DINA

[Hinukman [nga mao, naabsuwelto; nabindikar]].

Anak nga babaye ni Jacob pinaagi kang Lea. Si Dina lagmit sayis anyos na sa dihang mibalik si Jacob sa Canaan ug mipuyo sa Sucot, natawo siya sa Haran sa dihang nagpuyo didto ang iyang amahan.​—Gen 30:​21, 22, 25; 31:41.

Sa panahong si Jacob ug ang iyang pamilya nagpuyo sa tolda sa gawas sa siyudad sa Sekem, sa pagkadili-maalamon ang batan-ong si Dina magduawan sa mga babayeng Canaanhon didto. Sa usa niini nga pagduaw siya giamong-amongan ni Sekem nga anak sa Hivihanong pangulo nga si Hamor. Si Sekem nahigugma kaniya, ug si Dina nagpabilin sa iyang panimalay hangtod nga nanimalos ang iyang pursosong mga igsoon nga si Simeon ug Levi. (Gen 34:1-31) Ang pipila nangatarongan nga si Dina usa lamang ka bata sa dihang siya giamong-amongan. Apan, angayng hinumdoman nga sa wala pa makaadto sa Sekem, si Jacob nagtukod ug balay ug mga balongbalong sa Sucot, nga nagpakitang taudtaod na siyang nagpuyo didto. (Gen 33:17) Siya nagpalit ug usa ka luna sa yuta didto sa Sekem ug dayag nga siya nakapundar sa iyang pagpuyo didto sa igoigong panahon. Kining tanan, lakip sa kamatuoran nga si Sekem nahigugma kang Dina, ang “batan-ong babaye,” nagpamatuod nga si Dina, bisan tuod batan-on pa, dili usa lamang ka bata sa dihang nakig-uban siya kang Sekem.​—Gen 33:​18, 19; 34:12.

Mga tuig sa ulahi, si Dina, lakip sa uban pa sa panimalay ni Jacob, miadto sa Ehipto tungod sa pagdapit ni Jose.​—Gen 46:​7, 15.