Nganong Mamatay Kita?
“Ibabaw sa tanang kabungtoran adunay kahilom karon, sa tumoy sa tanang kakahoyan halos dili ka makadungog ug kanaas; ang kalanggaman natulog diha sa kakahoyan: hulat una; sa dili na madugay ingon niini ikaw mopahulay.”—JOHANN WOLFGANG VON GOETHE, ALEMANG MAGBABALAK.
1, 2. (a) Ang mga tawo gilalang nga may unsang tinguha? (b) Unsang matanga sa kinabuhi ang napahimuslan sa unang tawhanong magtiayon?
ANG Diyos naglalang sa mga tawo uban sa pangandoy nga mabuhing walay kataposan. Sa tinuoray, ang Bibliya nag-ingon nga siya nagbutang “sa pagbati sa pagkawalay-kataposan sa ilang mga kasingkasing.” (Ecclesiastes 3:11, Beck) Apan labaw pa ang gibuhat sa Diyos kay sa paghatag sa mga tawo sa tinguhang mabuhi sa walay kataposan. Iyang gihatag usab kanila ang kahigayonan sa paghimo niana.
2 Ang atong unang mga ginikanan, si Adan ug Eva, gilalang nga hingpit, nga walay depekto sa hunahuna o lawas. (Deuteronomio 32:4) Tiaw mo ba—walay nakadukot nga mga kaul-ol ug sakitsakit, walay ngil-ad nga mga kahadlok o kabalaka! Dugang pa, ang Diyos nagbutang kanila diha sa nindot nga paraisong puy-anan. Maoy katuyoan sa Diyos nga ang tawo mabuhing walay kataposan ug ngadtongadto ang yuta mapuno sa iyang hingpit nga mga liwat. (Genesis 1:31; 2:15) Apan, nganong mamatay kita?
Pagkamasupilon Nagpatungha sa Kamatayon
3. Ang kinabuhing dayon alang kang Adan ug Eva nagdepende sa unsa?
3 Gisugo sa Diyos si Adan: “Gikan sa matag kahoy sa tanaman ikaw makakaon hangtod sa pagkatagbaw. Apan mahitungod sa kahoy sa kahibalo sa maayo ug daotan ayaw gayod ug kaon gikan niini, kay sa adlaw nga ikaw mokaon gikan niini ikaw mamatay gayod.” (Genesis 2:16, 17) Busa kondisyonal ang kinabuhing dayon alang kang Adan ug Eva; nagdepende kadto sa ilang pagkamasinugtanon sa Diyos.
4. Sa dihang si Adan ug Eva nakasala, nganong sila nawad-an sa palaaboton nga mabuhing walay kataposan diha sa Paraiso?
4 Makapasubo, hinunoa, si Adan ug Eva misupak sa balaod sa Diyos. (Genesis 3:1-6) Sa paghimo niadto, sila nahimong makasasala, kay “ang sala maoy pagkamalinapason.” (1 Juan 3:4) Ingong resulta, si Adan ug Eva wala nay palaabotong kinabuhing dayon. Ngano? Kay “ang bayad sa sala mao ang kamatayon.” (Roma 6:23) Busa, sa gipahayag ang sentensiya kang Adan ug Eva, ang Diyos miingon: “Abog ka ug sa abog ka mobalik.” Unya ang atong unang mga ginikanan gipapahawa gikan sa ilang Paraisong puy-anan. Sa adlaw nga sila nakasala, si Adan ug Eva nagsugod sa hinay apan mapadayonong proseso sa pagkamatay.—Genesis 3:19, 23, 24.
“Ang Kamatayon Mikaylap sa Tanang Tawo”
5. Sa unsang paagi ang kamatayon mikaylap sa tibuok tawhanong banay?
5 Niadtong tungora ang sala dulot nga nahasilsil kang Adan ug Eva diha sa ilang mga gene. Busa, sila wala makapatunghag hingpit nga mga liwat, sama nga ang dili-hingpit nga hulmahan dili makagamag hingpit nga butang. (Job 14:4) Sa pagkatinuod, ang matag tawong ipanganak nagpamatuod nga ang atong unang mga ginikanan nawad-an sa hingpit nga panglawas ug sa kinabuhing dayon alang sa ilang kaugalingon ug sa ilang mga kaliwat. Ang Kristohanong apostol Pablo misulat: “Pinaagi sa usa ka tawo ang sala misulod sa kalibotan ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala.”—Roma 5:12; itandi ang Salmo 51:5.
6. Nganong mamatay kita?
6 Karong adlawa ang mga siyentipiko wala gayod mahibalo kon nganong ang mga tawo matigulang ug mamatay. Ang Bibliya, hinunoa, nagsaysay nga kita mamatay tungod kay kita natawong makasasala, kay nakapanunod niining kahimtanga gikan sa atong unang tawhanong mga ginikanan. Apan unsay mahitabo kanato sa dihang mamatay kita?