Si Rebeca—Usa ka Diyosnon ug Kugihan nga Babaye
PANANGLIT ikaw ang mopilig asawa alang sa imong anak lalaki. Unsang matanga sa babaye ang imong pilion? Unsang mga katakos ang kinahanglang mabatonan niya? Mangita ka bag babaye nga matahom sa pisikal, utokan, maluloton, ug kugihan? O may lain pang hiyas nga imong pangitaon?
Kanang sulirana giatubang ni Abraham. Si Jehova misaad nga moabot ang mga panalangin sa iyang mga kaliwat pinaagi sa iyang anak lalaki nga si Isaac. Sa pagsugod nato sa paghisgot sa iyang asoy, si Abraham tigulang na, apan ang iyang anak lalaki ulitawo pa. (Genesis 12:1-3, 7; 17:19; 22:17, 18; 24:1) Sanglit tagamtamon man ni Isaac ang mga panalangin uban sa iyang pangitaonon pa nga asawa ug mga anak nga mahimong ilang ipanganak, gihikay ni Abraham ang pagpangitag usa ka angayng asawa alang kang Isaac. Una sa tanan, siya kinahanglang alagad ni Jehova. Kay dili makaplagan ang ingong matang sa babaye sa Canaan, diin nagpuyo si Abraham, siya kinahanglang mangita sa laing dapit. Ang babaye nga napili sa kataposan mao si Rebeca. Sa unsang paagi nakaplagan siya ni Abraham? Siya ba babayeng espirituwal? Unsay atong makat-onan sa paghisgot sa iyang panig-ingnan?
Ang Pagpangitag Babaye nga May Hinungdanong mga Katakos
Gisugo ni Abraham ang iyang labing tigulang nga alagad, lagmit si Eliezer, nga moadto sa halayong Mesopotamia aron sa pagpilig usa ka pangasaw-onon ni Isaac gikan sa mga kabanay ni Abraham, nga mga isigkamagsisimba kang Jehova. Seryoso kaayo ang pagpilig pangasaw-onon nga si Eliezer gipapanumpa nga siya dili mopilig Canaanhon aron mapangasawa ni Isaac. Angayng matikdan ang pagkamapugsanon ni Abraham bahin niini.—Genesis 24:2-10.
Sa pag-abot sa siyudad sa mga kabanay ni Abraham, gidala ni Eliezer ang iyang napulo ka kamelyo ngadto sa usa ka atabay. Handurawa ang talan-awon! Gabii na kadto, ug si Eliezer miampo: “Ania, ako nahimutang sa usa ka tuboran sa tubig, ug ang mga anak nga babaye sa mga tawo sa siyudad manggula aron sa pagkalos ug tubig. Ang mahitabo gayod mao nga ang batan-ong babaye nga akong sultihan, ‘Palihog, ipaubos ang imong banga aron ako makainom,’ ug nga sa pagkatinuod moingon, ‘Uminom ka, ug paimnon ko usab ang imong mga kamelyo,’ kini siya ang imong itudlo alang sa imong alagad, kang Isaac.”—Genesis 24:11-14.
Ingong lagmit nasayran sa matag babaye niadtong dapita, ang giuhaw nga kamelyo makainom ug daghang tubig (halos 100 ka litro). Busa ang usa ka babaye nga motanyag sa pagkalos ug mainom nga tubig alang sa napulo ka kamelyo kinahanglang andam nga maghago. Ang iyang pagbuhat niana nga may uban nga nagtan-aw lang apan wala motabang magpamatuod gayod sa iyang kusog, pailob, pagkamapaubsanon, ug malulotong kasingkasing alang sa mga tawo ug mga hayop.
Unsay nahitabo? “Buweno, nahitabo nga sa wala pa siya mahuman pagsulti, aw, ania, ang migula mao si Rebeca, nga gipanganak kang Betuel nga anak nga lalaki ni Milca nga asawa ni Nahor, igsoong lalaki ni Abraham, ug ang iyang banga diha sa iyang abaga. Karon ang batan-ong babaye makabibihag kaayo sa panagway, usa ka ulay, . . . ug siya milugsong ngadto sa tuboran ug misugod pagpuno sa iyang banga ug unya misaka. Dihadiha ang alagad midagan sa pagsugat kaniya ug miingon: ‘Palihog, paimna akog diyutayng tubig gikan sa imong banga.’ Sa baylo siya miingon: ‘Inom, akong ginoo.’ Niana gidali niya pagpaubos ang iyang banga diha sa iyang kamot ug nagpainom kaniya.”—Genesis 24:15-18.
Takos ba si Rebeca nga Mahimong Asawa ni Isaac?
Si Rebeca maoy apo ni Abraham sa bahin sa pag-umangkon, ug gawas nga matahom, siya maayog panggawi. Siya dili magpanuko sa pagpakigsulti sa usa ka estranghero, ni siya sobra ka mahigalaon. Iyang gitugtan sa pag-inom si Eliezer sa dihang nangayo siyag mainom. Kasagarang gidahom kana, sanglit kana maoy usa ka ilhanan sa matinahorong panggawi. Komosta man ang ikaduhang bahin sa pagsulay?
Si Rebeca miingon: “Inom, akong ginoo.” Apan dili lang diha kutob. Si Rebeca nagpadayon: “Alang sa imong mga kamelyo ako usab magkalos ug tubig hangtod nga matapos sila sa pag-inom.” Mitanyag siya ug labaw pa kay sa kasagarang gidahom. Nga maikagon, “dihadiha siya nagbubo sa iyang banga sa imnanang pasong ug midagan nga pabalikbalik ngadto sa atabay sa pagkalos ug tubig, ug nagpadayon sa pagkalos alang sa iyang tanang kamelyo.” Gihimo niya ang trabaho nga maikagon. “Sa kasamtangan,” matod sa asoy, “ang tawo nagsud-ong kaniya sa katingala.”—Genesis 24:19-21.
Sa pagkahibalo nga ang dalaga kabanay ni Abraham, si Eliezer mihapa nga nagpasalamat kang Jehova. Siya nangutana kon aduna bay dapit nga kapalabyan sa kagabhion alang kaniya ug sa iyang mga kauban. Si Rebeca mitubag nga positibo ug midagan sa pagpauli uban ang balita bahin sa mga bisita.—Genesis 24:22-28.
Human sa pagpatalinghog sa estorya ni Eliezer, ang igsoong lalaki ni Rebeca, si Laban, ug ang iyang amahan, si Betuel, nakasabot nga ang Diyos nagtultol sa mga panghitabo. Tino gayod, si Rebeca maoy gitudlo alang kang Isaac. “Dad-a siya ug lakaw,” matod nila, “ug ipahimo siyang asawa sa anak sa imong agalon, ingon sa gisulti ni Jehova.” Unsay pagbati ni Rebeca bahin niana? Sa gisukna kon siya mouban ba dayon, siya mitubag pinaagig usa ka pulong nga Hebreohanon, nga nagkahulogan: “Andam ako nga mouban.” Wala siya pugsa sa pagdawat sa maong tanyag sa kaminyoon. Tin-aw kanang gisulti ni Abraham nga si Eliezer makagawas sa iyang panumpa “kon ang babaye dili buot” mouban. Apan nakita usab ni Rebeca ang paggiya sa Diyos bahin sa maong butang. Busa sa walay paglangan, iyang gibiyaan ang iyang pamilya aron makigminyo sa usa ka lalaki nga wala niya sukad mahimamat. Ang maong maisogong desisyon maoy talagsaong pasundayag sa pagtuo. Siya gayod ang hustong pagkapili nga asawa!—Genesis 24:29-59.
Sa dihang nahimamat niya si Isaac, si Rebeca nagtabon sa iyang kaugalingon ingong ebidensiya sa pagpasakop. Gidawat siya ni Isaac ingong iyang asawa, ug sa walay duhaduha tungod sa iyang maayong mga hiyas, si Isaac nahigugma kaniya.—Genesis 24:62-67.
Kaluhang mga Anak Lalaki
Si Rebeca wala manganak sulod sa mga 19 ka tuig. Sa kataposan, siya nanamkon ug kaluha, apan naglisod siya sa iyang pagmabdos, kay ang mga bata nagbugnoay sulod sa iyang tagoangkan, nga tungod niadto si Rebeca mituaw ngadto sa Diyos. Mahimong buhaton nato ang samang butang sa mga panahon sa dakong kalisdanan sa atong kinabuhi. Si Jehova nagpatalinghog kang Rebeca ug iyang gilig-on siya. Siya mahimong inahan sa duha ka nasod, ug “ang magulang mag-alagad sa manghod.”—Genesis 25:20-26.
Kanang mga pulonga tingali dili lang ang hinungdan sa labaw nga gugma ni Rebeca sa iyang mas bata nga anak lalaki, si Jacob. Magkalain ang mga batang lalaki. Si Jacob “walay ikasaway,” apan si Esau walay pagtagad sa espirituwal nga mga butang nga ilis sa usa ka pagkaon, iyang gibaligya ang iyang katungod sa pagkapanganay, ang iyang katungod nga manunod sa mga saad sa Diyos, ngadto kang Jacob. Ang pagkaminyo ni Esau sa duha ka babayeng Hitihanon nagpakitag kawalay-pagtahod—pagkayugot pa—sa espirituwal nga mga prinsipyo, nga nakahatag ug dakong kaguol sa iyang mga ginikanan.—Genesis 25:27-34; 26:34, 35.
Paningkamot nga Mabatonan ang Panalangin Alang Kang Jacob
Ang Bibliya walay gisulti kon nahibalo ba si Isaac nga si Esau magaalagad kang Jacob. Bisan unsay kahimtang, si Rebeca ug Jacob nahibalo nga ang panalangin iya ni Jacob. Milihok dayon si Rebeca sa pagkadungog nga naghunahuna si Isaac sa pagpanalangin kang Esau sa dihang iyang dad-an ang iyang amahan ug linutong inayam nga karne. Ang pagkadesidido ug kasibot nga nagtimaan sa iyang pagkabatan-on diha pa gihapon kaniya. ‘Gisugo’ niya si Jacob sa pagdala kaniyag duha ka nating kanding. Lutoan niyag kinaham nga pagkaon ang iyang bana. Unya si Jacob kinahanglang magpakaaron-ingnon nga siya si Esau aron mabatonan ang panalangin. Mitutol si Jacob. Masayran gayod sa iyang amahan ang panglansis ug panghimaraoton siya! Namugos si Rebeca. “Mahiari kanako ang maldisyon nga alang kanimo, anak ko,” matod ni Rebeca. Unya siya nagluto sa pagkaon, naghimo kang Jacob nga sama ni Esau, ug gipaadto si Jacob ngadto kang Isaac.—Genesis 27:1-17.
Wala ipahayag kon nganong gibuhat kadto ni Rebeca. Daghan ang mosaway sa iyang gibuhat, apan ang Bibliya wala magsaway niana, ni gisaway kana ni Isaac sa pagkadiskobre nga si Jacob diay ang nakadawat sa panalangin. Gidugangan pa hinuon ni Isaac ang panalangin. (Genesis 27:29; 28:3, 4) Nahibalo si Rebeca kon unsay gitagna ni Jehova bahin sa iyang mga anak lalaki. Busa siya milihok aron matino nga si Jacob ang makabaton sa panalangin nga maoy iyang katungod. Tin-aw nga kini nahiuyon sa kabubut-on ni Jehova.—Roma 9:6-13.
Si Jacob Gipaadto sa Haran
Niadtong tungora gipakyas ni Rebeca ang mga plano ni Esau pinaagi sa pag-agda kang Jacob nga mokalagiw hangtod mahupay ang kasuko sa iyang igsoon. Nananghid siya kang Isaac bahin sa iyang plano apan malulotong naglikay sa paghisgot sa kasuko ni Esau. Hinunoa, sa mataktikanhon iyang gihangyo ang iyang bana pinaagi sa pagpahayag ug kabalaka bahin sa posibilidad nga si Jacob maminyog Canaanhon. Ang maong ideya mismo igo na nga makadani kang Isaac nga mandoan si Jacob sa paglikay sa maong kaminyoon ug nga moadto siya ngadto sa kabanayan ni Rebeca aron mangitag asawa nga may kahadlok sa Diyos. Walay talaan nga si Rebeca ug si Jacob nagkita pag-usab, apan ang mga buhat ni Rebeca mohatag gayod ug dakong panalangin alang sa umaabot nga nasod sa Israel.—Genesis 27:43–28:2.
Ang atong nasayran bahin kang Rebeca modasig kanato sa pagdayeg kaniya. Siya matahom kaayo, apan ang iyang tinuod nga katahom mao ang iyang diyosnong pagkamahinalaron. Kana ang gipangita ni Abraham diha sa usa ka umagad nga babaye. Ang iyang ubang maayong mga kinaiya lagmit milabaw pa sa bug-os gilaoman ni Abraham. Ang iyang pagtuo ug pagkamaisogon sa pagsunod sa paggiya sa Diyos ug ang iyang kasibot, pagkamakasaranganon, ug pagkamaabiabihon kaayo maoy mga hiyas nga angayng sundogon sa tanang Kristohanong mga babaye. Kini mao ang mga hiyas nga gipangita ni Jehova diha sa tinuod nga sulondang babaye.