Kapitulo 9
Kalinaw ug Kasegurohan sa Tibuok Yuta—Usa ka Kasaligang Paglaum
1, 2. Unsang mga kahimtang, nga gitagna sa Bibliya, ang magahimo niining yuta nga usa ka makapahimuot nga dapit nga pagapuy-an?
KINING yuta mahimong usa ka labihang makapahimuot ug makapainteres nga dapit nga pagapuy-an kon ang matuod malinawon, siguro nga mga kahimtang naglungtad pa sa tibuok yuta. Walay sapayan nga kini halayo niana karon, ang Bibliya nagatagna nga ang yuta mahimong unyang usa ka matahum nga puloy-anan diin ang tawhanong panimalay magapahimulos sa kinabuhi sa bug-os.
2 Unsa man gayod ang gisaad sa Bibliya? Sa unsang paagi makasiguro kita nga kana matuman?
Lig-ong Sukaranan Alang sa Konpiyansa
3, 4. (a) Unsa ang atong matun-an sa pagkakasaligan sa sukaranang mga balaod nga nagakontrolar sa uniberso? (b) Kinsa ang Magbubuhat niadtong mga balaod, ug busa sa unsa pa nga kita dunay maayong katarungan sa pagpahaluna sa atong pagsalig?
3 Ang tino sukaranang mga balaod nagakontrolar sa uniberso. Daghan kanila wala nato tagda. Ang pagsubang sa adlaw, ang pagsalup sa adlaw, ang nagkalainlaing mga nawung sa bulan, ug ang mga panahon nagaabut ug nagalakaw sa paagi nga nagaamot sa kalig-on sa tawhanong pagkinabuhi. Ang mga tawo makahimog mga kalendaryo ug magplano ug mga kalihokan daghang mga tuig sa pasiuna. Nahibalo sila nga ang kalihokan sa adlaw, bulan, ug mga planeta kasaligan. Unsa ang atong matun-an niini?
4 Ang Magbubuhat sa maong mga balaod sa bug-os kasaligan. Kita makasalig sa iyang ginaingon ug ginabuhat. Diha sa iyang ngalan, ingon nga Maglalalang sa langit ug yuta, nga ang Bibliya nagasaad sa usa ka matarung bag-ong kahikayan. (Isaias 45:18, 19) Sa atong matag adlaw nga rutina sa kinabuhi, kita sa normal nagasalig sa pipila ka gisukdon sa ubang katawhan—niadtong kinsa nagadalag pagkaon sa merkado, niadtong kinsa nagahatud sa sulat, ug sa suod nga mga higala. Dili ba makatarunganon, diay, nga ikapahaluna ang daku, mas dakung konpiyansa sa Diyos ug sa piho nga katumanan sa iyang mga saad?—Isaias 55:10, 11.
5. Sa unsang paagi ang pagkawalay bisan unsang hakug nga tuyo kon unsa ang gisaad sa Diyos maghatag kanato ug pagtuo?
5 Bisan tuod sagad nga dili kasaligan ang mga saad sa mga tawo, ang mga saad sa Diyos bug-os nga kasaligan ug alang sa atong kaayohan, dili sa iyang kaugalingon. Bisan tuod ang Diyos wala magkinahanglan sa bisan unsang butang gikan kanato, siya nakakaplag ug kalipay niadtong kinsa nagapahaluna sa pagtuo kaniya tungod kay sila nahigugma kaniya ug sa iyang matarung mga dalan.—Salmo 50:10-12, 14.
6. Unsang matang sa pagtuo ang Bibliya nagatabang kanato sa pagbaton?
6 Unya, usab, ang Bibliya nagadangup sa atong mga gahum sa pagpangatarungan. Wala kini magakinahanglan sa buta nga pagtuo o kredulidad. Sa pagkamatuod, kini nagahubit sa matuod nga pagtuo ingon nga “ang gipasalig nga pagpaabut sa mga butang nga gilauman, ang dayag nga pagpasundayag sa mga butang bisan wala makita.” (Hebreohanon 11:1) Sa Bibliya, ang Diyos nagahatag kanato sa usa ka lig-ong sukaranan alang sa pagtuo. Ang kalig-on sa maong sukaranan dugang ug dugang nagapadayag samtang kita nagatubo sa kahibalo sa Pulong sa Diyos ug sa pagtan-aw nga ang kamatuoran niana nagasaler diha sa atong kaugalingong mga kinabuhi ug sa katumanan sa mga tagna niini.—Salmo 34:8-10.
7. Samtang kita nagasusi sa mga saad sa Bibliya sa umaabut nga mga panalangin unsa ang dili nato dahumon nga ang pagtuo kanila magakinahanglan kanato?
7 Ang mga saad sa Bibliya sa umaabut nga mga panalangin layo ra kaayo sa gisulayan sa pagtanyag sa mga tawo. Apan kadtong mga saad wala nagakinahanglan kanato sa pagtuo sa mga butang nga nagasupak sa tanan tawhanong kasinatian. Ni sila nagasupak sa normal tawhanong mga tinguha. Palandunga ang pipila niining dakung mga panalangin ug tan-awa sa unsang paagi kini matuod.
Ang Yuta Mahimong usa ka Tanamang Puloy-anan
8, 9. (a) Unsang ideya ang dad-on sa atong hunahuna sa terminong “paraiso”? (b) Ang maong butang sukad naglungtad ba sa yuta? (c) Unsa ang nagapakita nga katuyoan sa Diyos nga ang Paraiso magalungtad sa tibuok yuta?
8 Ang pulong “paraiso” nagagikan sa susamang mga pulong nga gigamit sa karaang mga panahon (Hebreohanon, par·desʹ; Persiyano, pairi·daeʹza; Grego, pa·raʹdei·sos), mga pulong nga gigamit sa paghubit sa mga butang nga naglungtad sa yuta kaniadto. Kining mga pulong tanan duna sa sukaranang ideya sa usa ka matahum nga parke o sama sa parke nga tanaman. Sama sa karaang mga panahon, mao man usab karon dunay daghan sa maong mga dapit, ang uban kanila mga parke nga labihang ka daku. Ug ang tawo dunay natural nga paghandum sa ilang katahum. Ang Bibliya nagasaad nga magaabut ang adlaw sa dihang kining tibuok planeta mahimong sama sa parke nga tanaman o paraiso!
9 Sa dihang ang Diyos naglalang sa unang tawhanong pares siya naghatag kanila ingon nga puloy-anan ang tanaman sa Eden, usa ka ngalan nagakahulogan “Paraiso sa Kalipay.” Apan ang Paraiso dili limitado lamang sa maong usa ka dapit. Ang Diyos nag-ingon kanila: “Magmabungahon ug magdaghan ug pun-on ang yuta ug magagahum niini.” (Genesis 1:28; 2:8, 9) Kini nagalakip sa pagpakaylap sa mga utlanan sa Paraiso ngadto sa mga kinatumyan sa yuta, usa ka balaang gipahayag nga katuyoan nga wala matapos pinaagig masupakong kurso ni Adan ug Eva. Si Jesu-Kristo nagpakitag pagsalig niining katuyoana sa gisaaran niya ang usa ka tawo kinsa namatay tapad kaniya nga siya makabaton sa oportunidad sa pagpuyo sa maong yutan-ong Paraiso. (Lucas 23:39-43) Sa unsang paagi kini magaabut?
10. Sa Pinadayag 11:18, unsang mga ali sa Paraiso ang ginasaad sa Diyos nga wagtangon?
10 Sa nagasingabut nga “dakung kasakitan” ang Diyos magawagtang sa tanang mga ali sa iyang umaabut yutan-ong Paraiso pinaagi sa ‘pagdala ngadto sa kalaglagan niadtong nagalaglag sa yuta.’ (Pinadayag 11:18) Busa ang Diyos magahimo sa dili mahimo bisan kanus-a sa tawhanong mga gobiyerno. Siya magawagtang niadtong tanan kinsa hakug nga nagahugaw sa yuta sa pagtagbaw sa komersiyal nga kadalo, sa tanan kinsa nakigsangka sa malaglagong mga gubat, ug sa tanan kinsa sayup nga nagagamit sa yuta tungod kay sila walay pagtahud alang sa dagayang mga gasa nga gitagana sa Diyos.
11. (a) Unsang hitabo sa kasaysayan ang nagapakita nga ang pagpasig-uli sa Paraiso sa yuta dili supak sa tawhanong kasinatian? (b) Sa unsang gisaad nga panalangin nga kini nagapalig-on sa atong pagtuo?
11 Ang tibuok yuta magabuswak unya uban sa katahum. Ang kapresko ug kahinlo makaplagan unya sa iyang hangin, tubig, ug yuta. Kining pagpasig-uli sa Paraiso dili usa ka butang nga dili katuohan, ni supak sa tawhanong kasinatian. Daghang mga siglo kanhi, sa dihang ang nasud sa Israel naggula sa pagkabinihag sa Babilonya, si Jehova nga Diyos nagpasig-uli kanila ngadto sa ilang yutan-ong puloy-anan, nga sa maong panahon usa ka awaaw nga kamingawan. Apan, tungod sa panalangin sa Diyos kanila ug sa ilang bulohaton, ang yuta sa wala madugay nahimong matahum kaayo nga ang katawhan sa palibut nagpahayag: ‘Kini nahimong sama sa tanaman sa Eden!’ Kana usab nahimong dagaya sa produkto, nga nagatangtang sa bisan unsang hulga sa gutom ug kanihit sa pagkaon. (Ezequiel 36:29, 30, 35; Isaias 35:1, 2; 55:13) Ang gibuhat sa Diyos niadto nag-ilustrar sa gamayng paagi kon unsa ang iyang buhaton pa sa globong gilapdon aron sa pagtuman sa iyang mga saad. Ang tanang tawo nga giisip nga takos nga mabuhi unya magapahimulos sa langitnon gitagana nga kalipay sa kinabuhi sa Paraiso.—Salmo 67:6, 7; Isaias 25:6.
Katapusan sa Kakabus ug Ekonomikong Pagkaulipon
12. Unsang mga kahimtang sa ekonomika ug trabaho ang kinahanglan tambalan kon kita makabaton sa matuod nga kasadya sa kinabuhi?
12 Ang kakabus ug ang pagkaulipon sa mga sistema ekonomika maoy kumon sa tibuok yuta. Walay matuod nga kasadya sa Paraiso kon ang minilyon magapadayon sa pagtrabaho nga nagatagana lamang sa sukaranang kinahanglanon aron mabuhi o sa pagbuhat sa usa ka bulohaton nga makalaay nga nagahimo sa usa ka tawo nga sama sa usa ka piyesa sa usa ka dakung makina.
13-15. (a) Asa nato makaplagi ang panig-ingnan sa kasaysayan nga nagapakita kanato kon unsa ang kabubut-on sa Diyos alang sa tawo niining bahina? (b) Sa unsang paagi kanang kahikayan nagaamot sa kasegurohan ug kasadya sa kinabuhi sa matag indibiduwal ug panimalay?
13 Ang kabubut-on sa Diyos alang sa tawo niining bahina makita sa paagi sa iyang pagdumala sa mga butang uban sa karaang Israel. Didto, ang tagsa ka panimalay nakadawat ug usa ka panulondong kabtangan sa yuta. (Maghuhukom 2:6) Bisan pa kon kini mahimong ibaligya, ug ang mga indibiduwal mahimong makabaligya gani sa ilang kaugalingon ngadto sa pagkaulipon kon sila mahulog sa utang, si Jehova sa gihapon naghimog mga tagana sa pagpanalipud batuk sa pagbaton ug labihan ka lapad nga yuta o sa bisan unsang taas-panahon nga pagkaulipon sa katawhan. Sa unsang paagi?
14 Pinaagi sa mga taganang ekonomiko diha sa Kasugoan nga iyang gihatag sa iyang katawhan. Ang ikapitong tuig sa pagkaulipon mao ang ‘tuig sa kagawasan’ sa dihang ang bisan kinsang Israelita nga anaa sa pagkaulipon kinahanglan hatagan sa kagawasan. Usab, ang matag ika-50 ka tuig maoy “usa ka Tinghugyaw” nga tuig alang sa tibuok nasud, usa ka tuig sa “pagpahibalo sa kagawasan” ngadto sa tanang mga pumuluyo. (Deuteronomio 15:1-9; Levitico 25:10) Unya ang bisan unsang gipanunod nga kabtangan nga gibaligya iuli sa iyang orihinal nga tag-iya. Ang tanan nga anaa sa pagkaulipon hatagan sa kagawasan, bisan kon wala pa matapos ang pito ka tuig. Usa kini ka malipayong panahon sa pagtingub sa panimalay ug sa usa ka bag-ong pagsugod sa kinabuhi sa ekonomika. Busa, walay yuta ang mahimong ibaligya alang sa tanang panahon. Ang pagbaligya niini, sa epekto, usa lamang ka arriendo nga matapos, sa kinaulahian, sa tuig sa Tinghugyaw.—Levitico 25:8-24.
15 Ang tanan niini nag-amot sa kalig-on sa ekonomika sa nasud ug sa kasegurohan ug kalinaw sa matag panimalay. Sa dihang gisunod kining mga balaora, ang nasud napugngan sa pagkahulog sa makapasubong hulagway nga atong makita karon sa daghang kayutaan diin ang labihan ka datu ug ang labihan ka kabus nagalungtad. Ang mga kaayohan sa indibiduwal nagpalig-on sa nasud, kay walay usa ang kinahanglan nga hikawan ug dugmokon sa dautang mga kahimtang sa ekonomika. Ingon sa gireport sa panahon sa pagmando ni Haring Solomon, “Ang Juda ug ang Israel nagpadayon sa pagpuyo sa kasegurohan, ang tagsatagsa ilalum sa iyang kaugalingong parras ug ilalum sa iyang kaugalingong kahoy nga igira.” (1 Hari 4:25) Karon daghang mga tawo dili makagamit sa ilang tanang kaalam ug pagpanguna tungod kay sila nalit-agan sa mga sistema ekonomika nga nagapugos kanila sa pag-alagad sa mga tinguha sa pipila o bisan sa usa lamang. Ubos sa balaod sa Diyos ang kugihang tawo tabangan sa pag-amot sa iyang mga abilidad ngadto sa kaayohan ug kasadya sa tanan. Kini nagahatag kanatog timailhan sa pagsabut sa personal nga bili ug dignidad nga mapahimuslan niadtong makabaton ug kinabuhi sa Bag-ong Kahikayan sa Diyos.
16. Mahitungod sa mga kahimtang sa pagkinabuhi ug sa situasyon sa ekonomika sa usa, unsa ang itagana sa Gingharian sa Diyos alang sa tanan mga sakup niana?
16 Sa tibuok yuta ang tagna sa Miqueas 4:3, 4 makabatun sa kahibudngang katumanan. Ang mahigugmaon sa kalinaw nga mga tawo nga nagakinabuhi ubos sa matarung pagmando sa Diyos “magalingkod, ang tagsatagsa sa ilalum sa iyang parras ug ilalum sa iyang kahoy nga igos, ug walay usa ang magapakurog kanila; kay ang mismong baba ni Jehova sa mga kasundalohan nagsulti niini.” Walay usa sa mga sakup sa Gingharian sa Diyos ang magapuyo sa hugaw nga mga dapit sa kabus o sa huot nga mga puloy-anan. Sila makabaton sa ilang kaugalingong yuta ug mga puloy-anan. (Isaias 65:21, 22) Ang Hari, si Kristo Jesus, dugay na kanhi nagsaad nga ang ‘mga maaghup mao ang magapanunod sa yuta,’ ug siya duna sa ‘tanang awtoridad sa langit ug sa yuta’ sa pagtino nga mao kini ang mahitabo.—Mateo 5:5; 28:18.
Malungtarong Kahimsog ug Kinabuhi
17-19. (a) Unsa ang nagapakita nga ang maayong panglawas ug ang taas nga kinabuhi natural nga mga tinguha sa katawhan? (b) Unsang kamatuoran sa tawhanong kinabuhi ug sa tanum ang nagahimo sa mubong gitas-on sa kinabuhi sa tawo nga daw kahibudnganan? (c) Unsa ang anaa sa tawhanong utok nga nagpakita nga rasonable kaayo ang pagtuo nga ang tawo gidesinyo nga mabuhi sa walay katapusan?
17 Walay usa niining mga kahimtang, bisan pa niana, ang makahimo sa kinabuhi nga matuod nga malinawon ug siguro samtang ang balatian, pagkatigulang, ug kamatayon naghanap sa umaabut. Dili ba makatarunganon o sukwahi ba sa tawhanong kasinatian ang paglaum sa kahupayan niining mga butang? Piho nga dili sukwahi sa tawhanong kinaiya nga buot niini, kay ang mga tawo nag-usik ug mga tibuok kinabuhi ug dili maihap nga mga kantidad sa salapi sa pagpanlimbasog sa pagkab-ot niini.
18 Busa ang paglaum sa malungtarong kahimsog ug kinabuhi dili kay dili gayod makatarunganon. Sa pagkamatuod, ang tinuod nga dili makatarunganon mao kini: Sa diha gayong ang mga tawo makadangat sa usa ka panuigon diin sila nakasugod sa pagbaton ug kahibalo, kasinatian, ug abilidad sa pagbuhat sa maayong mga butang, sila mosugod paingon sa pagkatigulang ug unya sa kapulihay mamatay. Apan, dunay mga kahoy nga nabuhi sulod sa kaliboan ka tuig! Ngano ang tawo, kinsa gilalang sa dagway sa Diyos, mabuhi lamang sa usa ka tipik sa panahon nianang pila ka dili-intelihenteng mga tanum? Nga makatarunganon, dili ba siya unta mabuhi ug mas, mas hataas pa?
19 Alang sa mga espesyalista nga nagtuon sa pagkatigulang, ang palakaw sa gihapon usa ka dakung misteryo. Misteryo, usab, mao ang kamatuoran nga ang tawhanong utok gidesinyo sa pagpasulod sa halus walay limite nga gidaghanon sa inpormasyon. Ingon sa gisulti sa usa ka magsusulat sa siyensiya, ang utok “hingpit nga may katakus sa pagtipig sa bisan unsang karga sa kaalam ug handumanan nga dayag na lamang ibutang niini sa tawo—ug kapin pa sa usa ka bilyon ka pilu sa gidaghanon niana, usab.”55 Kana nagakahulogan nga ang imong utok may katakus sa pagtipig dili lamang sa bisan unsang karga nga imong ibutang niini sa gitas-on sa kinabuhi nga 70 o 80 ka tuig kondili sa usa ka libo ka milyon ka pilu pa! Dili katingalahan nga ang tawo aduna nianang pagkauhaw sa kahibalo, sa maong tinguha sa pagtuon sa pagbuhat ug paghuman sa mga butang. Apan siya gialihan sa pagkamubo sa iyang kinabuhi. Aduna bay kahulogan nga ang katingalahang kapasidad sa tawhanong utok anaa gayod dinha apan dili ngani makagamit bisan sa tipik lamang sa tinagong gahum niana? Dili ba mas rasonable pa sa pagkanayon, ingon sa gibutyag sa Bibliya, nga si Jehova nagdesinyo sa tawo sa pagkinabuhi sa walay katapusan sa yuta ug naghatag kaniya sa usa ka utok nga dalayegong tukma nianang katuyoana?
20. Unsa ang ginaingon sa Bibliya nga gisaad sa Diyos nga buhaton alang sa katawhan bahin sa mga epekto sa sala, lakip ang kamatayon mismo?
20 Ang Bibliya nagapakita nga sa orihinal ang tawo duna sa oportunidad sa pagkinabuhi sa walay katapusan apan nawad-an niini tungod sa pag-alsa: “Pinaagi sa usa ka tawo [Adan] ang sala misulod sa kalibutan ug ang kamatayon pinaagi sa sala, ug busa ang kamatayon mikaylap sa tanang mga tawo tungod kay silang tanan nakasala.” (Roma 5:12) Apan ang Bibliya usab nagaunod sa saad sa Diyos nga didto sa ipasig-uling Paraiso, ang “kamatayon wala na, ni ang pagbakho ni ang paghilak ni ang kasakit pa.” (Pinadayag 21:3, 4; itanding 7:16, 17.) Kini nagapahayag nga ang walay katapusang kinabuhi, nga libre sa mga epekto sa sala, mao ang katuyoan sa Diyos alang sa katawhan. (Roma 5:21; 6:23) Kapin pa niini, kini nagasaad nga ang mga panalangin sa Bag-ong Kahikayan sa Diyos pagabuksan ngadto sa daghang minilyon kinsa nangamatay sa nangagi. Sa unsang paagi? Pinaagi sa usa ka pagkabanhaw nga nagahaw-as sa kumon nga lubnganan sa katawhan. Si Jesu-Kristo masaligong nagtagna: “Ang takna nagaabut diin ang tanan niadtong anaa sa handumanang mga lubnganan makadungog sa iyang tingug ug managpanggula.”—Juan 5:28, 29.
21, 22. Ngano ang paglaum sa pagpasig-uli sa bug-os nga kahimsog dili usa ka butang nga kapin rang lauman?
21 Ang medikal nga siyensiya karon makaarang sa pagpatungha sa “milagro nga mga droga” ug nagahimo sa katingalahang mga pagdisdis nga maorag dili katuohan bisan sa pipila ka dekada kanhi. Magaduda ba kita nga ang Usa kinsa naglalang sa mga tawo makahimo ug mas katingalahan dagkung mga buhat sa pag-ayog mga sakit? Sa tinuoray ang Maglalalang adunay katakus sa pagpasig-uli sa matarung-kasingkasing nga mga tawo ngadto sa lagsik nga kahimsog, bisan ngani sa pagbali sa palakaw sa pagkatigulang. Ug iyang mahimo kini nga dili na magadangup sa mga droga, pagpaopera, o sa artipisyal nga mga organo. Sa pagpakitag konsiderasyon, ang Diyos nagtagana ug ebidensiya nga ang maong mga panalangin dili kapin ra nga lauman.
22 Ang Diyos naghatag-gahum sa iyang Anak samtang dinhi sa yuta sa paghimo sa gamhanang mga buhat sa pagpang-ayo. Kining mga buhata nagapasalig kanato nga walay kahuyangan, depekto, o balatian ang dili mahimo sa gahum sa Diyos sa pag-ayo. Sa dihang ang usa ka tawo kansang unod tugob sa sanla nangaliyupo kang Jesus sa pag-ayo kaniya, si Jesus sa maluluy-on naghikap sa tawo ug nag-ingon: “Magmahinlo ka.” Ug, sumala sa rekord sa kasaysayan, “Dihadiha nahinloan siya sa iyang sanla.” (Mateo 8:2, 3) Si Jesus naghimo niining mga butanga nga nakita kaayo sa daghang saksi, ingon sa pagreport ni historyador Mateo: “Ang dakung mga panon nagduol kaniya, nga nagdala uban kanila sa katawhan nga bakol, kimay, buta, amang, ug sa daghang uban pa, ug sila nagbutang kanila sa iyang tiilan, ug siya nag-ayo kanila; sa pagkaagi nga ang panon natingala . . . ug sila naghimaya sa Diyos sa Israel.” (Mateo 15:30, 31) Basaha alang sa imong kaugalingon ang talaan sa Juan 9:1-21 aron sa pagtino kon unsa ka undanon ug katinuod sa kinabuhi ang report sa kasaysayan sa maong pagpang-ayo. Ang kamatuoran niining mga hitaboa gipamatud-an sa daghang mga saksi, lakip sa usa ka doktor, ang mananambal nga si Lucas.—Marcos 7:32-37; Lucas 5:12-14, 17-25; 6:6-11; Colosas 4:14.
23, 24. Nganong rasonable ang pagtuo nga ang mga minatay igapasig-uli sa kinabuhi ubos sa Gingharian sa Diyos?
23 Alang sa susamang mga katarungan wala kinahanglana kanato sa paghunahuna nga dili katuohan ang klarong saad sa Bibliya nga “dunay pagkabanhaw” sa mga minatay. (Buhat 24:15) Bisan gani sa mga tuig human sa kamatayon, ang tingug sa tawo, panagway, ug linihokan mahimong mapasig-uli gikan sa pelikula o sa videotape. Dili ba gayod ang Usa kinsa naglalang sa tawo, kinsa nahibalo sa tukmang estruktura atomika ug molekula sa tawo, makaarang sa pagbuhat ug kapin pa niana? Ang hinimo-tawo nga mga computer makatigum ug makakoordinar sa literal binilyon ka pidaso sa kasayuran. Apan gilalang sa Diyos ang kahibulongang uniberso uban sa mga binilyon (mga linibo ka milyon) sa mga galaksiya niana, ang kada galaksiya adunay mga binilyon ka bituon. Kana mototal sa mga trilyon, mga kuadrilyon, ug mas pa gani! Apan, ang Salmo 147:4 nag-ingon: “Iyang ginaisip ang gidaghanon sa mga bituon; nagahingalan siya kanilang tanan sa ilang mga ngalan”! Dayag nga maoy yano alang sa Diyos, kinsa aduna nianang daku kaayong katakus sa memorya, sa paghinumdum sa mga personalidad sa mga indibiduwal aron ipasig-uli sila ngadto sa kinabuhi.—Job 14:13.
24 Usab, si Jehova nagtagana ug kasaysayanhong mga panig-ingnan aron sa pagpalig-on sa atong pagtuo sa maong kahibulongang paglaum. Siya naghatag sa iyang Anak sa gahum sa pagpasundayag sa usa ka diyutay nga gilapdon kon unsa ang iyang himuon sa dakung gilapdon sa panahon sa iyang matarung pagmando sa yuta. Si Jesus nagbanhaw sa ubay-ubay patay nga mga tawo, kalagmitan sa atubangan gayod sa mga tawo. Si Lazaro, kinsa iyang gibanhaw duol sa Jerusalem, dugay-dugay na ganing namatay kay ang iyang lawas baho na. Tino nga ang paglaum sa pagkabanhaw adunay lig-ong pasukaranan.—Lucas 7:11-17; 8:40-42, 49-56; Juan 11:38-44.
Ang Katakus sa Yuta sa Pagpahaluna sa Maong Populasyon
25, 26. Kon banhawon ang mga minatay, dunay luna ba alang sa tanan nga pagapuy-an?
25 Kining planeta ba makatagana sa komportable nga lunang puy-anan alang sa maong populasyon nga magaresulta sa pagkabanhaw sa mga minatay? Nagkinahanglan ug kapin sa 5,000 ka tuig alang sa populasyon sa yuta sa pag-abut ug usa ka bilyon sayo sa mga 1800. Karon, kini hapit na sa lima ka bilyon.
26 Busa, kadtong buhi karon nagarepresentar sa usa ka dakung bahin sa total nga gidaghanon sa mga tawo nga sukad nagkinabuhi. Ginabanabana sa pipila nga ang total nga populasyon sa tanang tawhanong kasaysayan mahimong mga 15,000,000,000 ka tawo. Ang gidakuon sa mamalang-yuta sa yuta kapin sa 36,000,000,000 ka acre (15,000,000,000 ek). Kana magatugot sa kapin sa duha ka acre (1 ek) sa matag tawo. Dili lamang kini magatagana ug luna alang sa produksiyon sa pagkaon apan usab kini magatugot sa kalasangan, kabukiran, ug uban pa nga matahum nga mga dapit—uban sa wala kinahanglanang kaguot didto sa Paraiso. Unya, usab, ang Bibliya nagapakita nga dili ang tanan niadtong buhi karon maluwas ug mabuhi nianang Bag-ong Kahikayan. Sa pagkamatuod, si Jesus miingon, “Halapad ug maluag ang dalan paingon sa kalaglagan, ug daghan ang nagaagi niana.” Siya usab nagmatikod nga sa moabut na ang kalaglagan, kadtong wala magabuhat sa kabubut-on ni Jehova “mamahawa ngadto sa walay katapusang pagkawagtang.”—Mateo 7:13; 25:46.
27. Ang yuta makapatungha ba sa igong pagkaon alang niadtong tanang katawhan?
27 Apan ang yuta makapatungha ba ug igong pagkaon alang sa labihan ka daghang katawhan? Ang mga siyentipiko nagaangkon nga makahimo kini, bisan ubos sa mga kahimtang karon. Nagmatikod ang usa ka taho sa Toronto Star: “Sumala pa sa United Nations Food and Agriculture Organization (FAO) aduna na ing igong lugas nga gipatubo sa tibuok globo aron sa pagpakaon sa tanan ibabaw sa yuta uban sa 3,000 ka kaloriya sa kada adlaw, nga maoy . . . mga 50 por siento ang labaw sa minimo gidawat nga gitas-on.”56 Bahin sa umaabut, nagpatin-aw kana nga bisan ubos sa karong mga kahimtang, adunay igong pagkaon sa pagtagbaw sa mga panginahanglang doble sa presenteng populasyon sa kalibutan. Usab, ato gayong hinumduman nga si Jehova magatultol sa iyang katawhan nga sa husto gamiton ang agrikultural nga kahimoan sa yuta, kay ang Salmo 72:16 nagapasalig kanato: “Adunay daghang trigo sa yuta; sa tumoy sa kabukiran adunay pagsugwak.”
28. Nganong walay peligro uban sa katawhan nga mabuhi sa walay katapusan, nga ang yuta sa lakaw sa panahon mahimong guot?
28 Atong matikdan kon unsa ang katuyoan sa Diyos, ingon sa gibutyag sa orihinal ngadto sa unang tawhanong pares. Sila gisultihan nga “magapuno sa yuta ug magagahum niini,” nga nagapahalapad sa mga utlanan sa Eden ngadto sa kinatumyang dapit sa yuta. (Genesis 1:28) Matin-aw, kini magakahulogan sa pagpuno sa yuta ngadto sa komportable nga gilapdon, dili sa kapin nga katawhan. Kana sa gihapon magatugot sa ‘gigamhan’ nga yuta nga mahimong usa ka globong parke sama sa orihinal nga puloy-anan sa tawo nga samag parke. Busa, kining langitnong sugo nagapasabut nga, sa igong panahon ug paagi sa Diyos, ang pagdaghan sa populasyon pagakontrolahon.
Usa ka Lig-ong Patukoranan Alang sa Malungtarong Kalipay
29. Adunay unsang epekto sa mga relasyon sa ubang mga tawo sa kalipay sa usa ka tawo?
29 Bisan pa niana, bisan ang matahum nga mga palibut, materyal nga kauswagan, makapainteres nga bulohaton, ug maayong panglawas dili magagarantiya sa imong malungtarong kalipay. Daghan karon aduna niining mga butanga apan sa gihapon dili malipayon. Ngano? Tungod sa katawhan palibut kanila kinsa tingali hakugan, palaaway, salingkapaw, o madumtanon. Ang malungtarong kalipay sa Bag-ong Kahikayan sa Diyos magaabut sa dakung sukod gikan sa nausab nga pagpangisip sa katawhan sa bug-os nga yuta. Ang ilang gugma ug pagtahud alang sa Diyos ug sa ilang tinguha sa pagtuman sa iyang mga katuyoan magadala sa espirituwal nga kauswagan. Kon wala kana, ang materyal nga kauswagan dili makatagbaw ug kawang.
30. Sa unsang paagi kita nahibalo nga kadtong kinsa makapuyo o mabuhi sa Bag-ong Kahikayan sa Diyos maoy mga tawo lamang kinsa magaamot sa kalinaw ug kasegurohan sa uban?
30 Oo, maoy tinuod nga kalipay nga anaa sa palibut sa katawhan kinsa maloloton, mapinaubsanon, mahigalaon—mga tawo nga imo gayong mahigugma ug mapiyalan, kinsa nagabati sa susama niana kanimo. (Salmo 133:1; Proverbio 15:17) Ang gugma sa Diyos mao ang nagapasalig sa matuod nga gugma sa silingan, nga magahimo sa kinabuhi nga labihang makapahimuot sa Iyang matarung Bag-ong Kahikayan. Kadtong kinsa paboran sa Diyos sa walay katapusang kinabuhi mao ang nagpamatuod sa ilang gugma alang kaniya ug alang sa ilang isigkatawo. Uban sa maong mga silingan, mga higala, ug mga kaubanan sa trabaho, makaarang ka sa pagpahimulos sa matuod nga kalinaw ug kasegurohan ug sa malungtarong kalipay.—1 Juan 4:7, 8, 20, 21.
31. Kon matuod nga buot nato ang kinabuhi sa Bag-ong Kahikayan sa Diyos, unsa ang atong kinahanglang buhaton karon?
31 Sa pagkamatuod, ang maong dakung paglaum bukas kanimo! Busa ang kurso sa praktikal nga kaalam mao ang pagkaplag kon unsa ang kinahanglanon sa pagbaton niini. Karon na ang panahon sa pagdala sa imong kinabuhi nga uyon sa mga kinahanglanon sa Diyos alang niadtong pagaluwason latas sa nagasingabut nga “dakung kasakitan.”—2 Pedro 3:11-13.
[Hulagway sa panid 98]
Ang adlaw moabot sa dili madugay sa dihang ang tibuok nga yuta pagahimoon nga paraiso