BAYENG OSA

[Heb., ʼai·ya·lahʹ; ʼai·yeʹleth].

Kini maoy sakop sa pamilya nga Cervidae. Ang bayeng osa maoy yagpison, madanihon nga linalang, idlas, dili daling matumba, ug matulin. Kon manganakay na, kini motago sa labing hilit nga dapit sa lasang aron manganak ug unya padayong maglain, mahigugmaong mag-atiman ug manalipod sa mga nati niini hangtod sa panahon nga ang mga nati makasugakod na sa pag-atiman sa ilang kaugalingon.​—Job 39:1; Sal 29:9.

Ang lumo, madanihong bayeng osa tin-awng gihulagway diha sa Bibliya. (Pr 5:​18, 19; Aw 2:7; 3:5; tan-awa ang GASELA.) Gihisgotan ang pagkatulin ug pagkadili daling matumba sa maong hayop, nga tungod niini kini dali rang makaikyas gikan sa mga kaaway niini. (2Sa 22:​1, 34; Sal 18:​32, 33; Hab 3:19) Lagmit nga naghisgot sa kahanas ug kaabtik sa pagpakiggubat, si Jacob matagnaong naghubit sa tribo ni Neptali ingong “usa ka yagpis nga bayeng osa.” (Gen 49:21) Ang salmista, sa dihang gidid-an sa pagsulod sa sangtuwaryo, nagtandi sa iyang pagpangandoy sa Diyos ngadto sa pagpangandoy sa bayeng osa alang sa tubig sa kasapaan. (Sal 42:1-4) Ang paglarawan sa usa ka bayeng osa nga nagbiya sa iyang bag-ong natawong nati, nga sukwahi kaayo sa iyang iladong kinaiyahan sa pagkamahangawaon sa iyang mga anak ubos sa naandang mga kahimtang, nagpakita sa kagrabe sa mga hulaw sa Juda.​—Jer 14:​1, 2, 5.