SIMEON

[gikan sa lintunganayng pulong nga Heb. nga nagkahulogang “pamati, pagpamati; patalinghog”].

1. Ang ikaduha sa 12 ka anak nga lalaki ni Jacob; ginganlan siya niining ngalana kay matod pa ni Lea nga iyang inahan, “si Jehova namati, sa pagkaagi nga ako gidumtan ug busa siya naghatag usab kanako niining usa.”​—Gen 29:​32, 33; 35:23-26; 48:5; Ex 1:1-4; 1Cr 2:​1, 2.

Sa dihang ang iyang amahan nga si Jacob nagkampo duol sa Sekem, si Simeon, uban ni Levi nga iyang manghod nga sunod kaniya, naglungotlungot gayod sa kasuko ug nagtinguha nga manimalos. Kadto nga kasuko dili makataronganon ug mabangis. Wala hisayri o uyoni sa ilang amahan, sila nagbuotbuot sa pagpanimalos sa dungog sa ilang manghod nga babayeng si Dina pinaagi sa pagpatay sa mga Sekemnon, ug kini nagdalag pagkasinalikway sa tibuok banay ni Jacob.​—Gen 34:1-31.

Sa ulahi si Simeon nalangkit sa daotang buhat sa dihang siya ug ang iyang mga igsoon naglaraw sa pagpatay kang Jose. (Gen 37:12-28, 36) Ingong ikaduha sa kinamagulangan, wala iasoy kon si Simeon ba o dili ang utok sa laraw sa paghunos sa kinabuhi ni Jose. Katuigan sa ulahi, sa dihang si Jose ingong administrador sa pagkaon sa Ehipto nagsulay sa iyang mga igsoon, si Simeon ang gipili ni Jose nga gaposon ug bilanggoon hangtod nga si Benjamin madala sa iyang ubang mga igsoon ngadto sa Ehipto.​—Gen 42:14-24, 34-36; 43:​15, 23.

Sa hapit nang mamatay si Jacob, sa dihang iyang gipanalanginan ang iyang mga anak, si Jacob nahinumdom, apan wala mouyon, sa kapintas ni Simeon ug Levi labot sa mga Sekemnon daghang katuigan na ang milabay, nga nag-ingon: “Mga galamiton sa kapintasan ang ilang mga hinagiban sa pagpatay. Sa ilang suod nga pundok ayaw pag-adto, Oh kalag ko. Sa ilang kongregasyon ayaw pagpakighiusa, Oh galamhan ko, tungod kay sa ilang kasuko gipatay nila ang mga tawo, ug sa ilang pagkamabuotbuoton gikitnan nila ang mga torong baka. Tinunglo ang ilang kasuko, tungod kay kini mapintas, ug ang ilang mabangis nga kasuko, tungod kay kini nagmaharason. Ipabahinbahin sila kanako diha kang Jacob ug ipatibulaag sila kanako diha kang Israel.” (Gen 49:5-7) Tungod niana gihanaw ni Jacob ang paglaom ni Simeon nga siya ang makadawat sa katungod sa pagkapanganay nga wala maangkon sa iyang magulang nga si Ruben. Si Simeon may unom ka anak nga lalaki, usa kanila gikan sa babayeng Canaanhon. Ingon sa gitagna, ang tribonhong pahat ni Simeon wala mahiusa sa pahat ni Levi, kondili kining duha ‘natibulaag’; bisan sa kaugalingon niyang teritoryo, ang pahat ni Simeon nagkabulagbulag ingong sakop nga mga siyudad sulod sa teritoryo sa Juda.​—Gen 46:10; Ex 6:15; 1Cr 4:24; Jos 19:1.

2. Ang tribo sa Israel nga naggikan sa mga banay sa unom ka anak nga lalaki ni Simeon: si Jemuel, Jamin, Ohad, Jakin, Zohar, ug Shaul. (Gen 46:10; Ex 6:15) Sa nagpanaw ang Israel sa kamingawan, ang Simeon nagkampo uban sa Ruben ug Gad sa H sa tabernakulo, nga ang Ruben ang nangulo sa tulo-ka-tribo nga dibisyon. Sa ilang paglakaw, kining sama nga kahikayan sa mga tribo ang gisunod, nga si Selumiel ang nagsilbing pangulo sa Simeon, sa kampo ug sa kasundalohan niini.​—Num 1:​4, 6; 2:10-15; 10:18-20.

Pagkunhod sa Populasyon sa Tribo. Sa panahon sa unang pagsenso nga gihimo usa ka tuig human sa Pagpanggula gikan sa Ehipto, dihay 59,300 ka lig-on ug lawas nga mga lalaki nga 20 anyos pataas nga kuwalipikadong magsundalo gikan sa tribo ni Simeon. (Num 1:1-3, 22, 23) Hinunoa, mga 39 ka tuig sa ulahi, gipakita sa ikaduhang pagsenso nga ang tribo mikunhod pag-ayo, kay diha na lamay 22,200 ang nahibilin nga kuwalipikadong magsundalo. Kini nga pagkunhod mokabat ug kapin sa 62 porsiyento, nga mas dako pa kay sa nasinati sa ubang mga tribo.​—Num 26:​1, 2, 12-14.

Si Moises wala maghisgot sa ngalan ni Simeon sa iyang panamilit nga panalangin sa Israel. Wala kini magpasabot nga ang tribo wala panalangini, kay kini giapil man sa kataposan diha sa panalangin alang sa tanan. (Deu 33:6-24, 29) Ang Simeon mao ang unang ginganlan sa mga tribo nga gitudlong mobarog sa Bukid sa Gerizim may kalabotan sa mga panalangin nga ipahayag.​—Deu 27:​11, 12.

Walay duhaduha nga gitagad ang pagkunhod sa populasyon sa Simeon sa dihang gipahat ang tagsatagsa ka teritoryo sa Yutang Saad; ang tribo wala hatagig nahilain, tibuok nga bahin apan hinuon, mga siyudad nga bug-os anaa sa sulod sa teritoryo sa Juda. Busa natuman ang tagna nga gipahayag ni Jacob sa dihang himalatyon na siya kapin sa 200 na ka tuig ang milabay. (Num 34:16-20; Jos 19:1-9; itandi ang Gen 49:5-7.) Ang Simeon kauban sa Juda sa pag-ilog niini nga mga teritoryo gikan sa mga kamot sa mga Canaanhon. (Huk 1:1-3, 17) Ang sakop nga mga siyudad diha sa panulondon sa Simeon gigahin usab alang sa tribo ni Levi.​—Jos 21:​4, 9, 10; 1Cr 6:​64, 65.

Gihisgotan sa Ulahing Kasaysayan sa Bibliya. Ang mga Simeonhon gihisgotan sa panapanahon sa ulahing kasaysayan sa Israel​—sa panahon ni David (1Cr 4:24-31; 12:​23, 25; 27:16), sa mga adlaw ni Asa (2Cr 15:​8, 9), ug sa panahon ni Josias (2Cr 34:1-3, 6, 7). Kining ulahi nga paghisgot sa mga reporma ni Josias nagpakita nga, bisan tuod kini nahimutang sa teritoryo sa Juda, ang Simeon nakig-abin sa politika ug sa relihiyon sa amihanang gingharian. Mopatim-aw nga sa mga adlaw ni Ezequias gipatay sa 500 ka Simeonhon ang nahibilin sa mga Amalekanhon ug nanimuyo sa ilang dapit.​—1Cr 4:41-43.

Sa mga basahon sa tagna sa Ezequiel ug Pinadayag, ang ngalan ni Simeon makaplagan apil sa ubang mga tribo sa Israel. Ang hikting luna sa teritoryo nga gipahat sa Simeon nga nakita ni Ezequiel sa panan-awon labot sa plano sa pagbahinbahin sa Yutang Saad nahimutang taliwala sa Benjamin ug Isacar, H sa “balaang amot.” Apan ang ganghaan nga gipahat sa Simeon sa H sa balaang siyudad nahimutang uban sa mga ganghaan nga ginganlan sa ngalan ni Isacar ug Zabulon. (Eze 48:21-25, 28, 33) Sa panan-awon sa Pinadayag kapitulo 7 labot sa 144,000 ka tinimbrehan, ang Simeon mao ang ikapitong tribo nga gitala.​—Pin 7:7.

3. Usa ka katigulangan ni Maria nga inahan ni Jesus.​—Luc 3:30.

4. Ang matarong, masimbahong tigulang nga lalaki nga misulod sa templo sa mismong adlaw nga gidala ni Jose ug Maria ang bata nga si Jesus. Gipadayag sa Diyos kang Simeon nga sa dili pa siya mamatay iyang makita ang Kristo. Busa iyang gikugos ang bata, gidayeg si Jehova, ug uban sa balaang espiritu diha kaniya, siya nagpahayag sa inahan sa bata: “Kini siya gibutang alang sa pagkapukan ug sa pagbangon pag-usab sa daghan sa Israel.” Gitagna usab ni Simeon nga si Maria maguol sa hilabihan, nga samag pagalapsan sa usa ka espada, tungod sa masakit nga kamatayon sa iyang anak.​—Luc 2:​22, 25-35.

5. Ang laing porma sa ngalan ni Simon (Pedro) nga gigamit kas-a ni Santiago sa konseho sa Jerusalem.​—Buh 15:14.

6. Usa sa mga manalagna ug mga magtutudlo sa kongregasyon sa Antioquia, Sirya, nga nagpatong sa ilang mga kamot diha kang Bernabe ug Pablo human itudlo sa balaang espiritu kining duha alang sa misyonaryong buluhaton. Ang angga ni Simeon sa Latin maoy Nigro.​—Buh 13:1-3.