Usa ka Kaminyoon nga Makahatag Kaayohan sa Minilyong Buhi Karon
“Si Jehova nga atong Diyos, ang Makagagahom sa Tanan, nagsugod sa paghari. . . . Ihatag ta kaniya ang himaya, kay nahiabot na ang kasal sa Kordero ug ang iyang pangasaw-onon nakaandam na sa iyang kaugalingon.”—PINADAYAG 19:6, 7.
1. Kanus-a sugdan sa pag-awit ang matagnaong awit sa Pinadayag 19:6-8, ug ngano?
KINING makapaukyab nga mga pulong maoy bahin sa usa ka awit sa kadaogan. Kanus-a ba kini sugdan sa pag-awit? Human sa pagkalaglag sa karaang kaaway sa pagsimba ni Jehova—ang “Dakong Babilonya,” ang simbolikong “dakong bigaon” nga nagahawas sa tanang matang sa bakak nga relihiyon. Kinahanglang ipahamtang kaniya ang paghukom tungod sa pagmisrepresentar niya sa Diyos. Gilimbongan gayod niya ang mga tawo pinaagi sa iyang pakiglangkit sa tawhanong politika, sa iyang pagkadalo sa materyal, ug sa iyang makapatayng pagdumot sa matuod nga mga magsisimba ni Jehova!—Pinadayag 17:1-6; 18:23, 24; 19:1, 2; Santiago 4:4.
2. (a) Sa unsang paagi ipahinabo ni Jehova ang kalaglagan sa Dakong Babilonya? (b) Inay sa pagdayeg kang Jehova, unsay buhaton sa mga tiglaglag sa bakak nga relihiyon?
2 Sa dili na madugay, ibutang ni Jehova nga Diyos sa mga kasingkasing sa politikanhong mga pangulo sa kalibotan nga laglagon siya. (Pinadayag 17:12, 16, 17) Apan ang mga manlalaglag sa bakak nga relihiyon dili moduyog sa pag-awit sa dakong awit sa kadaogan. Hinunoa, ubos sa impluwensiya ni Satanas, alyas Gog, atakehon nila ang mga magtutuman sa matuod nga relihiyon, nga nagapuyong malinawon ug nagatipig sa ilang kaugalingon nga bulag sa pagkadaotan niining kalibotana.—Isaias 2:2-4; Ezekiel 38:2, 8-12; Juan 17:14; Santiago 1:27.
3. Tungod sa unsang mga hinungdan ang tawhanong mga alagad ni Jehova moduyog sa langitnong awit?
3 Kining masuklanon-sa-Diyos nga pag-atake sa politikanhong mga magmamando mosangko sa gubat sa Armageddon, nga maglaglag sa bug-os sa batok-relihiyon nga mga nasod. Sunod, ang daotang impluwensiya ni Satanas ug sa iyang mga demonyo pagawagtangon. (Pinadayag 16:14, 16; 19:11-21; 20:1, 2) Uban sa mga kasingkasing nga punog pasalamat, ang tanang buhing tawo moduyog sa langitnong koro: “Dayega si Jah, kamong katawhan, tungod kay si Jehova nga atong Diyos, ang Makagagahom sa Tanan, nagsugod sa paghari.” (Pinadayag 19:6) Sa pagkamatuod, ang maong makapauyog-sa-kalibotang mga hitabo magpasidaan sa pagsugod sa usa ka bag-ong yugto sa panahon. Mabayaw na unya ni Jehova ang iyang pagkasoberano ug mahanaw gikan sa yuta ang tanang nagahagit sa iyang pagmando. Sa kataposan ang panahon moabot na alang sa langitnong kasal. Sumala sa pagpadayon sa matagnaong awit: “Managmaya ug managsadya kita, ug ihatag ta [kang Jehova] ang himaya, tungod kay nahiabot na ang kasal sa Kordero ug ang iyang pangasaw-onon nakaandam na sa iyang kaugalingon.”—Pinadayag 19:7, 8.
4. (a) Kinsay gilandongan sa Kordero ug sa iyang “asawa”? (b) Unsang mga pangutana ang gisukna dinhi, ug sa unsang paagi atong mabatonan ang mga tubag?
4 Ang Kordero walay lain kondili mao ang hinimayang Jesu-Kristo, ug ang iyang “asawa” mao ang kompletong gidaghanon sa iyang 144,000 matinumanong dinihogang mga sumusunod nga karon nahiusa na kaniya sa langit. Sa tingob kining langitnong mga kapikas sa kaminyoon naglangkob sa tanang sakop sa Gingharian sa Diyos, nga maoy motuboy sa katawhan, apil sa mga patay nga banhawon, ngadto sa tawhanong kahingpitan. (Pinadayag 5:8-10; 14:1-4; 20:4, 12, 13; 21:3-5, 9, 10; 22:1-3) Molampos ba ang mga hitabo nga mosangko nianang bulahang kasal? Sa unsang paagi mabatonan nimo ang kaayohan sa maong kaminyoon? Sa pagkaplag sa mga tubag sa maong mga pangutana, susihon nato ang mga hitabo bahin sa kaminyoon ni Isaac, sumala sa nahitala sa Genesis kapitulo 24.
Usa ka Pinili sa Diyos nga Pangasaw-onon Alang Kang Isaac
5, 6. Nganong si Abraham mapugsanon nga si Isaac dili mangasawag usa ka Canaanhon, ug alang kang kinsa kini maayong giya karong adlawa? (1 Corinto 7:39)
5 Ang asoy nagsugod sa paghatag ni Abraham ug mga tugon ngadto sa iyang tagdumala sa panimalay, lagmit si Eliezer. (Genesis 15:2; 24:2) “Ikaw papanumpaon ko tungod kang Jehova,” matud ni Abraham, “nga dili ka magkuha ug usa ka asawa alang sa akong anak nga lalaki gikan sa mga anak nga babaye sa mga Canaanhon nga sa ilang taliwala ako nagapuyo, apan umadto ka sa akong yuta ug sa akong mga kaubanan, ug magkuha ka ug usa ka asawa alang sa akong anak lalaki, alang kang Isaac.”—Genesis 24:3, 4.
6 Nganong si Abraham mapugsanon kaayo nga ang iyang anak nga lalaki dili mangasawag usa ka Canaanhon? Kay ang mga Canaanhon maoy mga kaliwat ni Canaan, nga gitunglo ni Noe. (Genesis 9:25) Dugang pa, ang mga Canaanhon nailhan tungod sa ilang daotang mga buhat, ug labing hinungdanon, sila wala magsimba kang Jehova. (Genesis 13:13; Levitico 18:3, 17-28) Hisabtan, buot ni Abraham nga ang iyang anak nga lalaki mangasawa gikan sa iyang kaugalingong pamilya, ang mga kaliwat ni Shem, nga nakadawat sa dinasig nga panalangin ni Noe. (Genesis 9:26) Pagkamaayo kini nga giya alang sa mga Kristohanon nga mopalabi sa pagminyo karong adlawa.—Deuteronomio 7:3, 4.
7. Giunsa ni Abraham pag-andam si Eliezer alang sa iyang asaynment o tinudlong buluhaton?
7 Busa si Eliezer misugod sa usa ka panaw nga kapin sa 800 kilometros paingon sa Mesopotamia. Siya milakaw nga andam kaayo, nga may napulo ka kamelyong kargadog mga gasa. (Genesis 24:10) Dugang pa, siya nakapalandong niining makapalig-on-sa-pagtuo nga mga pulong sa iyang agalon: “Si Jehova ang Diyos sa mga langit . . . magpadala sa iyang manulonda sa pag-una kanimo, ug ikaw magakuha gayod ug usa ka asawa alang sa akong anak nga lalaki gikan didto.”—Genesis 24:7.
8, 9. (a) Unsay nahitabo sa dihang si Eliezer nakaabot sa siyudad sa Nahor? (b) Pinaagi sa unsang pagsulay nga pilion ang nahiangayng pangasaw-onon?
8 Sa kataposan, nahiabot siya sa siyudad sa Nahor sa amihanang Mesopotamia. Gipalubog ni Eliezer ang gikapoyng mga kamelyo aron makapahulay sa usa ka atabay sa gawas sa siyudad. Kadto ang takna sa dihang ang mga babaye mangalos ug tubig—usa ka maayong higayon, sa pagkamatuod, aron si Eliezer mangitag umaabot nga pangasaw-onon! Apan unsa kaha siyang matanga sa babaye? Ang pinakamatahom? Dili. Si Eliezer interesado ilabina sa usa ka babayeng may diyosnong personalidad. Kadto gipadayag sa mapaubsanong pag-ampo sa pagtuo nga sa maong panahon iyang gilitok: “Jehova ang Diyos sa akong agalong si Abraham, palihog ipahinabo kini, sa akong atubangan niining adlawa ug buhata ang mahigugmaong-kalulot sa akong agalon si Abraham. Ania ako nagapahimutang sa usa ka tuboran, ug ang mga anak nga babaye sa mga tawo sa siyudad nagaanhi aron mokalos ug tubig. Ang kinahanglang mahitabo mao nga ang dalaga nga akong ingnan, ‘Ipaubos ang imong banga, palihog, aron ako makainom,’ ug magaingon gayod, ‘Uminom ka, ug pagapaimnon ko usab ang imong mga kamelyo,’ kini siya ang imong igatudlo alang sa imong alagad, kang Isaac; ug pinaagi niini maila nga ikaw nagapakita sa maunongong gugma sa akong agalon.”—Genesis 24:11-14.
9 Kadto usa gayod ka dakong pagsulay. Sumala sa The New Encyclopædia Britannica, ang giuhaw kaayong kamelyo makainom ug ‘95 litrong tubig sa 10 minutos.’ Tingali ang mga kamelyo ni Abraham wala uhawa sa ingon, apan ang kababayen-an niadtong panahona pihong nasayod sa kapasidad sa hayop alang sa tubig. Sa pagkamatuod, kinahanglan ang usa ka maluluton kaayo, dihakog, kugihang babaye aron moboluntaryo sa pagkalos ug tubig alang sa napulo ka gikapoyng kamelyo nga iyaha sa usa ka estranghero.
10, 11. (a) Sa unsang talagsaong paagi gitubag ang pag-ampo ni Eliezer? (b) Giunsa pagpakita ni Rebeka ang maayong mga hiyas? (c) Unsay sanong ni Eliezer?
10 Sa wala pa gani matapos ni Eliezer ang iyang pag-ampo, kadto gitubag, sumala sa ginaingon sa asoy: “Ania migula si Rebeka . . . Karon ang dalaga matahom kaayo sa dagway, usa ka ulay, ug walay lalaki ang nakahimo sa pakigsekso kaniya; ug siya mikanaog sa tuboran ug mipuno sa iyang banga sa tubig ug dayon misaka. Dihadiha ang alagad midalagan sa pagtagbo kaniya ug miingon: ‘Palihog, hatagi akog diyutay nga tubig sa imong banga.’ Sa baylo siya miingon: ‘Uminom ka, akong ginoo.’ Niana dali niyang gipaubos ang iyang banga diha sa iyang kamot ug gipainom siya. Sa natapos siya sa pagpainom kaniya, dayon siya miingon: ‘Mokalos ako alang sa imong mga kamelyo usab hangtod nga sila makahuman sa pag-inom.’ Busa dali niyang gibubo ang iyang banga sa pasung ug midalagan nga balikbalik sa atabay aron sa pagkalos ug tubig, ug nagpadayon sa pagkalos alang sa tanan niyang kamelyo.”—Genesis 24:15-20.
11 Si Eliezer ‘nakatutok nga nahibulong’ samtang gitan-aw niya kining milagrosong tubag sa iyang pag-ampo. Sa dihang ang dalayegong ulay natapos, gigantihan niya siyag bulawang singsing sa ilong ug duha ka bulawang pulseras ug nangutana: “Kang kinsa ka man nga anak?” Sa pagkahibalong siya ang apong pag-umangkon nga babaye ni Abraham, si Eliezer miyukbo ngadto kang Jehova sa matinahorong pagsimba, nga miingon: “Dalayegon si Jehova ang Diyos sa akong agalong si Abraham, nga wala magbiya sa iyang mahigugmaong-kalulot ug sa iyang pagkakasaligan ngadto sa akong agalon. Kay samtang ako nagalakaw, si Jehova nagtultol kanako ngadto sa balay sa mga igsoon sa akong agalon.”—Genesis 24:21-27.
12. Sa unsang paagi gitapos ang kahikayan didto sa balay ni Rebeka?
12 Si Rebeka mahinamong midalagan sa pagpahibalo sa iyang pamilya. Sa ulahi, sa nadunggan sa amahan ni Rebeka ug sa igsoong lalaki gikan sa kaugalingong baba ni Eliezer ang tuyo sa iyang panaw ug giunsa ni Jehova sa pagtubag ang iyang pag-ampo, sila miuyon nga walay pagpanuko nga si Rebeka mahimong asawa ni Isaac. “Ug nahitabo nga sa dihang nadungog sa sulugoon ni Abraham ang ilang mga pulong, siya mihapa sa gilayon sa iyang kaugalingon sa yuta atubangan ni Jehova. Ug ang sulugoon nagpagula sa mga alahas nga salapi ug mga alahas nga bulawan ug mga sapot ug naghatag kanila ngadto kang Rebeka; ug siya mihatag usab sa mga butang nga hamili ngadto sa iyang igsoong lalaki ug sa iyang inahan.”—Genesis 24:52, 53.
Ang Sanong sa Pangasaw-onon ug sa Iyang mga Sulugoong Babaye
13. Sa unsang paagi ang pagpili ni Jehova gilig-on ingon nga tukma?
13 Giunsa pag-isip ni Rebeka ang pribilehiyo sa pagkapiniling balaanon ingong pangasaw-onon ni Isaac? Sa sunod adlaw may nahitabo nga nagpadayag sa tinuod niyang mga gibati sa kahiladman. Kay nakatuman na sa tuyo sa iyang panaw, buot ni Eliezer nga mobalik ngadto sa iyang agalon nga walay langan. Apan buot sa pamilya ni Rebeka nga ang pangasaw-onon mopabilin uban nila sa labing menos napulo ka adlaw. Busa gihatag kang Rebeka ang katungod sa paghukom kon siya andam bang molakaw dayon. “Andam ako nga molakaw,” matud niya. Ang pagsugot nga mobiya dayon sa iyang pamilya ug mopanaw ngadto sa layong yuta aron makigminyo sa usa ka lalaki nga wala pa niya igkita maoy talagsaong pasundayag sa pagtuo diha sa pagtultol ni Jehova. Kadto naglig-on nga siya mao ang tukmang gipili.—Genesis 24:54-58.
14. (a) Si kinsa ang gipauban kang Rebeka? (b) Unsang matang sa panaw ang ilang giatubang?
14 Si Rebeka may kauban sa iyang paglakaw. Sumala sa ginapatin-aw sa asoy: “Si Rebeka ug ang iyang mga sulugoong babaye mitindog ug sila nanakay sa mga kamelyo.” (Genesis 24:61) Busa ang panon sa kamelyo misugod sa usa ka peligrosong panaw sa kapig 800 kilometros agi sa langyawng teritoryo. “Ang aberids nga katulin sa kargadong mga kamelyo,” nagaingon ang librong The Living World of Animals, “maoy mga 4 k[ilometros] m[atag] o[ras].” Kon ang mga kamelyo ni Abraham milakaw sa maong katulin sulod sa walo ka oras sa usa ka adlaw, gidangtag kapin sa 25 ka adlaw aron makaabot sa ilang destinasyon sa Negeb.
15. (a) Unsang maayong panig-ingnan ang atong makita diha kang Eliezer, Rebeka, ug sa iyang mga sulugoon? (b) Unsay gilandongan sa asoy?
15 Si Eliezer, Rebeka, ug iyang mga sulugoong babaye bug-os nagsalig sa pagtultol ni Jehova, usa ka maayong panig-ingnan alang sa mga Kristohanon karong adlawa! (Proverbio 3:5, 6) Dugang pa, ang asoy maoy makapalig-on-sa-pagtuong matagnaong drama. Sumala sa atong nakita, si Abraham nagahulagway kang Jehova nga Diyos, nga naghalad sa iyang minahal nga Anak, ang Mas Dakong Isaac, aron ang makasasalang mga tawo makabatog kinabuhing walay kataposan. (Juan 3:16) Ang pagpangandam alang sa kaminyoon ni Isaac nahitabo sa usa ka panahon tapos sa iyang pagkaluwas gikan sa kamatayon ibabaw sa halaran. Kadto matagnaon sa pagpangandam alang sa langitnong kaminyoon, nga ang maong pagpangandam mainitong misugod tapos sa pagkabanhaw ni Jesus.
Ang Kaminyoon sa Mas Dakong Isaac
16. (a) Sa unsang paagi, sa kahaom, ang sulugoon ni Abraham nagahulagway sa balaang espiritu sa Diyos? (b) Unsang pangutana ang ikasukna bahin sa espiritu ug ang pangasaw-onon?
16 Ang ngalan ni Eliezer nagkahulogang “Ang Akong Diyos Maoy Magtatabang.” Sa ngalan ug sa buhat, siya haom nga nagahulagway sa balaang espiritu sa Mas Dakong Abraham, si Jehova nga Diyos, nga Iyang gipadala sa maong layong yuta, ang atong yuta, sa pagpilig nahiangayng pangasaw-onon alang sa Mas Dakong Isaac, si Jesu-Kristo. (Juan 14:26; 15:26) Ang matang pangasaw-onon mao “ang kongregasyon,” nga gilangkoban sa mga tinun-an ni Jesus nga gipanganak sa balaang espiritu ingong espirituwal nga mga anak sa Diyos. (Efeso 5:25-27; Roma 8:15-17) Maingon nga si Rebeka nakadawat ug mahalong mga gasa, ang unang mga membro usab sa Kristohanong kongregasyon sa adlaw sa Pentekostes 33 K.P. nakadawat usab ug milagrosong mga gasa sa pagpamatuod sa ilang balaang pagkatinawag. (Buhat 2:1-4) Sama kang Rebeka, kinabubut-on nilang gibiyaan ang tanang kalibotanon ug unodnong mga relasyon aron mahiusa sa kataposan sa ilang langitnong Pamanhonon. Sukad sa panahon nga ang tinagsa ka mga membro sa matang pangasaw-onon gitawag hangtod sa ilang pagkamatay, kinahanglang bantayan nila ang ilang espirituwal nga kaputli samtang nagapanaw agi sa peligroso, mahayloong kalibotan ni Satanas. (Juan 15:18, 19; 2 Corinto 11:3; Santiago 4:4) Kay puno sa balaang espiritu, ang matang pangasaw-onon nagadapit sa uban nga moambit sa mga tagana ni Jehova alang sa kaluwasan. (Pinadayag 22:17) Nagasunod ka ba sa iyang panig-ingnan pinaagi sa pagsunod usab sa pagtultol sa espiritu?
17. (a) Unsay gihulagwayan sa napulo ka kamelyo? (b) Unsay angay nga atong tinamdan bahin sa Bibliya ug sa gibase-sa-Bibliyang mga basahon nga giandam sa matang pangasaw-onon? (Buhat 17:11)
17 Ang matang pangasaw-onon nagapabili pag-ayo sa gihulagwayan sa napulo ka kamelyo. Ang numerong napulo gigamit sa Bibliya sa pagpasabot sa kahingpitan o pagkakompleto kon bahin sa mga butang sa yuta. Ang napulo ka kamelyo tingali ikatandi ngadto sa kompleto ug hingpit nga Pulong sa Diyos, nga pinaagi niana ang matang pangasaw-onon nagadawat sa sustento ug espirituwal nga mga gasa. (Juan 17:17; Efeso 1:13, 14; 1 Juan 2:5) Sa pagkomento bahin sa pagpainom ni Rebeka sa mga kamelyo, ang The Watchtower sa Nobyembre 1, 1948, mihimo niining pagpadapat ngadto sa matang pangasaw-onon: “Sila mahigugmaong nagatagad sa Pulong sa Diyos nga nagabungag dako sa iyang espiritu alang kanila. Sila naikag sa iyang sinulat nga Pulong, nga nagadulot niini ug nagapalunhaw niini pinaagi sa pag-atiman niini ug pagpasundayag ug sinserong kabalaka alang sa iyang mensahe ug katuyoan, nga nagatinguha sa pagtuo niini.” Ingong pananglitan niini, ang nahibilin sa matang pangasaw-onon mahigugmaong nagtaganag minilyon sa bag-o, modernong New World Translation of the Holy Scriptures. Kon kaha kining maayong hubad anaa sa inyong pinulongan o wala, nagapakita ka bag pagpabili pinaagi sa regular nga pagsusi sa Bibliya uban sa mga tabang sa pagtuon nga gitagana sa matang pangasaw-onon?—2 Timoteo 3:16.
Haduol na ang Kasal sa Kordero
18. Nganong ang mga sulugoon ni Rebeka haom nagahulagway sa mga kauban sa pangasaw-onon karong adlawa?
18 Niining kataposang mga adlaw sa kalibotan ni Satanas, ang nahibilin sa matang pangasaw-onon gikuyogan sa “usa ka dakong panon,” nga ikatandi sa “babayeng mga sulugoon” ni Rebeka. Sama sa kaso ni Rebeka, kini sila labi pang daghan kay sa kompletong matang nga pangasaw-onon nga 144,000. Sila mao ang “dakong panon” sa “ubang mga karnero” ni Jesu-Kristo. (Pinadayag 7:4, 9; Juan 10:16) Ingong maunongong mga sulugoon sa pangasaw-onon, kinahanglan usab nga sila mahigawas sa kahugawan sa daotang kalibotan ni Satanas. Kinahanglan usab nga sila mosunod sa mga pagtultol sa espiritu ni Jehova ug sa iyang Pulong sumala sa gipatin-aw kini kanila sa matang pangasaw-onon. Apan lahi ang ilang ganti. Kon sila moantos sa maunongong pagpaluyo sa pangasaw-onon ni Kristo, sila maluwas sa kalaglagan sa kalibotan ni Satanas ug makabaton sa kahibulongang higayon sa pagpuyo sa walay kataposan sa usa ka yutan-ong paraiso.—Pinadayag 21:3, 4.
19. Unsay nahitabo sa dihang si Rebeka ug ang iyang mga sulugoon nakaabot sa kataposan sa panaw?
19 Milampos ba si Rebeka ug iyang “mga babayeng sulugoon” sa pagkab-ot sa ilang tumong? Oo. Sumala sa ginataho sa Bibliya: “Ug si Isaac didto sa gawas nga naglakaw aron mamalandong sa kapatagan sa pagtikyop sa kagabhion. Sa giyahat niya ang iyang mga mata ug mitan-aw, aw, nangabot ang mga kamelyo! Sa giyahat ni Rebeka ang iyang mga mata, iyang nakita si Isaac ug siya milukso gikan sa kamelyo.” Tapos ipatin-aw ni Eliezer ang iyang malamposong katuyoan, gidawat ni Isaac si Rebeka ingong iyang asawa ug “nahigugma kaniya.”—Genesis 24:63-67.
20. Unsang okasyon sa kasadyaan ang gilandongan sa kasal ni Isaac?
20 Sa susama, ang katuyoan ni Jehova bahin sa pangasaw-onon ni Kristo dili mapakyas. (Isaias 55:11) Sa dili madugay, kay ang Dakong Babilonya gihukman na ug gilaglag, ang kataposang mga sakop sa pangasaw-onong nahibilin magatapos sa ilang panaw. Ang panahon moabot nga sila mabulag gikan sa ilang kaubang mga sulugoon ug mahiusa sa kaminyoon sa Mas Dakong Isaac sa langit. Pagkadako unya kanang okasyon sa kasadyaan sa tibuok kalibotan!—Pinadayag 19:6-8.
21. Samtang nagkahiduol ang tayuktok sa langitnong kasal, unsay angay nga buhaton natong tanan?
21 Kasamtangan, ang minilyon nagapanalangin sa ilang kaugalingon pinaagi sa pagsanong ngadto sa ministeryo sa nagkadiyutayng pangasaw-onong nahibilin. Sa dili pa silang tanan magtapos sa ilang yutan-ong kinabuhi diha sa kamatayon, ang paglaglag sa samag-bigaong imperyo sa kalibotan sa bakak nga relihiyon magatimaan sa sinugdanan sa “dakong kasakitan nga wala pa sukad mahitabo sukad sa sinugdanan sa kalibotan.” Hamubo na ang panahong nahibilin. Kon buot nimong maluwas, hinungdanon kaayo nga makig-ambit sa pagtuman sa balaang mga sugo! (Mateo 24:14, 21; Marcos 13:10; Lucas 21:15; Juan 13:34) Ang maong mga sugo may linaing kapadapatan sa atong lisod nga mga panahon. Busa, kon kaha sakop sa pangasaw-onong nahibilin o sa iyang “dakong panon” sa mga sulugoon, magpadayon sa pagsugot kang Jehova alang sa iyang himaya ug sa imong kaugalingong walay-kataposang kalipay. Pagkatalagsaon unya kini alang sa dakong panon, nga giisip nang mga higala sa Diyos, sa pagpadayong buhi samtang si Jehova ‘nagabag-o sa tanang butang’ ug ang malungtarong mga kaayohan moagos sa minilyon diha sa usa ka paraisong yuta!—Pinadayag 21:5; 22:1, 2, 17.
Nahinumdom Ka Ba?
◻ Unsang makapaukyab nga mga hitabo ang kinahanglang mahitabo?
◻ Unsay nagapasalig nga ang langitnong kaminyoon molampos sa bug-os?
◻ Sa unsa ikatandi si Eliezer ug ang napulo ka kamelyo?
◻ Kinsa karong adlawa ang katumbas ni Rebeka ug sa iyang babayeng mga sulugoon?
◻ Unsay atong matun-an gikan sa mga hitabong motultol sa kaminyoon ni Isaac?