MAHANAIM

[Duha ka Kampo].

Usa ka dapit sa S sa Jordan diin si Jacob, human mobulag kang Laban, nakahibalag ug usa ka pundok sa mga manulonda. Human niadto, gitawag ni Jacob ang maong dapit nga “Mahanaim.” (Gen 32:​1, 2) Ang kahulogan niini nga ngalan (“Duha ka Kampo”) tingali nagtumong sa “kampo sa Diyos,” nga gihawasan sa iyang mga manulonda, ug sa kampo ni Jacob. Lagmit nga sa ulahi usa ka siyudad ang gitukod sa maong dapit. Sa ika-15 nga siglo W.K.P., kini nga siyudad unang gipahat ngadto sa mga Gadhanon ug dayon ngadto sa Levihanong mga Merarihanon.​—Jos 13:​24, 26; 21:​34, 38.

Samtang si David nagmando gikan sa Hebron, ang Mahanaim nagsilbing kaulohan sa karibal nga gingharian sa anak nga lalaki ug manununod ni Saul nga si Is-boset. Kini nagpakita nga kini maoy kinutaan ug nahimutang sa usa ka estratehikong dapit. (2Sa 2:8-11, 29) Dayag nga niini nga siyudad si Is-boset gipatay. (2Sa 4:5-7) Sa ulahi si David, nga mikalagiw gikan sa iyang rebeldeng anak nga lalaking si Absalom, miadto sa Gilead diin siya malulotong giabiabi didto sa Mahanaim. Tungod sa hangyo sa iyang mga tigpaluyo siya nagpabilin didto ug wala moapil sa pagpakiggubat nga bug-os nagsumpo sa pagsulay ni Absalom sa pag-ilog sa trono. (2Sa 17:24–​18:16; 19:32; 1Ha 2:8) Sa panahon sa paghari sa anak nga lalaki ni David nga si Solomon, ang Mahanaim nailalom sa hurisdiksiyon sa iyang luyoluyo nga si Ahinadab.​—1Ha 4:​7, 14.

Sa Awit ni Solomon 6:13 ang “sayaw sa duha ka kampo” mahimong hubaron usab nga “sayaw sa Mahanaim.” (AS; AT) Tingali nagtumong kini sa pagsayaw nga nalangkit sa usa ka pista nga gihimo didto sa Mahanaim.​—Itandi ang Huk 21:​19, 21.

Ang tukmang nahimutangan sa Mahanaim dili matino, apan kini anaa sa S sa Jordan ug dayag nga A sa Jabok. (2Sa 2:29; Gen 31:21; 32:​2, 22) Gituohan sa pipila nga kini mao ang Khirbet Mahneh (o, Mihna), mga 19 km (12 mi) sa A sa Jabok ug halos samang gilay-on sa S sa Jordan, apan daghan ang nagtuo nga kini layo ra kaayo sa A sa Jabok. Si Yohanan Aharoni nagtuo nga ang Mahanaim mao ang Tell edh-Dhahab el-Gharbi, sa A nga tampi sa Jabok, mga 12 km (7.5 mi) sa S sa Jordan.​—The Land of the Bible, gihubad ug giedit ni A. Rainey, 1979, pp. 314, 439.