Kristohanong Pamilya—‘Magtukaw Kamo’

“Magtukaw kita ug maghupot ug maayong panghunahuna.”—1 TES. 5:6.

1, 2. Unsay gikinahanglan aron ang pamilya magpabiling nagtukaw sa espirituwal?

NAGTUMONG sa “dako ug makalilisang nga adlaw ni Jehova,” si apostol Pablo misulat sa mga Kristohanon sa Tesalonica: “Mga igsoon, kamo wala diha sa kangitngit, nga tungod niana makalitan kamo nianang adlawa nga moabot sama sa mga kawatan, kay kamong tanan mga anak sa kahayag ug mga anak sa adlaw. Kita dili iya sa kagabhion ni sa kangitngit.” Si Pablo midugang: “Busa, dili kita mangatulog sama sa ginahimo sa uban, kondili magtukaw kita ug maghupot ug maayong panghunahuna.”—Joel 2:31; 1 Tes. 5:4-6.

² Ang tambag ni Pablo sa mga taga-Tesalonica haom gayod sa mga Kristohanon nga nagkinabuhi sa “panahon sa kataposan.” (Dan. 12:4) Samtang nagkaduol ang kataposan sa daotang sistema ni Satanas, siya determinadong ipahilayo ang labing daghang matuod nga magsisimba gikan sa Diyos. Busa maalamon nga atong seryosohon ang tambag ni Pablo nga magtukaw sa espirituwal. Aron ang Kristohanong pamilya magpabiling nagtukaw, ang matag membro kinahanglang magtuman sa iyang Kasulatanhong responsabilidad. Nan, unsa ang papel sa bana, asawa, ug anak aron sila makatabang sa ilang pamilya nga “magtukaw”?

Mga Bana—Sundoga “ang Maayong Magbalantay”

 3. Sumala sa 1 Timoteo 5:8, unsay nalakip sa responsabilidad sa usa ka lalaki isip ulo sa pamilya?

³ “Ang ulo sa usa ka babaye mao ang lalaki,” nag-ingon ang Bibliya. (1 Cor. 11:3) Ingong ulo sa pamilya, unsay nalakip sa iyang responsabilidad? Ang Kasulatan nag-ingon: “Kon adunay si bisan kinsa nga wala magtagana alang sa mga iya, ug ilabina alang sa mga sakop sa iyang panimalay, siya naglimod sa pagtuo ug mas daotan pa kay sa tawong walay pagtuo.” (1 Tim. 5:8) Busa, ang lalaki angayng magtagana sa materyal nga panginahanglan sa iyang pamilya. Apan aron makatabang siya sa iyang pamilya nga magtukaw sa espirituwal, dili lamang siya magtagana kanila sa materyal. Kinahanglang palig-onon niya ang espirituwalidad sa iyang pamilya, nga tabangan ang tanan nga molig-on ang ilang relasyon sa Diyos. (Prov. 24:3, 4) Sa unsang paagi niya kini mahimo?

 4. Unsay makatabang aron molampos ang lalaki sa pagpalig-on sa espirituwalidad sa iyang pamilya?

⁴ Sanglit “ang bana maoy ulo sa iyang asawa ingon nga si Kristo usab maoy ulo sa kongregasyon,” angayng susihon ug sundogon sa usa ka bana ang matang sa pagkaulo ni Jesus sa kongregasyon. (Efe. 5:23) Tagda kon giunsa paghubit ni Jesus ang iyang relasyon uban sa iyang mga sumusunod. (Basaha ang Juan 10:14, 15.) Unsa ang yawi aron molampos ang lalaki sa pagpalig-on sa espirituwalidad sa iyang pamilya? Mao kini: Tun-i ang gipamulong ug gibuhat ni Jesus ingong “maayong magbalantay,” ug ‘sunda pag-ayo ang iyang mga tunob.’—1 Ped. 2:21.

 5. Unsang kahibalo ang nabatonan sa Maayong Magbalantay bahin sa kongregasyon?

⁵ Sa masambingayong pagkasulti, ang relasyon tali sa magbalantay ug sa karnero gibase sa kahibalo ug pagsalig. Ang magbalantay nakaila gayod sa iyang mga karnero, ug ang mga karnero nakaila ug nagsalig kaniya. Sila nakaila ug mosunod sa tingog sa magbalantay. “Ako nakaila sa akong mga karnero,” matod ni Jesus. Dili mabaw ang iyang kahibalo bahin sa mga membro sa kongregasyon. Ang Gregong pulong nga gihubad ug “nakaila” nagpasabot ug “personal, lalom nga kahibalo.” Oo, ang Maayong Magbalantay nakaila sa tagsatagsa niya ka karnero. Siya nahibalo sa ilang mga panginahanglan, kahuyangan, ug katakos. Walay bisan unsang butang bahin sa iyang mga karnero ang dili niya mamatikdan. Ug ang mga karnero bug-os nakaila sa magbalantay ug nagsalig sa iyang pagpanguna.

 6. Sa unsang paagi masundog sa mga bana ang Maayong Magbalantay?

⁶ Aron masundog sa bana ang pagkaulo ni Jesus, kinahanglang isipon niya nga siya usa ka magbalantay ug ang iyang giatiman maoy mga karnero. Angay siyang maningkamot nga mailhan pag-ayo ang iyang pamilya. Mahimo ba gayod kana sa usa ka bana? Oo, kon siya maayong makigkomunikar sa tanang membro sa pamilya, mamati sa ilang mga problema, manguna sa kalihokan sa pamilya, ug maalamon sa paghimog mga desisyon bahin sa pamilyahanong pagsimba, pagtambong sa mga tigom, pagsangyaw, lulinghayaw, ug kalingawan. Sa dihang ang usa ka Kristohanong bana manguna nga may kahibalo sa Pulong sa Diyos ug nakaila gayod sa mga membro sa iyang pamilya, lagmit sila mosalig gayod sa iyang pagkaulo. Ingong resulta, malipay siya nga makita ang iyang pamilya nga nagpabiling nahiusa sa matuod nga pagsimba.

7, 8. Sa unsang paagi masundog sa usa ka bana ang Maayong Magbalantay sa pagpakitag pagmahal niadtong ilalom sa iyang pag-atiman?

⁷ Ang maayo nga magbalantay nagmahal usab sa iyang mga karnero. Sa dihang atong tun-an ang kinabuhi ug ministeryo ni Jesus diha sa mga Ebanghelyo, atong maapresyar ang pagmahal nga gipakita ni Jesus sa iyang mga tinun-an. Iya ganing ‘gitugyan ang iyang kalag alang sa mga karnero.’ Ang mga bana angayng mosundog kang Jesus sa pagpakitag pagmahal niadtong ilalom sa ilang pag-atiman. Imbes magharihari sa iyang asawa, ang bana nga nagtinguha sa pag-uyon sa Diyos magpadayon sa paghigugma kaniya “ingon nga si Kristo nahigugma usab sa kongregasyon.” (Efe. 5:25) Ang iyang mga pulong angayng maluloton ug may konsiderasyon, kay ang asawa angay nga pasidunggan.—1 Ped. 3:7.

⁸ Sa pagbansay sa mga anak, angayng sundon sa ulo sa pamilya ang mga prinsipyo sa Diyos. Apan, kinahanglang pakitaan usab niyag pagmahal ang iyang mga anak. Ang pagdisiplina angayng himoon sa mahigugmaong paagi. Ang ubang bata dili dayon makasabot kon unsay gidahom kanila. Nianang kahimtanga, ang amahan angay nga mas mapailobon. Sa dihang ang amahan kanunayng mosunod sa panig-ingnan ni Jesus, ang pamilya mobati nga luwas ug may kasegurohan. Matagamtam sa iyang pamilya ang espirituwal nga kasegurohan nga giawit sa salmista.—Basaha ang Salmo 23:1-6.

 9. Sama kang Noe, unsay responsabilidad sa Kristohanong mga bana, ug unsay makatabang kanila sa pagtuman niana?

⁹ Ang patriarkang si Noe nagkinabuhi sa panahon sa kataposan sa kalibotan sa iyang adlaw. Apan si Jehova ‘nagluwas kaniya uban sa pito pa sa dihang siya nagpadala ug lunop sa usa ka kalibotan sa dili-diyosnong katawhan.’ (2 Ped. 2:5) Responsabilidad ni Noe nga tabangan ang iyang pamilya nga maluwas sa Lunop. Kana usab ang responsabilidad sa Kristohanong mga ulo sa pamilya niining kataposang mga adlaw. (Mat. 24:37) Pagkahinungdanon nga ilang tun-an ang panig-ingnan sa “maayong magbalantay” ug sundogon siya!

Mga Asawa—Palig-ona ang Inyong Panimalay

10. Unsay ipasabot nga ang asawa magpasakop sa iyang bana?

¹⁰ “Ang mga asawa kinahanglang magpasakop sa ilang mga bana ingon nga sa Ginoo,” misulat si apostol Pablo. (Efe. 5:22) Kini wala magpasabot nga walay dignidad ang posisyon sa asawa. Sa wala pa lalanga si Eva, ang matuod nga Diyos mipahayag: “Dili maayo alang sa tawo nga magpadayon nga mag-inusara. Buhatan ko siyag katabang, ingon nga iyang katimbang.” (Gen. 2:18) Ang papel sa asawa ingong “katabang” ug “katimbang”—nga nagapaluyo sa iyang bana sa iyang pag-atiman sa mga responsabilidad sa pamilya—dungganon gayod.

11. Sa unsang paagi ang sulondang asawa magpalig-on sa iyang panimalay?

¹¹ Ang usa ka sulondang asawa maningkamot alang sa kaayohan sa iyang panimalay. (Basaha ang Proverbio 14:1.) Sukwahi sa buangbuang nga babaye nga walay pagtahod sa kahikayan sa pagkaulo, ang maalamong babaye adunay halalom nga pagtahod sa maong kahikayan. Imbes magpakitag masinupakon ug independenteng tinamdan nga komon sa kalibotan, siya nagapasakop sa iyang bana. (Efe. 2:2) Ang asawa nga buangbuang dili managana sa pagpanaway sa iyang bana, samtang ang maalamong babaye maningkamot nga ang iyang mga anak ug ang uban mas motahod sa iyang bana. Ang maong asawa mag-amping nga dili pakamenoson ang pagkaulo sa iyang bana pinaagi sa pagyawyaw o pagpakiglalis. Anaa usab ang bahin sa pagdaginot. Ang usa ka buangbuang nga babaye lagmit magwaldaswaldas sa gihagoang kinitaan sa pamilya. Dili ingon niana ang mapaluyohong asawa. Siya mokooperar sa iyang bana maylabot sa pinansiyal. Siya maalamon ug madaginoton. Dili niya pugson ang iyang bana sa pag-obertaym.

12. Sa unsang paagi ang asawa makatabang sa iyang pamilya nga “magtukaw”?

¹² Ang sulondang asawa motabang sa iyang pamilya nga “magtukaw” pinaagi sa pag-abag sa iyang bana sa pagtudlo sa ilang mga anak bahin kang Jehova. (Prov. 1:8) Aktibo niyang suportahan ang Pamilyahanong Pagsimba. Dugang pa, paluyohan usab niya ang iyang bana sa dihang siya magtambag ug magdisiplina sa ilang mga anak. Pagkalahi niya sa dili-mokooperar nga asawa, kansang mga anak mag-antos sa pisikal ug espirituwal!

13. Nganong importante nga ang asawa magpaluyo sa iyang bana diha sa teokratikanhong kalihokan?

¹³ Unsay bation sa usa ka mapaluyohong asawa kon ang iyang bana may katungdanan sa kongregasyon? Siyempre, malipay siya! Bisag unsay pribilehiyo sa iyang bana, ministeryal nga alagad man, ansiyano, o kaha membro sa Hospital Liaison Committee o Kingdom Hall Operating Committee, siya malipay niana. Ang iyang aktibong pagsuportar sa iyang bana pinaagi sa pulong ug buhat nagkinahanglan gayod ug pagsakripisyo. Apan nahibalo siya nga ang pagkapuliki sa iyang bana sa teokratikanhong kalihokan makatabang sa pamilya nga magtukaw sa espirituwal.

14. (a) Kanus-a mahimong lisod sa asawa ang pagpaluyo sa iyang bana, ug sa unsang paagi niya kana masagubang? (b) Sa unsang paagi ang asawa makaamot sa kaayohan sa iyang pamilya?

¹⁴ Mahimong lisod sa usa ka asawa ang pagpaluyo sa iyang bana sa dihang dili siya makauyon sa desisyon sa iyang bana. Bisan pa niana, siya magpakitag “malinawon ug malumong espiritu” ug mokooperar aron molampos ang desisyon sa bana. (1 Ped. 3:4) Ang usa ka maayong asawa maningkamot sa pagsundog sa panig-ingnan sa diyosnong mga babaye sa karaang panahon, sama ni Sara, Ruth, Abigail, ug sa inahan ni Jesus nga si Maria. (1 Ped. 3:5, 6) Sundogon usab niya ang edarang mga sister karon nga ‘matinahoron sa panggawi.’ (Tito 2:3, 4) Pinaagi sa pagpakitag gugma ug pagtahod sa iyang bana, ang sulondang asawa dakog ikatabang sa kalamposan sa ilang kaminyoon ug sa kaayohan sa pamilya. Ang iyang panimalay maoy dapit sa kahupayan ug kasegurohan. Alang sa usa ka espirituwal nga lalaki, ang usa ka mapaluyohong asawa bililhon kaayo!—Prov. 18:22.

Mga Batan-on—‘Ipunting ang Inyong mga Mata sa mga Butang nga Dili Makita’

15. Sa unsang paagi ang mga batan-on makatabang sa mga ginikanan aron ang ilang pamilya “magtukaw”?

¹⁵ Sa unsang paagi kamong mga batan-on makatabang sa inyong ginikanan aron ang inyong pamilya “magtukaw” sa espirituwal? Tagda ang ganti nga gibutang ni Jehova sa inyong atubangan. Tingali sukad sa inyong pagkabata, ang inyong mga ginikanan nagpakita kaninyog mga hulagway bahin sa kinabuhi sa Paraiso. Samtang kamo nagtubo, lagmit gigamit nila ang Bibliya ug mga basahon aron matabangan mo sa paghanduraw bahin sa kinabuhing walay kataposan sa bag-ong kalibotan. Ang pagpunting sa inyong mga mata diha sa pag-alagad kang Jehova ug sa pagplano sa inyong kinabuhi uyon niana makatabang ninyo nga “magtukaw.”

16, 17. Unsay mahimo sa mga batan-on aron makadaog sa lumba sa kinabuhi?

¹⁶ Seryosoha ang mga pulong ni Pablo sa 1 Corinto 9:24. (Basaha.) Dagana ang lumba sa kinabuhi uban ang tuyo nga modaog. Pilia ang dalan nga moresulta sa ganti nga kinabuhing walay kataposan. Daghan ang nalinga sa pagpangagpas sa materyal mao nga ang ilang mga mata wala na mapunting sa ganti. Pagkabinuang niana! Ang pagplano alang sa kinabuhi nga nasentro sa materyal nga mga butang dili motultol sa tinuod nga kalipay. Lumalabay lamang ang mga butang nga mapalit sa salapi. Apan, kamo angay nga magpunting sa inyong mga mata sa “mga butang nga dili makita.” Ngano? Kay “ang mga butang nga dili-makita walay kataposan.”—2 Cor. 4:18.

¹⁷ “Ang mga butang nga dili-makita” naglakip sa mga panalangin sa Gingharian. Planoha ang inyong kinabuhi sa paagi nga inyong makab-ot kana. Sa dihang gamiton ninyo ang inyong kinabuhi sa pag-alagad kang Jehova, kana moresulta sa tinuod nga kalipay. Ang pag-alagad sa matuod nga Diyos motaganag mga kahigayonan alang sa daling makab-ot ug dugayng makab-ot nga mga tumong.a Ang pagtakdag realistiko ug espirituwal nga mga tumong makatabang kaninyo nga padayong mag-alagad sa Diyos nga naglaom sa ganti nga kinabuhing walay kataposan.—1 Juan 2:17.

18, 19. Sa unsang paagi matino sa usa ka batan-on kon iya bang naugmad ang suod nga relasyon sa Diyos?

¹⁸ Mga batan-on, ang unang lakang diha sa dalan sa kinabuhi mao ang pag-ugmad ug suod nga relasyon kang Jehova. Inyo na ba nang nahimo? Pangutan-a ang kaugalingon: ‘Ako ba mahunahunaon sa espirituwal, o kuyogkuyog lang ko sa akong ginikanan? Ako bang ginaugmad ang mga hiyas nga makapahimuot sa Diyos? Naningkamot ba ko sa pagpakig-ambit kanunay sa mga kalihokan sa matuod nga pagsimba, sama sa regular nga pag-ampo, pagtuon, pagtambong sa tigom, ug sa pagsangyaw? Nakigsuod ba ko sa Diyos pinaagi sa pagpalambo sa akong relasyon kaniya?’—Sant. 4:8.

¹⁹ Palandonga ang panig-ingnan ni Moises. Bisag nagdako sa langyawng kultura, gipalabi niya nga mailhan ingong magsisimba ni Jehova inay anak sa anak nga babaye ni Paraon. (Basaha ang Hebreohanon 11:24-27.) Kamong mga batan-on, magmadeterminado sa pag-alagad nga matinumanon kang Jehova. Sa paghimo niana, inyong mabatonan ang tinuod nga kalipay, ang labing maayong kinabuhi nga posible karon, ug kamo padayong “makapangupot pag-ayo sa tinuod nga kinabuhi.”—1 Tim. 6:19.

20. Sa lumba sa kinabuhi, kinsa ang makadawat sa ganti?

²⁰ Sa mga lumba sa karaang panahon, usa ra ka maglulumba ang makadaog. Ang lumba sa kinabuhi dili ingon niana. Kabubut-on sa Diyos “nga ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Tim. 2:3, 4) Daghan na ang nagmadaogon sa lumba, ug daghan usab ang nagadagan kauban nimo. (Heb. 12:1, 2) Ang ganti maangkon niadtong molahutay. Busa magmadeterminado nga modaog!

21. Unsay hisgotan sa sunod artikulo?

²¹ Seguradong “moabot ang dako ug makalilisang nga adlaw ni Jehova.” (Mal. 4:5) Ang Kristohanong mga pamilya kinahanglang andam sa pag-abot niana. Ang tanang membro sa pamilya kinahanglang magtuman sa ilang Kasulatanhong responsabilidad. Unsa pay imong mahimo aron magpabiling nagtukaw sa espirituwal ug molig-on ang imong relasyon sa Diyos? Ang sunod artikulo maghisgot sa tulo ka butang nga makaapektar sa espirituwal nga kahimtang sa pamilya.

[Footnote]

Unsay Imong Nakat-onan?

• Nganong kinahanglang “magtukaw” ang Kristohanong pamilya?

• Sa unsang paagi masundog sa bana ang Maayong Magbalantay?

• Sa unsang paagi ang sulondang asawa magpaluyo sa iyang bana?

• Sa unsang paagi ang mga batan-on makatabang sa ilang pamilya nga magtukaw sa espirituwal?

[Hulagway sa panid 9]

Ang mapaluyohong asawa bililhon kaayo sa bana nga mahunahunaon sa espirituwal