moises imbes kang Aaron o Miriam ingong pangulo?

¹⁴ Tulo ka tuig ang pagkamagulang ni Aaron kay kang Moises, apan ang duha mas bata kay sa ilang igsoong babaye, si Miriam. (Exodo 2:​3, 4; 7:7) Ug sanglit si Aaron mas larinong mosulti kay kang Moises, siya gitudlo sa pag-alagad ingong tigpamaba sa iyang igsoon. (Exodo 6:​29–​7:2) Apan, sa pagpangulo sa mga Israelinhon, wala pilia ni Jehova ang kinamagulangan, si Miriam, o ang labing larino, si Aaron. Ang iyang pagpili kang Moises gihimo nga may bug-os nga pag-ila sa tanang kamatuoran ug mga panginahanglan sa panahon. Sa usa ka higayon nga kulang pa sila niining matin-aw nga pagsabot, si Aaron ug Miriam nagreklamo: “Kang Moises ba lamang nakigsulti si Jehova? Dili ba nakigsulti usab siya kanamo?” Si Miriam, nga tingali maoy pangunang tigsiba, gisilotan sa iyang pagkawalay-pagtahod sa pinili ni Jehova, diin siya ug si Aaron angay untang moila nga siya mao “ang labing mapainubsanon sa tanang tawo ibabaw sa yuta.”​—Numeros 12:​1-3, 9-15.

15, 16. Sa unsang paagi gipamatud-an ni Caleb nga siya may pagsalig kang Jehova?

¹⁵ Sa dihang ang 12 ka espiya miadto sa pagpangespiya sa Yutang Saad, 10 ang nagdalag negatibong report. Ilang gipahadlok ang mga kasingkasing sa mga Israelinhon pinaagi sa pagsulti mahitungod sa Canaanhong “mga lalaki nga hilabihang dagkoa.” Kini, sa baylo, nakapahinabo sa mga Israelinhon “sa pagbagulbol batok kang Moises ug Aaron.” Apan dili tanang espiya ang nagpakitag kakulang ug pagsalig kang Moises ug kang Jehova. Atong mabasa: “Dayon misulay si Caleb sa pagpahilom sa katawhan sa atubangan ni Moises ug miingon: ‘Manungas kita dayon, ug kita tinong makapanag-iya niini, tungod kay segurado gayod nga atong madaog kini.’” (Numeros 13:​2, 25–​33; 14:2) Ang malig-ong pagbarog ni Caleb giduyogan sa iyang isigkaespiya nga si Josue. Ang duha nagpakita nga ilang gihimo si Jehova nga ilang pagsalig sa dihang sila miingon: “Kon si Jehova nahimuot kanato, nan kita iya gayod nga pasudlon ngadto niining yutaa ug ihatag niya kini kanato, usa ka yuta nga nagapaagay sa gatas ug dugos. Lamang . . . ayaw kamo kahadlok sa katawhan sa yuta . . . si Jehova nagauban kanato. Ayaw sila kahadloki.” (Numeros 14:​6-9) Kining pagsalig kang Jehova nagantihan. Taliwala sa hamtong nga kaliwatan nga buhi niadtong panahona, si Caleb, Josue, ug pipila ka Levihanon lamang ang nakapribilehiyo sa pagsulod sa Yutang Saad.

¹⁶ Sa milabay ang pipila ka tuig si Caleb miingon: “Alang kanako, ako bug-os nga nagsunod kang Jehova nga akong Diyos. . . . Ug ania karon si Jehova nagtipig kanako nga buhi, sama sa iyang gisaad, niining kap-atan ug lima ka tuig sukad sa panahon nga si Jehova nanaad kang Moises niining mga pulonga sa diha nga nagpanaw pa ang Israel didto sa kamingawan, ug karon ania ako niining adlawa nga kawaloan ug lima ka tuig na ang panuigon. Sa gihapon ako mabaskog karon sama sa adlaw sa pagpadala ni Moises kanako. Sumala sa akong kusog kaniadto, mao usab ang akong kusog karon.” (Josue 14:​6-11) Matikdi ang positibong tinamdan ni Caleb, ang iyang pagkamatinumanon, ug ang iyang pisikal nga mga katakos. Bisan pa niana, wala pilia ni Jehova si Caleb nga mahimong manununod ni Moises. Kining pribilehiyoa gihatag ngadto kang Josue. Kita makasalig nga si Jehova may mga katarongan sa iyang pagpili, ug kadto mao ang labing maayong pagpili.

17. Daw unsa ang nagpahimo kang Pedro nga dili-takos hatagan ug responsibilidad?

¹⁷ Gilimod ni apostol Pedro ang iyang Agalon sa tulo ka higayon. Siya usab sa pagkamadalidalion milihok nga kinaugalingon, nagputol sa dalunggan sa ulipon sa hataas nga saserdote. (Mateo 26:​47-55, 69-75; Juan 18:​10, 11) Ang uban tingali moingon nga si Pedro hadlokan, dili-timbang nga tawo, nga dili-takos sa pagtagamtam ug linain nga mga pribilehiyo. Bisan pa niana, kinsay gihatagan sa mga yawi sa Gingharian, nga nakapribilehiyo sa pagbukas sa dalan ngadto sa langitnong pagtawag sa tulo ka grupo? Si Pedro.​—Buhat 2:​1-41; 8:​14-17; 10:​1-48.

18. Unsang sayop, ingon sa gihisgotan ni Judas, ang atong buot likayan?

¹⁸ Kining maong mga pananglitan nagpakita nga kita kinahanglang magbantay sa paghukom sa panggawas nga mga panagway. Kon kita may pagsalig kang Jehova, dili nato pagadudahan ang iyang mga pagpili. Bisan tuod ang iyang yutan-ong kongregasyon gilangkoban sa mga tawong dili-hingpit, nga wala mangangkon nga dili-makasala, iyang gigamit sila sa gamhanang paagi. Si Judas, ang igsoon ni Jesus sa inahan, nagpasidaan sa unang-siglong mga Kristohanon batok sa mga tawong “walay-pagtamod sa pagkaginoo ug nagapamulong nga inabusar labot sa mga mahimayaon.” (Judas 8-10) Dili gayod angay nga mahisama kita kanila.

19. Nganong kita walay katarongan sa pagduda sa mga pagpili ni Jehova?

¹⁹ Dayag nga namili si Jehova alang sa pipila ka responsibilidad ug mga tawo nga adunay partikular nga mga hiyas nga gikinahanglan sa paggiya sa iyang katawhan diha sa dalan nga buot niya nga maoy ilang pagalaktan nianang partikular nga higayon. Kita angayng maningkamot sa pagdawat niini nga kamatuoran, dili dudahan ang mga pagpili sa Diyos, apan magmakontento nga mapainubsanong mag-alagad kon asa kita sa tagsatagsa ibutang ni Jehova. Sa ingon kita nagpakita nga atong gihimo si Jehova nga atong pagsalig.​—Efeso 4:​11-16; Filipos 2:3.

Pagpasundayag ug Pagsalig sa Pagkamatarong ni Jehova

20, 21. Unsay atong makat-onan gikan sa paagi sa Diyos sa pagpakiglabot kang Moises?

²⁰ Kon may mga panahon nga maghinobra kita sa pagsalig sa atong kaugalingon ug wala kaayoy pagsalig kang Jehova, magkat-on kita kang Moises. Sa 40 anyos pa, nagkinaugalingon siya sa paghatag ug kagawasan sa mga Israelinhon gikan sa pagkabihag sa Ehipto. Ang iyang mga paningkamot tino nga may maayong katuyoan, apan kini wala mosangpot ug dihadiha nga kagawasan sa Israel, ni nakapaarang-arang kini sa iyang kaugalingong kahimtang. Sa pagkatinuod, siya napugos sa pagkalagiw. Human lamang sa pagkaagom ug 40 ka tuig nga malisod nga pagbansay diha sa langyawng yuta nga siya nahimong takos pilion sa pagbuhat sa iyang gitinguhang buhaton sa sinugdanan pa. Niining higayona siya makasalig sa pagpaluyo ni Jehova tungod kay ang mga butang karon ginahimo na sa paagi ni Jehova sa usa ka panahon nga mosibo sa Iyang orasan.​—Exodo 2:​11–​3:10.

²¹ Ang matag usa kanato angay mangutana sa kaugalingon: ‘May mga panahon ba nga ako usahay mag-una-una kang Jehova ug sa mga ansiyano nga gitudlo diha sa kongregasyon, nga maningkamot sa pagpadali sa mga butang o mobuhat ug mga butang sa akong kaugalingong paagi? Imbes mobati nga nasayloan sa pipila ka pribilehiyo, ako ba andam modawat sa akong nagkamulong yugto sa pagbansay?’ Sa tinuod, kita ba may nakat-onang hinungdanong leksiyon gikan kang Moises?

22. Bisan pag nawad-an ug dakong pribilehiyo, unsay pagbati ni Moises labot kang Jehova?

²² Dugang pa, kita makakat-on ug laing leksiyon kang Moises. Ang Numeros 20:​7-13 nagtug-an kanato sa sayop nga iyang nahimo, nga nakahatag kaniya ug dakong kapildihan. Siya nawad-an sa pribilehiyo sa paggiya sa mga Israelinhon ngadto sa Yutang Saad. Siya ba sa maong panahon misanong nga ang desisyon ni Jehova sa maong butang dili-matarong? Siya ba nagpalain sa iyang kaugalingon, sa laing pagkasulti, nangluod tungod kay siya wala tagda ug maayo sa Diyos? Si Moises nawad-an ba ug pagsalig sa pagkamatarong ni Jehova? Atong makita ang mga tubag diha sa mga pulong nga gisulti ni Moises mismo ngadto sa Israel wala magdugay una pa siya namatay. Mahitungod kang Jehova, si Moises nag-ingon: “Hingpit ang iyang kalihokan, kay ang tanan niyang mga dalan hustisya. Usa ka Diyos sa pagkamatinumanon, nga kaniya walay inhustisya; matarong ug matul-id siya.” (Deuteronomio 32:4) Dayag nga nagpabiling masaligon si Moises kang Jehova hangtod sa kataposan. Kita komosta? Kita ba sa tinagsatagsa naghimog mga lakang sa paglig-on sa atong pagsalig kang Jehova ug sa iyang pagkamatarong? Sa unsang paagi mahimo nato kana? Atong tan-awon.

Unsay Imong Tubag?

◻ Unsay mga katarongan nga angayng magbaton ug pagsalig ang mga Israelinhon kang Jehova?

◻ Mahitungod sa pagsalig, unsay atong makat-onan gikan kang Abraham?

◻ Nganong angay kitang maglikay sa pagduda sa mga pagpili ni Jehova?

[Hulagway sa panid 13]

Ang pagsalig kang Jehova naglakip sa pagtahod niadtong mga nagapanguna sa kongregasyon